Qinnuteqaat 17. novembari 2016 tunniunneqarsimavoq, piffissaliunneqartorlu 1. juuli 2016-imiit 1. decembari 2016-imut inatsip allannguuteqarnissaanut piffissaliunneqarsimasup iluaniilluni.

17/00500

Kommunip 30 juni 2017-imi siusinaartumik pensionisiassavit atuutilernissaat pillugu aalajangiinera pillugu naammagittaalliutit Isumaginninnermi Naammagittaalliuuteqartarfiup siulittaasuata 30 oktober 2018-imi suliaraa imalu aalajangiivoq

AALAJANGIINEQ

Kommuniata aalajangiinera allanngortinneqarpoq, 1. juni 2017-imit atuutilersumik siusinaartumik pensionisiaqalertussanngorlutit. Tamanna imatut paasineqassaaq kommunip aalajangiinera eqqunngitsuusoq, taamaattumillu illit naammagittaalliuutigisimasat pillugu ilalerneqartutit.  

Siusinaartumik pensionisiat pillugit Inatsisartut inatsisaat nr. 40, 9. decembari 2015-imeersoq kingusinnerusukkullu allanngortinneqartoq naapertorlugu suliaq aalajangiiffigineqarpoq     

Nassuiarneqarnera:      

Allakkani 17 november 2016-imik ullulimmi erserpoq siusinaartumik pensionisiaqalernissannut qinnuteqarsimavutit.

Allakkamittaaq erserpoq, tartukkut puakkullu kræfteqalersimasutit tamatumunngalu katsorsartissimasutit. Kommuni, Rigshospitalimiit nakorsap oqaaseqaataanik, tigusaqarsimavoq. Kommunip illoqarfimmi napparsimavimmut ulloq 17 november 2016-imi nakorsap nalunaarutaanik piumasimavoq. Siusinaartumik pensionisiaqalernissamut qinnuteqaammik immersuisimavutit. Suliami allakkanittaaq allaqqavoq suliaq suli ingerlanneqartoq aammalu suliamik sullissisup ittuni suliaq qanoq ingerlanneqarnissaanik apereqqaarniartoq Ilaqutariinnermut Ataatsimiititaliamit suliarineqassanersoq imaluunniit siulittaasup aalajangiineratut ingerlanneqassanersoq. Kapitali 3, § 9, imm. 2, aammalu kapitali 9 § 31 Inatsisartut inatsisaanni nr. 40-mi, 9. december 2015-imeersumi innersuunneqarput.

Qinnuteqaammut immersuiffimmi 11 maj 2017-imeersumi erserpoq siusinaartumik pensionisiaqalernissamut qinnuteqaqqittutit.  Tunngavilersuutitut allaqqavoq tartukkut puakkullu kræftilersimanerit. Siusinnerusukkut atuarfigisimasat, ilinniakkat aammalu siornatigut suliffigisimasat allattorfissaanni allaqqavoq meeqqat atuarfianni 10 klassimi atuarfimmiit anisimasutit.

Kommunip 30 juni 2017-imi 1 juli 2017-imiit atuutilertumi siusinaartumik pensionisiaqalernissat aalajangiissutigivaa. 

Inatsisitigut tunngavilersuutitut Siusinaartumik pensionisiat pillugit Inatsisartut inatsisaanni nr. 40 9. decembari 2015-imeersumi § 5 aamma § 6 kommunip innersuussutigai.   

Atuutilerfissap ullulerneqarnera kommunimit tunngavilersorneqanngilaq.

Ulloq 18. juli 2017 Isumaginninnikkut Naammagittaalliuuteqartarfimmut allagaqarlutit naammagittaalliorputit. Siullermik kræftimik nappaateqalerputit 2015-imi, aappassaani 2016-imi pingajussaanillu 2017-imi. Taamaammat august 2016-imi suliunnaarputit, sapaatillu akunneri 13-it suliffeqanngikkallarnermi ikiorsiissutinik tunineqarputit. November 2016-imi siusinaartumik pensionisiaqalernissannut qinnuteqarputit. Nakorsaq december 2017-imi kommunimut tamanna pillugu allagaqarpoq.

Maj 2017-imi kommuni akiniarnera sivisuallaaqimmat kommunimut tuttaqaqqipputit.  Paasitinneqarputit nakorsamiit allagaq kommunimi uninngatiinnarneqarsimasoq suneqaranilu. Taamaammat kommunip nakorsamik allakkamik nutaamik piniaqqoqqissimavaatit. Juni 2017-imi nakorsaq attavigeqqippat.  Paasitinneqarputit nakorsaq siullermiilli tusagaqarsimanngimmat marloriaq allaqqissimagaluartoq. Kommunip akiniarnissaa sivisuallaaqimmat kommunimut ikioqqullutit saaffiginnissimagaluarputit ikiorsinnaasimanngilaatilli.

