Isumaginninnikkut Naammagittaalliuuteqartarfiup siulittaasuata ulloq 6. decembari 2017-imi Kommune-p 18. aggusti 2015-imi panippit A inuusoq xxxxxx- xxxx, erninersiutissaanut tunngatillugu aalajangiinera pillugu naammagittaalliutit suliaraa, imalu:

Sags nr.: 2015 - 8119

AALAJANGIIVOQ

Kommune-p aalajangersimasaa atuutiinnassaaq. Tassa imaappoq kommunip aalajangiinera eqqortuusoq naammagittaalliuuteqarninnilu ilalerneqanngilatit.
Naartunermi, erninermi qitornavissiartaarnermilu sulinngiffeqartarneq ullormusiaqartarnerlu pillugit Inatsisartut inatsisaat nr. 14, 7. decembari 2009-meersoq naapertorlugu suliaq aalajangiivigineqassaaq.

Nassuiaat:

Suliap paasissutissartaanni atuarneqarsinnaavoq, paniit A Kommuni taamanikkut najugaqarfigisassinnut, ulloq 13. juuli 2015-imi erninersiutit pillugit qinnuteqarsimasoq. Aamma atuarneqarsinnaavoq ulloq 3. aggusti 2015-imi ernertaarsimasoq.

Ulloq 18. aggusti 2015-imi kommunip allattugaataani atuarneqarsinnaavoq, A qinnuteqaataa itigartinneqarsimasoq, isertitaqarnanilu suliffeqarsimanngimmat.

Itigartitsinermut tunngatillugu aalajangiineq allaganngorlugu suliarineqarsimanersoq takuneqarsinnaanngilaq.

Aamma atuarneqarsinnaavoq, Kommunip piffissami 31. juuli 2015-imiit 23. aggusti 2015-ip tungaanut 1.917,- kr.-nik aamma piffissami 24. aggusti 2015-imiit 9. septembari 2015-ip tungaanut 1.118,- kr.-nik pisortanit ikiorsiissutinik ateq-mut tunniussaqarsimasoq.

Ulloq 23. juuli 2015-imi Kommuneqarfik Sermersuumut pisortanit ikiorsiissutinik qinnuteqarputit.

Kommunip 29. aggusti 2015-imi allaganngorlugu aalajangiineratigut qinnuteqaatit itigartinneqarpoq.

Ulloq 14. aggusti 2015-imi Isumaginninnikkut Naammagittaalliuuteqartarfimmut naammagittaalliuuteqarputit. Naammagittaalliuutinni oqaatigaat, juulimi naatsorsuutitissimallutit, tamatumalu kingorna tusagaqaqqinnak. Pisut akornanni paniit A ernertaarpoq. Taamaammat anaanaasup immuanut taarsiullugu meeqqap miluttagassaanut aningaasanik pisariaqartitsivutit, paniit erninersiutinik suli tigusaqarsimanngimmat. Ajoraluartumik aamma nillataartitsiveqanngilasi.

Oqarasuaatitigut ilisimatitsivutit, naammagittaalliuutigalugu, paniit taamanikkut 18-nit inorlugit ukioqartuusoq, erninersiutinik qinnuteqarnermini itigartinneqarsimasoq, taarsiullugulu ullut 14-ikkaarlugit pisortanit ikiorsiissutinik 1.100,- kr.-nik tunineqarsimasoq.

Uigisat V, A-mut ataataasoq, A-mut angajoqqaatut oqartussaassutsimik tigummiaqataasoq ulloq 24. maaji 2017-imi atsiukkamik akuersissuteqarpoq, suliaq Isumaginninnikkut Naammagittaalliuuteqartarfimmit suliarineqarsinnaasoq.

Inunnik nalunaarsuisarfimmi paasissutissaani atuarneqarsinnaavoq, inunnik nalunaarsuisarfimmi paasissutissat malillugit A erninilu ilinni uinnilu najugaqartoq.

Ulloq 15. novembari 2017-imi Isumaginninnikkut Naammagittaalliuuteqartarfimmut oqarasuaatitigut ilisimatitsivutit, A erninersiutinik qinnuteqarnermi nalaani atuarneq ajorsimasoq, aamma ilinniagaqartuunanilu ilinniartuunerminit atuanngikkallarfeqarsimanngitsoq. 2015-imi maajimi Danmarkimiit nuukkassi atuarunnaarsimasoq. Taamanili atuaqqissimanngilaq, kisianni meeraa meeraaqqerivimmiilermat Majoriami aallartippoq.

