AALAJANGERSIMAVOQ:

Maalaarutit ilalerneqanngilaq, maalaarutigisimagakku mianersoqqusissut nr 2 inigisannit anisinneqariataarsinnaanissat pillugu. Imatut paasisariaqarpoq, illup iluani malittarisassaasut unioqqutinneri pissutigalugit mianersoqqusissut inigisannit anisinneqariataarsinnaanissat pillugu tigusimasat, eqqortuusimavoq.

Nassuiaat:

Allakkanni 30. maj 2012-imeersumi Ineqarneq Pillugu Maalaaruteqarfiup allattoqarfianut mianersoqqusissummut aappaanut maalaarsimavutit, taannalu majip 21-ani 2012-imi Inissiaatileqatigiit XX-miit ilinnut nassiussaavoq (tamatup kingorna Inissiaatileqatigiinnik taaneqassapput).

Inissiaatileqatigiit allagaataani innersuunneqarpoq, illit 31. maj 2011 mianersoqqusissut siulleq tigusimagit – aammalu illup malittarisassai ilinnut ilanngunneqarsimallutik. Inissiaatileqatigiit innersuuppaat, allatut ajornartumik mianersoqqusissut aappaa tassaasoq inissiamik attartuinermi isumaqatigiissummi unioqqutitsineq, nipituumik nipilersorsimallutit, nateq tukkartorsimallugu, iikkanut kasuttoqattaarnerit nillianerillu pissutigalugit.

Nalunaarutigineqarpoq ZZ ullormi 27. maj 2011 illit najugarisannut qaaqqutissimagamik. Nipiliorneq pillugu nalunaarusiami nal. 22.55 nipituumik nipilersortoqarpoq.

Sanilerisarsi Inissiaatileqatigiinnut mail-erluni nalunaarutigisimavaa, ilissinni fiisternersi aallartissimasoq tallimanngornermi ualikkut nalunaaqutaq 17:30 unnuaatalu tungaanut ingerlasimalluni (arfinninngornerup unnukkua) nalunaaqutaq 04:00 missaata tungaanut. Politiit inissiarnut takkupput nal. 3:00 missaanni, tamatumani ingasattajaartumik paatsiveerussimaarpusi tiggullusilu kamaassuaarlusi. Tamatumap kingorna nipaalliallassimavusi. Nal. 23.00 sanilerisarsi YY-imut sianersimavoq, nipiliorneq uppernarsaqqullugu.

Majip 31-ianeersumut 2011-imi maalaarut aammalu QQ´ip majip 27-iani 2011-imi nipiliornermut nalunaarutaa ilinnut nassiunneqarpoq majip ulluisa 31-ani 2011 pineqartumut oqaaseqaqqullutit. Oqaaseqarfigisimanngilat.

Junip 23-ani 2011-imi mianersoqqusissut Inissiaatileqatigiinnit tiguvat majip 27-ani 2001 nipiliorsimanerit pillugu. Inissiaatileqatigiit innersuuppaat, attartornermut isumaqatigiissut unioqqutissimagit aammalu illup iluani malittarisassat unioqqutissimagitit nipituallaammik nipiliorsimallutit.

Inissiaatileqatigiinniit innersuunneqarpoq, unioqqutitsinerup kingunerisinnaagaa, Inissiaatileqatigiiffimmut tunngavilimmik ilissi pillusi maalaartoqaqqissappat, s.a. nipiliornermut tunngasunik assigisaanillu, taava aappassaaneerluni illup iluani malittarisassanik unioqqutitsisoqassaaq, taamalillunilu mianersoqqusissutip aappaa tunniunneqartariaqassalluni. Mianersoqqussisut taanna naalanneqanngippat aammalu maalaarutinik tunngaveqarluartunik nutaanik takkuttoqassappat nipiliorsimanermik najugaqartunullu allanut akornutaasunik, taava attartuinermut isumaqatigiissutip paarinerlugaasimasutut inassutigineqassaaq.

Pingajussaanik mianersoqqussissut tunniunneqareersorlu suli nutaanik tunngaveqarluartunik maalaaruteqartoqassappat taava inissiamik attartuinermi isumaqatigiissutip §69 imm. 1 Inatsisartut peqqussutaat nr. 2, majip 12-iani 2005-meersumi, §67, imm. 1. malillugu unioqqutitsineq, attartukkap isumaqatigiissutaata atorunnaarsitaaneranik kinguneqarsinnaavoq.

ZZ majip arfernata 2012-imi najoqqutaralugit nal. 8:46 tunngavilersuutigineqarpoq illit najugarni nipitoorujussuarmik nipilersorpaluttoqarmat.