Naammagittaalliutit malillugu 1 juli 2017-imi akissarsivutit (siusinaartumik pensionisiat) taamaattorli ingerlaannaq atuutilinngitsumik.  Taamaammat Isumaginninnermi Naammagittaalliuuteqartarfimmut naammagittaalliorputit.

Isumaginninnermi Naammagittaalliuuteqartarfik kommunimit suliamut paasissutissanik tigusaqarsimavoq. 

Ulloq 27 juli 2015-imi Rigshospitalimiit nakorsamiit oqaaseqaammi allaqqavoq sapaatip akunnerani arfinilinni napparsimasutut nalunaarsorneqartutit tartuvit illua peerneqarsimammat. 

Ulloq 10 november 2016-imi Rigshospitalimiit nakorsamiit oqaaseqaammi napparsimasutut nalunaarsorneqarnerit allaqqavoq. Erserpoq julimi tartukkut kræfternikkut pilatsereernerpit kingorna utersaartoorsimagavit 7 november 2016 pilatseqqittutit.  Aammattaaq ukiortaareernerani pilatseqqinnissarnut pilersaarusiortoqarpoq puanni tinuneq peerneqarniarmat.  Taamaammallu januar 2017-ip tungaanut sulisinnaanavianngitsutit ilimagineqarpoq puakkut pilatsinneq tamatuma nalaani pissammat. 

Illoqarfimmi napparsimavimmiit nakorsamit nalunaarummik 26 maj 2017-imi ullulimmik ilaasoqarpoq. Siornatigut pilatsissimanerit allaqqavoq. Taassuma saniatigut aammattaaq erserpoq april 2017-imi pilatseqqissimasutit qaammatillu pingasut kingorna CT-skannertittussaasutit.  Kingullermik suligavit august 2016-imi meeraaqqanik paaqqinnittarfimmi sulisimavutit. Qasuvutit suliaritereernerpillu kingorna sunnerteqqaqalutit taamaammallu suleqqilernissannullu saperlutit. Pilatsereernerup kingorna sakissavit saamerliani anniarujuttarputit nipaallisaatinilli atugaqarnak. Ungasinngitsumi unitsitaaqqissimavutit toqqusaakkut aseruuttoorsimanerit pissutigalugu. Taassuma kinguneratigut nakorsaq innersuussivoq siusinaartumik pensionisiaqalissasutit.

Ulloq 30 juni 2017-imi siulittaasup ulloq 1 juni 2017-imiit atuutilersumiit siusinaartumik pensionisiaqalernissamut aalajangiinera ilavoq.

Inassuteqaatip atorneqarnissaanit erserpoq, juli 2015-imi tartukkut kræfteqalersimanerit. Maj 2017-imi siusinaartumik pensionisiaqalernissamut qinnuteqarsimasutit erserpoq aammalu 26 maj 2017-imi nakorsamiit oqaaseqaat tiguneqartoq.

Innersuummi tunngaviusutut innersuunneqarlutillu issuarneqarsimapput, Siusinaartumik pensionisiat pillugit Inatsisartut Inatsisaat nr. 40, 9. december 2015-imeersoq § 5, § 6, § 9, imm. 2 aammalu § 31,

Inatsisitigut tunngaviit:    

Siusinaartumik pensionisiat pillugit Inatsisartut inatsisaat nr. 40, 9. decembari 2015-imeersumi kingusinnerusukkullu allanngorneqartumi § 31 naapertorlugu, qaammatip ataatsip kingorna siusinaartumik pensionisiaqarsinnaatitaaneq atuutilissaaq, piumasaqaatit naammassineqarsimassapput, kommunalbestyrelsilu aalajangiisimassaaq siusinaartumillu pensionisiat pisassaritissallugit.  31 allanngortinneqarpoq Inatsisartut inatsisaanni nr. 19 28. November 2016-imeersumi siusinaartumik pensionisiallu pillugit inatsisartut inatsisaattut allannguummi 1 decemberi 2016-imi atuutilersumi.

Allannguutissatut inatsimmi erserpoq § 2, imm. 2,  allannguutissatut inatsimmi allannguutit aallaavigalugit siusinaartumik pensionisiaqalerniartut qinnuteqarnerup tunniunneqarneraniit piumasaqaatillu naammassineqarsimaneraniit qaammat ataaseq tullinnguuttumi aatsaat pensionisiaqalersinnaanissaat.

