AALAJANGIINEQ

Inatsisit naapertorlugit ilissinnut akiligassaasut akilissavasi, inersi naliginnarmik iluarsartuunnissaa eqqarsaatigalugu, tamatumani sikaaviit iluisa eqqiarneqarnissaat ilanngullugit.

Ineqarneq pillugu Maalaaruteqarfik piginnaatitaanngilaq suliassap immikkoortortaa asaffimmut tunngasoq suliarissallugu.

Suliassap nassuiaataa:

Nalunaarutigineqarsimavoq inissiamut nuussimasusi, Najugaq B-XX, Najugaqarfik majip ulluisa aallaqqaataanni 2008.

Majip ulluisa arfernani 2008 misissuinermi amigaatinik allattuiviliortoqarpoq, taakkunanilu amigaatit amerlanerit aaqqinneqarput. Majip ulluisa 28-iani 2008 amigaatituaasoq tassaavoq errorsiviup kuuffissaata aaqqinnissaa aammalu sinittarfimmut matuersaatit tunniunnissaat.

Attartugarsi qimassallugu taamaatipparsi nuussallusi septemberip ulluisa aallaqqaataanni 2010. Inissiamik aninissinni uppernarsaat pinialerassiuk, Inissiaatileqatigiinniit augustusip ulluisa qulaaluaanni 2010 nalunaarutigineqarpoq, inissiaq naliginnarmik iluarsartuunneqassasoq aammalu imaarsimassasoq, eqqiarneqarsimassasoq aammalu ajoquteqassanngitsoq.

Nakkutigineqarluni alakkaanermi nalunaarusiami oktoberip aallaqqaataanersumi 2010-imi takuneqarsinnaavoq, iikkat tamavimmik qilaavilu marloriarlutik qalipattariaqartut, uffarfik ataaseriartumik qalipattariaqartoq, inimi natiit aammalu ineeqqani pingasuusuni natit lak-erneqassasut ataaseriarlugit, kiisalu linoleum paarlermi qiterlermi igaffimmilu qillarissagassaasut. Sikaaviit ilui, igaffimmi milluaasoq (emhætte) aammalu uffarfik eqqiarneqassasut. Asaffik taarsigassanngortinneqarsimavoq qupiorarsimammat.

Nuunnermi aningaasartuutit oktoberip ulluisa 16-ianeersut 2010 naapertorlugit, ilissi nammineq akiligassaraarsi 3.330,71 kr. Nuunnermi akiligassat katillugu 18.073,61 kr.-uvoq, taakkunanilu naliginnarmik iluarsartuussineq 15.210 kr.-iulluni. Paarinerlussimaneranut aningaasartuutit 2.863,61 kr.-iupput, tassanilu ilaalluni sikaaviit iluisa eqqiarneqarnerat uffarfiup eqqiarnera aammalu asaffiup uffarfimmiittup taarsernera. Naliginnaasumik iluarsatuussinissamut ilanngaat annertussusiligaavoq 4.410, 90 kr., tassaallunilu akiligassap tamakkiisup 29 %-a.

Allakkani decemberip ulluisa arfernaneersuni 2010 Inissiaatileqatigiit nuunnermi akiligassat allanngortikkumanngilaat, aammalu nalunaarlutik, Inissiaatileqatigiit naliginnarmik aserfallassimanermut aningaasartuutini aalajangersimasumik akeqartittarai soorlu inissiap amerneqarnissaa eqqarsaatigalugu, taamaalillunilu akiusut qaffasissinnaasut.

Decemberip ulluisa 29-ani Inissiaatileqatigiinnut maalaarutigaarsi qalipaanermut akiligassaq. Ilissi isumaqannginnassi qilaavi iikkallu amertariaqartut.

Ineqarneq pillugu Maalaaruteqarfimmut maalaaruteqarnissinni tikkuartorparsi, depositium-ip ilamerna utertikkusukkissi, tassaasoq kr. 5.090,39, aammalu asaffimmut tunngasoq 1.963,61. Nalunaarutigaarsi inissiap iserteqqaarnerani takusarneqarmat nakkutigineqarsimammat ajoqutinik malugisaqaratik, taamaallaat nuuttareernissinni uffarfimmi kuuffik napisimasoq naammattoorsimagissi, taannalu nalunaarutigisimanngilarsi. Akiligassaq takkummat atsaat paasisimavarsi ini tamakkerlugu amerneqarsimasoq, sikaaviit eqqiarneqarsimasut aammalu kuuffik taarserneqarsimasoq taamaalillusilu akiligassat 71%-ii akilertussanngorlugit.