Sanilerisavit mail-ikkut 7. maj 2012 inissiaatileqatigiinnut maalaarutigaa, ilissigooq weekendi naallugu uninngiivillusi fiistassimagassi ingattamik arfininngornerup unnukkuani (sapaatip unnuaani) aammalu ingattartumik pisimasoq nalunaarutigineqarluni.

Arfinngornermi majip 5-ni – sapaammi 6-ni nal. 01:00 missaani inuppaaluit najugarnut takkussimapput, taamaalineranilu fiistannersi ingattartissimalluni. Nal. 05:00 suli nippannerusimavoq tamatumani natermut tukkartuisoqarluni, iikkamut kasuttuisoqarluni, suaartartoqarluni, nilliasoqarluni nipilersuutillu nippannissartik tamannguat nippassimalluni. Fiistanneq nal 14:00 tungaanut ingerlaqqissimavoq, fiistannerlu taamatimmat angutit 6-7 inissiamiit ulikattarlutik inissiamiit aniakaasimapput, puiaasat natermut sequmittarlugit, illup iigaanut quisimallutik saneqquasullu suaartarfigalugillu nilliaffigisimallugit. Nal. 08:30 missaani sanilerisat Securitas-imut sianersimavoq nipiliornermik uuttortaavigeqqullusi.

Majip ulluisa 10-ni 2012 Inissiaatileqatigiit QQ-ip nipiliorsimanermut uuttortaasimanermi nalunaarsugaq maalaarullu ilinnut nassiussimavaat ilinniik oqaaseqarfigineqarniassammata.

Allakkani majip ulluisa 18-ianeersumi 2012 nalunaarutigisimavat uiit 55-inik ukioqalersimasoq, inuillu 10 missaanniittut neriartoqqusimagisi. Kikkut tamarmik nuannataarsimapput erinarsuataarsimallutillu guitarertoqarsimavoq.Erinarsuut ”nateq manna qupeqili manna” atorassiuk piaarisimanngilasi, aammalu piaaralusi nipituumik nipilersorsimanasi allaallumi sanilerisarsi tusarnaaqataalluarsimalluni. Ilanngullugu innersuuppat, qallunaajulluni Nuummullu tikerlaajulluni kalaallit qitittariaasiannut nipilersuutaannullu ilisimaqarnani soorunami nuannerpallaarsimassanngitsoq. Maalaaruteqarsimasoq ingattarsernerarpat. Fiistaannersi nal. 01:00 unissimavoq.

Majip ulluisa arfernat 2012 pillugu nalunaarputit ilissinnut naatsorsuutiginngisassannik pisoqarsimammat, ilaqutassinni katittoqarsimmat katittullu angajoqqaavi ilissinni unnuisimallutik. Imerniartarfiit matummata najugassinni inissisimasut angerlakaasimapput, tamannalu illit nuannarisimanngilat.

Innersuuppat maalaarut ingattarsertoq. Unnukuani ilissinni ernuttoqarsimanngilaq, pisutuaq tassaasimavoq nallukattarsimagassi. Pulaartut nuannatsassimapput nipituvallaaleqimmata anisissimavatit. Iikkamut kasuttuisoqarneranik paasisaqanngilatit tusaanagulu. Pulaartutit pissusilersuutimikkut allanut ajortuliorlutik aniakaasimappata, eqqagassanik igalaaminernillu qimataqarlutik taava ingattarsertumik pissuseqarsimanerarpatit. Pulaartoqaraangassi oqarfigisarpatit nipaarsaaqqullugit.

Allakkani majip 21-ianeersumi 2012 Inissiaatileqatigiinniik nutaamik mianersoqquneqarputit. Inissiaatileqatigiiffiup siusinnerusukkut mianersoqqussutaasimasut innersuuppai, innersuunneqarlunilu nutaamik tunngavilimmik maalaartoqassappat soorlu nipiliornermik nalunaarusiortoqaqqissappat il.il., taava attartuininni unioqqutitsisimasutut innersuunneqassagavit. Mianersoqqusissut pingajussaaneertussaammat, nutaanik tunngavilinnik maalaaruteqartoqassappat, taava Inatsisartut peqqussutaat nr. 2, majip 12-iani 2005-meersumi, §67, imm. 1. malillugu mianersoqqusissut pingajussaaneerluni tunniunneqassammat, inissiamiit anisitaanermik kinguneqarataarsinnaasoq.

