Ineqarneq pillugu maalaaruteqarfik ulloq 9. juuni 2021-mi YYX aserfallatsaaliineq iluarsartuussinerlu pillugu maalaarutit suliaraa. Ineqarneq pillugu Maalaaruteqartarfik ima aalajangiivoq:
AALAJANGIINEQ
Ineqarneq pillugu Maalaaruteqartarfik isumaqarpoq, YYX aserfallatsaaliuinissamut pisussaaffimminik eqquutitsisimanngitsoq.
Taamaattumik Ineqarneq pillugu Maalaaruteqartarfik isumaqarpoq, YYX teknikerimik najukkap ajoqutaanik amingaataalu pillugit misissuititsissasoq.
Taassuma saniatigut Ineqarneq pillugu Maalaaruteqartarfik isumaqarpoq, YYX-ip erngup aqqutaa (ruujorit) iluarsartuutissagai, qerillutik najukkap iluanut erngup isaannginnissaa pinaveersaarniarlugu.
Naggataatigut Ineqarneq pillugu Maalaaruteqartarfik isumaqarpoq, YYX-ip solaarip tikka aamma naqqup-iluani silaannarissarfik pillugu iluarsartuussissasoq.
Ineqarneq pillugu Maalaaruteqartarfiup pingaartippaa, YYX-ip kiassaat errorfillu taarsersimagai.
Ineqarneq pillugu Maalaaruteqartarfiup najukkanni igalaat, igaffiup naqqullu qanoq inneri pillugit suliaqassalluni pisinnaatitaaffeqanngilaq, taakkua pillugit uppernarsaatinik ilanngussaqarsimannginneq peqqutaalluni.
Aammattaaq Ineqarneq pillugu Maalaaruteqartarfiup ineqarnermut akiligassat aamma attartukkamik pisinermi apeqqutit suliarissallugit pisinnaatitaaffeqanngilaq.
Tassa imaappoq naammagittaalliuutit ilaannakuusumik isumaqataaffigineqarpoq. Taamaattumik akiliutigisimasavit utertinneqarnissaanut pisinnaatitaaffeqarputit.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Ineqarneq pillugu Maalaaruteqartarfimmut maalaarut 1. septembari 2020-meersoq
- YYX saaffiginnissutit 16. novembari 2018-imeersoq
- YYX saaffiginnissutit 3. septembari 2019-imeersoq
- YYX-nut saaffiginnissutit 7. maaji 2020-meersoq
- Oqarasuaatikkut oqaloqatiginninnermi nalunaarusiaq 20. oktobari 2020-meersoq
- YYX-ip suliamut oqaaseqaatai 10. novembari 2020-meersoq
- Oqarasuaatikkut oqaloqatigiinnermi nalunaarusiaq 01. decembari 2020-meersoq
- YYX-ip suliamut oqaaseqaatai 16. decembari 2020-meersoq
- YYX-ip suliamut oqaaseqaatai 17. februaari 2021-meersoq
- Assit ulloq 20. februaari 2021-mi nassiunneqartut
- Oqarasuaatikkut oqaluussisimanermut allatuiffik 22. marsi 2021-meersoq
Nassuiaat:
Ulloq 1. septembari 2020 Ineqarneq pillugu Maalaaruteqartarfimmut YYX aqqutigalugu najugaqarfiit, XXX-XXX pillugu maalaaruteqarputit.
Maalaarutinni erserpoq, najukkat aserfallatsaaliorneqarsimanngitsoq iluarsartuuttariaqartorlu.
Najukkat solaarisunnittoq aamma igalaat, naqqit igaffillu iluarsartuunneqartariaqartut oqaatigivatit.
Aammattaaq piffissami apriili 2017-imit septembari 2018 tikillugu ineqarnermut akiligassap akilernissaa pillugu nassitsissimavutit.
Aammattaaq YYX-imit najukkat pisiarerusullugu kissaatigaat.
Ulloq 20. oktobari 2020 Ineqarneq pillugu Maalaaruteqartarfimmut oqarasuaatikkut ilisimatitsiivutit, najukkanni erngup aqqutaa qerittartoq, kiassaallu ajoquteqartoq, igalaat ussiittut naterlu iluamik oqorsarneqanngitsoq.
