Itigartitsisut utoqqalinersiutisialimmut tapisianik aapparisap ilisiartonissamut angalassutissaanut, pitsorluttoq

Aalajangiineq

Kommunep aalajangiinera aalajangiusimaneqarpoq, kisianni allamik tunngavilerlugu. Kommunip aalajangiinerani inerniliunneqartoq eqqortuuvoq. Tassa naammagittaalliuutit isumaqatigineqanngilaq.

Suliaq Utoqqalinermi pensionisiat pillugit Inatsisartut inatsisaat nr. 20, 23. november 2015-imeersoq kingusinnerusukkut allannguuteqartoq, kiisalu Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq kingusinerusukkut allannguuteqartinneqartoq naapertorlugit aalajangiiffigineqarpoq.

Nassuiaat:

Suliami erserpoq utoqqalinermi pensionisiaqartuusutit, katissimasuullutillu.

Ernerit ulloq 12. september 2017-imi toqukkut qimaguppoq, ullorlu taanna Kommunemut angalanissavit aningaasartuutaasa akilerneqarnissaanut, aappavillu ilaginissaanut qinnuteqarputit, ernerpit illoqarfimmi ilissaanissaanut atatillugu angalanissannut ikiortigerusullugu. Nuliavit angalanissaanut aningaasartuutit matussuserneqarnissaannut qinnuteqaateqarputit, angalanerni ikiorniassammatit, pitsorluttuunerit, KOL-imik nappaateqarnerit uummatilunnerillu pissutigalugit.

Kommune ulloq 12. september 2017-imi aalajangiivoq, tassani kommunip ernerpit ilineqarnissaanut peqataasinnaanernut atatillugu angalanermut aningaasartuutit akilerneqarnissaannut akuersisimapput. Kommunip aamma nalunaarfigaatit angalanissannut nuliavit ikiortissatut ilaanissaanut angalanermi aningaasartuutit akilerneqarnissaannut itigartitsilluni.

Angalanissavit aningaasartuutaasa matussuserneqarnissaannut kommunip inatsisitigut tunngavigisatut Utoqqalinersiaqarneq pillugu Inatsisartut inatsisaat nr. 20, 23. november 2015-imeersumi § 17, imm. 1, aamma imm. 6 innersuussutigai. Kommunip aalajangersakkat issuaaffigisimavai.

Nuliavit angalanissaanut aningaasartuutit matussuserneqarnissaannut kommunip itigartitsinerminut tunngavittut innersuussutigaa nakorsap oqaaseqaataa ulloq 12. september 2017-imeersoq, nakorsallu oqaaseqaataanit uku issuaaffigai: *Naatsorsuutigaara angalasinnaassaguni ingiaqateqarnissani pisariaqartissagaa.”

Kommunip ilaatigut nangillugu oqaaseqarpoq: ”Nuliat pisortanit ikiorsiissutisisanngilaq, tamannalu pissutigalugu angalanissaanut aningaasartuutit matussusissallugit inatsisitigut tunngavissaqanngilaq.”

Nuliavit angalanissaanut aningaasartuutit matussusernissaannut kommunip itigartitsinermini inatsisitigut tunngavimmik innersuussinngilaq. Kommuni eqqortumik naammagittaalliuuteqarnissamut ilitsersuivoq.

Ulloq 13. september 2017-imi kommunip aalajangiissutaa, ernerpit ilisaanissaanut atatillugu angalanissannut nuliavit ikiortitut ilaginissaanut qinnuteqaatit kommunimit itigartitsissutigineqartoq pillugu Isumaginninnermi Naammagittaalliuuteqarfimmut naammagittaalliuutigaat.

Naammagittaalliuutinni allassimavat, (ikiorteqarnak) ingiaqateqarnak pisussinnaannginnerit. Naammagittaalliuutinnut tunngavilersuutitut allassimavat, ernerit ukiut arlallit takusimannginnakku, ilisaaneranut peqataarusullutit, aamma ernerpit qatanngutai ilagerusullugit.

Isumaginninnermi Naammagittaalliuuteqarfik kommunimiit allagaatinik nassuiaammillu tigusisimavoq.

Kommunip Isumaginninnermi Naammagittaalliuuteqartarfimmut ilisimatitsissutigisimavaa, ernerpit illoqarfimmi ilisaanissaanut atatillugu ilinnut nuliavillu peqataanissaanut angalanissassinni aningaasartuutit matussuserneqarnissaanut kommune qinnuteqarfigisimagit.

