illup iluata silaannaa

Aalajangiineq

Ineqarnermut Naammagittaalliuuteqartarfik isumaqarpoq inissiap, pisattat il.il. misissorneqarnissaannut Inissiaatileqatigiiffik inniminniisariaqartoq inissiarlu suli ima oqoqartigippat/oqoqarneranilluunniit malunnartoqarpat illup iluanut sunniuteqartumik taava inissiaatileqatigiiffik suliffeqarfiup XZ-ip nalunaarusiaanit allassimasutut inissiamik iluarsaassisussaallunilu-/aserfallatsaaliuisussaavoq.

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu aaliangiisoqarpoq. 

Suliami allagaatit: 

  1. A + B. Attartornermut isumaqatigiissut 22. oktobari 2013-imeersoq, ilassutitalik.
  2. Siusinnerusukkut attartortitsinermi oqummut atatillugu ineqartumit Inissiaatileqatigiiffik Y-imut 24. septembari 2013-imi oqaluttuarineqarsimasut.
  3. Amigaatit pillugit attartortumit ilisimatitsissutit 22. oktobari 2013-imeersut.
  4. Inissiaatileqatigiiffiup inissiamik 11. apriili 2013-imi iluarsaassinera
  5. Oquk pillugu nalunaarusiaq sullivimmit ZZ-mit ulloq 19. decembari 2015
  6. Inaarutaasumik nalunaarusiaq ZZ-imit ulloq 26. februaari 2016
  7. Oqummik misissuineq XXZ-mit ulloq 6. januaari 2016
  8. Nakorsamit XY-miik oqaaseqaat ulloq 7. januaari 2016
  9. Iluarsartuussereernerup kingorna misissuineq XXZ-mit ulloq 26. marsi 2016
  10. Misissuinermit nalunaarusiaq XXZ-mit ulloq 7. apriili 2016
  11. Inissiamit utaqqiisaa najukkamit 20. apriili 2016-imi nuunneq pillugu Inissiaatileqatigiiffik Y-ip naammagittaalliuuteqartumut
  12. XXZ, inuk ZY-mik – oqaaseqaatit ulloq 25. apriili 2016 XXZ`p nalunaarusiaa 7. apriili 2016-imeersoq pillugu Inissiaatileqatigiiffik Y-mut
  13. Inissiaatileqatigiiffik Y attartortumut ulloq 9. maaji 2016
  14. Ineqarnermut Naammagittaalliuuteqartarfimmut naammagittaalliuut 17. maaji 2016
  15. Sanasoq XXX oqummik misissuineq ulloq 31. maaji 2016
  16. Sanasoq XXX oquiaaneq ulloq 24. juuni 2016.
  17. Ineqarnermut Naammagittaalliuuteqartarfimmut Inissiaatileqatigiiffik Y oqaaseqaatai ulloq 27. juuni 2016
  18. Suliamik ingerlatsineq pillugu attartortup nassuiaataa ulloq 29. juuli 2016
  19. Attartortumiit Ineqarnermut Naammagittaalliuuteqartarfimmut ulloq 12. januaari 2017
  20. Suliffeqarfiup XXZ oqummik misissuinera ulloq 7. apriili 2017

Inissiaatileqatigiiffiup Y-ip suliffeqarfiullu XXZ-ip akornanni attaveqatigiittarnerat maaji/juuni 2017

Nassuiaat:

Attartornermut isumaqatigiissummi allaqqavoq inissiaq XXX, Illoqarfimmi Z-mi tigusimagissi 1. november 2013-imi. Inissiaq 75,80 m²-iuvoq ininut sisamanut agguaqqalluni.

Siusinnerusukkut najukkassinni YY-miittumi aamma utaqqiisaasumik najugarisimasarsi XXX-imiittoq oqoqalersimasut paasineqarmata inissiaq initaarivarsi.