Inissiaatileqatigiit suliassami pineqartumut oqaaseqaataanni takuneqarsinnaavoq martsip ulluisa 28-iani 2012 nalunaarutigineqarsimammat, inissiaq tamaat najugaqarfiusoq tamakkiisumik iluarsartuunneqarsimammat, ilissilu attartuinermi isumaqatigiissut nutaaq majip ulluisa aallaqqaataanni 2008-imi atsiorsimasusi.

Naliginnarmik iluasartuussinermi akiligassatut ilanngagassaq tassaasoq 29% pisimavarsi piffissami tassani attartukkassinni najugaqarnissinni, tamakkiisumillu iluarsartuunneqareermat. Asaffimmut tunngatillugu Inissiaatileqatigiit uppernarsarlugu assilisimavaa, inspektøriusullu allattugaatai malillugit, illit Innuttaasoq A nalunaarutigisimavat, asaffimmut nakkartitsisoorlutit katataqarsimallutit.

Aprilip ulluisa 19.-iani aammalu 20.-iani 2012 tikkuartorparsi, ilumuunngitsoq Innuttaasoq A-ip asaffimmut nakkartitsisimasoq. Asaffik nuunnissinni qupereersimavoq, inissiamut annertuumik nutartersimasumut nuukkassi. Inissiaatileqatigiinnut nalunaarutigisimanngilarsi ilissinnut akornutaanngimmat.

Aprilip ulluisa 20-iani 2012 Inissiaatileqatigiit allanngortikkumanagu nalunaarpoq, inissiaq tamakkiisumik nutartigaasimammat iserternissinni, taamaalillusilu Illuutileqatigiinnut nalunaarsimasinnaasusi inissiarsi arlaatigut amigaateqarpat imaluunniit kukkuneqarsimappat.

Inatsisitigut tunngavigineqartut:

§84 malillugu, imm. 1 nr. 5, inissianik attartuisarnermi tunngatillugu Inatsisartut peqqussutaanni nr. 2, majip 12-iani 2005 allassimavoq Ineqarneq pillugu Maalaaruteqarfik maalaarutinik suliaqarsinnaasoq attartuisut makkua pillugit maalaruteqarpata:

2) Inissiap aserfallannera iluarsartuunneralu, §45 naapertorlugu.

7) Inissiap qimannerani qanoq issusaa (naliginnarmik iluarsartuussineq) §77 naapertorllugu.

§45 naapertorlugu attartortitsisoq Namminersornerullutik aammalu Kommunit inissiaataani pisussaaffigaat isumagissallugu, inissiat attartugassat attartugarlu illersorneqarsinnaasumik isumagissallugu.

Imm. 2

Stk. 2. Teknikkikkut atortorissaarutit ikkussorneqarsimasut kuuffinnut, kiassarnermut, gassimut, imermullu ajunngitsumik atorneqarsinnaasunngorlugillu aserfallanneqassapput. Taamatuttaaq aamma attartortitsisup pisussaaffigaa innaallagiamut toortagassat, panelit, matserfiit, kiassaatit, sikaaviit ikkussukkat, illup atortui il.il. isumagissallugit. Nutarterinerit allatigulluunniit iluarsartuussinerit aserfallassimanermik pisoqalinermillu ajortissimasut ima akulikitsigisumik isumagineqartariaqarput, najugaqatigiiffiup tamaat pisariaqartitsinera aammalu attartukkap qanoq issusaa apeqqutaalluni.

Imm. 3. Attartornerup nalaani attartup qilaavisa qalipannissaat, qalipannissaa aamma imaluunnit iikkanik tapetsilersuinissaq kiisalu illumi natiit lakernissaat.

§48

Attartuinermut peqqussutaasumi §48-imi allaqqavoq, attartuisitsisoq pisussaatitaasoq inissiaqarfik isumagilluassallugu aammalumi attartukkap illersorneqarsinnaasumik aserfallanneqassasoq, arlaatigullu aseruisoqarpat pisussaavoq taarsivigissallugu namminerminit illlumi inoqataasunit allanilluunniit aserortikkat, inissiamik attartuisup akuerisaannik attartukkamut isersimasup.

