Tusagassiornermi ileqqorissaarluarnissaq attanniarlugu Kalaallit Nunaanni Tusagassiuutit pillugit Aaliangiisartut tusagassiuutit tusagassiornermi ileqqorissaarnissamik maligassiissutinik unioqqutitsinerit pillugit nalilersuutinik  isornartorsiuinissartik suliaqartassaaq.

Tusagassiuutit pillugit Aaliangiisartut tusagassiorfiit pisunut aallakaatitsinerat pillugu nalilersuuteqarsinnaavoq, tamatumunngalu , tusagassiuutit naqqiissuteqarnissaannut naalakkiisinnaallutik, kiisalu naqqiuteqartoqarnissaannut akuersissuteqarsinnaallutik.

Tusagassiuutit pillugit Aaliangiisartut allattoqarfimmik Atuisartoqarnermut Unammilleqatigiinnermullu Aqutsisoqarfimmi inissisimasumi sullinneqarput.

Kikkut naammagittaalliuuteqarsinnaappat?
Inuit inatsisitigullu pisinnaatitaasut Tusagassiuutit pillugit Aaliangiisartunut naammagittaalliuuteqarsinnaapput.

Tusagassiuutit pillugit Aaliangiisartut naammagittaalliuut suliarissappassuk, naammagittaalliortup naammagittaalliuutigineqartumut inatsisitigut attuumassuteqarnissaa piumasaqaataavoq.

Suliaq Tusagassiuutit pillugit Aaliangiisartuniit suliarineqassappat, naammagittaalliuuteqartup allaatigisami eqqartorneqarsimanera, assiliami nuisasimanera imaluunniit tamanit kinaassuserineqarsinnaanera piumasaqaataavoq.

Eqqartorneqartumut aaliangersimasumut soqutiginninneq (faglig interesse) imaluunniit politikkikkut soqutiginninneqtoqqammavigalugit suliarineqarnissaa naammanngilaq.

Suliamut inatsisitigut attuumassutilimmiit naammagittaalliortoqanngikkaluartoq Tusagassiuutit pillugit Aaliangiisartut nammineq suliniuteqarlutik tusagassiornermi ileqqorissaarnissamik maligassiissutit pillugit suliamik pingaarutilimmik imaluunniit tunngaviliisumik aallartitsisinnaapput.

Tusagassiuutit suut naammagittaalliuutigisinnaavigit?
Kalaallit Nunaanni tusagassiuutit, namminersortumik sulianik nutaarsiassalerisartut pillugit naammagittaalliuuteqarsinnaavutit. Tassaappullu:

• Nunap iluani tusagassiuutit naqitat
  • elektronikkikkut tusagassiuutit (allakkiat aalajangersimasumik saqqummiunneqartartut, assit assigisaalluunniit)
  • nipikkut assikkulluunnit aallakaatitat

Suut naammagittaalliuutigisinnaavigit?
Suliat tusagassiornermi ileqqorissaarnissamik maligassiissutinik unioqqutitsisut, imaluunniit suliat naqqiissuteqarnissamik pisinnaatitaaffeqarfigisorisatit (eqqunngitsoqartillugu naqqiisinnaatitaaneq) naammagittaalliuutigisinnaavatit.

Tusagassiuutit pillugit Aaliangiisartut suliat allanut tunngasut suliarisinnaanngilai. Assersuutigalugu aaliangiisartut tusagassiuut nikanarsaataasumik ajuallatsitsineq pillugu inatsimmik imaluunniit piginneqqaartussaatitaanermik unioqqutitsisimanersoq isummerfigisinnaanngilaat.

Tusagassiuutit pillugit Aaliangiisartunit taarsiissummik tunineqarsinnaanngilatit.

Sumut naammagittaalliuuteqarsinnaavunga naammagittaalliornissamullu piffissarititaq suua?
Isumaqaruit ilinnut tunngatillugu tusagassiornermi ileqqorissaarnissamik maligassiissutit unioqqunneqarsimasut, tusagassiuummut toqqaannaq imaluunniit Kalaallit Nunaanni Tusagassiuutit pillugit Aaliangiisartunut naammagittaalliuuteqarsinnaavutit. Kisiannili Kalaallit Nunaata Radioa (KNR) pillugu naammagittaalliuutaappat, taava taakkununnga toqqaannaq nassiunneqaqqaartassaaq.

Tusagassiuummut imaluunniit Tusagassiuutit pillugit Aaliangiisartunut naammagittaalliuuteqaruit, taava allaaserisap naammagittaalliuutigisavit saqqummiunneqarneraniit, imaluunniit aallakaatitap naammagittaalliuutigisavit aallakaatinneraniit sapaatit akunneri sisamat qaangiutsinnagit naammagittaalliuutigissavat.