XXX-imut iserternissinnut atatillugu inissiaq nutarterlugu iluarsaattuunneqarpoq tassami inimi ineeqqanilu marlunni natit taarserneqarmata. Matut arfineq-marluk sikaaviilu portusuut taarserneqarput, soorlu aamma uffarfimmi silaannarissartarfiit taarserneqartut. Uffarfimmi flisit kannerilu misissorlugillu iluarsaanneqarput klinkinillu nutaanik natilerlugu. Iikkat, qilaat, atortorissaarutit, kiassaatit qisuusinnaasullu tamarmik qalipanneqarput.

Iluarsartuussinerit ilanngussami 16. apriili 2013 ullulerneqarsimasumi ersipput.

2015-ip ingerlanerani ilissi nammineq meeqqasilu iluaagisaqartarlerpusi oqummik pissuteqarsinnaasumik taamaammallu Inissiaatileqatigiiffik Y-imut saaffiginnillusi.

Taamaammat inissiaatileqatigiiffiup suliffeqarfimmut XZ-mut inniminniivoq, suliffeqarfillu 19. decembari 2015-imi inissiamik misissuivoq.

Misissuineq malillugu uffarfiup eqqaaniittumi ineeqqap teqeqquani annertussusaa (kategori) C-mut naleqquttumik oqoqartoq paasineqarpoq.

Inimi, uffarfiup eqqaaniittumi ineeqqami isaarissallu eqqaaniittumi ineeqqami silaannaap pujoralallip misissornerani annertussutsip (kategori) A saniatigut oqummik takussaasoqanngilaq.

Igaffiup eqqaaniittup ineeqqap pujoralaqanngitsup misissornerani oqummik oquulluunniit akuinik peqqissutsimut ulorianarsinnaasunik aamma nassaartoqanngilaq.

Nerisarfimmi igalaat ataanni iikkamit, iikkamit betoniusumit aamma sinittarfinni iikkanit taamatullu isaarissamiittumi atisanut nivinngaavimmit misissugassatut tiguneqartunik XZ-ip 26. februaari 2016-imi immikkut misissuereernerata kingorna oquusinnaasumik takussutissaqanngilaq.

Misissuineq naammaginnginnassiuk XXZ-mi suliffeqarfik YY misissuinissaanut inniminniivusi. 6. januaari 2016-imi misissuisoqarpoq.

Misissuineq malillugu sinittarfimmi annertussuseq (kategori) B-mut naleqquttumik oqoqartoq paasineqarpoq. Inimi igalaat ataanni kategori B nassaarineqarpoq. Isaarissami silaannarmit aamma oqummik tigusanit misissukkat kategori B-mik nassaartoqarpoq. Sikaaviup portusuup tunuani iikkamit gipsiusumit misissukkat kategori C-mik nassaarput.

Nakorsap XXX-ip oqaaseqaammini 7. januaari 2016-imeersumi uppernarsarpaa inissinni oqoqarnera pissutaalluni ilissi qitornasilu iluaagusuuteqartusi. Iluaagusuutisi tassaapput qasoqqaneq, sakissakkut anniarneq, qingap sulluini iluaagusunneq, anersaartorniarnikkut iluaalliorneq niaqorlunnerlu. Inissiap nammineq misissorneqarsimanera innersuussutigaa tassami ilaatigut sinittarfimmi annertuumik oqoqartoq paasineqarsimammat.

Ilissi qitornassilu nakorsamit misissorneqarsimanersi tunngavigalugu Nakorsap oqaaseqaataa allanneqarsimanngitsutut isikkoqarpoq.

Inissiaatileqatigiiffiup isaarissami sikaaviup portusuup naqqani oquk peerniarlugu  aammalu sinittarfiup teqeqquata igaani gipsi iluarsiniarlugu iluarsartuussereernerata kingorna XXZ 26. marsi 2016-imi misissugassanik nutaanik tigusivoq. Misissuinermit erserpoq kategori B-mut naleqquttumik sinittarfimmi isaariamilu oqoqartoq. Ineqartunut iluaagusutsitsisinnaasumik inissiami oqoqartoq naliliiffigineqarpoq.

