imatullu aalajangiilluni

AALAJANGIINISSAMUT

inassuteqaat Inissiami attartorsimasanni iikkap iggavimmut inimullu akunnequtaasup

pissuserisimasaatut ilillugu iluarseqqinnissaanut aningaasartuutit ilaat

akilissavatit.

Taamaattumik naammagittaalliiuutinni ilaannakortumik taperserneqarputit.


Nassuiaat:

Attartornermut isumaqatigiissumnmi 15. April 1987-imeersumi takuneqarsinnaavoq inissiamut, Najugaq, Najugaqarfik, 15. April 1987 nuuttutit.


Ukiumi 2005-imi aamma 2006-imi Inissiaatileqatigiiffik qinnuteqarfigaat inigisanni iigaq iggavimmut inimullu akunneqautaasoq peerumallugu. Allakkatigut 10. Juni aamma 9. Oktober 2006 Inissiaatileqatigiiffiup nalunaarfigaatit qinnuteqaatit akuerineqarsinnaasoq 6.000,00 koruunit sallunaveeqqutitut akileqqaarukkit. Illit ulloq 20. Oktober 2006 aningaasat akilerpatit.


Ulloq 16. April 2010 inissiamik attartonerit atorunnaarsippat ullormi 31. Maj 2010 inissiaq qimattussanngorlugu.

Ulloq 31. Maj 2010 inissiap qimanneqarneranut atatillugu misissuisoqarpoq nalunaarusiortoqarlunilu. Nalunaarusiami allassimavoq iikkap piiarneqartup iluarsillugu sananeqarnera akilissagit, tamatumalu saniatigut innaallagissap aqqusernera akilissagit, taamaattumillu 6.000,00 koruunit sallunaveeqqutitut akilersimagitit.

Ulloq 16. September 2010 inissiap qimanneranut atasumik akiligassinneqarputit katillugit 17.916,00 koruuninik amerlassusilinnik.


Naammagittaalliuummi 8. Februar 2012-imeersumi allapputit isumaqarlutit ukiut taama amerlatigisut inissiaq najoreersimagakku taamak amerlatigisunik akiligassinneqarnerit eqqortuunngitsoq. Inissiaatileqatigiiffimmit oqarfigineqarsimavutit inissiaq paarilluarsimagit arlaannillu aserugaqarsimanak.

Nassuiaammi 15. Maj 2012-imeersumi tassungalu atasumik annertunerusumik oqaaseqaatini 24. Juli 2012-imeersuni inissiaatileqatigiiffik allappoq, iikkap piiarnissaa akuerineqarsimasoq piumasaralugu sallunaveeqqutitut 6.000,00 koruunit akilerneqarnissaat, taakkulu aningaasat akilerneqarlutik 20. Oktober 2006. Iigaq piiarneqarpoq aningaasat akilerneqareermata, iikkallu peerneqarnera illit nammineq akilerpat.

Tassunga atatillugu Inissiaatileqatigiiffiup allakkat 21. August 2006 ulloqartut innersuussutigai, allakkanilu taakkunani takuneqarsinnaalluni attartornermik isumaqatigiissutip atorunnaarsinneranut atatillugu inissiap qimalernerani pissusaatut ilillugu qimannissaa isumagissagit.

Allakkiat ilanngussat malillugit iikkap pissusiatut sanaqqinnera akeqarpoq 17.916,00 kr.

Inissiaatileqatigiiffiup aammattaaq nalunaarutigaa sallunaveeqqutitut akilikkatit konto-mut immikkut atulersitamut ikineqarsimanngitsut inigisamullu akilersuutinnut ilaatinneqaannarsimasut, taamaattumillu inissiaq qimakkakku takussutissaqaratik.

Inissiap nalinginnaasumik iluarsaannera inissiitileqatigiiffimmit aningaasartuutigineqarpoq.

Inatsisitigut tunngavigisaq:

Inissiani attartortittakkani ineqarneq pillugu Inatsisartut peqqussutaanni nr. 2-mi, 12. Maj 2005-imeersumi § 84, imm. 1 nr. 5 malillugu ineqarneq pillugu naammagittaalliuuteqartarfiup attartortut naammagittaalliuutaat makkununnga tunngasut suliarisarpai:

5) Attartortup attartukkaminik atuinera (torersaarnissamik malittarisassanik unioqqutitsinerit ) takuuk § 50.

