Ineqarneq pillugu Maalaaruteqartarfik isumaqarpoq, inimi qilaap nalinginnaasumik iluarsartuunneqarneranut akiliissanngitsutit

Ineqarneq pillugu Maalaatuteqartarfik isumaqarpoq, inimi qilaap nalinginnaasumik iluarsartuunneqarneranut akiliissanngitsutit

Ineqarneq pillugu Maalaaruteqartarfimmut ulloq 9. juuni 2021 inissiaatileqatigiiffik X-p najukkamit nutsernermi akiligassaq pillugu aalajangiussaa pillugu maalaaruteqarputit. Tassunga atatillugu Ineqarneq pillugu Maalaaruteqartarfik aalajangiivoq: 

AALAJANGIINEQ 

Ineqarneq pillugu Maalaaruteqarfik isumaqarpoq najugakunni illoqarfimmi Z-mi YY-mi nalinginnaasumik iluarsartuussineq akilissagit. 

Aammattaaq Ineqarneq pillugu Maalaaruteqartarfik isumaqarpoq, inimi qilaap nalinginnaasumik iluarsartuunneqarneranut akiliissanngitsutit. 

Taamaattumik inissiaatileqatigiiffik nutaamik nalinginnaasumik iluarsartuussineq pillugu akimik naatsorsuissaaq, tassanilu inimi qilaap iluarsartuunneqarnera ilanngunnagu nutaamik akiligassamik nasariarluni, najukkamit nutsernermi akiligassaq ilinnut nassiutissavaa. 

Ineqarneq pillugu Maalaaruteqartarfiup ineqarnermut akiligassat, akileeqqussut akitsuutitalik qularnaveeqummullu akiligassap sinneranut tunngasut suliarinissaannut pisinnaatitaanngilaq. 

Ima isumaqarluni, maalaarutinni ilaannakortumik ilalerneqartutit. 

Aalajangiussaq Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingornalu allanngortinneqartoq naapertorlugu aalajangiiffigineqarpoq. 

Suliami uppernarsaatit:

• Ineqarneq pillugu Maalaaruteqartarfimmut maalaarutit 13- maaji 2019-imeersoq.
• Attartornermut isumaqatigiissut 28. oktobari 2016-imeersoq.
• Amingaatit allattorsimaffiat 9. novembari 2016-imeersoq.
• Inissiaatileqatigiiffiup amingaatit allattorsimaffiat pillugu akissutaa 14. novembari 2016-imeersoq.
• Nakkutilliinermi nalunaarusiaq 31. maaji 2017-imeersoq.
• Najukkamit nutsernermi akiligassaq 28. juuni 2017-imeersoq.
• Faktura 17. juuni 2017-imeersoq.
• Maalaarutinnut ilassutit 14. maaji 2019-imeersoq.
• Inissiaatileqatigiiffiup suliamut oqaaseqaataa 15. aggusti 2019-imeersoq.
• Tusarniaanermi akissutit 7. oktobari 2019-imeersoq.
• Tusarniaanermut ilassutit 8. oktobari 2019-imeersoq.
• Atuisartoqarnermut Unammilleqatigiinnermullu Aqutsisoqarfimmut saaffiginnissutit 14. apriili 2020-meersoq.
• Oqarasuaatikkut oqaloqatigiinnermi allagaatit 6. maaji 2021-meersoq.
• Inissiaatileqatigiiffiup suliamut oqaaseqaatai 7. maaji 2021-meersoq.

Paasissutissiineq:

Ineqarneq pillugu Maalaaruteqartarfimmut ulloq 13. maaji 2019-imi inissiaatileqatigiiffik X-imi najugakut, illoqarfimmi Z-mi YYY-miittoq pillugu maalaaruteqarputit.

Attartornermi osumaqatigiissummi takuneqarsinnaavoq, najugaq ulloq 28. oktobari 2016 aallarnerfigalugu tigusimagit.

Najugaq 101,50 kvadratmiiterinik annertussusilik sisamanik initaqarpoq.