Inissiaatileqatiigiiffimmiit aamma innersuunneqarpoq, allakkat mianersoqqusissut aappassaaneermata aammalu Inatsisartut peqqussutaat nr. 2, majip 12-iani 2005-meersumi, §67, imm. 1 malillugit allataammata.

Majip ulluisa 30-iani 2012 maalaarutigisimavat, mianersoqqusissut aappaa ilinnut tunniunneqarsimmat. Ilaatigut oqaatigisimavat, ilissinnut naammagittaalliorneq ingasattajaartuusoq aammalu ilaqartut, pissutsit piviusut naapertorlugit ilumuunngitsut, s.a. eqqagassanik eqqakkattaarineq. Atsaat siullerpaamik misilittagaqarfiginngilarsi, inunnit ilisarisimanngisassinnit uparuartorneqarlusi. Nalunaarutigaarsi sanilisi Inissiaatileqatigiinni atorfeqarmata, aamma nalunaarutigaarsi ilaquttasi erinarsornermik nuannarisaqartuummata, nipikitsunnguamik, taamaallaat guitarertarassi, tulleriillusilu erinarsortarassi. Nilliaasallusi erinarsorneq ajorpusi aammalu nipilersuuteqannginnassi nipituumik nipilersorsinnaasumik.

Maalaarutit aamma imarivaa inissiassinni amigaaterpaalussuit, s.a. naammaginanngitsumik nipimut oqorsagaanngimmat, igalaat ussiitsut, natiit nipiliortut, isigaarsinartoq, tarrarsuutip ikkussornera amigaateqarmat, sanasut igitassaagalui aammalu natiit nutaat, aserfallalereersut.

Inissiaatileqatigiit maalaarutit misissoreerlugu suliassap immikkoortui nassiuteqqissimavaat. Inissiaatileqatigiit julip 6-ni 2012 suliassap immikkoortui misissuataarsimavaat. Sulissap ingerlarna uppernarsaatit tunngavigalugit ingerlasimapput, taakkuami qulaani takussutissaqareerput.

Inissiaatip aserfallassimanera pillugu maalaarutit Inissiaatileqatigiit atsaat tusarpaat, innersuussinerminilu oqaatigaat siornatigut ilinniik oqaatigineqartunit naamagittaalliorfigitissimanatik. Tamanna pillugu maalaarutissaqaruit Inissiaatileqatigiinnut saaffiginnittariaqarputit, inissiap aserfallannissaannut tunngappata.

Inissiaatileqatigiit inerniliipput, oqaatigalugu attartortumut malaaruteqartoqartillugu maalaarnermut malittarisassaasut malilluinnarlugit pissuseqartussaammata, Inissiaatileqatigiillu isumaqarmata ilinnut maalaarutaasut pissusissamisoormata maalaarutigineqartut nipiliornermut tunngasuummata, unnukkut kingusissukkut, unnuami ullaassakkullu pisimammata illup malittarisassai annertuumik unioqqutinneqarsimasutut isigineqarmata, soorlulusooq illit nammineq Inissiaatileqatigiinnut majip ulluisa 21-ani 2012 nipiliorsimasutut nassuertutit ajuusaartutillu. Inissiaatileqatigiit mianersoqqusissutit marluk nassiunneqareersimasut atuutsinniarlugit aalajangeqqavai.

Inatsisikkut tunngavia:

§84-imi, Inatsisartut peqqussutaat nr. 2, majip 12-iani 2005-meersumi inissianik attartuisarnermi Ineqarneq Pillugu Maalaaruteqarfik piginnaanileqarnikuuvoq illup malittarisassartai unioqqutinneqarsimatillugit suliassat suliarisinnaallugit.

Illup malittarisassai naapertorlugit nipiliornermik pissuseqartut pillugit imatut allassimasoqarpoq: Sakkut, nipilersorneq il.il.

Sakkut nipiliortut, soorlu qillerutit, sanilerisat pillugit taamaallaat nal. 08.00 aammalu 19.00 akornanni atorneqaqqusaapput. Majuartarfinni nipiliorluni pinnguarneq inerteqqutaavoq, altanit aqqutaatigut imaluunniit naqqup iluani nipilornerit inerteqqutaapput. Radio, TV, immiussutit, oqaluttartut nuutai imaluunniit Cd-kkut nipilersuutit sanilerisanut akornutaatillugit atorneqaqqusaanngillat.

Nipiliorluni fiistaannerit inerteqqutaapput, sanilerisat immikkut akuersaaqqaarsimanngippata. Nipilersortartut sungiusarniarpata imaluunniit nipilersorluni ilinniartitsisoqarniarpat attartortitsisumit akuerineqaqqaartussaavoq.