Peqqussumi pineqartumi § 50 malillugu attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi torersaarnissamut maleruagassat, ilanngussaq 4-mi taaneqartut maleruassavaat.

Peqqussummut ilanngussami 4-mi allassimasoqarpoq: Ileqqorissaarnissamut

maleruagassani makku atuupput:

Inissiami/illumi allanngortitsinerit

Attartortoq iikkat akunneqautaasut pioreersut saniatigut ikkussinanilu pioreersunik peersissanngilaq. Aamma allatigut inissiami allanngortititsisoqassanngilaq attartortitsisoq allakkatigut akuerseqqaartinnagu. Allanngortitsinissamut allakkatigut akuersisoqarpat attartortup taamatut suliaqarnermut tunngasut tamaasa akilissavai. Attartornermi isumaqatigissutip atorunnaarsinneranut atatillugu allanngortinneqarsimasut pissusimissut sanaqqinneqarnissaat piumasarineqarsinnaavoq. Allanngortitat pissusimissut sanaqqinnerat attartortumit suliarineqassaaq imaluunniit attartortitsisumit suliaritinneqassapput akiligassat attartortumut akiligassanngorlugit. Allanngortinneqartut attartortitsimit allaganngorlugu akuerineqanngitsut paasineqarniariarunik pissusimissut sanaqqinneqassapput akiligassat attartortumut akiligassanngorlugit.

Naliliineq:

Ineqarneq pillugu Naammagittaalliuuteqartarfik isumaqarpoq iikkap inimut iggavimmullu akunnequtaasup pissutsimisut sanaqqinnissaanut atatillugu akiligassat akilissagitit.

Ineqarneq pillugu Naammagittaalliuuteqartarfiup pingaartutut isigaa torersuunissamik maleruagassani allassimasoq, tassalu inissiamik attartornermut isumaqatigiissummik atorunnarsitsinermut atatillugu inissiaatileqatigiiffiup allanngortinneqartut pissusimissut sanaqqinneqarnissaat piumasarisinnaammagu.

Peerneqartunik pissusiitut sanaqqiineq attartortumit isumagineqassaaq imaluunniit taassuma akiligassaanik suliaritinneqassaaq.

Imaappoq inissiamik attartornermut isumaqatigiissutip atorunnaarsinneranut atatillugu Inissiaatileqatigiiffiup illit inissiami attartukkanni allanngortitavit pissusiattut sanaqqinnissaasa ilinnit isumagineqarnissaat piumasarisinnaavaa.

Inissiaatileqatigiiffik iikkap pissusiatut sanaqqinnissaanut atatillugu piumasaqarsinnaasoq allassimammat, allassimananili pinngitsoorani piumasaqartussaasoq, taava Inissiaatileqatigiiffik allanngortitsinissamut allaganngorlugu akuersissuteqarnissamut atatillugu nalunaarfiginissannut pisussaavoq, tassani oqaatigalugu inissiamik attartukkannik qimatsinissamut atatillugu iikkap pissusiatut sanaqqinnissaanut aningaasartuutit pinngitsoornak akilissagitit.

Ineqarneq pillugu Naammagittaalliuuteqartarfiup pingaartutut isigaa Inissiaatileqatigiiffiup ulloq 10. Juni 2005 aamma 9. Oktober 2006 inissiap attartukkavit qimannissaanut atatillugu iikkap peerneqartup pissusiatut ilillugu sanaqqinnissaa pillugu ilinnik ilisimatitsisimanera.

Aamma illit nammineq qaammammi augustimi 2006 allapputit erseqqissumik paasisimallugu inissiamik attartornerit atorunnaarsissagukku inissiaq qimassagit nuuffiginerani pissusiatut itillugu.


Tamanna tunngavigalugu Ineqarneq pillugu Naammagittaalliuuteqartarfik naliliivoq, illit iikkap piiannginnerani ilisimasimagit inissiap attartukkavit qimannissaanut atatillugu iikkap pissusiatut ilillugu sanaqqinnissaanut aningaasartuutit akilernissaat isumagisussaassallugu.