Tamatuma kingorna inissiaatileqatigiiffiup inissiaq XZ-mut misissorteqqippaa. Tamanna pisimavoq 7. april 2016-imi. Sinittarfimmi igalaat ataanni aamma atisanut sikaaviup tunuani kiisalu isaarissami iikkani uffarfiup tungaanut inillu tungaanut misissukkat kategori A-p saniatigut oqoqarneranik takussutissartaqanngillat.

Allakkatigut 20. apriili 2016-imeersukkut inissiaatileqatigiiffiup ilisimatippaasi inissiami oqoqarneranik misissuineq maanna naammassimmat inissiamilu oqoqanngimmat utaqqiisaa inigisarsi XXY qimallugu YYX, Illoqarfimmi Z-mi uterfigeqqissagissi.

Inissiaatileqatigiiffimmut qarasaasiakkut allakkamini 25. apriili 2016-imeersuni suliffeqarfiup YXX, XXZ oqaatigaa isumaqatigiissut malillugu sullivimmit attuumassuteqanngitsumit soorlu suliffeqarfik YY misissuineq ingerlanneqartussaagaluartoq. Taamaammat XZ-ip atoqqinneqarsimanera naammaginngilaa.

Utaqqiisaa najukkassi qimannissaa pillugu Inissiaatileqatigiiffiup Y-ip allagai akissuteqarfigigakkit Illit XXX oqaatigaat ilaqutariit inigisaminnut uteqqinnginneranni assigiinngitsuni oqoqarfiusut iluarsaanneqarsimanerat tassunga ilanngullugu siusinnerusukkut oqummik nassaarfiusimasut aammalu inip sananeqaataa ilanngullugu uppernarsineqaqqaartariaqarput. Tamatuma saniatigut ZZX malillugu inissiap imermik ajoqusersimanera tamatumalu kingorna ajoqusikkat iluarsineqarsimanersut iluamik erseqqissarneqarsimannginnera innersuussutigaat.

Suulluunniit qaavinit misissugassanit tigusinerup naammaginannginnera naqqulli ataani oqoqarnersoq misissussallugu pingaaruteqartoq innersuussutigaat.

Attartortut tassalu ilissi inissiami tipimiunersi naammagittaalliortarnersi malillugu sullivik Sanasoq YXY inissiaatileqatigiiffiup qinnuigaa inissiaq misissoqqullugu inissiami suli oqoqarsinnaanerata paasineqarnissaa siunertaralugu.

Sanasoq YXY 31. maaji 2016-imi ikkami ungallermi inimi igalaat ataanni putuseqqaarluni misissuivoq. Gipsimik qillerinerup takutippaa siusinnerusukkut immattoqarsimasoq isugutattoqarneranilli malunnartoqanngitsoq.

Putuliorluni misissuinerup takutippaa inimi naqqup ataani aamma sinittarfimmi teqeqqumi kategori B-mut naleqquttumik taamaallaat oqoqqartoq. Tamatuma saniatigut naqqup ataani oqoqarneranik takussutissaqanngilaq qillerilluni misissukkat kategori A-miittut eqqaassanngikkaanni.

Inissiaq pitsaalluinnartoq Sanasoq inerniliivoq siunnersuutigaali inimi iigaq ammartariaqartoq oqoqannginnera qularnaarniarlugu.

Oqummik nassaarfiusut salinneqareernerisa kingorna igalaat ataanni siusinnerusukkut imermit ajoquserneqarsimasumi gipsip peerneqarnerata kingorna oqoqarneranik takussaasoqanngilaq kategori A eqqaassanngikkaanni.

Siusinnerusukkut inigisassi XXY-miittup maannakkullu inigisassi YYX-imiittup silaannalunnerannik ajornartorsiutaasut allakkatigut 27. juuni 2016-imeersukkut Ineqarnermut Naammagittaalliuuteqartarfimmut Inissiaatileqatigiiffiup nassuiaatigai.

Inissiaatileqatigiiffiup allagai 27. juuni 2016-imeersut qarasaasiakkut 29. juuli 2016-imi akissuteqarfigaasi tamatumalu saniatigut XXY-mi YYX-imilu oqoqarneranik sullissinermut isummasi nassuiaatigalugit.