§ 67, imm. 1 nr. 4 malillugu, Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu allaqqasoqarpoq attartuisitsisoq attartup attartuineq pillugu isumaqatigiissutaa atorunnaarsissinnaagaa, attartortup arlaleriarluni attartuisitsisumit allakkatigut mianersoqqusaagaluarluni eqqortumik pissuseqarnissamik ileqqoqarnissamillu soqutigisaqanngippat imaluunniit najugarisamut najugaqartunut allanullu akornutaappat, pisimasullu imatut inissisimappata, attartuisitsisup attartornermut isumaqatigiissut atorunnaarsittariaannaanagu. Attartuisup atsaat pingasoriarluni allakkatigut mianersoqqusissutinik pereerpat imaluunniit peqqussutinik malitsiinnartunik arlalinnik pisimappat qaammatit 12-ut iluani.

Peqqussummi § 69, imm. 1 naapertorlugu attartuisitsisup attartukkamik atorunnaarsitsiniaanera §67 malillugu allakkatigoortussaavoq aammalu attartuisup maalaartitaasinnaaneranik paasissutissartaqassalluni imm. 2 malillugu. Attartukkamik atorunnaarsitsiniaanermi aamma ilanngullugu nassuiaatigineqassaaq suna pillugu attartukkap atorunnaarsitaalernersoq.

Naliliineq:

Ineqarneq Pillugu Maalaaruteqarfiup nalilerpaa, Inissiaatileqatigiit pisussaaffigisimagaa mianersoqqusissummik aappassaanik tunissallutit nipiliortutut pissuseqarninni illup malittarisassai unioqqutsinneqarsimmata.

Taamaalilluni Ineqarneq Pillugu Maalaaruteqarfiup tungaviliinnerminni pingaartissimavaa, majip 27-iani 2011 nipiliornermik nalunaarusiortoqarsimammat, tassanilu ZZ naapertorlugit illit najukkappit addressiani nipilersuutinik nipituunik nipilersortoqarmat nal. 22:55 aammalu nipiliornermik nalunaarusiaq majip 6-ni 2012 allassimasoqarmat nal. 08:46 nipitoorujussuarmik nipilersortoqarmat.

Ineqarneq Pillugu Maalaaruteqarfiup aamma illit pillutit maalaarutaasut nassuiaatigineqarnerat pingaartissimavai, maalaarutit pineqartut Inissiaatileqatigiinnut nassiunneqarsimapput illit eqqaarmiuninngaanniit. Taakkua nassuiaataat malillugit tallimanngornermi fiistaassimavusi tallimanngornermi nal. 17.30-miit arfininngornerup unnukkuanut, tassanilu politiilersuunneqartariaqarsimavusi inissianni perulluliortoqarmat paggittoqarlunilu.

Majip 7-ani 2012 maalaartut naapertorlugit arfininngornermi majip ulluisa tallimaani, arfinngornermiit sapaammi ualikkumut nal. 14:00-mut fiistaassimavutit, tassanilu nipilersuutit nippassimapput, natermut tukkartuisoqarsimavoq, suaartartoqarsimavoq nilliasoqarsimallunilu il.il.

Ineqarneq Pillugu Maalaaruteqarfiup aamma pingaartillugu tunngavilerpaa, illit allakkanni majip ulluisa 18-iani 2012 ersersippat, ilissinni nipiliortoqarsimammat erinarsortoqarluni majip ulluisa 27-iani 2011 nal. 01.00 tungaanut aammalu majip ulluisa 8-ni 2012 katittoqarneranut tunngatillugu.

Ineqarneq Pillugu Maalaaruteqarfiup taamaalilluni Inissiaatileqatigiiffik isumaqatigaa, arlaleriarluni nipiliornikkut pissuseqaraanni illup malittarisassaannik unioqqutitsinerummat, tamannalu kingunerisussaammagu attartuinermut isumaqatigiissutip taamaatiinnarnissaa, § 67, imm. 1 nr. 4 aammalu §69 imm. 1 malillugu, Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu taamatut allaqqasoqareermat.

Aalajangiineq:

Ineqarneq Pillugu Maalaaruteqarfiup taamaasilluni Inissiaatileqatigiiffiup aalajangiinera tassaasoq mianersoqqusissummik nr. 2-mik tunissallutit, atuutsiinnarpaa.

