Inigisavit qimanneranut atatillugu akiligassat pillugu Inissiaatileqatigiiffiup X-ip aalajangiineranut tunngasumik naammagittaalliuuteqarnerit Ineqarneq pillugu Maalaaruteqarfiup ulloq 9. juuni 2021 suliarivaa imalu aalajangiivoq Ineqarneq pillugu Maalaaruteqarfik ima aalajangiivoq:
AALAJANGIINEQ
Ineqarneq pillugu maalaaruteqarfik isumaqarpoq, Inissiaatileqatigiiffik aserfallatsaaliuinissamut pisussaaffimminik eqquutitsisimanngitsoq.
Ineqarneq pillugu Maalaaruteqarfiup inissiaatileqatigiiffiup isaariami nateq, uffarfiup igalaavini, igaffimmi inimilu qullilerfiit, inimi ikkuffik, sinittarfinni iggavimmilu sikaaviit matui matumilu paarnaarsaasertarfik iluarsartuutissagaa isumaqarpoq.
Taassuma saniatigut Ineqarneq pillugu Maalaaruteqarfik isumaqarpoq, inissiaatileqatigiiffiup matu silarleq ussissassagaa.
Aammattaaq Ineqarneq pillugu Maalaaruteqarfik isumaqarpoq, inissiaatileqatigiiffiup eqqaaveqarfik nutaamik taarsissagaa.
Ineqarneq pillugu Maalaaruteqarfiup tunngaviliuppaa, inissiaatileqatigiiffiup sinittarfimmi igalaap qiversartua iluarsartuutereersimagaa.
Taassuma saniatigut Ineqarneq pillugu Maalaaruteqarfik isumaqarpoq, illit nammineq inigisat qalipassagit, isaariami uffarfimmilu qulleq pære’lerlugu, paaq apulluunniit qaliaanut ajoqusiinnginniassammat, kiassaateqarfimmi silaannarissarfik ammatillugu nammineq isumagissagit.
Naggataatigut Ineqarneq pillugu Maalaaruteqarfik isumaqarpoq, inissiaatileqatigiiffiup silataani assakaasunut salliligaq kiassaateqarfimmilu matu iluarsartuutissanngikkaa.
Aamma Ineqarneq pillugu Maalaaruteqarfik isumaqarpoq, inissiaatileqatigiiffik kiassaateqarfimmi igalaamik ikkussissanngitsoq.
Ineqarneq pillugu Maalaaruteqarfik apeqqutit inimi naqqit isikkui pillugit aamma uffarfimmi igalaaq pillugu, inigisap silataani isikkua, kuuffiup ruujorianut ikorfaq, illup iluani matut, matserfiit liistillu taarsersorneri pillugit aamma silaannarissarfiup assiaqutaa pillugu malaarutinik suliarinnissalluni piginnaatitaaffeqanngilaq, pissutsit taagorneqartut pillugit uppernarsaammik nassiussisoqarsimanngimmat.
Aammattaaq Ineqarneq pillugu Maalaaruteqarfik qui majuartarfillu pillugit apeqqutit maalaarutigineqartut pillugit suliarinnissaanullu piginnaatitaaffeqanngilaq, tamanna attartornermi ilaanngimmat.
Tassa imaappoq naammagittaalliuutit ilaannakuusumik isumaqataaffigineqarpoq.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Ineqarneq pillugu Maalaaruteqarfimmut maalaarutit 16. januaari 2019-meersoq.
- Inissiaatileqatigiiffik X-imut saaffiginnissutit 27. apriili 2016-imeersoq.
- Inissiaatileqatigiiffimmiit suliaq pillugu oqaaseqaatit 11. septembari 2019-imeersoq.
- Tusarniaanermut akissutit 30. septembari 2019-imeersoq.
- Inissiaatileqatigiiffimmiit naammagittaalliuut pillugu oqaaseqaat 3. oktobari 2019-imeersoq.
- Inissiaatileqatigiiffimmiit naammagittaalliuut pillugu oqaaseqaat 14. novembari 2019-imeersoq.
- Attartornermut isumaqatigiissutip tapiutaa 25. marsi 2009-meersoq.
- Attartornermut isumaqatigiissutip tapiutaa 24. apriili 2009-meersoq.
- Oqarasuaatikkut oqaluussisimanermut allatuiffik 5. marsi 2021-meersoq.