Kommunip suliaq misissorsimavaa illillu angalanerni aningaasartuutit matussuserneqarnissaat pillugu aalajangersimallutik. Utoqqalinermi pensionisiaqartuugavit inatsisitigut tunngavilersuutitut Utoqqalinermi pensionisiat pillugit Inatsisartut inatsisaat nr. 20, 23. november 2015-imeersumi § 17 imm. 1, aamma 6 kommunip innersuussutigai.

Nuliavit angalanissaanut aningaasartuutit matussuserneqarnissaanut qinnuteqaatit kommunip itigartitsissutigisimavaa. Kommunip ilisimatitsissutigaa, nuliat uillarnersiutisiaqartuuvoq, tamannalu pissutigalugu kommunip nuliat imminut pilersortutuut isigaa. Taamaalilluni kommuni inatsisitigut tunngavissaqanngilaq nuliavit angalaneranut aningaasartuutinik matussusiliinissaminut.

Kommunip aamma ilisimatitsissutigaa, aallaqqaataani illit kisimiillutit angalanissat kissaatigisimanngikkit, kisiannili taamaakkaluartoq ulloq 14. september 2017-imi ilisimatitsissutigaat kisimiillutit ilisaaffisaanukarnissat kissaatigalugu.

Nakorsap oqaaseqaataani 12. september 2017-imeersumi illit pillutit allassimavoq: ”Napparsimasoq malunnaatilimmik anniarnerminut atatillugu ajornartorsiuteqarpoq, KOL-imik nappaateqarnera ajorsiartuinnarpoq uummatilullunilu.

Naatsorsuutigaara angalasinnaassaguni ingiaqateqarnissani pisariaqartissagaa.”

Kommunimi sulisut akornanni 12. september 2017-imi mailikkut allaffigeqatigiinnermi takuneqarsinnaavoq, Illoqarfimmi ilisinissamut nuliavit ilaginissaa kissaatigalugu oqaaseqarsimasutit, pitsorluttuunerit pissutigalugu, ilaannilu nissutit ingerlasinnaajunnaartarmata. Qitiluttuuvutit, nuliallu angalaqataassaguni ikiortussaallutit.

Inuit allattorsimaffiini paasissutissani allassimavoq katissimasuusutit. Illit nuliallu meeraqanngilasi. Immikkut illit inersimasunik meeraqarputit, aamma nuliat immikkut inersimasumik ataatsimik meeraqarpoq.

Inatsisitigut tunngavigisaq:

Utoqqalinersiaqarneq pillugu Inatsisartut inatsisaat nr. 20, 23. november 2015-imeersoq kingusinerusukkut allannguuteqartinneqartumi § 17, Imm. 6 naapertorlugu Utoqqalinersiaqartut, tak. imm. 1, ukiumut ataasiarlutik najukkap angerlarsimaffigisap avataanut qani-gisaminni toqusoqartillugu ilisisoqarnerani peqataajartornissamut angalanermut aningaasartuutit matussuserneqarnissaannut pisinnaatitaapput.

Aalajangersakkamut nassuiaatinit erserpoq ilaatigut ”Aalajangersagaq malillugu akunnittarfimmi il.il. ineqarnermut akiliutinut aningaasatigut ikiorsiisoqarsinnaassanngilaq, taamaallaalli angalanermut aningaasartuutit matussuserneqassallutik.”

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersoq kingusinerusukkut allannguuteqartinneqartoq § 24 naapertorlugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Naliliineq:

Isumaginninnikkut Naammagittaalliuuteqartarfiup siulittaasua isumaqarpoq, nuliavit angalanissaanut aningaasartuutit matussusernissaanut pisinnaatitaanngitsutit, ernerpit ilisaanissaanut angalanissannut atatillugu ikiortaanissaa siunertaralugu ingiaqataanissaanut.

Tamatumunnga tunngavilersuutaasoq tassa, Utoqqalinersiaqarneq pillugu Inatsisartut inatsisaat nr. 20, 23. november 2015-imeersumi kingusinnerusukkut allanngortinneqartu-mi § 17, imm. 6 naapertorlugu utoqqalinersiutilik toqusoqartillugu ilisisoqarnerani peqataajartornissamut angalanermut aningaasartuutit matussuserneqarnissaannut periarfissaqarnera inatsisitigut tunngavissaqanngitsoq.