Amingaatit allattorsimaffiat 9. novembari 2016-imeersoq malillugu najukkami ataani allassimasut ajoquteqarlutillu amingaateqarput:

• Igaffimmi ledningit ”ikkuffii” ”matutaqanngillat”
• Qimatulivimmi matu qupparniklik
• Inimut matu qalipannera katangarsimasoq
• Inimi qilaaq qalipanneqanngitsoq
• Inimi iigaq ataaseq qalipalluarneqanngitsoq
• Sinittarfinni saagulerfiit qimaannarnikut
• Najugaq oqussunnittoq
• Qalianit qilaaq suliarilluarneqanngitsoq
• Isaariami matu silarlup matserfii aserornikut
• Igaffimmi aalap milluaasuata sinaakkutaa amingaataasoq
• Qulliup assiaqutaa amingaataasoq 

Inissiaatileqatigiiffiup ulloq 14. novembari 2016-imi oqaatigaa, amingaatit allattorsimaffiat ilinniit tigusimallugu.

Najukkamit ulloq 1. juuni 2017 nuullutit attartuiunnaarputit, kingornalu najugaq ulloq 31. maaji 2017-imi nakkutilliinikkut misissorneqarluni.

Nakkutilliinermi nalunaarusiaq ilinnit atsiorneqarsimanngilaq.

Nakkutilliinermi nalunaarusiaq 31. maaji 2017-imeersoq malillugu, najukkami nalinginnaasumik iluarsartuussisoqartussaavoq, tassani iikkat qilaarlu qalipanneqarlutillu masatsernaveersaammik ataasiartumik qallerneqassammata.

Taassuma saniatigut oqaatigineqarpoq, kissarsuutip tunua eqqiarneqarsimanngitsoq.

Najukkamit nutsernermi akiligassami 28. juuni 2017-imeersumi takuneqarsinnaavoq, 12612 koruuninik nalinginnaasumik iluarsartuussinermut akiligassaqartutit, tassani ilanngaatit 8 %-it ilanngunnagit, tassa najukkami qaammatit amerlassusaat pineqarpoq.

Aammattaaq takuneqarsinnaavoq, 4418,43 koruunit ineqarnermut akiligassat, 150 koruuninik akileeqqussummik akitsuutitalik aamma 5558 koruuni qularnaveeqummut akiligassat sinneri akilertussaagit.

Naggataatigut qularnaveeqummut 16773 koruunit akilersimavatit.

Taamaattumik katillugit 4986,47 koruunit inissiaatileqatigiiffimmut akilertussaavatit.

Faktura qalipaasoq XXZ-imiit ulloq 7. juuni 2017-imi nassiunneqarnikoq malillugu, najugaq 12612 koruunit nalinganut nalinginnaasumik iluarsartuunneqarpoq.

Maalaarutinni takuneqarsinnaavoq, najukkannit nutsereernermi qularnaveeqummik tigusaqarsimannginnerit paasisinnaanngikkit.

Oqaatigaat, amingaatit allattorsimaffianni allatatit minillugit, najukkamit nutsinnginninni nammineq najukkat qalipassimallugu.

Naggataatigut oqaatigaat, najugaq amerlasuunik assiuteqarfigalugu, kisiannili taakkua iPadikunniittut, taannalu ammarsinnaanngikkit.

Aammattaaq oqaatigaat, inissiaatileqatigiiffimmut assit siornatigut nassiutereernikuullugit.

Maalaarutinnut ilanngussanni 14. maaji 2019-imeersumi takuneqarsinnaavoq, isertinnginninni viceværterlu najugaq misissoqqaarsimagissi.

Tassunga atatillugu najukkap qilaava qalipanneqarsimanngitsoq paasisimagit, tamannalu viceværtip aqutsisunut ingerlateqqissimavaa, aqutsisullu akisimapput qalipanneqanngitsortaa akuerineqarsimasoq.

Aammattaaq oqaatigaat, iserterninni amingaatit allattorsimallugit, qalipannissaanulli eqqiarneqarnissaanullu amingaataasut ilanngullugit allassimanagit, isumaqaraluaravit tamakkua ilinnut tutsinneqassanngitsut.

Inissiaatileqatigiiffik X ulloq 15. aggusti 2019-imi Ineqarneq pillugu Maalaaruteqartarfimmut oqaatigaa, attartornermut peqqussut naapertorlugu najukkamit nutsernermut nalunaarusiaq suliarineqarsimasoq.