Ukiup ataatsip ingerlanerani suliap suli inaarneqannginnera pillugu 12. januaari 2017-imi naammagittaalliuutigaarsi. Ilisimatitsivusi arfineq pingasoriarlusi nooqattaareernissi kingorna inigisassinnut utertariaqarsimasusi. Ilisimatitsivusi ineeraq ataaseq papkassinik ulikkaartoq ineeqqamiissinnaanngitsusilu tassaniikkaangassi ajortittarassi. Puuiaasinnaanngilasi oquup ilisarnaatai sumi tamaaniimmata. Ineeqqap allap qilaavani arlalinnik pullartaasaqarpoq aammalu qilaap iikkallu akornanni qernertunik quppaqartiterluni. Oqussunnimmat tassani ineeqqamiissinnaasimanngilasi.

Inimi sofami siniffiliorlusi sinittarpusi tassanili aamma ajortittarlusi pingaartumik anorleraangat oquk silaannarmiileraangat. Ilisimatitsivusi ajuinnavittarlusi aammalu nakorsat oqaaseqaataat Inissiaatileqatigiiffik Y-mik qisuariarfigineqarneq ajortut.

Kiisalu ilisimatitsivusi tamassi suliffeqarasi taamaammallu inigisassi suliffeqarfik YYX-mut misissortinnissaa aningaasassaqartinnasiuk.

Inigisassinni silaannalunneranik pissuteqartumik iluaagisassinnik naliliinerit assigiinngitsorpassuit kingunerisaannik Ineqarnermut Naammagittaalliuuteqartarfimmit inissiaq oqoqarneranik misissueqqullugu  suliffeqarfik XXY qinnuigineqarpoq.

Inigisami oqoqarneranik misissugassanik tigusinerit 20. marts 2017-imi pisimapput. Misissuinermi init tamarmik silaannarmik misiliinernik tigusiffigineqarnikuupput aammalu sinittarfimmi illullu qaliani pingasunik qaavaniit misissugassanik tigusisoqarsimalluni.

Silaannarmik misissuisoqarpoq inissiap silaannalunnerata misissorneqarnissaa siunertaralugu. Silaannaq uuttorneqarmat silaannaq annertuumik sakkortuumillu minguttaqarnersoq misissorneqarpoq. Tassunga tunngatillugu innersuussutigineqassaaq silaannaq uuttorneqartoq annertuumik sakkortuumillu mingussimatillugu oqoqarnera paasineqartarmat oquup ilaa inimiittoq silaannakkoorluni siammarsinnaasarmat. Silaannaq uuttorneqartoq annertuumik sakkortuumillu mingussimatillugu inimi silaannaap qanoq innerattaaq paasineqartarpoq, ininilu silaannaq annertuumik mingussimatillugu inuittaaq eqqorneqarsinnaasarput. Init 5-iusut tamarmik silaannaat uuttortarneqarput.

Misissuinerit takutippaat sinittarfik, ini paarlerlu kategori C-imik annertuumik oqoqarsinnaaneranik pasineqartut qalianilu ini kategori A-mik.

Mycometer- surface misiligutit aqqutigalugit paasineqarpoq qaliani quassuttuut qalialiartarfiillu eqqaani misiligutit kategori C-iusut.

Suliffeqarfik XXY inerniliilluni nalunaarpoq uuttortaanerni nalinginnaasumik killissarititaasut qaangerlugit amerlanertigut uuttuinerit angusiffiusimasut. Misiligutissat uuttortarneqartut iikkap, qilaap natillu qaaviniik tigusaapput. Misiligutissat sukani qaliatalu pladitaani tiguneqartut kategori C-itut inerneqarput, taakku annertuumik oqunikkiartortoqarneranik takutitsipput. Qalialiartarfik ussiippoq misissuinerullu takutippaa annertuumik oqunikkiartortoqartoq.

