Siulequt
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 10, imm. 5 naapertorlugu Isumaginninnermi Naammagittaalliuuteqartarfik Inatsisartunut suliaqarfini pillugit ukiumoortumik nalunaaruteqartartussaavoq.
Nalunaarusiaq ukiumut ilivitsumoortuuvoq naammagittaalliuutillu tiguneqartut Naammagittaalliuuteqartarfimmilu aalajangiinerit qassiunerinik kisitsisit atorlugit nalunaarsuusiornerup saniatigut tunngaviusumik aalajangiinernik imaqartarluni. Tunngaviusumik aalajangiinerni saqqummiunneqartuni kikkut pineqarnersut takuneqarsinnaajunnaarsinneqartarput.
Kommunenut, Kanukokamut, Inatsisartut Ombudsmandianut, Rigsombudsmandimut aammattaaq Isumaginninnermi Siunnersortinngorniat Ilinniarfiannut nalunaarusiaq nassiunneqartarpoq.
Naammagittaalliuteqartarfiup qarasaasiatigut nittartagaatigut www.nanoq.gl/dsa nalunaarusiaq pissarsiarineqarsinnaavoq, taamattaaq nalunaarusiaq Isumaginninnermi Naammagittaalliuuteqartarfiup allattoqarfianut saaffiginninnikkut pissarsiarineqarsinnaalluni.
Februar 2006
Ole Rud
Siulittaasoq.
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11-mi, 12. november 2001-imeersumi § 10 imm. 5 naapertorlugu matumuuna Isumaginninnermi Naammagittaalliuuteqartarfik 2004-mi sulisimanini pillugu nalunaaruteqarpoq.
Naammagittaalliuuteqartarfiup inatsisitigut tunngavissai
Isumaginninnermi Naammagittaalliuuteqartarfiup sulinera aallartippoq 1. januar 1980-imi.
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11-mi, 12. november 2001-imeersumi § 8 imm. 1 aammat 2 malillugit Isumaginninnermi Naammagittaalliuuteqartarfik tassaavoq isumaginninnermi malittarisassat malillugit kommunalbestyrelsip aalajangigai pillugit naammagittaalliuuteqartarfik.
Naammagittaalliuuteqartarfiup sulinera §§-ini 9-miit 11-mut inatsisitigut tunngavissinneqarpoq.
Naammagittaalliuuteqartarfik siulittaasoqassaaq allanillu sisamanik ilaasortaqassalluni. Naalakkersuisut siulittaasumik, taassuma sinniisussaanik, ilaasortanik sisamanik taakkulu sinniisusaannik ukiunut marlunnoortumik toqqaassapput. Siulittaasoq inatsisilerituutut soraarummeersimassaaq imaluunniit allatigut Kalaallit Nunaanni inatsisinik isumaginninnermut tunngasunik sukumiisumik paasisimasaqassalluni. Ilaasortat marluk isumaginninnermi inatsisinik ilisimasaqassapput, ilaasortallu marluk isumaginninerup iluani inuiaqatigiit ingerlaasiannik ilisimasaqassallutik. Naalakkersuisut Isumaginninnermi Naammagittaalliuuteqartarfimmut allattoqarfeqarnikkut ikiuutissapput.
Naammagittaalliuuteqartarfiup katigaanera.
Isumaginninnermi Naammagittaalliuuteqartarfik ukiumi nalunaarusiorfiusumi ukuninnga inuttaqarsimavoq:
Bendt Frederiksen, Upernavik
Nukákuluk Kreutzmann, Nuuk
Martha Labansen, Nuuk
Emilie Lennert, Sisimiut
Ole Rud, Nuuk
Ole Rud ukiumi nalunaarusiorfiusumi Naammagittaalliuuteqarfimmi siulittaasuuvoq.
Naalakkersuisut Allattoqarfiat Naammagittaalliuuteqartarfimmut allattoqarfiuvoq. Nalinginnaasumik ukiumut pingasoriarluni tallimariarluniluunniit ataatsimiittoqartarpoq.
Allattoqarnerup tungaatigut immikkut taasassat
Isumaginninnermi Naammagittaalliuuteqartarfiup allattoqarnera Naalakkersuisut Allattoqarfiata isumagaa. Allattoqarneq marlunngorlugu avinneqarsinnaavoq, tassa allatsit suliassaviinik sulinermut (naammagittaaliuutinik tigooraaneq, suliamut tunngasunik paasiniaaneq, naammaagittalliuuteqartarfiup ataatsimiinnissaanik piareersaaneq, il.il.) aammalu naammagittaalliuutit inatsisinut tunngasortaasa suliarinerat.
