1. Siulequt
Matumuuna Ineqarneq pillugu Maalaaruteqarfik Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 83, imm. 4 naapertorlugu ukiumoortumik nalunaarusiorpoq.
Nalunaarusiaq ukiumut qaammatit malillugit allataavoq, tassanilu Ineqarneq pillugu Maalaaruteqarfiup suliai naatsumik nassuiarneqarlutik, maalaarutit tiguneqarnikut naatsorsuusioqqissaarneri aamma suliat naammassisut pillugit allataalluni.
Nalunaarusiaq Ineqarneq pillugu Maalaaruteqarfiup nittartagaani www.aua.gl-imi atuarneqarsinnaavoq.
Ineqarneq pillugu Maalaaruteqarfiup allaffeqarfia isumaqatigalugu ukiumoortumik nalunaarusiap assilineranik nassinneqarsinnaavutit.
Ineqarneq pillugu Maalaaruteqarfik ataani allaqqasumi attavigineqarsinnaavoq:
Najugaq: Imaneq 29, 1, postboks 689, 3900 Nuuk
E-mail: maalaarut@nanoq.gl
Oqarasuaat: 32 80 33
Naja Joelsen
Ineqarneq pillugu Maalaaruteqarfimmi siulittaasoq.
2. Ineqarneq pillugu Maalaaruteqarfik pillugu
Ineqarneq pillugu Maalaaruteqarfik Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 82, imm. 1 naapertorlugu pilersinneqarpoq.
Ineqarneq pillugu Maalaaruteqarfik ineqarnermut tunngasunik maalaaruteqartarfinni allaffissornikkut qullersatut inissisimavoq.
Allaffissornikkut, eqqartuussisutut oqartussaasutut, pisortanit allaniilluunniit sullissinissamut aalajangiussinissamullu malittarisassanik oqaaseqaatinillu attaviittuulluni suliaqartarpoq.
Ineqarneq pillugu Maalaaruteqarfik Namminersorlutik Oqartussat kommunillu inissiaataanni attartortup attartortitsisullu akornanni, Illuut A/S minillugu (paasisaqarnerorusukkuit Ineqarneq pillugu Maalaaruteqarfiup 2014-imut ukiumoortumik nalunaarusiaa takuuk) isumaqatigiinngissutit pillugit aalajangiisarput.
Aalajangiussat unioqqutinneqassanngillat tamanillu allanngortinneqarsinnaanatik. Taamaattumik Ineqarneq pillugu Maalaaruteqarfiup aalajangiussai oqartussani allaffissornikkut suliaqartunut allanut maalaarutigineqarsinnaanngillat. Tamanna ima isumaqarpoq, arlaata Ineqarneq pillugu Maalaaruteqarfiup aalajangiussaa maalaarutigerusukkuniuk, suliaq eqqartuussivimmut kisimi ingerlateqqinneqarsinnaavoq.
Ineqarneq pillugu Maalaaruteqarfiup siunertaraa, aalajangiussai ersarissumik nalituumillu tunngavilimmik ilitsersuuteqarlutillu innuttaasumut, inissiaatileqatigiiffimmut allanullu suliamut attuumassutilinnut iliuusissamik tikkuussinissani.
Taamaasilluni Ineqarneq pillugu Maalaaruteqarfiup aalajangiussat imartullutik eqqortuunissaat isumannaarpaa, innuttaasoq nunami sumiikkaluaruniluunniit.
Ineqarneq pillugu Maalaaruteqarfiup suliai Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi (attartornermut peqqussummi) § 82-86 aamma Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. novembari 2008-meersoq naapertorlugit naleqqussarneqarput.
3. Ineqarneq pillugu Maalaaruteqarfiup piginnaasai
Ineqarneq pillugu Maalaaruteqarfiup piginnaasai attartortitsisarneq pillugu peqqussummi § 84, imm. 1-imi takuneqarsinnaapput.
Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
- Ineqarnermut akiliutinik qaffaanissamik siumoortumik ilisimatitsisarnermi piumasarisat.
- Aserfallatsaaliuineq iluarsaassinerlu.
- Inissiap iserterfigineqarnerani qanoq issusia.
- Attartukkami atortut ikkussukkat pitsanngorsaanerillu (atuisinnaatitaaneq).
