Unammilleqatigiinnermi aalajangiisartut ukiumoortumi nalunaarutaat 2005

Siulequt

Unammileqatigiinnermut inatsit maanna ukiuni 15-ini atuussimavoq. Unammilleqatigiinnermut Aalajangiisartut inatsimmik aqutsisuusut ukiuni makkunani unammilleqatigiinnermut inatsimmi maleruagassat siammartinnissaat pingaartissimavaat. Suliffeqarfiit akornanni isumaqatigiissutinik nalunaaruteqartarnerit amerlasiartuinnartut uppernarsarpaat unammilleqatigiinnermut inatsit ilisimaneqarnerulersimasoq.

Inatsisartuni Naalakkersuisuinilu naalakkersuinermik suliallit akornanni inuiaqatigiinni kiffaanngissuseqartumik unammillernerulernissamut aamma soqutiginninneq annertusiartortutullusooq ippoq. Kiffaanngissuseqartumik unammillersinnaaneq namminermi siunertaanngilaq kisiannili unammillernerulerneq inuussutissarsiutit ajunngitsumik ingerlanneqarnissaannut qulakkeereqataasuuvoq tamannalu aningaasarsiornerup annertusiartornissaanut kalaallillu imminut napatissinnaasumik aningaasaqalivinnissaannut tunngavissaavoq.

Pingaartumik inuiaqatigiinni kalaallisut ittuni suliffeqarfiit pisortanit pigineqartut amerlanerussuteqarluartillugit aammalu suliffeqarfiit akuerissutinik, kiffartuussinissamik isumaqatigiissutinik assigisaannillu sakkoqartillugit kisermaassisutut imaluunniit pingaarnerussuteqartutut inissisimatillugit pingaaruteqartpoq inatsisiliortartut pisaanermillu tigumminnittut maluginiarluinnartarmassuk inatsiseqartitsinermi allaffissornermiluunniit ajunngitsumik unammillersinnaanermut pisuussutillu sunniutilimmik iluaqutiginissaannut pisariaqanngitsunik aporfissaqartoqartarnersoq. Pingaaruteqarpoq kisermaassisussaatitaanerit taamaattut piujuarnissaat nalilersorneqartuartariaqarmat aammalu nalinginnaasuunngitsumik annertuumik ilunaaruteqartalernissamut imaluunniit sunniutikitsumik tunisassiornerup attatiinnarnissaanut atornerluisoqarnersoq nalilerneqartuartariaqarluni.

Unammilleqatigiinnermut inatsit nakkutilliinermik periaaseqarnermik tunngaveqarpoq. Nunani avannarlerni allani amerlanerni nakkutilliinermik periaasqaerneq inerteqquteqartarnermik periaaseqarnermik taarserneqaranikuuvoq. Tamaaliornikkut suliffeqarfiit erseqqissunik malittarisassaqarnissaat sunniuteqarneursumillu oqartussaassuseqarnissaq qulakkeerneqarput. Suliassatut misilitassanik inuiaqatigiit kalaallit unammisassaqartillugit unammilleqatigiinnermut inatsit iluarsiivigisassallugu pisariaqarpoq.

Unammilleqatigiinnermut Aalajangiisartut allattoqarfillu nunat avannarliit suleqatigiinnerannut peqataapput. Nunat tamat suliniutaannut peqataasarneq aalajangiisartut allattoqarfiullu suliaanut nukittorsaataapput kiisalu ilisimasassanik iluatinnaateqarluinnartunik tunioraasuulluni attaveqarfissanillu pilersitsisarluni. Nuannaarutigaara nalunaarutigisinnaagakku Unammilleqatigiinnermut Aalajangiisartut septemberi 2007-mi nunat avannarliit Ilulissani atatsimoorlutik ataatsimiinnissaannut aggersaasussaammata.

Ukiup ingerlanerani suliassat assigiinngisitaartut suliarineqarsimanerannut ukiumoortumik nalunaarut paasissutissiissuteqarpoq amerlanerusunullu peqataanissaa ilimanaateqarluni – namminersortut naalakkersuinermillu suliallit – unammilleqatigiinnermut maleruagassanut ilisimasaqarnerulissallutik. Atuarluarisi.