Inissiami silaannaap oqoqarneranik uuttuinermit paasineqarpoq sanaartukkanut nalinginnaasunut sanilliullugu inissiaq oqoqarnerungaatsiartoq. Taamaammat sanaartukkat ilaannut oquup siaruartinneqannginnerani oqoqarfiusuni oqqoqarneranullu pissutaasoq peersinnaaqqullugu illup iluani silaannaap iluarsinissaa pisariaqarpoq.

Qilaami illup saqqaata tungaanut (ineeqqani marlunni isaarissamut qanittumiittuni) isugutassimasuni/masassimasuni simerneqalersimasoq qularnanngitsumik isugutak qaliarsuarminngaanneersoq iikkamiit imaluunniit qaliarsuamiit iikkaniillu katersuussimassasoq takuneqarsinnaavoq.

Suliffeqarfik XXY malillugu sanaartukkat ilaannut oquup siaruartinneqannginnerani  inissiami aamma qaliarsuarmi taakkunanilu oqoqarneranut pissutaasoq peersinnaaqqullugu illup iluani silaannaap iluarsinissaa pisariaqarpoq. Isugutattoqartuaannarpat sanaartukkap ilaanut isugutak annertunerusumik ajoqusiisussaavoq.

Najugaqartut iluaagusuutaat eqqarsaatigalugit illup sannaani ersinngitsumik oqoqarsinnaanera tunuarfigineqarsinnaanngilaq. Illup iluani silataaniluunniit iikkat piiarlugit illup sannai misissorneqartariaqarput. Tamatuma kingorna illu tamakkerlugu eqqiarluaqqissaartariaqarpoq.

Nalunaarusiaq Suliffeqarfik XXY Inissiaatileqatigiiffik Y-ip 13. juuni 2016-imi mailikkut oqaaseqarfigaa. Inissiaatileqatigiiffiup maluginiarpaa qaliarsuarmi misissugassatut tiguneqartut oqoqarneranik takussutissiisut taamaattorli inissiami illup iluata qanoq sunnerneqarsimatiginera nalornissutaavoq. Tamatuma qaliarsuarmilu isugutaap katersuutiinnarneranut pissutaasup (qaliani iikkap ussiittup) pinngitsoorani ussissarnissaa Inissiaatileqatigiiffiup qularnaarusuppaa.

Misissugassatut tiguneqartut silaannarmit misissuinermut tunngasut tamarmik annertuumik oqoqarneranik takussutissartallit innersuussutigineqarput. Oqaatigineqarpoq silaannarmit misissugassat eqqiaaneq aammalu pisattat eqqarsaatiginagit tiguneqartut taamaammallu inissiaq piffissami sivisuumi najorneqarsimanngimmat illu pujoralaqangaatsiartoq.

Taamaattumik najugaqartut inissiamut allamut nuunnissaannik neqeroorfigineqarnissaat isummerfigineqannginneranni ini imaarneqarlunilu eqqiarneqarnissaa tamatumalu kingorna nutaamik uuttortaasoqassasoq  Inissiaatileqatigiiffiup siunnersuutigaa.

Inissiaatileqatigiiffiup misissuinermut oqaaseqaataanut Suliffeqarfiup XXY-ip nassuiaatini 2. juuni 2017-imi mailikkut nassiuppai.

Nassuiaatinit erserpoq inissiami namminermi imaluunniit inissiami pisattat oqoqarnersut pisataajaareernerup kingorna misissuinerup ersersissagaa.

Oqummit pisut avataaneersut katersuuttut tassaasinnaapput pisattaneersut, atisaneersut imaluunniit eqqiaanerlunnermit pisut. Pingaartumik inini natersualinni, saagoqartuni assigisaannillu imaluunniit oqulimmi najugaqarsimagaanni annertuumik oquup partikkiliinik katersuuttoqarsimasinnaavoq.

Sanaartukkani eqqiluisaarluarfiunngitsuni pujoralaat Inimi pujoralalerujussuarmi uuttortaanermi kategori C anguneqarsinnaasarpoq inimi oquup pujoralaanik soqanngikkaluarpalluunniit. Misissukkat kategori C-mik inernilikkat malitseqartinneqartuaannartariaqarput soorlu oquup pileqqaarfiata peerneratigut imaluunniit eqqiarluarsimannginneq pissutaappat peqqissaartumik eqqiaanikkut.