YYX ulloq 10. novembari 2020-mi Ineqarneq pillugu Maalaaruteqartarfimmut oqaatigaa, YYX-ip avinneqarnerata kingorna YYX-mit najugarineqartut pillugit allaffissornikkut sullissinerat tigusimagai. Tassunga atatillugu YYX-ip paasisimavaa, XZZ-mi sulisuunikut najugaqarfimmi suli najugaqartut.
Taamaattumik 2018-imi nutaanit ulloq 1. apriili 2017-imi atuutilertussanik attartornermut isumaqatigiissusiortoqarpoq, tamannalu ineqarnermut akiligassanik regningi malinnaatitanut peqqutaalluni.
Aammattaaq YYX ilisimatitsiivoq, sapaatip akunnerata tulliani teknikerimik kissarsuut uuliatortup takutinnissaa pillugu suliakkiiniarluni.
Ulloq 1. decembari 2020 Ineqarneq pillugu Maalaaruteqartarfimmut oqarasuaatikkut ilisimatitsiivutit, teknikermik takkuttoqarsimanngitsoq.
YYX ulloq 16. decembari 2020-mi Ineqarneq pillugu Maalaaruteqartarfimmut oqaatigaa, teknikeriata naqqup-ilua ulloq 30. juuni 2020-mi takusarsimagaa, paasillugulu silaannarissarfeeqqanik putunik amingaateqartoq, annikitsumik solaarisunnittoq, uuliaasivik illup silataani kusersimasoq aamma naqqup-ilua atisanik madrassinillu ulikkaartoq, taamaattumillu illup iluani silaannaq isugutalluni.
Aammattaaq YYX-ip oqaatigaa, teknikerip piffissami qaninnermi najugaq takusaraluarsimavaa, najugarsili paarnaaqqammat attavissaanasilu iluatsissimanngilaq.
YYX Ineqarneq pillugu Maalaaruteqartarfimmut ulloq 17. februaari 2021-mi oqaatigaa, kiassaat errofillu taarserneqarsimasut. Aammalu oqarput, teknikeriata najugaq, aamma juuli 2020-mi naqqup-iluani nakkutilliinermit sinneruttut piffissami qaninnermi takusassagai.
Ulloq 20. februaari 2021 Ineqarneq pillugu Maalaaruteqartarfimmut assinik nassiussivutit, taakkunanilu takuneqarsinnaavoq, imeq najukkannut kuuttoq.
Ulloq 22. marsi 2021 Ineqarneq pillugu Maalaaruteqartarfimmut oqarasuaatikkut nalunaarputit, YYX-ip kiassaat errorfillu taarsersimagai.
YYX ulloq 30. marts 2021-mi Ineqarneq pillugu Maalaaruteqartarfimmut oqaatigaa, teknikeriata ulloq 29. marsi 2021-mi najukkami nakkutilliinissamut piffissamik isumaqatigiissuteqarfiginiarlutit attavigisimagaatit.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi kingusinnerusukkut allanngortinneqartumi § 45-mi allaqqavoq, Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaat attartortitsisup pisussaaffigigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Aammattaaq peqqussummi tassani § 84-imi allassimavoq Ineqarneq pillugu Maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, § 28, imm. 2 takuuk.
2) Aserfallatsaaliuineq iluarsaassinerlu, § 45 takuuk.
3) Inissiap iserterfigineqarnerani qanoq issusia, § 47 takuuk.
4) Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5) Attartortup atukkaminik atuinera (torersaanissamik malittarisassanik unioqqutitsinerit), § 50 takuuk.
6) Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7) Inissiamit aninermi inissiap qanoq issusia (iluarsaassineq nalinginnaasoq) § 77 takuuk.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqartarfik isumaqarpoq, YYX teknikerimik najukkap ajoqutai amingaataalu pillugit misissuiartortitsissasoq.
Tassunga tunngavigineqarpoq, arlaleriarlutit YYX-mut saaffiginninnikuugavit, YYX-lu kingorna teknikerimik najukkamut misissuiartortitsiniarlutik oqaatiginikuummassuk. Ineqarneq pillugu Maalaaruteqartarfiup najugaq suli misissorneqarsimanngitsutut isigaa, soorlu siunissami nakkutilliinissamut ulluliisoqarsimannginnera pingaartikkaa.
