Pisortanit ikiorsiissutit pillugit Kommunip 20. decembari 2016-imi aalajangiinera pillugu naammagittaalliuutit Isumaginninnikkut Naammagittaalliuuteqartarfiup ulloq 6. decembari 2017-imi suliaraa imalu

Sags nr.: 2017 - 144

AALAJANGIIVOQ

Kommune-p aalajangernera atuutiinnassaaq. Tamanna isumaqarpoq, kommunip aalajangiinera eqqortuusoq, naammagittaalliornerillu ilalerneqanngitsoq.

Suliaq Pisortanit ikiorsiissutit pillugit Inatsisartut peqqussutaat nr. 15, 20. novembari 2006-imeersoq kingornalu allannguuteqartinneqartoq naapertorlugu aalajangiiffigineqarpoq.

Nassuiaat:

Ulloq 12. decembari 2016-imi uigisallu pisortanit ikiorsiissutit pillugit qinnuteqarsimavusi.

Ulloq 20. decembari 2016-imi kommuni aalajangiivoq, tassani aningaasaqarnikkut sinneqartooruteqarassi uigisallu pisortanit ikiorserneqarnissarsi itigartitsissutigineqarpoq.

Ulloq 29. decembari 2016-imi Isumaginninnikkut Naammagittaalliuuteqartarfimmut naammagittaalliuuteqarputit, kommunip aalajangiinera isumaqatiginnginnakku.

Ilisimatitsissutigineqarpoq, piffissami qinnuteqarfiusumi sulisimasutit aamma nuliat S ulloq 6. decembari 2016-imi ernereernerup kingunerisaanit erninermi sulinngiffeqarsimasoq.

Suliamut paasissutissani atuarneqarsinnaavoq, nuliat suliffissarsiuussisarfimmut saaffiginnissimasoq nalunaarutigalugulu ulloq 30. septembari 2016-imi kingullermik akissarsisimalluni. Pissutaasoq tassaavoq, peqqissaanermi ikiortitut ilinniagaqarneq ulloq 22. septembari 2016-imi naammassisimammagu.

Aammattaaq atuarneqarsinnaavoq, nuliat ulloq 6. oktobari 2016-imi suliffissarsiortutut nalunaarsorneqarsimasoq.

2016-imi decembarimi naatsorsuussinermi immersugassiami atuarneqarsinnaavoq, illit isertitatit 9.133,- kr.-iusut taavalu nuliat 4.616,- kr.-inik isertitaqarsimalluni, taakkunannga 3.203,90 kr.-nit Brugseni 11. novembari 2016-imut tunngasuupput, aamma isertitat sinneri erninersiutaallutik. Isertitasi katillugit 13.749,- kr-iupput.

Innaallagissamut 635,- kr.-nik akiligassaqarsimavusi, ineqarnermut 2.960,- kr-nik akiligassaq aamma meeqqerivimmut 210,- kr-inik akiligassaq. Aningaasartuutisi katillugit 3.805,- kr.-iupput. Ilissinnut meeqqanullu 2-nut inuuniarnermi atugassanut aningaasartuutisi kommunimit 6.295.- kr.-inut naatsorsuusiorneqarsimapput taamaasillusilu aningaasartuutisi katillugit 10.100,- kr.-iupput. Taamaammat nuliallu 3.649,- kr.-nik sinneqartooruteqarpusi.

Brugsenimiit akissarsianut allagartami atuarneqarsinnaavoq, nuliat piffissami 24. oktobari 2016-imiit 6. novembari 2016-ip tungaanut akileraarutit ilanngaatigereerlugit 3.203,90 kr.-nik akissarsiaqarsimasoq. Akissarsiat taakku tunniunneqarput ulloq 11. november 2016.

Kommunimiit akissarsiat allagartaanni atuarneqarsinnaavoq, piffissami 14. novembari 2016-imiit 27. novembari 2016-ip tungaanut nuliat erninersiutinik 1.412,52 kr.-nik tunineqarsimasoq. Erninersiutit tunniunneqarsimapput ulloq 2. decembari 2016.

Pisiffimmiit akissarsiat allagartaanni atuarneqarsinnaavoq, ullut 14-ikkaarlugit akissarsisartutit aamma ulloq 18. novembari 2016-imi 4.698,10 kr.-nik akissarsisutit taavalu ulloq 2. decembari 2016-imi 4.435,08 kr.-nik akissarsiaqarlutit.

Inunnik nalunaarsuisarfiup nalunaarsugaataani atuarneqarsinnaavoq, piffissami qinnuteqarfiusumi nuliallu meeqqanik ukiukitsunik marlunnik najugaqateqartusi.

Inatsisitigut tunngavigisaq:

Pisortanit ikiorsiissutit pillugit Inatsisartut peqqussutaat nr. 15, 20. novembari 2006-imeersumi § 7 naapertorlugu Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq 1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma 2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

§ 8 naapertorlugu kommunalbestyrelse pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu

  1. suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliassarsiortuunngikkuni
  2. sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit
  3. napparsimaguni imaluunniit erninermut atatillugu sulinngiffeqaruni taamaattumillu sulilernissamut piareersimasinnaanani.

Imm 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

Peqqussummi tassani § 13 malillugu pilersuinermut akiligassanullu aalajangersimasunut pisortanit ikiorsiissutisiat annertussusaat qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit missaliuussinikkut aalajangerneqartarput.

Naliliineq:

Isumaginninnikkut Naammagittaalliuuteqartarfik isumaqarpoq, nuliallu pisortanit ikiorsiissutisisarnissassinnut pisinnaatitaanngitsusi.