Maalaaruteqarnissannut ilitsersuut:

Ineqarneq Pillugu Maalaaruteqarfiup aalajangiussai allaffissornikkut aqutsisunut allanut oqartussaasunut maalarutigineqaqqissinnaanngillat, §86 imm.7 malillugu, Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu kingusinnerusukkut allannguutitalimmik allanngortoq malillugu. Attartuisup attartortitsisullu akunnerminni isumaqatigiinngissutaat kissaatigineqassappat eqqartuussivinnut ingerlateqqinneqarsinnaapput, taamaattoqarniarpallu attartuisup eqqartuussivimmut aggeqqusissummik tunniussissaaq. Tamanna aamma atuutsinneqarpoq, allakkatigut attaveqaqatigiinneq il.il., attartuisup Inissiaatileqatigiiffianiit ingerlanneqarsimappat.

Ineqarneq Pillugu Maalaaruteqarfiup aalajangiussai namminersornerusunut kommuninullu ineqarnermut attartuisutut unioqqutinneqartussaanngitsumik atuutsinneqarpoq. Namminersornerusut kommunillu Illuutileqatigiinnik avataaniittumilluunniit attartuillutik ineqarfinnut pineqartunut ingerlatsisoqarsimappat, taava Ineqarneq Pillugu Maalaaruteqarfiup aalajangiussai assingusumik atuutsinneqarput, § 86 imm. 6 malillugu Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu taamatut allaqqasoqarmat.

Ineqarneq Pillugu Maalaaruteqarfik sinnerlugu

Innuttaasoq B

Ineqarneq Pillugu Maalaaruteqarfimmi siulittaasoq

Inissiaatileqatigiiffik XX kopiissaa:

Inatsisitigut tunngavik (GL):

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

§ 67. § 66-imi taaneqartut saniatigut attartornerni allani attartortitsisoq taamaallaat atorunnaarsitsisinnaavoq:

1) Attartortitsisup attartortitamini nammineerluni najugaqalivinniarluni nalunaarutigippagu, imaluunniit attartortitsisoq pingaarutilinnik tunngaveqarluni attartornermik atorunnaarsitsinissamut immikkut pissutissaqartitsippat, aammalu atorunnaarsitsiniarluni nalunaaruteqarneq illuatungeriinnut tunngasut nalilerneqarnerat aallaavigalugu naammaginartutut isigineqarsinnaappat.

2) Attartortitsisup illumik iluarsaassinissaq isaterinissarluunniit peqqutaalluni attartorneqartoq qimanneqartariaqartoq uppernarsarpagu.

3) Attartortoq illup ingerlanneqarnerani suliaqartussatut atorfeqartitaasimappat, inissiarlu attartortitseqqinnermi atorfimmit taartaasumut atorneqassappat.

4) Attartortoq attartortitsisumit allakkatigut mianersoqqussutinik tunineqartaraluarluni pissuserisassanik malinninngippat, imaluunniit pissusilersornera illumut ineqartunulluunniit allanut akornutaappat, pissutsilli imaanngippata attartortitsisup attartornermik isumaqatigiissut atorunnaarsisinnaallugu. Attartortoq allakkatigut mianersoqqussutsinik inassuiaatinilluunniit pingasunik qaammatit tulleriit aqqaneq marluk iluanni tigusisimasussaavoq.

§ 69. § 67 naapertorlugu attartortitsisup atorunnaarsitsiniarnera allakkatigut nalunaarutigineqassaaq, aammalu attartortup imm. 2 naapertorlugu akerliliissuteqarsinnaaneranut paasissutissanik imaqassalluni. Aammattaaq atorunnaarsitsissut atorunnaarsitsinermut tunngaviusoq pillugu paasissutissanik imaqassaaq.

Imm. 2. Attartortup atorunnaarsitsissut akueriumanngikkuniuk, attartortoq atorunnaarsitsissutip tiguneraniit sapaatit akunneri arfinillit qaangiutsinnagit allakkatigut akerliliissuteqassaaq. Attartortitsisup atorunnaarsitsissut atuutsiinnarniarlugu kissaatigiguniuk, attartortitsisoq sapaatit akunneri allat arfinillit qaangiutsinnagit eqqartuussivimmi suliassanngortitsissaaq. § 67, nr. 2 aamma 3 naapertorlugit Namminersornerullutik Oqartussat kommunellu inissiaataanni attartortittakkani attartornermik atorunnaarsitsinermut akerliliissut kinguartitsigallarnermik kinguneqarsinnaanngilaq.

§ 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45.

3) Inissiap iserterfigineqarnerani qanoq issusia, tak. § 47.

4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.

5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.

6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.

7) Inissiamit aninermi inissiap qanoq issusia (iluarsaassineq nalinginnaasoq), tak. § 77.