Qaqortoq, ulloq 26. juuni 2006

Carl-Aage Skovaa
Unammilleqatigiinnermut Aalajangiisartunut siulittaasoq

 

Aallaqqaasiut

Unammilleqatigiinnermut Aalajangiisartut suliaat

Unammilleqatigiinnermut Aalajangiisartut sulinerat Naalakkersuisut aamma Inatsisartut inuussutissarsiutitigut politikkikkut anguniagaannik tunngaveqarpoq. Taamaalilluni Unammilleqatigiinnermut Aalajangiisartut suliassaasa pingaarnersarivaat kalaallit unammilleqatigiinnermi inatsisaat 1993-mi jannuaarip aallaqqaataani atuutilersinneqartoq nakkutigissallugu. Inatsit nakkutilliinermut inatsisaavoq paasinartuutsitinermik aamma isumaqatigiiniarsinnaanermik tunngaveqartoq.

Unammilleqatigiinnermut Aalajangiisartut aamma suliassarivaa nakkutilliinissaq, kiisalu salliutinneqartutut inissisimasut isumaqatigiissutaat unammilleqatigiinnermut ajoqutaasinnaasut atornerluinerillu akuliuffigisinnaallugit. Taamatut nalunaartarnissamut tunngasuni ileqquuvoq, isumaqatigiissutip nalunaarutiginerup misissuiffigineqarnissaanut ataatsimiititaliap nalilersuisarnera, Unammilleqatigiinnermi inatsimmi § 11 naapertorlugu suliffeqarfinnik isumaqatigiinniarnissaq aallartinneqassanersoq. Unammilleqatigiinnermi inatsimmi §§-it 11 aamma 13 tunngavigalugit akuliussinnaanermut assersuutit kinguliani allaaserineqarput.

Unammilleqatigiinnermut Aalajangiisartut aamma maalaarutinik tigusaqartarpoq. Tamatumani Unammilleqatigiinnermut Aalajangiisartut tunngaviatigut nammineerluni aalajangigassarivaa, maalaarutit suut suliarineqassanersut. Taamaalilluni Unammilleqatigiinnermut Aalajangiisartut suut suliarissanerlugit tulleriiaarisinnaavoq, suliassat ataasiakkaat Kalaallit Nunaanni unammilleqatigiinnermi pissutsinut pingaaruteqassusiat tunngavigalugu.

Unammilleqatigiinnermi ataatsimiititaliaq kiisalu Unammileqatigiinnermi ataatsimiititaliap aamma Kalaallit Nunaanni Atuisartunut Siunnersuisoqatigiit ataatsimoorussamik allatseqarfiat nunat avannarliit unammilleqatigiinnermut tunngasuni ataatsimiinnerinut peqataasarpoq. 2004-mi Finlandimi aamma Sverigemi ataatsimiittoqarpoq, takuuk kinguliani immikkoortoq 5. Unammilleqatigiinnermi taamatut suliaqarneq pingaartilluinnarneqarpoq, nunani avannarlerni inatsisit aamma taakkua atortinneqarnerat Kalaallit Nunaannit ilisimaneqarnissaat pingaaruteqarmat.

Unammilleqatigiinnermut inatsip nutarterniarneqarnera

Unammilleqatigiinnermut Aalajangissartunut ilaasortat

Unammilleqatigiinnermi inatsimmi § 4, imm. 2 naapertorlugu Unammilleqatigiinnermut Aalajangiisartut ilaasortai arfinillit Naalakkersuisunit ukiuni sisamani atuuttussatut toqqarneqartarput. Ataatsimiititaliaq inuussutissarsiutit tungaatigut tamatigoortumik ilisimasaqassapput, taamatullu inatsisilerinermut, aningaasarsiornermut, aningaasalersuinermut aamma pissutsinut atuisartunut tunngassuteqartunut.