Kommunip aalajangiinermini tunngavilersuinermini innersuussutigaa, nuliavit pisortanit ikiorsiissutisisannginnera. Kommunip innersuussutigisussaagaluarpaa, Utoqqalinersiaqarneq pillugu Inatsisartut inatsisaat nr. 20, 23. november 2015-imeersumi kingusinnerusukkut allanngortinneqartumi § 17, imm. 6 kisiat naapertorlugu, inatsisitigut tunngavissaqarmat utoqqalinersiutilik Kalaallit Nunaanni qanigisaminni toqusoqartillugu ilisisoqarnerani peqataajartornissamut angalanermut aningaasartuutit matussuserneqarnissaannut pisinnaatitaavoq.

Isumaginninnermi Naammagittaalliuuteqartarfiup siulittaasuata Kommunemut erseqqissaatigissavaa, suliassat suliarineqartarnerat pillugu inatsimmi piumasa-qaatitut allassimasut aalajangiinermi malinneqartussaammata tassunga ilanngullugit inatsisini malittarisassanut attuumassuteqartunut innersuussineq aamma tunngavilersuisussaatitaaneq.

Aalajangiineq:

Kommunep aalajangiinera aalajangiusimaneqarpoq, kisianni oqaatigineqartoq tunngavilersuutigalugu.

Inussiarnersumik Inuulluaqqusillunga

Siulittaasoq

Allakkap assilinera: Kommunemut, allaffia pingaarneq aamma allaffik.

Inatsisit toqqammaviit:

Utoqqalinersiaqarneq pillugu Inatsisartut inatsisaat nr. 20, 23. november 2015-meersoq

Aningaasaqarnermut tapeq aamma saniatigut tapeq

§ 17. Utoqqalinersialimmut aningaasaqarnikkut immikkut ittumik ajornartorsiuteqartumut imaluunniit utoqqalinersialik aningaasaqarnikkut annertuumik ajornartorsiuteqalernissaa ilimanaateqarpat aningaasaqarnermut tapeq tunniunneqarsinnaavoq.

Imm. 2. Aningaasaqarnermut tapeq, tak. imm. 1, utertillugu akileqquneqarsinnaavoq:

  1. Illersorneqarsinnaanngitsumik aningaasanik aqutsinerlunneq pissutigalugu aningaasaqarnermut tapeq tunniunneqarpat, imaluunniit
  2. Utoqqalinersiaqartoq aningaasaqarnermut tapinik pisartagaqartoq kingusinnerusukkut aningaasanik piffissamut pineqartumut aningaasaqarnermullu tapit assinganik siunertaqartumik pissarsisimappat.

Imm. 3. Utertillugit akileeqqusineq aatsaat piumasarineqarsinnaavoq utoqqalinersialimmut tapinik aningaasaliissuteqarnermut atatillugu utertitsisussaatitaanermik ilisimatitsisoqarsimappat.

Imm. 4. Saniatigut tapeq aningaasaqarnermut tapiliunneqartut saniatigut tunniunneqarsinnaavoq aningaasartuutit aalajangersimasut akilereernerini utoqqalinersiallit aningaasat namminneq atorsinnaasaat pillugit kommunip minnerpaaffiliisimanera tunngavigalugu.

Imm. 5. Utoqqalinersialimmut Kalaallit Nunaata avataani aalajangersimasumik najugalimmut aningaasaqarnermut tapeq aamma saniatigut tapeq tunniunneqassanngilaq.

Imm. 6. Utoqqalinersiaqartut, tak. imm. 1, ukiumut ataasiarlutik Kalaallit Nunaanni najukkap angerlarsimaffigisap avataanut qanigisaminnik toqusoqartillugu ilisisoqarnerani peqataajartornissamut angalanermut aningaasartuutit matussuserneqarnissaannut pisinnaatitaapput.

Imm. 7. Aningaasaqarnermut tapit aamma saniatigut tapit pillugit, aamma aningaasat nammineq atorsinnaasat ilanngullugit Naalakkersuisut malittarisassanik ersarinnerusunik aalajangersaassapput.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq

§ 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15.

Scroll to Top