Tamatumani tunngavilersuutigineqarpoq, illit aapparisavillu aningaasatigut pisariaqartitsinissi takutimmagu, 2016-imi decembarimi aningaasatigut 3.649,- kr.-nik sinneqartooruteqartusi. Taamaasilluni aningaasartuutinut aalajangersimasunut aamma inuuniarnermi atugassanut pisariaqartitassi pissarsiarinissaanut nammineq periarfissaqarsimavusi. Taamaasillusi akiligassat decembarimi akilerneqartussat akilerneqarnissaannut periarfissaqarsimavusi.

Isumaginninnikkut Naammagittaalliuuteqartarfimmit tunngavilersuutigineqarpoq, suliffeqaravit pisortanit ikiorsiissutinik ikiorserneqarnissannut pisinnaatitaaffeqarsimanngitsutit, kisiannili nuliat ernereernermi sulinngiffeqarsimasoq, taamaasillunilu suliartoqquneqarnissaminut piareersimasussaatitaanngikkallarnissamut akuerineqarsimagami pisortanit ikiorsiissutinik ikiorserneqarnissamut piumasaqaataasut naammassinikuullugit. Taamaammat kommuni naatsorsuusiorsimasinnaavoq aningaasaqarnikkut amigartooruteqarnersusi takuniarlugu.

Isumaginninnikkut Naammagittaalliuuteqartarfilli isumaqarpoq, kommuni nuliavit atia atorlugu naatsorsuusiorsimassagaluartoq, tassami nuliat nuliat pisortanit ikiorsiissutinik ikiorserneqarnissaminut pisinnaatitaaffeqarmat.

Suliap sivisuallaartumik suliarineqarsimanera allaffissornermut tunngasunik pissuteqartoq Inunnik Isumaginninnikkut Naammagittaalliuuteqartarfiup ajuusaarutigaa.

Aalajangiineq:

Kommune-p aalajangernera atuutiinnarneqarpoq.

Inussiarnersumik Inuulluaqqusillunga

Naja Joelsen

Siulittaasoq

Assilinera Kommune-mut, qullersaqarfimmut

Inatsisit toqqammaviit:

Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq

§ 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq

  1. inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
  2. imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

§ 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu

  1. suliffeqanngikkuni, suliffissaminillu naammaginartumik neqeroorfigineqarsimanngikkuni, suliffissanillu pimoorullugu periarfissarsiortuuguni,
  2. sulisinnaanngitsutut nalilerneqarsimaguni sungiussiniarnermigut ajornartorsiornini, imaluunnnit peqqinnginnini pissutigalugit imaluunniit
  3. napparsimaguni imaluunniit erninermut atatillugu sulinngiffeqaruni taamaattumillu sulilernissamut piareersimasinnaanani.”

Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

§ 13. Pilersuinermut akiligassanullu aalajangersimasunut pisortanit ikiorsiissutisiat annertussusaat missiliuussinikkut aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.

Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.

Imm. 3. Aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput. Pilersuinermut aningaasartuutinullu aalajangersimasunut pisortanit ikiorsiissutit annerpaamik SIK-p Naalakkersuisullu akornanni isumaqatigiissutit naapertorlugit ilinniarsimanngitsumut aningaasarsiarititat ikinnerpaaffiisa 65%-erisinnaavaat, taamaattorli imm. 4 takuuk.

Imm. 4. Pisuni immikkut ittuni SIK-p Naalakkersuisullu isumaqatigiissutaat naapertorlugu suliamik ilinniagaqarsimanngitsut aningaasarsiaasa minnerpaat 65%-iat sinnerlugu ikiorsiissutinik tunniussisoqarsinnaavoq, tamanna pisariaqavissappat qinnuteqartup ilaqutaasalu pilersorneqarnissaannut akiligassanullu aalajangersimasunut, naleqquttumillu ineqarniarnermikkut atugaqaannarnissaannut.

Imm. 4. Pisuni immikkut ittuni SIK-p Naalakkersuisullu isumaqatigiissutaat naapertorlugu suliamik ilinniagaqarsimanngitsut aningaasarsiaasa minnerpaat 65%-iat sinnerlugu pilersorneqarnissamut akiligassanullu aalajangersimasunut ikiorsiissutinik tunniussisoqarsinnaavoq, pisortanit ikiorsiissutinik pisartagaqartup ilaqutaasalu inuuniarnikkut ineqarnikkullu naammaginartumik atugaqaannarnissaasa qulakkeerneqarnissaat pisariaqassappat.

Imm. 5. Nammineq pisuussutigisamik pissaaleqisoqarpat aallaavittut taamaallaat tunniunneqarsinnaapput pilersuinermut akiligassanullu aalajangersimasunut pisortanit ikiorsiissutissat affaannai. Pilersuinermut ikiorsiissutit aningaasanngornagit tunniunneqassapput.

Imm. 6. Naliliiniarnermut tunngatillugu kommunalbestyrelsip pingaartissavaa meerartaasinnaasut pisariaqartitaasa isiginiarneqarnissaat.

Imm. 7. Naligalugu inooqatigisaq peqqussummi matumani paasineqassaaq katissimanagu inooqatigisatut, pisortanit ikiorsiissutinik qinnuteqarnermi pisartagaqartup inooqatigisaa, tamannalu sioqqullugu sivikinnerpaamik ukiumi ataatsimi inuit nalunaarsorneqartarfianni najugaqatitut nalunaarsorneqarsimasussaq.

Imm. 8. Pilersuinermut akiligassanullu aalajangersimasunut kiisalu immikkut ittumik pisortanit ikiorserneqarsinnaanermut Naalakkersuisut malittarisassanik aalajangersaasinnaapput.