2004-mi jannuaarip aallaqaataanit atortuulersumik Unammilleqatigiinnermut Aalajangiisartunut ilaasortat ukuninnga katiterneqarsimapput:

  • Siulittaasoq Carl-Aage Skovaa, inuussutissarsiuteqartut soqutigisaqarfiinut pituttorsimanngitsoq
  • Siulittaasup tullia Karsten Høy, inuussutissarsiuteqartut soqutigisaqarfiinut pituttorsimanngitsoq
  • Benny Reiding, ILIK
  • Ole Rud, Grønlands Arbejdsgiverforening
  • Lida Skifte Lennert, inuussutissarsiuteqartut soqutigisaqarfiinut pituttorsimanngitsoq
  • Leif Ellebæk Motzfeldt, inuussutissarsiuteqartut soqutigisaqarfiinut pituttorsimanngitsoq
  • Sofia Rossen, inuussutissarsiuteqartut soqutigisaqarfiinut pituttorsimanngitsoq

 

Suliassiissutit Aaalajangiisarnerillu

Unammilleqatigiinnermut Aalajangiisartut 2005-mi ataasiaannavillutik Ataatsimiipput 27. maajaimi Qaqortumi ingerlanneqarluni. Unammilleqatigiinnermut Aalajangiisartut ataatsimiinnerannut atatillugu sulilluni soraareernermi illoqarfimmi namminersortut aggersarneqarput. Ataatsimiinnermi tassani nal.ak. 2-nik sivisussusilimmi inuit 25-30-it peqataapput.

Decemberi 2005-ip naalernerani Ataatsimoorussamik Allattoqarfiup suliassiissutigineqartut 218-it nalunaarsorsimavai. Ukiup ingerlanerani suliassiissutit nutaat 26-it aalajangiisartunut takkupput. Tassa taamaalilluni paasineqarsinnaalerpoq suliassiissutitut takkuttartut ukiut tuusintilikkaat nikinnerisa nalaani ikinnerungaatsiartut.

Suliassiissutit amerlanersaat Unammilleqatigiinnermut Aalajangiisartunit 2005-mi tiguneqartut nalunaarutitut suliassiissutaapput. Tassaanerullutik suliffeqarfiit isumaqatigiissutigilikkaminnik nalunaarutigisartagaat niuerfinni unammilleqatigiinnermi kinguneqartitsisinnaasut. Ataani ersersinneqarput suliassiissutit taamaattut pingasut naatsumik nassuiaasersorneqartut unammilleqatigiinnikkut naliligassanngorlugit aalajangiisartunit suliarineqartut.

Sul. nr. 147: Kalaallit Nunaannut qaartiterutissanik il.il. eqqussuineq tunisaqartarnerlu

1. januar 1993 aallarnerfigalugu qaartiterutissanik eqqussuineq Superbyg Kalaallit Nunaat A/S-imit tiguneqarpoq tuniniaanerli Superbyg-mut KNI Pilersuisoq A/S-imullu nuunneqarluni. Taama pisoqannginnerani Grønlands Tekniske Organisationip suliassat taakku isumagisarai. Nuussineq pivoq Naalakkersuisut 1992-mi Aningaasaqarnermut Ataatsimiititaliamut inassuteqaataat tunngavigalugu. 1997-miit Sanaartornermut Aqutsisoqarfiup (Bygge- og Anlægsstyrelsip) peqqussutai malillugit Kalaallit Nunaanni niuerfinni qaartiterutissat eqqussorneqarnerat tuniniarneqarnerallu Pilersuisumit tiguneqarpoq.

Superbyg 1992-mi nuussineq naapertorlugu suliffeqarfiusussaavoq kisiartaq Kalaallit Nunaannut qaartiterutissanik eqqussuisussaq tuniniaanerli Superbygimit isumagineqartussaalluni illoqarfinni pisiniarfeqarfigisamini illoqarfinnili allani tuniniaaneq Pilersuisumit isumagineqartussaalluni.

Tamanna tunngavigalugu suliffeqarfiit marluk niueqatigiinnissamik isumaqatigiissuteqarput 1. februari 1993 aallarnerfigalugu qaartiterutissanik il.il. tuniniaasarnissamik kiisalu suleqatigiinnissamik isumaqatigiissuteqarlutik stoffit qaajasut atortullu ikiuutit suliarisarnissaat pillugu taannalun atuutilerpoq 1. januar 2003-mi.