- Maalaarutinnut ilassutit 16. marsi 2021-meersoq.
- Inissiaatileqatigiiffimmiit naammagittaalliuut 15. apriili 2021-meersoq pillugu oqaaseqaat.
Nassuiaat:
Ulloq 16. januaari 2019 Ineqarneq pillugu Maalaaruteqarfimmut inissiaatileqatigiiffik X aqqutigalugu najugaqarfiit, illoqarfimmi YZY-mi najugaq XX pillugu maalaaruteqarputit.
Maalaarutinni erserpoq, inissiaatileqatigiiffimmut ukiut pingasut ingerlanerini saaffiginnittarsimagaluartutit, najukkanni ajoqutit amingaatillu iluarsitikkusukkaluarlugit.
2006-imiilli najugarilersimallugu oqaatigaat.
Ulloq 27. apriili 2016-imi inissiaatileqatigiiffimmut najukkanni silataanilu qalipaaqqusillutit, inimi ikkuffimmik igalaallu qiversarfia qupeqqammat ammarsinnaananilu taarseeqqusillutit noqqaavutit.
Taassuma saniatigut sialleraangat matup alloriusaaniit imeq kusertartoq, matorlu ussiitsoq aamma eqqaavik anorimik tinginneqarsimasoq oqaatigaatit.
Naggataatigut inissiaatileqatigiiffik piumaffigaat, qui iluarseqqullugu, isaariami uffarfimmilu qulliit pære’tai taarseqqullugit, kiassaateqarfiup matua putoqarmat taarseqqullugu, kiassaateqarfimmi igalaaleeqqusillutit paarnaassaataalu paarnaaruminaammat taarseqqullugu.
Inissiaatileqatigiiffik ulloq 11. septembari 2019-imi Ineqarneq pillugu Maalaaruteqartarfimmut oqaaseqarpoq, matu silarlermut iluarsiissutissaminik ulammarissussamik ussissaammillu, eqqaavimmik ikkussisussamik sinittarfimmilu igalaap tigummivianik iluarsaassisussamik piniarsimalluni.
Aamma inissiaatileqatigiiffiup oqaatigaa, illit attartortutut qaliani persoqassappat, kanajaartaani imeqalinnginnissaa nammineq isumannaassallugu akisussaaffigaat.
Taassuma saniatigut inissiaatileqatigiiffiup oqaatigaa, qui attartornermut isumaqatigiissummi ilaanngitsoq.
Naggataatigut inissiaatileqatigiiffiup oqaatigaa, qulliit pære’tassai Pilersuisumi pisiarineqarsinnaasut, Pilersuisumilu nungussimappata, noqqaanissaannik piumaffigisinnaavatit.
Ulloq 30. septembari 2019-imi Ineqarneq pillugu Maalaaruteqarfimmut oqaatigaat, inissiaatileqatigiiffik nakkutilliisumik najukkannut assiliisitsiatortoqarsimasoq ajoqutinillu allattuisoqarluni.
Aamma najukkamut majuartarfeqannginnera maalaarutigalugu oqaatigaat.
Taassuma saniatigut kommunip sulisuisa qui sanasimagaat oqaatigaat.
Naggataatigut oqaatigaat, anorip eqqaavik tingitsissimagaa, inissiaatileqatigiiffiup ikkussimanngimmagu.
Inissiaatileqatigiiffiup ulloq 3. oktobari 2019-imi Ineqarneq pillugu Maalaaruteqarfimmut oqaatigaa, najukkannnut pingasunik piniagaqarsimallutik, matulu silarlermut igalaartassamik ikkussissamaalerlutik, ulammarissumik taarsiiniarlutik ussissarniarlugulu, sinittarfimmi igalaap tigummivia taarserniarlugu eqqaavillu ikkunniarlugu.
Aamma inissiaatileqatigiiffiup oqaatigaa, nakkutilliisuata uffarfimmi, igaffimmi inimilu igalaat qullilerfii imertanissimasut, kiassaateqarfimmi silaannarissarfik matoqqasoq naqqualu ammartiteerneqalersimasoq uppernarsarsimagaa.
Inissiaatileqatigiiffiup ulloq 14. novembari 2019-imi oqaatigaa, suli najukkamut pingasunik piniagaqarlutik, illoqarfimmili X-mi sanasunik piniarneq ajornartorujussuusoq, soorlu atortussanik piniarnermi tikisitsiniarneq ajornareertoq.