Inissiap attartukkap alakkerternerani paasineqassappat paarinerlutaasoq, taava attartuisup ingerlaannartumik aseruisimanini aaqqissortissavaa, attartortitsisumit piumasarineqarpat.

§ 77 malillugu inissiap qimanneratigut naliginnarmik iluarsartuunneqartarpoq tamatumani ilaallutik qilaavisa qaqortumik qalipannerat, iikkat qalipannerat/tapetsilersornerat aammalu eqqiarneqarnera. Natiit nutaamik lak-ilersugaassapput.

Nalilersuineq:

Ineqarneq pillugu Maalaaruteqarfik isumaqarpoq, ilissi pisussaaffigigissi aningaasartuutaasuni nammineq akiligassasi isumagissagissi, inigisassi naliginnarmik iluarsartuunnerata aningaasartuutai akileeqataaffigalugit.

Ineqarneq pillugu Maalaaruteqarfik taamatut naliliinermini pingaartissimavaa, inatsisitigut piumasaqaataammat inissianik attartortitsisarnermi § 77 imm. 1 naapertorlugu inissiaq qimanneqaraangat naliginnarmik iluarsartuunneqassasoq.

Tamanna imatut paasineqassaaq, inissiamik attartuisup inissiap qimanneratigut naliginnarmik iluarsartuussinissamut aningaasartuutaasut akisussaaffigigai akilissallugit, tamatumanilu ilaapput qilaavisa qaqortumik qalipannerat, iikkat qalipannerat/tapetsilersornerat aammalu eqqiarneqarnera. Natit nutaamik lak-ilersugaassapput.

Ineqarneq pillugu Maalaaruteqarfik innersuuppaa ukiuni marlunni aammalu qaammatini sisamani inissiaq najugaqarfigisimagissi taamaattoq pissutissaqanngilaq inissiap qimannerani naliginnarmik iluarsartuunerani aningaasartuutit annikillisassallugit.

Taamaattumik qilaavisa qaqortumik qalipannerat, iikkat qalipannerat/tapetsilersornerat aammalu eqqiarneqarnera akilissavarsi.

Inissiaatileqatigiit nalunaarutigivaat, naliginnarmik iluarsartuussisoqartillugu aalajangersimasunik akeqartitsisartoq, tassungalu tunngatillugu Ineqarneq pillugu Maalaaruteqarfiup tikkuartussavaa, Inissiaatileqatigiiffiup pisussaaffigigaa, qalipaanermut neqeroorutaasut qaqugumulluunniit nakkutigineqartartussaammata.

Ineqarneq pillugu Maalaaruteqarfiup piviusorsiorluni naliliinera naapertorlugu iluarsartuunnermut aningaasartuutaasoq appartinneqarsinnaavoq, tamatumani uppernarsaasoqarsinnaanngippat sanasut ataasiakkaat akiligassartaasa qanoq annertutigineranik.

Ineqarneq pillugu Maalaaruteqarfiup isumaa naapertorlugu piginnaaneqanngilaq aalajangissallugu kikkut asaffiup akilernissaannut pisussaanersut.

Ineqarneq pillugu Maalaaruteqarfik piginnaaneqarneq pillugu aallarniutaasumik oqaatiginiarpaa, akisussaaffiup agguartaarnissaa illup iluani aserfallattaaliinermut tunngasutigut §45 imm. 2 (attartortitsisoq) aamma imm. 3 (attartuisoq) tamatumanilu Ineqarneq pillugu Maalaaruteqarfik piginnaatitaavoq §84 imm. 1. nr 2 naapertorlugu.

Attartortitsisup aamma aallaaviatigut, §45 imm. 2 aamma imm. 3 malittaralugit akisussaaqataavoq attartukkap uffarfiata atortulersornerat pillugit, ilaatigut taarsersorneqarnerat malitaralugu attartuisullu naliginnaasumik atuinera tunngavigalugu.

Ineqarneq pillugu Maalaaruteqarfiup paasippagu suliassaq aserfallassimanermut pineqartullu qanoq inneranut tunngasuusoq, taavalu ajoqusigaq tigussaasumik uppernarsarlugu attartuisumut naliginnaasumik atuinerannut pisuussutigineqarsinnaanngippat, taava Ineqarneq pillugu Maalaaruteqarfiup suliassartaa suliarisinnaanngilaa, apeqqut taanna ineqarnermi attartuisarnermut peqqussutip §48-ianut tunngassuteqartussaammat, tassanerpiarlu Ineqarneq pillugu Maalaaruteqarfik piginnaaneqanngilaq suliarissallugu.