- Attartortup attartukkaminik atuinera (torersaarnissamik malittarisassanik unioqqutitisinerit).
- Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq).
- Inissiamit aninermi inissiap qanoq issusia (iluarsaassineq nalinginnaasoq).
Ineqarneq pillugu Maalaaruteqarfimmut maalaaruteqarneq 150 koruuninik akeqarpoq. Maalaaruteqartup suliaq suliarineqassappat, akiliutigineqartussaq akilissavaa. Attartortoq (maalaaruteqartoq) ilaannakortumik tamakkiisumilluunniit ilalerneqaruni akiliutigineqartoq utertinneqassaaq.
Ineqarneq pillugu Maalaaruteqarfiup maalaaruteqartup maalaarummut akiliutissaq akilinngippagu, maalaarutigineqartoq suliarissallugu itigartissavaa.
Aammattaaq Ineqarneq pillugu Maalaaruteqarfik suliarisinnaanngisaminik maalaaruteqartoqarpat, suliarisinnaanagit itigartissavai. Tamanna soorlu najukkami nipiliornernut tunngassuteqarsinnaavoq imaluunniit pisortanit pigineqanngitsuni attartukkat pillugit maalaarutinut tunngasinnaalluni.
Naggataatigut Ineqarneq pillugu Maalaaruteqarfiup maalaarutit suliarineqarsinnaanngitsut, soorlu uppernarsaatitaqanngitsut, suliarissallugit itigartitsissutigisarpai. Saniatigut maalaarutit ersarissumik takuneqarsinnaappat – tamakkiisumik ilaannakortumilluunniit – ilalerneqarnavianngitsut, taava Ineqarneq pillugu Maalaaruteqarfiup maalaarutip suliarinissaanut itigartissinnaavaa. Tamanna pisinnaavoq, maalaaruteqartoq assersuutigalugu attartornermini piviusorsiunngitsumik ilalerneqarnissaminullu siumoortumik periarfissaqanngitsoq takuineqarsinnaalereersimappat.
4. Ineqarneq pillugu Maalaaruteqarfiup ilaasortai
Ineqarneq pillugu Maalaaruteqarfik ataatsimik siulittaasoqarpoq pingasunillu ilaasortaqarluni.
Siulittaasoq sinniisussaalu Naalakkersuisut ivertinneqareernerini ineqarnermut immikkoortortami Naalakkersuisunngortup toqqagarivai. Tamarmik ineqarnermut pissutsinut tunngasunik immikkut ittumik ilisimasaqassaaq imaluunniit inatsisilerituutut inerluni soraarummeersimassalluni.
Ineqarneq pillugu Maalaaruteqarfimmi ilaasortaq ataaseq sinniisussaalu Naalakkersuisup inissiaatileqatigiiffik INI A/S-imiit siunnersorneqarluni toqqassavai.
Naalakkersuisup KANUKOKA-mit siunnersuutigineqartoq tusareerlugu, ilaasortaq ataaseq sinniisussaalu toqqassavai, aamma Naalakkersuisup Attartortunit Nuna tamakkerlugu peqatigiiffiit IPK imaluunniit SIK, IMAK aamma PPK siunnersuuteqareernerini ilaasortaq ataaseq sinniisussaalu toqqassavai.
Ineqarneq pillugu Maalaaruteqarfiup ilaasortai sinniisussaalu ineqarneq pillugu pissutsinut paasisimasaqartussaapput.
Taamaattumik Ineqarneq pillugu Maalaaruteqarfiup katiterneqarnera attartortup attartortitsisullu soqutigisai pillugit saqqummiussisarnissaannik nassataqarpoq.
Ineqarneq pillugu Maalaaruteqarfiup ilaasortai ukiunut sisamanut sulisussatut toqqagaasarput, maannakkullu piffissarititaq 14. novembari 2021-mut killeqarpoq. Ineqarneq pillugu Maalaaruteqarfik pingaarnertut maleruagassaraa, ukiumut minnerpaamik pingasoriarluni ataatsimiittarnissaa. Assigiinngitsut peqqutaallutik ukiup ingerlanerani ilaasortat sinniisussallu ilai taarserneqarnikuupput.