Ineqarneq pillugu Maalaaruteqarfimmut oqarasuaatikkut ulloq 15. marsi 2021-mi oqaatigaat, inissiaatileqatigiiffimmiit tusagaqarsimanak, aamma ulloq 3. oktobari 2019-imi iluarsartuunniarlugit neriorsuutigisaat suli iluarsartuunneqarsimanngillat.
Ulloq 16. marsi 2021-mi Ineqarneq pillugu maalaaruteqarfimmut ataani allaqqasut oqaatigaatit:
- Inimi nateq avissaartitilertoq, quppanitsiterluni ilaalu katassimalluni.
- Aneerasaartarfimmut igalaap listia avissaartitersimasoq inimilu igalaat allat pullannitsitersimallutik
- Inimi ikkuffik atorsinnaanngitsoq
- Inimi matu listiilu taarserneqassasut
- Sinittarfimmi igaffimmilu sikaaviit matulluarneqarsinnaanngitsut
- Igaffimmi igalaap qulaatungaa ammaannartoq, oqorsaatillu ersiinnarlutik igalaallu listia qupparneqarluni
- Sinittarfiup aappaani igalaap tigummivia napinikoq
- Sikaaviit pingasut matulu matusinnaanngitsut
- Isaariami listit annikitsumik ajoquteqartut taarsigassaallutillu
- Matu listillu taarsigassaasut, siallernerit tamaasa kusertoqartarmat
- Uffarfimmi igalaaq taarsigassaasoq, silarlunnerit tamaasa apummik isaasoqartarmat
- Uffarfiup igalaartaasa iikkallu qisuttai kusanaattut iluarsartuussaasariaqarlutillu
- Matu silarleq, listitaalu aamma alloriusaq taarserneqassasoq
- Matu silataaniit kisimi paarnaarneqarsinnaasoq
- Kiassaateqarfimmut matu putoqanngitsumik taarserneqassasoq
- Kiassaateqarfimmi igalaamik ikkussisoqassasoq
- Kissarsuut uuliatortoq kissarsuuteqarfimmi tipittumik paatiterisoq
- Eqqaavik tingitaanikoq
- Qui ikkunneqarnikuunnginnami marloria tingitaanikuusoq
- Qui marlunnik putoqalersimasoq, taamaattumillu matu matusinnaajunnaarluni
- Qui ussiittoq anorleraangallu siaruaattoqartartoq
- Silaannarissarfiup assiaqutaa aserorsimasoq
- Illup silataaniittoq kuuffiup ruujoria qisuminermik ikorfassaqanngitsoq
- Najugaq paatiternikuugami qalipatassaasoq
- Illup silataa qalipanneqarnissaminut pisariaqartitsisoq.
Inissiaatileqatigiiffiup ulloq 15. apriili 2021-mi Ineqarneq pillugu Maalaaruteqarfimmut oqaatigaa, igalaat iluarsartuunneqareersut. Taassuma saniatigut inissiaatileqatigiiffiup ataani allaqqasut oqaatigai:
- Isaariami nateq ajoquteqalaartoq, sinnerali ajoquteqanngitsoq. Ajoqutit annertuallaannginneri peqqutaalluni, iluarsartuussineq PPV-nutarterineq iluatsillugu tullissaani suliarineqarsinnaasut nalilerneqarput.
- Salliarnartap matuani allorfik ammasoq. Tamanna nalinginnaasutut ammaneqalaaginnarmat, sananeqaataanullu pingaaruteqarnani, maalaarutigineqarsinnaasutut isigineqanngilaq.
- Igalaani qullilerfiit isugutammik sunnerneqarsimasut. Nakkutilliinermi panertutut nalilerneqarsimapput. Isikkumikkut kusananngillat, igalaanilli taarsiinissamut iluarsartuussineq utaqqitinneqarsinnaavoq.
- Inimi ikkuffimmik innaallagialerisumik misissuititsinissaq aallartillugu.
- Matut illup iluaniittut listitaalu suli atorsinnaammata taarserneqassanngikkallarput.
- Sikaaviit matuinik, illup iluani matunik matulu silarleq sanasumit suliarineqarnissaminnut aallartisinneqarlutik.
- Assakaasut assiaqutai silarliit taarserneqassanngillat, quppartarneri nalinginnaasummat sananeqaataanullu pingaaruteqarnani.
- Sinittarfimmi igalaap qiversarfia taarserneqarrsoq.