Ulloq 7. oktobari 2019 Ineqarneq pillugu Maalaaruteqarfimmut oqaatigaat, inissiaatileqatigiiffiup najugakunnut iserterninni assilinikuusatit nassiussimanngikkai.

Najukkamit nuunnginnerni najugaq qalipassimallugu oqaatigaat, inissiaatileqatigiiffiulli qularnaveeqqut utertikkusunngilaa, aammattaaq akiligassamik nassissimallutit.

Aammattaaq allapputit eqqunngitsumik pineqarsimasutut misigisimallutit.

Ulloq 8. oktobari 2019 Ineqarneq pillugu Maalaaruteqarfimmut oqaatigaat, paasissutissat amigartut, inissiaatileqatigiiffimmut assit allakkallu nassiunnikuusatit ilaanngimmata.

Aammattaaq qularnaveequtip utertinneqarnissaa qalipaatitsisimasuusaarnerullu akiligassartaata atorunnaarsinneqarnissaa qularinagu aliangiusimavutit.

Ulloq 14. apriili 2020 Ineqarneq pillugu Maalaaruteqarfimmut oqaatigaat, najukkamut nutsernermi najugaq pitsaanngitsoq, najukkamiillu nutsernermi najugaq qalipassimallugu eqqiarlugulu, tamannalu pillugu inissiaatileqatigiiffimmut assit pillugit saaffiginnginnikuullutit, maannamulli akineqarnikuunak.

Ulloq 6. maaji 2021 oqarasuaatikkut Ineqarneq pillugu Maalaaruteqarfimmut ilisimatitsivutit, najukkamit nutsernermi nakkutilliinermi ilaasimanak, meeqqatilli sinnerlutit ilaasinnaatitaasimasut.

Aammattaaq inissiaatileqatigiiffik isumaqitiginnginnakku atsioqataasimanak ilisimatitsissutigaat.

Inissiaatileqatigiiffiup ulloq 7. maaji 2021-mi Ineqarneq pillugu Maalaaruteqartarfimmut oqaatigaa, najugaq pillugu assiuteqaratik.

Inatsisitigut tunngavigisaq:

Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi § 45 imm. 3. allassimavoq piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigigaa taakkununngalu aningaasartuutit akilissallugit.

Peqqussummi tassani § 77-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Naqqit nutaamik lakkersimasutut isikkoqassapput, taamaattorli tak. imm. 3.

Imm. 2 Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3 Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

• 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

Aammattaaq peqqussummi tassani § 84, imm. 1-imi allassimavoq Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1. Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2. Aserfallatsaaliuineq iluarsaassinerlu, § 45 takuuk.
3. Inissiap iserterfigineqarnerani qanoq issusia, § 47 takuuk.
4. Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5. Attartortup atukkaminik atuinera (torersaanissamik malittarisassanik unioqqutitsinerit), § 50 takuuk.
6. Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7. Inissiamit aninermi inissiap qanoq issusia (iluarsaassineq nalinginnaasoq) § 77 takuuk.

Aalajangiussaq tamakkiissuuvoq.

Nalilersuineq:

Ineqarneq pillugu Maalaaruteqartarfik isumaqarpoq, illoqarfik Z-imi najugakunni YY-mi nalinginnaasumik iluarsartuussineq akilissagit.

Peqqussummi tassani § 77, imm. 1-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Taassuma saniatigut naqqit lakkeqqammersutut isikkoqassapput.

Ineqarneq pillugu Maalaaruteqartarfiup najukkamit nutsernermi qalipaasimanernut uppernarsaammik ilanngussisimannginnerit pingaartippaa.

Aammattaaq Ineqarneq pillugu Maalaaruteqarfiup najukkamut nutsernermi nalinginnaasumik iluarsartuunneqarsimanersoq pillugu uppernarsaateqannginnera pingaartippaa, soorluttaaq attartornermi isumaqatigiissummi takuneqarsinnaanngitsoq, najukkamit nutsernermi nalinginnaasumik iluarsartuussinissamut piumasaqaammik allannguisoqarsinnaasoq isumaqatigiissutigineqarsimanersoq.