Isumaqatigiissutaasup nalunaarutigineqarnera pissutaavoq Unammilleqatigiinnermut Aalajangiisartut tungaanniit soqutiginnilernermut. Suleqatigiinnissamik isumaqatigiissummi namminermi unammilleqatigionnikkut killilersuutaasinnaasunik soqanngilaq unammilleqatigiinnermut ajortunik sunniuteqarsinnaasunik. Akerlianilli aalajangiisartut maluginiarpaat isumaqatigiissut 1993-imeersoq nalunaarutigineqarsimanngitsoq.

Isumaqatigiissut taanna misissorneqarpoq aalajangiisartullu ulloq 23. novemberi ataatsimiinneranni Unammilleqatigiinermut Aalajangisartut aalajangerput unammilleqatigiinneq pillugu inatsimmi § 5 imm. 1 malillugu isumaqatigiissut nalunaaruteqartussaatitaanermi ilaasoq. Inatsimmi § 5 imm. 3 naapertorlugu isumaqatigiissut atorsinnaatitaassaaguni nalunaarutigineqartussaavoq isumaqatigiissutinngortinneraniit ullut 14 qaangiutsinnagit. Tassa isumaqatigiissut taanna aalajangiisartunut nalunaarutigineqanngisaannarsimammat atuutilerfia ulloq 1. februari 1993-mut utertillugu atorsinnaassuseqanngilaq.

Naak Superbyg, Pilersuisoq Naalakkersuisullu isumaqaraluartut Naalakkersuisut aalajangigaat 1992-imeersut unammillerneq pillugu inatsisip atorneqarfissaata avataani ”inatsimmik tunngavilimmik” aalajangiinerusoq Superbyg inatsisitigut aalajangikkamik kisermaassisussaatitaanermik angusaqanngisaannarsimasoq Unammilleqatigiinnermut Aalajangiisartut isumaqarput, soorluttaaq isumaqatigiissutigereerlugu kisermaassisussaatitaaneq matumani pineqanngitsutulluunniit aalajangiisartut isumaqartuarsinnartut. Akerlianilli matumani pineqarpoq Superbygimiit pissusilersorneq nammineq niuernermi nuimanerussuteqarnini sakkugalugu nioqqutissanit eqqussuisunit allaniit kissaataannjgitsumik unammillerteqarnissaq pinngitsoortissinnaasimagaa.

Unammilleqatigiinnermut Aalajangiisartut isumaqarput avaqqunneqarsinnaanngitsoq Superbyg 1993-miilli 1997 tikillugu qaartiterutissanik eqqussuinissamut kalaallit niuerfiini nuimasumik inissisimanini atornerlussimasinnaagaa unammillerneq pillugu inatsimmi § 13 unioqqutillugu. Unioqqutitsisimasinnaanerli imatut isigineqartariaqarpoq ajunngitsumik isumaqarluni pisimasutut massami Superbyg-ip suliassani suliarisimammagu naalakkersuinikkut aalajangiinerit 1992-meersut atugassarititaasa iluanni aammalu Naalakkersuisut piginnaatitsissutaat ataqqillugu.

Sanaartornermut Aqutsisoqarfiup peqqussutai 1997-meersut aqqutigalugit qaartiterutissanik eqqussuineq Pilersuisumut nuunneqarpoq Kalaallit Nunaanni qaartiterutissanik tuniniaanissamut aamma akisussaasuulersumit. Unammilleqatigiinnermut Aalajangiisartut isumaat malillugu Pilersuisoq inatsisitigut aalajangikkamik kisermaassisussaatitaanermik angusaqarsimavoq tassa peqqussutit 1997-meersut nalunaarut nr. 12-mik 1986-meersumik inatsisitigut tunngaveqarmata. Kingorna Pilersuisup kisermaassisussaatitaaneq Superbyg-mut nuuppaa. Taamaalillutik Unammilleqatigiinnermut Aalajangiisartut periarfissaqanngillat unammillerneq pillugu inatsimmi iliuuseqarnissamut aalajangersakkat atussallugit.