- Allorfiit sanerfiillu taarserneqassanngitsut.
- Uffarfimmi igalaaq piffissami qanittumi taarserneqassanngitsoq.
- Matu silarleq taarserneqassanngilaq, kisianni matuarsaaserfiata igalaartaatalu taarserneqarnissaa aallartinneqassaaq, tamannalu illit nammineq akilertussaavat, illit attartorninni ajoqut pinngorsimammat.
- Kissarsuuteqarfimmut matu taarserneqassanngilaq, naqqani putut silaannarissarfittut atormata.
- Kissarsuuteqarfimmi igalaamik ikkussisoqassanngilaq.
- Kissarsuuteqarfimmi silaannarissarfik ammajuaannassaaq.
- Attartornerup nalaani iikkat qilaarlu nammineq qalipannissai isumagisussaavatit.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi kingusinnerusukkut allanngortinneqartumi § 45-mi allaqqavoq, Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaat attartortitsisup pisussaaffigigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Aammattaaq peqqussummi tassani § 84-imi allassimavoq, Ineqarneq pillugu maalaaruteqarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, § 28, imm. 2 takuuk.
2) Aserfallatsaaliuineq iluarsaassinerlu, § 45 takuuk.
3) Inissiap iserterfigineqarnerani qanoq issusia, § 47 takuuk.
4) Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5) Attartortup atukkaminik atuinera (torersaanissamik malittarisassanik unioqqutitsinerit), § 50 takuuk.
6) Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7) Inissiamit aninermi inissiap qanoq issusia (iluarsaassineq nalinginnaasoq) § 77 takuuk.
Aalajangersagaq tamakkiisuuvoq.
Naliliineq:
Ineqarneq pillugu maalaaruteqarfik isumaqarpoq, Inissiaatileqatigiiffik aserfallatsaaliuinissamut pisussaaffimminik eqquutitsisimanngitsoq.
Peqqussummi tassani § 45-imi Imm. 1 aamma Imm 2-mi erserpoq, inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Taamatuttaaq aserfallatsaalissalluni attartortitsisup pisussaaffigaa. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Tamanna ima isumaqarpoq, attartortitsisup nammineq nalilersinnaagaa aserfallatsaaliuineq iluarsartuussinerlu pisariaqarnersoq. Attartortitsisup aserfallatsaaliuineq amingarnerarpagu, tamanna attartortup iluarsartuutissallugu pisussaaffigaa.
Taamaattumik Ineqarneq pillugu Maalaaruteqarfik isumaqarpoq, inissiaatileqatigiiffiup isaariami nateq, uffarfimmi, igaffimmi inimilu igalaani qullilerfiit, inimi ikkuffik,sinittarfinni igaffimmilu sikaaviit matui matumilu silarlermi matuersaaserfik iluarsartuutissagai.
Tassunga tunngaviuvoq, inissiaatileqatigiiffiup isaariami naqqit ajoqusersimaneri, nakkutilliisullu nalunaarutaatut igalaat qullilerfittai isugutammik ajoqusersimasut taarserneqartariaqartut nassuerutigisimavai, inimilu ikkuffiit innaallagialerisumit misissorneqarnissaanik aallartiisoqarluni, sanasumillu sikaaviit matui, sinittarfinni igaffimmilu matut misissorneqassallutik aamma matu silarlermi paarnaasaatip igalaallu taarserneqarnissaanut aallartiisoqareerluni.
Taassuma saniatigut Ineqarneq pillugu Maalaaruteqarfik isumaqarpoq, inissiaatileqatigiiffiup matu silarleq ussissassagaa.
Tassunga tunngaviuvoq, inissiaatileqatigiiffiup matu silarleq ussissartissallugu oqaatiginikuugamikku.
Aammattaaq Ineqarneq pillugu Maalaaruteqarfik isumaqarpoq, inissiaatileqatigiiffiup eqqaavik nutaamik ikkuffilerlugu isumagissagaa.
Tassunga tunngaviuvoq, inissiaatileqatigiiffik siornatigut eqqaaviup tingitaaqqinnginnerani ikkutissallugu oqaaseqarnikuummat.
Ineqarneq pillugu Maalaaruteqarfiup tunngaviliuppaa, inissiaatileqatigiiffiup sinittarfimmi igalaap qiversartua iluarsartuutereersimagaa.
