Atuisartoqarnermut Unammilleqatigiinnermullu Aqutsisoqarfik VVS & El Firmaet A/S-ip Arssarnerit A/S-imi suliaqarfinnut piginnittuulernera pillugu pisariillisamik nalunaarummik tigusaqarpoq.
Peqataasut naliliinerat malillugu nuussineq tassaavoq kattussineq, unammilleqatigiinnermi inatsimmi kattussinermut nakkutiginninnermut aalajangersakkanut ilaasoq. Tamanna isumaqarpoq Atuisartoqarnermut Unammilleqatigiinnermullu Aqutsisoqarfik akuersiteqqaarnagu kattussineq naammassineqarsinnaanngitsoq.
Kattussineq pisariillisamik periuseq malillugu suliarineqarsinnaanersoq pillugu piumasaqaatit eqquutsinneqarsimanersut pillugit Aqutsisoqarfik suli nalilersuinngilaq.
VVS & El Firmaet A/S Ilulissani najugaqarfeqarpoq, aamma Avannaani Qeqertarsuullu nalaani vvs-imut, kiassarnermut silaannarissarfinnullu atortorissaarutinik ikkussuilluni suliaqartarpoq, kiisalu innaallagialerinermut atortunik ikkussuisarpoq, tamatumunnga ilanngullugit sarfalerinermik suliaqarneq sarfalerinermullu kiffartuussineq.
Arssarnerit A/S Nuummi najugaqarfeqarpoq, Nuummilu innaallagialerinermut atortunik ikkussuisarpoq, tamatumunnga ilanngullugit sarfalerinermik suliaqarneq sarfalerinermullu kiffartuussineq, sillimaniarnermut atortorissaarutinik ikkussuineq (tillinniartoqarnermut ikuallattoqarnermullu sillimasiineq, kiisalu pigaartutut suliaqarneq sillimaniarnermilu aaqqiissutit (Matu Security)).
Atuisartoqarnermut Unammilleqatigiinnermullu Aqutsisoqarfiup suliffeqarfinnik kattussineq pillugu oqaaseqaateqarusullutik soqutiginnittut pingasunngorneq ulloq 4. marsi 2026 nal. 12.00 nallertinnagu tunniussinissaat kaammattuutigaa.
Oqaaseqaatit uunga nassiunneqassapput:
Atuisartoqarnermut Unammilleqatigiinnermullu Aqutsisoqarfik
Imaneq 29, 1. sal
3900 Nuuk
E-mail: aua@nanoq.gl eller unammineq@nanoq.gl
Mrk.: VVS & El Firmaet A/S’ erhvervelse af aktiviteter i Arssarnerit A/S.
Annertunerusumik suliffeqarfinnik kattussineq pillugu paasisaqarusukkuit, Arnatsiaq Hermansen attavigineratigut paasisaqarnerusinnaavutit, uunga attavigisinnaavat, tlf. (+ 299) 32 80 33, e-mail: aua@nanoq.gl imaluunniit unammineq@nanoq.gl.