Kingorna Unammilleqatigiinnermut Aalajangiisartut unammillerneq pillugu inatsimmi § 16 naapertorlugu Ineqarnermut Attaveqaqatigiinnermullu Naalakkersuisumut saaffiginnissuteqarsimapput kalaallit niuerfiisa qaartiterutissanik eqqussuisinnaanerat tuniniaasinnaanerallu inatsisitigut pituttorsimasuujunnaarsinnissaa innersuussutigiitigalugu suliffeqarfiit allat aamma niuernermut tassunga isersinnaaqqullugit. Aalajangiisartut isumaat malillugu tamatuma ilaatigut aamma akit qaffasissusiat sunnersinnaavaa.

Susassaqarfik pillugu nalunaarutip allanngortinnissaa pisortaqarfiup sulissutigaa 2005-illi naanerani suliaq siuariartorsimanersoq Unammilleqatigiinnermut Aalajangiisartut suli takusinnaassimanngilaat.

Sul nr. 177: Post Greenlandip aamma Air Greenlandip akornanni allakkanik poortukkanillu timmisartuussisarnissaq pillugu isumaqatigiissut

1. august 2004-miit Kalaallit Nunaanni allakkat poortukkallu assartorneqartarnissaat pillugu Post Greenland-ip aamma Air Greenland-ip akornanni isumaqatigiissut nutaaq atuutilerpoq. Post Greenland-ip isumaqatigiissut Unammilleqatigiinnermut Aalajangiisartunut nassiuppaa isumaqatigiissutip nalunaaruteqarnissamut pisussaaffiunersoq pisussaaffiunnginnersorluunniit nalilertinnissaa siunertaralugu.

Isumaqatigiissummi pineqarpoq Post Greenland sinnerlugu allakkat poortukkallu assartortarnissaat suliarisarnissaallu Air Greenland-ip Kalaallit Nunaanni timmisartuussisarnikkut aqqutigisartagai atorlugit. Air Greenland-ip atortut sulisussallu atugassaritissavai allakkat poortukkallu silaannakkut assartornissaannut niuernikkut susassaqarfimmi matumanai – Kangerlussuaq, Nuuk, Sisimiut, Maniitsoq, Aasiaat, Ilulissat, Uummannaq aamma Upernavik.

Isumaqatigiissut 1. august 2004-miit atuutilerpoq 31. oktober 2007 tikillugu atuuttussaalluni piffissamilu isumaqatigiissuteqarfigisami atorunnaarsinneqarsinnaannani.

Post Greenland allakkat poortukkallu allatut assartornissaannut mattusimaneqanngilaq soorluttaaq Air Greenland aamma assartuinissamut periarfissaannik killilersuunneqarnani. Aammattaaq Air Greenland periarfissaqarpoq assartuisussaq alla atorsinnaassallugu taamaaliornissaq pisariaqartinneqartutut isigineqarpat.

Tassa illuatungeriit arlaannaallluunniit kisermaassisussaatitaanngilaq assigisaannilluunniit pilersitsivigineqarnani.

Suliassiissut Unammilleqatiginnermut Aalajangiisartut suliaraat isumaqarlutillu isumaqatigiissut nalunaarutigissallugu pisussaaffittaqanngitsoq taamaattumillu taanna isumaqatigiissummi illuatungeriinnut utertinneqarpoq.

Aammattaaq aalajangiisartut Post Greenland-mut innersuussutigaat isumaqatigiissut nutarterneqannginnerani imaluunniit isumaqatiginninniutigeqqinnginnerani niuerfinnut misilittarniaqqullugu – suliariumannittussarsiuussinikkut.