Taassuma saniatigut Ineqarneq pillugu Maalaaruteqarfik isumaqarpoq, illit nammineq qalipaanissaq isumagisussaagit, isaariami uffarfimmilu qulliit pære’tai nammineq taarsissagitit, kiassaateqarfimmi silaannarissarfik ammatiinnartassagit, taamaasilluni qalianut paaq persorlu isaassanngilaq erngumillu innarlerneqarnani.
Tassunga tunngavigineqarpoq, attartornermi peqqussummi § 45 imm. 3 naapertorlugu, attartortoq attartornerup nalaani qalipaanermut akisussaallunilu akiligassartaanut isumaginnittussaasoq, attartornermilu peqqussummi inissiaatileqatigiiffiup qulliit pære’tai taarsertassallugit akisussaasuusutut allaqqasoqarani.
Naggataatigut Ineqarneq pillugu Maalaaruteqarfik isumaqarpoq, inissiaatileqatigiiffiup silataani assakaasunut salliligaq kiassaateqarfimmilu matu iluarsartuutissanngikkaa.
Matumunnga tunngavigineqarpoq, inissiaatileqatigiiffiup assiaqutit silarliit quppartiterneri nalinginnaasuusut, sananeqarneranullu ajoqutaanngitsut pillugu oqarsimammat. Kiassaateqarfimmut matu pillugu, inissiaatileqatigiiffiup nalunaarutiginikuuaa, matup naqqani putut silaannarissarfissatut innersuussaammata suneqassanngitsut.
Aamma Ineqarneq pillugu Maalaaruteqarfik isumaqarpoq, inissiaatileqatigiiffik kiassaateqarfimmi igalaamik ikkussissanngitsoq.
Tassunga tunngavigineqarpoq, inissiaatileqatigiiffik najukkami nutaanik ikkussuussinissaminut pisussaatitaanngimmat.
Ineqarneq pillugu Maalaaruteqarfik inimi naqqit pillugit, uffarfimmi igalaaq pillugu, najukkap isikkua pillugu, kuuffiup ruujorianut ikorfaq pillugu, matut illup iluaniittut, matserfiit liistillu pillugit aamma silaannarissarfimmut assiaqut pillugu taarserneqarnissai pillugit apeqqutinik suliarinnissalluni piginnaaneqartinneqanngilaq, taakkununnga uppernarsaatinik tunniussisoqarsimanngimmat.
Aammattaaq Ineqarneq pillugu Maalaaruteqarfik qui majuartarfillu pillugit apeqqutit maalaarutigineqartut pillugit suliarinnissalluni piginnaatitaaffeqanngilaq, tamanna attartornermi ilaanngimmat.
Aalajangiineq:
Ineqarneq pillugu maalaaruteqartarfik isumaqarpoq, Inissiaatileqatigiiffik aserfallatsaaliuinissamut pisussaaffimminik eqquutitsisimanngitsoq.
Tassa imaappoq naammagittaalliuutit ilaannakuusumik isumaqataaffigineqarpoq. Taamaattumik akiliutigisimasavit utertinneqarnissaanut pisinnaatitaaffeqarputit. Taamaammat kontumut sorlermut ikineqarnissaa pillugu oqarasuaatikkut Ineqarneq pillugu Maalaaruteqarfimmut attaveqarlutit paasissutissiissutigissavat.
Ineqarneq pillugu Maalaaruteqartarfiup aalajangiineri Namminersorlutik Oqartussanut kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Ineqarnermut Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat soorlu maani pisumi taava tamanna Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. novembari 2008-meersoq § 11 naapertorlugu, iluarsisassat Ineqarneq pillugu Maalaaruteqartarfiup aalajangiinerata saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarnermut Maalaartarfimmi siulittaasoq.
Ilanngussat: Inatsisitigut tunngavigisaq
Assilineqarnera uunga: Inissiaatileqatigiiffik X. Attartorluni normu innersuutigineqarpoq: XX-XXX-XXXX-XX
lnatsisit toqqammaviit:
lnissianik attartortitsisarneq pillugu lnatsisartut peqqussutaat nr. 2, 12. maj 2005-imeersoq
§ 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa. 1mm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
1mm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
§ 84. lneqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) lneqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) lnissiap iserterfigineqarnerani qanoq issusia, tak.§ 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) lnissiamit aninermi inissiap qanoq issusia (iluarsaassineq nalinginnaasoq), tak.§ 77.
1mm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.