Naalakkersuisut 13. november 2003 aalajangerpaat Isumaginninnermi Naammagittaalliuuteqartarfiup ukiumit aningaasaliiffimmit 2004-mit atuutilersumik Isumaginninnermi Naammagittaalliuuteqartarfik nammineerluni aqutassaminik aningaasaliiffigineqassasoq. 1,0 mio. koruuninik aningaasaliinissaq Naalakkersuisut siunnersuutigaat. Tamanna 2004-mut Aningaasanut Inatsisissap akuersissutigineranut atatillugu Inatsisartunit akuerineqarpoq 2003-milu decemberip 11-ani atortussanngortinneqarpoq. Aningaasaliissutit 2005-imi attatiinnarneqarput.
Isumaginninnermut tunngasuni aalajangikkat inatsisit naapertorlugit Isumaginninnermi Naammagittaalliuuteqartarfimmut naammagittaalliuutigineqarsinnaapput. Suliassanik annertuumik sunniutilinnik, soorlu pinngitsaaliilluni meeqqanik angerlarsimaffiup avataanut inissiisarnernik, Naammagittaalliuuteqartarfik tigusaqartarpoq, aammali annertunngitsumik sunniutilinnik, soorlu utoqqalineq pissutigalugu pensionisianut inummut tapiutit pillugit malittarisassat naapertorlugit aallaasimik kusanartumik, angallammut motoorimik il.il. qinnuteqaatinut kommunip itigartitsineri suliakkiissutigineqartarput.
Naammagittaalliuuteqartarfimmi allatsit/suliarinnittut Naalakkersuisut Allattoqarfianni fuldmægtigitut atorfinitsinneqartarput, ukiorlu aningaasaliiffik 2003 tikillugu Inatsisartut Allattoqarfianni sulisut ataatsimut amerlassusiannut ilaallutik atorfeqarsimallutik. Suliassanik suliarinnittussatut nalinginnaasumik inatsilerituut atorfinitsinneqartarput. Suliassat annertussusaat sulisussarsisinnaanerlu atorfimmilu uninngatitsisinnaaneq apeqqutaatillugit 1988-imiit allatsit ataaseq-marluk atorfeqartinneqartarput.
Naalakkersuisut Allattoqarfianni Naammagittaalliuuteqartarfiup allattoqarnikkut inissisimanerata nalaani inatsisilerituunik sulianik ingerlatsisussanik sulisussarsiortarneq sulisunillu tigumminnissinnaaneq ajornakusoorsimavoq. Atorfeqartartut nalinginnaasumik ukioq ataaseq missiliorlugu atorfimminni atasarsimapput. Sulisut taarseraannerujussuat aammalu ataatsimiinnermi ataatsimi suliassat taamaallaat 20-t 30-illu akornanni amerlassusillit suliarineqarsinnaanerat pissutaalluni Naammagittaalliuuteqartarfiup suliassaatai amerlasuut ukioq ataaseq sinnerlugu pisoqaassuseqarput, tamanna Naammagittaalliuuteqartarfiup assorsuaq naammaginngilaa. Suliassalli uninngasut allattoqarfiup siulittaasullu immikkut ittumik annertuumik sulinerat pissutaalluni ikilisinneqarput.
Naammagittaalliuutit suliarineqartut appartinniarlugit 2002-mili aasakkut Naammagittaalliuuteqartarfik suliniuteqalerpoq. Sulisumik marlunnik oqaasilimmik atorfinitsitsinissamut Naammagittaalliuuteqartarfik 2004-mi periarfissaqalerpoq, siulittaasorlu siulittaasutut inatsisit naapertorlugit aalajangiisaleriartuinnarsimavoq. Siulittaasoq annertusiartuinnartumik siunnersuinermi ilitsersuinermilu ikiuuttalersimavoq.
Suliassat amerliartornerat pissutigalugu naammagittaalliuuteqartarfik nukissatigut annertusileriffigineqartariaqartoq Naammagittaalliuuteqartarfiup nalilerpaa. (Uani Naammagittaalliuuteqartarfiup maluginiarpaa naammagittaalliuuteqarfinnut allanut naleqqiullugu aningaasaliissutit annikinerusut, tassunga peqatigitillugu naak naammagittaalliuuteqarfinnut allanut naleqqiullugu suliassat amerlanerugaluartut).
Maannakkut naammagittaalliuuteqartarfiup suliassai il.il. inatsisilerituunit marlunnit allaffimmiumillu (kontorfuldmægtigimit) ataatsimit suliarineqarsinnaasutut nalilerneqarput, tassa sulinerup qanoq aaqqissuunneqarnera apeqqutaalluni. Tassunga ilanngunneqassapput naammagittaalliuuteqartarfiup nutsigassaatai (ukiumut quppernerit 3000 missaaniittut).