Sul nr. 188: Puisit amii pillugit Great Greenlandip aamma KNAPK’p akornanni tunisaqartarnissamik isumaqatigiissut

Suliassiissummi pineqarpoq Great Greenland-ip aamma KNAPK’p akornanni tunisaqartarnissamik isumaqatigiissut aammalu 2004-mi 2005-imilu puisit amiinik tunisaqartarsimanermut tapiissutinik pissarsinissamut periarfissaq. Taanna aallaaveqarpoq Unammilleqatigiinnermut Aalajangiisartut ulloq 17. juni 2004-mi ataatsimiinnerannit tassani aalajangiisartut aalajangersumik oqaatigimmassuk 2003-mut 2004-mullu puisit amiinik tunisaqartarnissaq pillugu kiffartuussinissamik isumaqatigiissummik Aalisarnermut, Piniarnermut Pisortaqarfik aammalu Great Greenland A/S isumaqatigiissutaat nalunaaruteqartussaatitaanermut ilaammat.

Tassunga atatillugu puisit amiinik tunisaqarnermut tapiissutinik tunniussinissamut maleruagassat atuuttut immikkoortillugit misissorlugit aallartinneqarput. Unammilleqatigiinnermut Aalajangiisartut ulloq 23. november 2004-imi ataatsimiinneranni aalajaniisartut aalajangiuppaat Aalisarnermut Piniarnermullu Naalakkersuisoq pisortatigoortumik saaffigineqassasoq innersuussutigiitigalugu inuussutissarsiutigalugu piniartut Great Greenland-innaanngitsumut tunitsivinnullu allanut amminik tunisaqarnissamik toqqaasimasut siunissami tapiissutisinissamut periarfissaqartinneqartariaqartut tunisaqarnermut tapiissutinik pissarsinissamut piumasaqaatit atugassarititaasullu Naalakkersuisut aalajangersgaat naammassisimapptigik.

Taamanikkut Naalakkersuisuusimasoq Rasmus Frederiksen ulloq 21. februar 2005-mi akissuteqarpoq oqaatigalugu Aalisarnermut Piniarnermullu Pisortaqarfiup sulissutigerusukkaa pusit amiinik tunisaqarnermut tapiissutit aqutsiviginerannut periaatsit nutaat aalajangersorneqarnissaat. Tamannalu ima pissasoq pisariaqarpat 2006-mut kiffartuussinissamik isumaqatigiissutissaq malitseqartinneqassasoq innersuussutinik Unammilleqatigiinnermut Aalajangiisartut pisortaqarfimmut saqqummiussai tunngavigalugit.

Ulloq 18. april 2005-mi Aalisarnermut Piniarnermullu Pisortqarfiup nalunaarutigaa – Great Greenland A/S aamma KNAPK sinnerlugit – 2005-imut puisit amiinik tunisaqartarneq pillugu isumaqatigiissut.

Unammilleqatigiinnnermut Aalajangiisartut ataatsimiinnerminni nalunaarutigineqartut marluutillugit oqaluuseraat aalajangiullugulu isumaqatigiissut 2004-mut atuuttoq nalunaarutigissallugu pisussaatitaaffiusoq aammalu nalunaarutigineqarsimannginnerata kingunerisaanik atuutinneqarsinnaanngitsoq. 2005-mut isumaqatigiissummut tunngatillugu aalajangiisartut aalajangerpaat isumaqatigiissut taanna nalunaarutigissallugu pisussaaffigineqartoq kingusinaartumillu nalunaarutigineqarsimanerata kingunerisaanik aatsaat atuuffeqalersimasoq piffissamit nalunaarutigineqarfianiit.

Naggasiut – Post scriptum: 2006-mut puisit amiinik tunisaqarnermut tapiissutit pillugit isumaqatigiissutip nutaap nalunaarutigineratigut Unammilleqatigiinnermut Aalajangiisartut ajoraluartumik paasisinnaassimavaat aalajangiisartut innersuusstaanut pisortaqarfik malitseqartitsisimanngitsoq.