Taamaattoq akuersissutaagallartutut Inissiaatileqatigiiffiup allakkiaani 0000 normoqartumi takuneqarsinnaasutut ilinnit naatsorsuutigineqarsinnaasimassagaluarpoq aningaasat 6.000,00 koruunit ikkap sanaqqinnissaanut atugassat immikkut konto-liuunneqarsimanissaat.

Tamanna tunngavigalugu inissiaatileqatigiiffiup inissiap qimanneranut atatillugu aningaasat piumasarisai 11.916,00 koruuninut appartinneqarput. 

Aalajangiineq:

Iikkap pineqartup sanaqqinneranut aningaasartuutit 11.916,00 koruunit akilissavatit.

Taamaattumik naammagittaalliuutinni ilaannakortumik taperserneqarputit.

Suliap matuma suliarinerani peqataapput Innuttaasoq C, Innuttaasoq D, Innuttaasoq E aamma Innuttaasoq F.

Aalajangiineq tamanit isumaqataaffigineqarpoq.

Naammagittaalliornissamut ilitsersuut:
Ineqarneq pillugu Naammagittaalliuuteqartarfiup aalajangiinera allaffissornikkut oqartussaasunut allanut suliassanngorteqqinneqarsinnaanngilaq, tak. inissiani attartortittakkani ineqarneq pillugu Inatsisartut peqqussutaanni nr. 2-mi 12 maj 2005-imeersumi kingusinnerusukkut allannguuteqartinneqartumi § 86, imm. 7. Attartortup attartortitsisullu akunnerminni saqitsaassutaata eqqartuussisunit suliarineqarnissaa kissaatigineqarpat, attartortitsisumik eqaartuussisunut aggeqqusissut XX eqqartuussivianut tunniunneqassaaq. Tamanna atuuppoq attartortitsisup allaffissornikkut ingelatseqatigiiffia allakkatigut allatigullu attaveqartarsimagaluarpalluunniit.

Ineqarneq pillugu Naammagittaalliuuteqartarfiup aalajangiinera Namminersorlutik Oqartussanit kommuninillu attartortitsisutut pinngitsoorani malinneqartussaavoq, tak. § 86, imm. 6.

Nunatta Eqartuussiviata ilitsersuinermut immikkoortortaqarfia oqarasuaatikkut saaffiginninnernut ammasarpoq sisamanngornerni nal. 14.15, oqarasuaat 368000.

På klagenævnets vegne

Naammagittaalliuuteqartarfik sinnerlugu

Innuttaasoq G

Formand for boligklagenævnet

Ineqarneq pillugu Naammagittaalliuuteqartarfiup siulittaasua

Assinga uunga: Inissiaatileqatigiiffik XX

Lovgrundlag (GL):

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

§ 84. Ineqarneq pillugu maalaaruteqartarfiup attartortut maalaarutaat makkununnga tunngasut

suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45.

3) Inissiap iserterfigineqarnerani qanoq issusia, tak. § 47.

4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.

5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.

6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.

7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Imm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.

Imm. 3. Maalaarutip ineqarneq pillugu maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput.

Imm. 4. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaaruteqartarfik maalaarutip suliarinissaanut itigartitsissaaq.

§ 50. Attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi torersaarnissamut maleruagassat, ilanngussaq 4-mi taaneqartut maleruassavaat.

Ilanngussaq 4.


Torersaarnissamut maleruagassat

Inigisami allanngortiterinerit

Attartortoq talulersueqqusaananilu talunik piiaaqqusaanngilaq. Aamma attartortitsisoq allaganngorlugu akuersissuteqarsimatinnagu inissiami allanik allanngortiterinissaq inerteqqutaavoq. Allanngortiterinissaq akuerineqarsimappat, allanngortiterinermut aningaasartuutit tamaasa attartortup akilissavai. Attartornerup atorunnaarnerani allanngortitikkat pissuserisimasamittut ilisinneqaqqinnissaat piumasarineqarsinnaavoq. Pissusitoqaanut utertitsineq attartortumit suliarineqassaaq imaluunniit taassuma akiligassaanik suliaritinneqassalluni. Allanngortiterinerit attartortitsisoq allaganngorlugu akuersiteqqaarnagu suliarineqarsimasut paasineqarnerminni ingerlaannaq attartortup akiligassaanik pissusitoqqamittut ileqqittussanngortitaasinnaapput.