Taassuma saniatigut Ineqarneq pillugu Maalaaruteqartarfik isumaqarpoq, YYX aserfallatsaaliinissamut pisussaaffini malissimanngikkaa.
Peqqussummi tassani § 45-imi Imm. 1 aamma Imm 2-mi erserpoq, inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Taamatuttaaq aserfallatsaalissalluni attartortitsisup pisussaaffigaa. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Tamanna ima isumaqarpoq, attartortitsisoq aallaavittut nammineq suut aserfallatsaaliiffigissanerlugit iluarsartuullugillu pisariaqartinneqarnersut aaliangersinnaavai. Attartortitsisup aserfallatsaaliinermi amingaatit paasigunigit, pisussaavoq tamanna iluarsiivigissallugu.
Taamaattumik Ineqarneq pillugu Maalaaruteqartarfik isumaqarpoq, YYX-ip erngup aqqutaa iluarsartuutissagaa, ruujorit qeritsissinnaajunnaarlugillu najukkamut imeq kuutsissinnaajunnaarlugu. Aamma assit nassiunnikuusatit tunngavigineqarput, tassani erngup ruujoriisa pitsaannginneri peqqutaallutik najukkamut erngup kuunneranik takutitsimmat.
Taassuma saniatigut Ineqarneq pillugu Maalaaruteqartarfik isumaqarpoq, YYX-ip solaarisunni naqqullu iluani silaannarissarfiit iluarsartuutissagai.
Tassunga tunngavigineqarpoq, YYX teknikerimik ulloq 30. juuni 2020-mi naqqup-iluani misissuisitsinikuusoq, tassanilu solaarisunni aamma silaannarissarfinnik amingaateqartoq paasillugu.
Taamaattumik Ineqarneq pillugu Maalaaruteqartarfik isumaqarpoq, YYX-ip amingaatigineqartutut oqaatigineqarnikut ilisimagai, taamaattumillu iluarsartuuttariaqarlugit.
Ineqarneq pillugu Maalaaruteqartarfiup pingaartippaa, YYX-ip kiassaat errorfillu taarsersimagai.
Ineqarneq pillugu Maalaaruteqartarfiup najukkanni igalaat, igaffiup naqqullu qanoq inneri pillugit suliaqassalluni pisinnaatitaaffeqanngilaq, taakkua pillugit uppernarsaatinik ilanngussaqarsimannginneq peqqutaalluni.
Aammattaaq Ineqarneq pillugu Maalaaruteqartarfiup ineqarnermut akiligassat aamma attartukkamik pisinermi apeqqutit suliarissallugit pisinnaatitaaffeqanngilaq.
Aalajangiineq:
Ineqarneq pillugu maalaaruteqartarfik isumaqarpoq, YYX aserfallatsaaliuinissamut pisussaaffimminik eqquutitsisimanngitsoq.
Ineqarneq pillugu Maalaaruteqartarfiup YYX-ip kiassaat errorfillu taarsersimagai pingaartippaa.
Ineqarneq pillugu Maalaaruteqartarfiup najukkanni igalaat, igaffiup naqqullu qanoq inneri pillugit suliaqassalluni pisinnaatitaaffeqanngilaq, taakkua pillugit uppernarsaatinik ilanngussaqarsimannginneq peqqutaalluni.
Aammattaaq Ineqarneq pillugu Maalaaruteqartarfiup ineqarnermut akiligassat aamma attartukkamik pisinermi apeqqutit suliarissallugit pisinnaatitaaffeqanngilaq.
Tassa imaappoq naammagittaalliuutit ilaannakuusumik isumaqataaffigineqarpoq. Taamaattumik akiliutigisimasavit utertinneqarnissaanut pisinnaatitaaffeqarputit. Taamaattumik Inissiaatileqatigiiffimmut saaffiginneqquneqarputit konto normut tunniunnissaa siunertaralugu.
Ineqarneq pillugu Maalaaruteqartarfiup aalajangiineri namminersornerullutik oqartussanut (namminersorlutik oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Ineqarnermut Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat soorlu maani pisumi taava tamanna Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. novembari 2008-meersoq § 11 naapertorlugu, iluarsisassat Ineqarneq pillugu Maalaaruteqartarfiup aalajangiinerata saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqartarfimmi siulittaasoq
Assilineqarnera uunga: YYX. Attartorluni normu innersuutigineqarpoq: XX-XXXX