Naliliineq:

Ineqarnermut Naammagittaalliuuteqartarfik isumaqarpoq illup iluani silaannarmik ajornartorsiuteqarneq sanaartukkamik attartukkamillu aserfallatsaaliisimannginnermik pissuteqarnersoq Inissiaatileqatigiiffik Y attartortoq sinnerlugu misissoqqissaarneqartariaqartoq. Tassunga ilanngullugu illup attartukkallu iluini silaannarmik misissueqqissaarnissaq ingerlanneqassanersoq illumi attartukkamilu atisat, natersuit pisattat pigisallu allat illup iluaniitiinnarlugit  imaluunniit illumik attartukkamillu misissueqqissaarneq pigisat anniseqqaarlugit ingerlanneqassanersoq naliliiffigineqassaaq.

Matumani Ineqarnermut Naammagittaalliuuteqartarfiup pingaartippaa inigisamik Suliffeqarfiup XXY-ip silaannarmit misissuisimaneranit annertuumik oqoqarneranik il.il. ersersitsimmat taamaattorli uuttuinermi inernerit sumik pissuteqarnersut paasineqarsinnaanani.

Ineqarnermut Naammagittaalliuuteqartarfik aamma isumaqarpoq eqqiaareernerup kingorna oqoqarneranik misissuinermit erserpat inissiami kategori A-p saniatigut suli oqoqartoq taava Suliffeqarfiup XXY-ip nalunaarusiaani 7. apriili 2017-imeersumi siunnersuutigineqartutut iluarsartuussinermik aserfallatsaaliuinermillu suliassat inissiaatileqatigiiffiup suliarissavai.

Nakorsap oqaaseqaatai 7. januaari 2016-imeersut Ineqarnermut Naammagittaalliuuteqartarfiup maluginiarpai.

Tamatuma saniatigut oqaatigineqarpoq misissuinissat pisariaqartut sullivimmit attuumassuteqanngitsumit illit inissiaatileqatigiiffiullu isumaqatigiissutigisinnaasassinnit suliarineqarunik naleqqunnerussagaluartoq. Tamatumunnga aningaasartuutit inissiaatileqatigiiffiup akilertussaavai.

Akiliutigisimasassi utertinneqarnissaannut pisinnaatitaaffeqarpusi. Taamaammat kontonormumut sorlermut aningaasat ikineqassanersut oqarasuaammut 328033-mut saaffiginnillusi ilisimatitsissuteqassasusi qinnuigineqarpusi.

Suliap taama sivisutigisumik suliarineqarnera Ineqarnermut Naammagittaalliuuteqartarfiup ajuusaarutigaa tamanna ilaatigut allaffissornermut tunngasunik ilaatigullu piffissami sivisuumi ataatsimiititaliamik toqqaasoqarnikuunnginnera tamatumunnga pissutaapput. Suliamut atatillugu misissueqqittoqarnissaanik pisariaqartitsisoqarsimanera pissutaaqataavoq.

Aalajangiineq:

Suliaq Inissiaatileqatigiiffik Y-imi suliareqqitassanngorlugu utertinneqarpoq. 

Naammagittaalliuuteqarnissamut ilitsersuut:

Ineqarnermut naammagittaalliuuteqartarfiup aalajangiinera ingerlatsinermut oqartussaqarfimmut allamut naammagittaalliuutigineqarsinnaanngilaq tak. § 86 imm. 7 Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq.

Attartortitsisup attartortullu akornanni aaqqiagiinnginneq eqqartuussivimmut tunniukkusunneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. , attartortitsisup allaffeqarfittut aktiaatileqatigiiffianit isumagineqarsimagaluarpataluunniit.

Inussiarnersumik/Venlig hilsen

Naja Joelsen

Siulittaasoq

Assilinera Inissiaatileqatigiiffimmut nassiunneqarpoq.

Scroll to Top