Tusagassiuummut toqqaannaq naammagittaalliuuteqarsimaguit, tamatumunngalu aalajangiissummik isumaqatiginngisannik pisimaguit, taava tusagassiuutip aalajangiissuteqarneraniit sapaatit akunneri sisamat qaangiutsinnagit Tusagassiuutit pillugit Aaliangiisartunut naammagittaalliuutigisinnaavat.

Isumaqaruit tusagassiuutinut isumannik oqaaseqarnissannik pisinnaatitaaffeqartutit (eqqunngitsoqartillugu naqqiisinnaatitaaneq), tamatigut tusagassiuutit aaqqissuisuanut paasissutissat akerlilerneqartut saqqummiunneqarneraniit kingusinnerpaamik sapaatip akunneri 4 qaangiutsinnagit naqqiisoqarnissaanut allaganngorlugu noqqaassuteqaqqaassaatit.

Tusagassiuutip noqqaassutinnut itigartitsippat, imaluunnit tusagassiuutip akissutaa naammaginngikkukku, sapaatip akunneri 4 qaangiutsinnagit Kalaallit Nunaanni Tusagassiuutit pillugit Aaliangiisartunut naammagittaalliuuteqarsinnaavutit.

Qanoq naammagittaalliuuteqassaanga?

Kalaallit Nunaanni Tusagassiuutit pillugit Aaliangiisartunut naammagittaalliuuteqassaguit, allaganngorlugu naammagittaalliuuteqassaatit.

Naammagittaalliuutit allakkatigut imaluunniit e-mailikkut nassiussinnaavat. Allaaserisaq sunarpiaq imaluunniit aallakaatitassiaq sunarpiaq naammagittaalliuutiginerit erseqqissassavat.

Naammagittaalliuuteqarneq akeqanngilaq.

Tusagassiuutit pillugit Aaliangiisartut attaveqarfissai:

Kalaallit Nunaanni Tusagassiuutit pillugit Aaliangiisartut

c/o Atuisartoqarnermut Unammilleqatigiinnermullu Aqutsisoqarfik

Postboks 689

3900 Nuuk

Oqarasuaat (+299) 32 80 33

E-mail: pressenaevn@nanoq.gl

Naalakkersuisut Tusagassiuisarnermi akisussaassuseqarneq pillugu Inatsisartut inatsisaat nr. 17, 19. novembari 2007 (Tusagassiuisarnermi akisussaassuseqarneq pillugu inatsit) naapertorlugu Kalaallit Nunaanni Tusagassiuutit pillugit Aaliangiisartut pilersippaat. Tusagassiuutit pillugit Aaliangiisartut inatsisilerituumik ataatsimik ilaasortanillu arfinilinnik katiterneqarpoq, allattoqarfimmillu ikiorteqarluni. Ilaasortanut tamanut tullersorteqarpoq.

Tusagassiuutit pillugit Aaliangiisartut ima aaqqissuunneqarput:

• Kirsten Thomassen, siulittaasoq , tullersortaa Ivik Paulsen
• Mariia Simonsen aamma Andreas Wille, Kalaallit Nunaanni Tusagassiortut Peqatigiiffianiit innersuussat, tullersortillu Else Løvstrøm aamma Karsten Sommer
• Dorthe Olsen aamma Irene Jeppson, aaqqissuisoqarfinni aqutsisunut sinniisussatut innersuussat, tullersortillu Jette Andersen aamma Noah Mølgaard
• Nino Fencker aamma Ane Marie Kristiansen, peqatigiiffinniit innersuussat, tullersortillu Ilannguaq Petrussen og Martin Mørch

Ilaasortat piffissami 1. aggusti 2025 – 30. juuni 2029 atuuffeqarput.

Tusagassiuisarnermi akisussaassuseqarneq pillugu Inatsisartut inatsisaat

Radiukkut tv-kkullu aallakaatitsisarneq pillugu Inatsisartut inatsisaat pillugu Namminersorlutik Oqartussat nalunaarutaat

Tusagassiornermi ileqqorissaarnissamik maligassiissutit uani atuarsinnaavatit

Tusagassiuisarnermi akisussaassuseqarneq pillugu Inatsisartut inatsisaat nr. 17, 19. novembari 2007-meersumi § 52, imm. 1 malillugu Naalakkersuisut Tusagassiuutit pillugit aalajangiisartut isumaqatiginninniarfigereerlugit sulianik aaqqissuussinerat aalajangersassavaat.

Sulianik Aaqqissuussineq suli aalajangersarneqanngilaq.

Tusagassiuutit pillugit Aaliangiisartut suliatik pillugit Naalakkersuisunut ukiumoortumik saqqummiussisarput.

Ukiumoortumik nalunaarutit Tusagassiuutit pillugit Aaliangiisartuniit ukiumoortumut aalajangiissutinik imaqarput. Kisiannili inuit pillugit paasissutissat ilaatinneqanngillat.

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2025

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2024

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2023

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2022

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2021

Kalaallit Nunaanni Tusagassiuutit pillugit Aaliangiisartut ukiumoortumik nalunaarutaat 2017-2020