Suliat ataasiakkaarlugit siulittaasumit ingerlanneqartarput, ataatsimiinnermilu ilaasortat aalajangiisarlutik. Suliat taasinermi amerlanerit taasaat tunngavigalugu aalajangiussaq suliarineqartarpoq, tassanilu siulittaasoq ilaasortaasullu tamarmik ataatsimik taasisinnaatitaapput. Taasinerit nalingiissappata, siulittaasup taasinera aalajangiisuusarpoq.
2020-p naalernerani ilaasortat ima katiteqqapput:
Siulittaasoq:
Naja Joelsen, eqqartuussissuserisoq.
Sinniisussaq: Tommy Ege Kristensen
Ilaasortat:
Olafur P. Nielsen, KANUKOKO
Sinniisussaq: Marie Fleischer, KANUKOKO
Søren Lennert Mortensen, A/S Inissiaatileqatigiiffik INI
Sinniisussaq: Karsten Lyberth-Klausen, A/S Inissiaatileqatigiiffik INI
Lise Mørup Dalsgaard, PPK
Sinniisussaq: Inuttalerneqanngilaq, PPK.
5. Ineqarneq pillugu Maalaaruteqarfiup 2020-mi suliai
Atuisartoqarnermut Unammilleqatigiinnermullu Aqutsisoqarfiup Ineqarneq pillugu Maalaaruteqarfiup allaffissornikkut sullissinera ingerlataraa. Aqutsisoqarfiup allaffeqarfiani Naammagittaalliuuteqartarfimmilu pingaarnertut suliat ingerlanneqartarput.
2020-mi Naammagittaalliuuteqartarfik 3-5-nik inatsisileritooqarpoq allaffimmiullu 1-2, taakkunaniillu marluk Ineqarneq pillugu Maalaaruteqarfimmi sulianut tunngasunut ilaasarlutik. Ineqarneq pillugu Maalaaruteqarfimmi suliat ukiunut kingullernut sanilliullugit ikinnerunerainut inatsisilerituut taarserarneri peqqutaasimavoq, taamaattumillu ukiut siuliinit suliat ikinneruneri uppernarsaatitut takuneqarsinnaapput.
Ineqarneq pillugu Maalaaruteqarfiup 2020-mi maalaarutigineqartut 2019-imiit amerlanerusut misigivaa, 2019-imi maalaarutigineqartut ikileriarnikuuneri peqqutaalluni. Maalaarutigineqartut allafeqarfiup tigusai amerlasuut Maalaaruteqarfiup suliarisinnaanngilai. Ilaatigut akiliummik akiliisimannginneq peqqutaalluni, ilaatigut Ineqarneq pillugu Maalaaruteqarfiup attartukkami maalaarutigineqartut ilamininngui kisiisa suliarisinnaammagit aamma ilaatigut suliat ilaasa Maalaaruteqartarfimmiit suliarineqarsinnaannginneri peqqutaalluni, assersuutigalugu uppernarsaammik takussutissartaqanngimmat. Suliat tamakku tuaviornerpaamik itigartinneqartarput, taamaasilluni maalaarutigineqartoq Maalaaruteqarfiup suliarisinnaannginnera maalaarutigineqartumit paasineqapallassaaq.
2020-p naalernerani ilimagineqarpoq, 2021-mi suliassat amerlassusaat 2020-mut assigussasut.
6. Naatsorsueqqissaarneq 2020
Ineqarneq pillugu Maalaaruteqarfik 2020-mi nuna tamakkerlugu attartutunit 67-inik maalaarutinik tigusaqarpoq, 2019-imi 52-iupput.
Katillugit suliat 35-t itigartinneqarlutik naammassineqarput. Suliat 35-t akiliummik akiliinnginneq, piginnaatitaaffeqannginneq, inatsisitigut tunngavissaqannginneq imaluunniit maalaaruteqarsimasup maalaarutiminik unitsitsiinnarnera, imaluunniit suliap neriunaateqannginnera peqqutaalluni itigartinneqarsimapput.
Taassuma saniatigut suliat pingasut Maalaaruteqarfiup ataatsimiinnerani suliarineqarput (pkt. 6.2 takuuk).
6.1 Suliat itigartinneqartut agguataarneri
(Pdf ataaniittoq takuuk).