Amingaatit allattorsimaffiani takuneqarsinnaavoq, inimi iigaq ataaseq qalipanneqarluarsimanngitsoq pillugu Ineqarneq pillugu Maalaaruteqarfiup najukkamut nutsernermi nalinginnaasumik iluarsartuussisoqarsimasoq pillugu naliliinera allannguuteqanngilaq.

Ineqarneq pillugu Maalaaruteqarfik isumaqarpoq, inimi qilaaq nalinginnaasumik iluarsartuunneqarnera akilissanngikkit.

Matumunnga tunngavigineqarpoq, § 77, imm. 3-mi ersermat, attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Ineqarneq pillugu Maalaaruteqartarfiup najukkamut iserterninni amingaatit allattorsimaffianut inimi qilaaq qalipanneqarsimanngitsoq allassimagit pingaartippaa.

Taassuma saniatigut Ineqarneq pillugu Maalaaruteqartarfiup pingaartippaa, inissiaatileqatigiiffiup amingaatit allattorsimaffia oqaaseqaateqarfiginagu tigusimagaa, taamaasillutillu qilaap qalipanneqannginnera uppernarsarsimallugu.

Taamaattumik Ineqarneq pillugu Maalaaruteqartarfik nalinginnaasumik iluarsartuussineq pillugu akimik nutaamik naatsorsuissaaq, nutaamillu najukkamit nutsernermi akiligassamik ilinnut nassiusseqqilluni.

Ineqarneq pillugu Maalaaruteqartarfik ineqarnermut akiligassat, tuaviusaarutit qularnaveeqqummullu akiligassat sinneruttut pillugit apeqqutinik suliaqarnissaminut piginnaatitaaffeqanngilaq.

Aalajangiineq:

Ineqarneq pillugu Maalaaruteqartarfik isumaqarpoq, inimi qilaap nalinginnaasumik iluarsartuunneqarneqarnera akilissanngikkit.

Taamaattumik Ineqarneq pillugu Maalaaruteqartarfik nalinginnaasumik iluarsartuussineq pillugu akimik nutaamik naatsorsuissaaq, nutaamillu najukkamit nutsernermi akiligassamik ilinnut nassiusseqqilluni.

Tassa imaappoq maalaarutit ilaannakuusumik isumaqataaffigineqarpoq. Akiliutigisimasavit utertinneqarnissaannut pisinnaatitaaffeqarputit. Taamaattumik Ineqarneq pillugu Maalaaruteqarfimmut saaffiginneqquneqarputit konto normut tunniunnissaa siunertaralugu.

Ineqarneq pillugu Maalaaruteqartarfiup aalajangiineri Namminersornerullutik Oqartussanut (Namminersorlutik Oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.

Ineqarneq pillugu Maalaaruteqartarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat soorlu maani pisumi taava tamanna Ineqarneq pillugu Maalaaruteqartarfiup sulinera pillugu Namminersornerullutik Oqartussat nalunaarutaat nr. 27, 26. novembari 2008-meersumi § 11 naapertorlugu, iluarsisassat Ineqarneq pillugu Maalaaruteqartarfiup aalajangiinerata saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput.

Naammagittaalliuuteqarnissamut ilitsersuut:

Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, tak. Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.

Ineqarneq pillugu Maalaaruteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.

Inussiarnersumik inuulluaqqusillunga

Naja Joelsen

Ineqarneq pillugu Maalaaruteqartarfimmi siulittaasoq.

Takussutissaq: Inatsisitigut tunngaviliussaq

Inissiaatileqatigiiffik X-imut assilinera.

Inatsisitigut tunngavigisaq:

• 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik. 

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.

• 77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.

Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai

Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.

• 78. Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
• 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45. 

3) Inissiap iserterfigineqarnerani qanoq issusia, tak. § 47.

4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.

5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.

6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.

7) Inissiamit aninermi inissiap qanoq issusia (iluarsaassineq nalinginnaasoq), tak. § 77.

Imm. 2. Maalaarutit Ineqarneq pillugu Maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.

Imm. 3. Maalaarutip Ineqarneq pillugu Maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput.

Imm. 4. Attartortup suliaq eqqartuussivinnut suliakkiissutigineqareersoq Ineqarneq pillugu Maalaaruteqartarfimmut suliakkiissutigineqarnissaa kissaatigippagu, Maalaaruteqartarfik maalaarutip suliarinissaanut itigartitsissaaq.