Naliliineq:

Ulloq  1. juni 2017-imiit siusinaartumik pensionisiaqalernissannut pisinnaatitaasimasutit Isumaginninnermi Naammagittaalliuuteqartarfiup siulittaasua isumaqarpoq.

Tamatumunnga taamaammat tungavigineqarpoq siusinaartumik pensionisiaqalersinnaanerit qinnuteqaativit tunniunneraniit nakorsallu oqaaseqaataaniit ulloq 26 maj 2017-imeersoq tunngavigalugu piumasaqaatit naammassineraniit qaammat ataaseq tulliuttumi aatsaat atuutilernera. Taamaasillutit 1 juni 2017-imiit Allannguutissatut inatsit § 2, imm. 2,  allannguutissatut inatsimmi allannguutit malillugit siusinaartumik pensionisiaqalernissat pisinnaavoq

Isumaginninnermi Naammagittaalliuuteqartarfiup siulittaasuata pingaartippaa 17 november 2016-imi siusinaartumik pensionisiaqalernissamut qinnuteqarsimanerit.

Isumaginninnermi Naammagittaalliuuteqartarfiup siulittaasuata kommunimut erseqqissaatigissavaa, Siusinaartumik pensionisiat pillugit Inatsisartut peqqussutaat nr. 40, 9. december 2015-imeersumi kingornalu allannguuteqartumi, siusinaartumik pensionisiaqalernissamut qinnuteqaat allakkatigut tunniunneqassasoq imaluunniit siusinaartumik pensionisiaqalernissamut qinnuteqaateqarnermi immikkut immersugassaqassasoq piumasaqaataanngimmat.

Taamaasilluni kommuni 17 november 2016-imi suliamut ingerlatsinissaminut tunngavilersuutigisussaagaluarpaa.

Isumaginninnermi Naammagittaalliuuteqartarfiup siulittaasuata pingaartippaa 26 maj 2017-imi nakorsap allagaani nakorsap siusinaartumik pensionisiaqalernissat innersuummagu siusinaartumik pensionisiaqalernissamut piumasaqaatinut naammassisitsisoq isumaqarpoq.

Rigshospitalimiit nakorsaniit oqaaseqaatit juli 2015-imeersoq november 2016-imeersorlu napparsimanermik nalunaarutaapput.  Taamaasilluni siusinaarluni pensionisiaqalernissamut suliamut kommunimit nakorsap oqaaseqaataanik aallertoqarsimanngilaq. Taamaasilluni Isumaginninnermi Naammagittaalliuuteqartarfiup siulittaasuata tamakku pigaartissimanngilai.

Tamannalu pissutigalugu kommune ulloq 1. juni 2017 aallarnerfigalugu siusinaartumik pensionisiassat tunniutissavai.

Isumaginninnermi Naammagittaalliuuteqartarfiup siulittaasuata kommunimut erseqqissaatigissavaa, ajuusaarnartoq kommuni 17 november 2016-imi siusinaarlutit pensionisiaqalernissamut qinnuteqaatit ingerlassimanngimmagu aatsaallu nammineerlutit maj 2017-imi kommunimut attaveqaqqikkavit aatsaat ingerlanniarneqalersimammat.

Suliamik suliarinninneq allaffissornermut tunngasunik pissuteqartoq suliap sivisuallaartumik suliarineqarsimanera Isumaginninnermi Naammagittaalliuuteqartarfiup siulittaasuata ajuusaarutigaa.                            

Aalajangiineq:    

Kommuniata aalajangiinera allanngortinneqarpoq, 1. juni 2017-imit atuutilersumik siusinaartumik pensionisiaqalertussanngorlutit.

Eqqartuussivimmut suliassanngortitsineq:

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. novembari 2001-imeersoq kingusinnerusukkut allanngortinneqartoq § 8, imm. 4-imi allassimavoq Isumaginninnermi Naammagittaalliuuteqartarfiup aalajangigai allat suliamut attuumassuteqartumit Kalaallit Nunaanni Eqqartuussivimmut suliassanngortinneqarsinnaapput.           Aalajangiineq aalajangiinerup kingorna sapaatit akunnerisa sisamat iluanni Kalaallit Nunaanni Eqqartuussivimmut tunniunneqassaaq.     

Inussiarnersumik inuulluaqqusillunga 

Freja Lisby Nielsen        

Isumaginninnermi Naammagittaalliuuteqartarfiup siulittaasua