6.2 Suliat piviusorsiortumik suliarineqartut
2020-mi Ineqarneq pillugu Maalaaruteqarfik ataatsimiinneremini sulianik pingasunik piviusorsiortumik suliaqarsimavoq. Ataani aalajangiussat pillugit naatsumik nassuiaateqarpoq. Ineqarneq pillugu Maalaaruteqarfiup nittartagaani (www.aua.gl)-imi aalajangiussat tamarmik atuarneqarsinnaapput.
6.2.1 Suliap normua. 1 – 18/00517
Attartortoq inissiaatileqatigiiffiup najukkamit nutserneq pillugu aamma ineqarnermut aalajangiussaa pillugu maalaaruteqarpoq. Maalaaruteqartoq isumaqarpoq, najukkamut nutsernermi amingaatigineqarsimasut iluarsartuunneqarneri najukkamit nutsernermi akiligassaanut ilanngunneqarsimasut.
Ineqarneq pillugu Maalaaruteqarfik isumaqarpoq, attartortup najukkami nalinginnaasumik iluarsartuussineq akilissagaa. Maalaaruteqarfiup aalajangiussani tunngavilerpaa, attartortup iluarsartuussinermi akiliisussatut uppernarsaaserlugu isumaqatigiissutigineqarsimanngitsoq paasivaa. Maalaaruteqarfiullu akiligassap annikillisinneqarnissaa isummiuppaa, inissiaatileqatigiiffiup nakkutilliinermut nalunaarusiami naqqit ataasiaannarlugit lakkertinnissaat oqaatigereeraluarlugu akiligassami lakkertinnera marloriarsimasutut allassimammassuk.
Pisussaaffimmik sumiginnaanermut apeqqutit tunngasut suliarineqarneq ajorput, tassani uppernarsaatit pisariaqartinneqartarmata. Saniatigut Ineqarneq pillugu Maalaaruteqarfik ineqarnermut akiligassat pillugit suliaqarnissaminut pisussaatitaaffeqanngilaq.
6.2.2 Suliap normua. 2 – 19/00340
Attartortoq najukkamit nutsernermi nalinginnaasumik iluarsartuussinermut akiligassap annertuallaarnera maalaarutigaa. Maalaaruteqartoq isumaqarpoq, taama annertutigisumik akiliisussaanani, qaammatialuinnaat attartukkami najugaqarsimanini peqqutigalugu. Aammattaaq maalaaruteqartup najukkamit nutsereernermi suli qaammat ataaseq najukkamut akiliissussaanini pillugu maalaaruteqarpoq.
Ineqarneq pillugu Maalaaruteqarfiup attartortup nalinginnaasumik iluarsartuussinermut akiligissaq akilissagaa isumaqarpoq, attartornermi peqqussummi takuneqarsinnaammat, najukkamit nutsernermi nalinginnaasumik iluarsartuussisoqassasoq. Ineqarneq pillugu Maalaaruteqarfiup maluginiarpaa, inatsisitigut tunngavissaqanngitsoq, sivikitsumik attartornermut tunngasut piumasaqaatigineqartut suliarisinnaanagit.
Ineqarneq pillugu Maalaaruteqarfiup ineqarnermut akiligassanut tunngasut suliarissallugit pisinnaatitaaffeqanngilaq.
6.2.3 Suliap normua. 3 – 19/00099
Maalaaruteqartup najukkamit nutsernermi nalinginnaasumik iluarsartuussinermi akiligassap annertuallaarnera maalaarutigaa. Maalaaruteqartup nalunaarutigaa, najukkamut nutsernermi najugaq nalinginnaasumik iluarsartuussimaneqarnanilu eqqiarneqarsimanngitsoq.
Ineqarneq pillugu Maalaaruteqarfiup akiligassaq annikillisippaa, annertuallaarnera peqqutigalugu. Qaammammut nalikilliliineq 44%-miit 88%-mut annikillisinneqarpoq, tassani maalaaruteqartoq sivisuumik najugaqarsimanera peqqutaalluni. Saniatigut eqqiaanermut nalinginnaasumillu iluarsartuussinermut akiligassaq avinneqarpoq.
Pisussaaffimmik sumiginnaanermut tunngasut suliarineqarneq ajorput, tamakkua uppernarsaateqaqqaarluni suliarineqarsinnaammata. Saniatigut Ineqarneq pillugu Maalaaruteqarfik ineqarnermut akiligassat pillugit suliarinnissalluni pisinnaatitaaffeqanngilaq.