Ineqarneq pillugu Maalaaruteqarfik isumaqarpoq asaffiup taarsersornissaa inissianik attartortitsisarnermut peqqussutip §48-ia malillugu suliarineqassasoq.

Tunngavilersuuterput tassaavoq, uppernarsarneqanngimmat, ajoqutaasoq pinngorsimassasoq atorneqarluarnermini nungullarluni imaluunniit pisoqalisoorneratigut tamannami asaffimmut tunngatillugu naliginnaasuummat.

Ineqarneq pillugu Maalaaruteqarfik taamaasilluni ajoqqutaasup suussussia nassuiaatigineqartunut assigiinngitsunut sanilliussimavai, ajoqutaasoq paasiniarlugu.

Uppernarsarneqarsinnaanngimmat ajoqutaasoq mianersugaalliornikkut pinngorsimasoq taava Ineqarneq pillugu Maalaaruteqarfiup piginnaaneqarfiginngilaa suliassatut naammassiniassallugu, imaappoq asaffimmut tunngasortaa eqqarsaatigalugu.

Aalajangiineq:

Ineqarneq pillugu Maalaaruteqarfik isumaqarpoq ilissi inatsisitigut akiligassasi akilissagissi, inatsisitigummi allaqqasoqareermat naliginnarmik iluarsartuussineq qanoq ingerlanneqassanersoq, tamatumani aamma sikaaviit iluisa eqqiarnissaat ilanngullugit.

Ineqarneq pillugu Maalaaruteqarfik isumaqarpoq, apeqqummi tassani naammattumik piginnaaneqarani, asaffiup taarsersorneqarnissaa eqqarsaatigalugu.

Maalaaruteqarnissamik ilitsersuut:

Ineqarneq Pillugu Maalaaruteqarfiup aalajangiussai allaffissornikkut aqutsisunut allanut oqartussaasunut maalaarutigineqaqqissinnaanngillat, §86 imm.7 malillugu, Inatsisartut peqqussutaat nr. 2, majip 12-iani 2005-meersumi inissianik attartuisarneq pillugu kingusinnerusukkut allannguutitalimmik allanngortoq malillugu. Attartuisup attartortitsisullu akunnerminni isumaqatigiinngissutaat kissaatigineqassappat eqqartuussivinnut ingerlateqqinneqarsinnaapput, taamaattoqarniarpallu attartuisup eqqartuussivimmut aggeqqusissummik tunniussissaaq. Tamanna aamma atuutsinneqarpoq, allakkatigut attaveqaqatigiinneq il.il., attartuisup Inissiaatileqatigiiffianiit ingerlanneqarsimappat.

Ineqarneq Pillugu Maalaaruteqarfiup aalajangiussai namminersornerusunut kommuninullu ineqarnermut attartuisutut unioqqutinneqartussaanngitsumik atuutsinneqarpoq, § 86, imm. 6. najoqqutaralugu.

Naammagittaalliuuteqartarfik sinnerlugu

Innuttaasoq B

Ineqarneq pillugu Naammagittaalliuuteqartarfiup siulittaasua

XX allakkap mumiganik tunineqarpoq

Lovgrundlag (GL):

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

Illussaqartitsineq, boligstøtte, illunik attartorneq il.il. pillugit Kalaallit Nunaannut inatsit nr. 944, 23. december 1986-imeersoq naapertorlugu aalajangersarneqarput:

§ 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.

§ 48. Attartortup attartorneqartoq isumannaatsumik paarissavaa, ajoqusikkanullu attartortup nammineq, attartortup inoqutaasa allalluunniit attartortup attartorneqartumut isersinnaatitaasa isumannanngitsumik pissusilersornerisigut ajoqusersimasaannut taarsiinissamut attartortoq akisussaavoq. Takusaanermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai.

§ 77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.

Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.

Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.

§ 78. Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

§ 79. Attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat. Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa.

Imm. 2. Misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaanik missingersuummik allakkatigut nalunaarfigineqassaaq.

Imm. 3. Attartortup inissiamik qimatsinissani kingusinnerpaamik ullunik arfineq-pingasunik sioqqullugu najugaq nalunaarutit nassiunneqartarfissaat nalunaarutigissavaa.

§ 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45.