 

Nunat Avannarliit Suleqatigiinnerat

Kalaallit Nunaat 1997-imiilli unammilleqatigiittarnermi nunat avannarliit ataatsimoorussamik suleqatigiinnerannut ilaasarpoq. Suleqatigiissut ukiumut ataasiarlutik eqikkaallutik ataatsimiittarput ataatsimoorussamik ajornartorsiutaasut oqaluuserineqartarlutik misilittakkallu paarlaateqatigiissutigineqartarlutik kiisalu pisortat (direktørit) ataatsimiittarlutik nunani taakkunani unammilleqatigiinnermut oqartussaasut atorfilittaat qullersaasut unammilleqatigiinnermi suliassiissutit, aaqqissuussaanerit, inatsisinik atortitsineq il.il. pillugit misilittakkat paarlaateqatigiinnissaannut periarfissaqartarlutik. Aammattaaq nunat avannarliit ataatsimoorussamik unammilleqatigiinnikkut suleqatigiinnermi ullumikkut unammilleqatigiinnermi ajornartorsiutit nalunaarusiuunneqartarput. Nunat avannarliit ataatsimiittarnissasa pilersaarusiorneqartarnerat ingerlanneqartarnerallu nunat avannarliit unammilleqatigiinnermi oqartussaasuisa akornanni sinnersaraattumik isumagineqartarpoq. 2005-mi pisortat Roskilde-mi ataatsimeeqatigiipput aammalu eqikkaasumik ataatsimiinneq annertooq nunait tamanit immikkut 3 – 12-nit peqataaffigineqartoq Tórshavnimi ingerlannearpoq. 2007-mi ataatsimiinnissarsuaq septemberimi Ilulissani pisussatut pilersaarusiorneqarpoq Kalaallit nunaat ataatsiinnissamut annertuumut aggersaasussaalluni.

Direktørit Roskildemi ataatsimiinnerat, maj 2005

Ataatsimiinnermi tassani peqataapput nunanit avannarlernit allanit aammalu nunani avannarlernit killernit arfiniliusunit direktørit inuillu attaveqataasartut. Kalaallit Nunaata sinniisuutitaraa Ataatsimoorussamik Allattoqarfimmi pisortaq. Ataatsimiinnermi nunani ilaasortaasuni kingullermiilli pisimasut eqqartorneqarput soorluttaaq nunat angisuut nunani tamalaani unammilleatigiittarnermi suleqatigiinnernut peqataasarnitik nassuiaateqarfigaat.

Peqatigitillugu Tórshavnimi ataatsimiinnermi ataani pineqartut pilersaarusiornerat sammisassartaallu oqaluuserineqarput.

Unammilleqatigiinneq pillugu Savalimmiuni ataatsimiinneq, august 2005

Nunani avannarlerni unammilleqatigiinnermut oqartussaasut ukiumoortumik ataatsimiipput Savalimmiuni Tórshavnimi ulluni 24. – 26. august.

Ataatsimiinnermi – nunani ataasiakkaani inatsisit allannguutaat, taaneqarsinnaasut allat suliassiissutillu anginerusut pisarneq malillugu nalinginnaasumik nassuiarneqarnerisa saniatigut – eqimattakkuutaarluni sulisoqarpoq unammilleqatigiinnermi inatsisinik unioqqutitsinermut akiliisitsisarnerit uuttortarneqarlutik, ulluinnarni nioqqutissanut aningaaseriveqarnermut isersinnaanissamut aporfiusartut pillugit aammalu avatangiisit unammillernerlu pillugit politikkerisat akornanni suleqatigiinneq pillugu. Ataatsimiinnermi naggataagut ”nunamiit nerrivimmut”-suliniut nassuiaatigineqarpoq ukiup ingerlarngata kingusinnerusortaani Nordisk Ministerrådip aaqqissuussaanik nalunaarusiaq tamanut ammasumik saqqummiunneqarluni.

6. 2005-IMUT NAATSORSUTIT

Unammilleqatigiinnermut Aalajangiisartunut, Atuisartut Siunnersuisoqatigiivinut aammalu Atuisartut Naammigittaalliuutinut Ataatsimiititaliaanut 2005-mi Aningaasanut inatsimmit aningaasaliissutaasut katillugit 3.686.000 kr.-iupput.

Unammilleqatigiinnermut Aalajangiisartut 2005-mi immikkut ittunik aningaasartuuteqarput katillugit kr. 296.752-nik. Agguarnerat takunearsinnaasoq ataani immikkuualuttortalersukkamik naatsorsuutini.

Scroll to Top