Inatsisitigut tunngavigisaq:

Naartunermi, erninermi qitornavissiartaarnermilu sulinngiffeqartarneq ullormusiaqartarnerlu pillugit Inatsisartut inatsisaat nr. 14, 7. decembari 2009-meersumi § 3 naapertorlugu inuit makku naartunermi, erninermi qitornavissiartaarnermilu sulinngiffeqarsinnaatitaassagaanni piumasaqaatinik eqqortitsisut piffissami sulinngiffeqarfiusumi ullormusiaqarsinnaatitaapput:

  1. Akissarsiaqarlutik sulisartut kapitali 11-mi suliffeqarsimanissamik piumasaqaatinik eqqortitsisut, piffissamut sulinngiffeqarfiusumut tunngasunik akissarsiaqanngitsut allanilluunniit pisartagaqanngitsut.
  2. Namminersorlutik inuussutissarsiortut, inuussutissarsiornerminnik unitsitsisut.
  3. Namminersorlutik inuussutissarsiortut katissimallugit aappaat inooqataalluunniit ikiortaasut katissimallugu aapparmik inooqatimilluunniit inuussutissarsiornerani ikiortaajunnaartut. (piffissami sulinngiffeqarfiusumi)
  4. Ilinniartut atuartulluunniit ilinniakkaminnit meeqqalluunniit atuarfiannit sulinngiffeqartut atuanngiffeqartulluunniit.

Naartunermi, erninermi qitornavissiartaarnermilu sulinngiffeqartarneq ullormusiaqartarnerlu pillugit Inatsisartut inatsisaat nr. 14, 7. decembari 2009-meersumi § 29 naapertorlugu Akissarsiaqarluni sulisartoq ullormusiaqarsinnaatitaassaaq pineqartoq sulinnginnerup aallartiffia sioqqullugu sapaatit akunnerini 13-ini kingullerni suliffeqarnermut attuumassuteqarsimappat.

Sapaatit akunnerinik 13-inik naatsorsuinermi piffissat akissarsiaqarluni sulisartup akissarsiaqarluni sulisartutut suliffigisimasai, akissarsiaqarluni feeriarnersiuteqarluniluunniit feeriarfigisimasai, suliamut attuumassuteqartumik pikkorissarnerit peqataaffigisimasai suliffeqanngikkallarnermilu ikiorsiissutit pillugit Inatsisartut peqqussutaat naapertorlugu pisartagaqarfigisimasai ilaatinneqassapput.

Naliliineq:

Isumaginninnikkut Naammagittaalliuuteqartarfiup tunngavilersuutigaa, A-mut erninersiutinik itigartitsisilluni aalajangiineq kisiat naammagittaalliuutigigit.

Taamaammat Kommune-p pisortanit ikiorsiissutinik tunniussinera Isumaginninnikkut Naammagittaalliuuteqartarfimmit suliarineqanngilaq, taamaammallu aningaasat annertussusaat eqqortuunersut imaluunniit pisortanit ikiorsiissutinik kommunip ilinnut itigartitsinera aamma naliliiffigineqanngilaq.

Aalajangiinerit taakku pillugit naammagittaalliuuteqarnissaq kissaatigissagussiuk tamanna maanga nalunaarutigissagissi qinnuigineqarpusi.

Isumaginninnikkut Naammagittaalliuuteqartarfik isumaqarpoq Kommune-p aalajangernera eqqortuusoq.

Isumaginninnikkut Naammagittaalliuuteqartarfiup aalajangiinermini tunngavilersuutigaa, piffissami erninersiutit pillugit qinnuteqarfiusumi A ilinniagaqarnermini atuanngiffeqarallarsimanngitsoq.

Isumaginninnikkut Naammagittaalliuuteqartarfiup aamma pingaartillugu isiginiarpaa, A erninissaq sioqqullugu sapaatit akunnerini 13-ini kingullerni suliffeqarnermut attuumassuteqarsimanngitsoq.

Isumaginninnikkut Naammagittaalliuuteqartarfiup ilinnut ilisimatitsissutigissavaa, uigisallu panissinnut pilersuisussaatitaajunnaarnikuugassi, massakkummi meeqqaminut pilersuisussaatitaalernikuuvoq.

Allaffissornermut tunngasunik pissuteqarluni suliap sivisuallaartumik suliarineqarsimanera Isumaginninnikkut Naammagittaalliuuteqartarfiup ajuusaarutigaat.

Aalajangiineq:

Kommune-p aalajangersimasaa atuutiinnassaaq.

Inussiarnersumik Inuulluaqqusillunga

Naja Joelsen

Siulittaasoq

Allakkap assilinera: Kommune-p, allaffia pingaarneq aamma illoqarfimmi allaffik.

Allakkap assilinera uunga: A, najugaqarfik, nr.,-xx, 39xx illoqarfik.