Naammagittaalliuuteqartarfiup 2004-mi sulinera
Naammagittaalliuuteqartarfiup ukiumi nalunaarusiorfiusumi naammagittaalliuutit katillugit 220-t tiguai. 2003-mut naleqqiullugu naammagittaalliuutit 27-nik amerlisimapput. Nalinginnaasumik naammagittaalliuutit qaammammut 20-t 25-llu akornanni amerlassusillit naammagittaalliuuteqartarfimmut apuuttarput.
Naammagittaalliuutit tiguneqartut ima agguataarsimapput:
Isumaginninnermi pensionit utoqqarnillu paaqqinniffiit il.il. pillugit Inatsisartut peqqussutaat naapertorlugu aalajangiinermut naammagittaalliuutit 54-it
Naartunermi, erninermi qitornavissiartaarnermilu sulinngiffeqarneq pillugu Inatsisartut peqqussutaat naapertorlugu aalajangiinermut naammagittaalliuutit pingasut
Pisortanit ikiorsiissutit pillugit Inatsisartut peqqussutaat naapertorlugu aalajangiinernut naammagittaalliuutit 48-t
Annertussusileriikkanik ikiorsiissutit pillugit Inatsisartut peqqussutaat naapertorlugu aalajangiinernut naammagittaalliuutit qulingiluat
Meeqqanik inuusuttunillu ikiorsiisarneq pillugu Inatsisartut peqqussutaat naapertorlugu aalajangiinernut naammagittaalliuutit 25-t
Annertuumik innarluutillit ikiorserneqartarnerat pillugu Inatsisartut peqqussutaat naapertorlugu aalajangiinernut naammagittaalliuutit 35-t
Meeqqanut tapiissutit pillugit Inatsisartut peqqussutaat naapertorlugu aalajangiinernut naammagittaalliuutit qulit
Ineqarnermut tapiissutit pillugit Inatsisartut peqqussutaat naapertorlugu aalajangiinernut naammagittaalliuutit qulit
Meqqanut akilersuutit il.il. tunniunneqartarneri pillugit Inatsisartut peqqussutaat naapertorlugu aalajangiinernut naammagittaalliuutit tallimat
Naammagittaalliuutit 20-t suliassatut itigartinneqarput aamma/imaluunniit oqartussaasunut allanut imaluunniit suliamut oqartussaasuinnut innersuussutigineqarlutik, imaluunniit unitsiinnarneqarlutik naammagittaalliuummi sunarpiaq naammagittaalliuutigineqarnersoq ersinngimmat imaluunniit allatut naammassineqarlutik naammagittaalliuuteqartarfimmi suliarineqaratik
Aalajangiinerit
Ukiumi nalunaarusiorfiusumi Isumaginninnermi Naammagittaalliuuteqartarfik tallimariarluni ataatsimiippoq. Naammagittaalliuutit katillugit 92-it Naammagittaalliuuteqartarfiup suliarai. Tassunga ilanngunneqassapput naammagittaalliuutit katillugit 82-it siulittaasumit aalajangiiffigineqartut, tassa naammagittaalliuutit katillugit 174-iupput.
Naammagittaalliuutit 2004-imi tiguneqartut 2004-imi aalajangiiffigineqartunut naapertuutinnginnerat maluginiarneqassaaq. Tassunga tunuliaqutaavoq ukiuni siuliini tiguneqartut tamakkerlugit inaarutaasumik suliarineqanngimmata naammagittaalliuutillu ilaat ukiumut nalunaarusiorfiusumut allamut tunngassutillit 2004- imi suliarineqarsimammata.
Aalajangiinerit suliassaqarfinnut ataasiakkaanut ima agguataarsimapput:
Pisortanit pensionisiat utoqqarnillu paaqqinniffiit il.il. pillugit Inatsisartut peqqussutaat
Pisortanit pensionisiat utoqqarnillu paaqqinniffiit il.il. pillugit suliassat 30-t Naammagittaalliuuteqartarfiup suliarai, naammagittaalliuutit 34-t siulittaasumit aalajangiiffigineqarput, tassa naammagittaalliuutit katillugit 64-iupput.
Suliassani marlunni naammagittaalliuuteqartut suliassanngortitsineri itigartinneqarput:
Suliassani marlunni suliassanngortitsinerit siulittaasup itigartippai, isumaaginninnikkut malittarisassat naapertorlugit aalajangiisoqarsimannginnera pissutigalugu.
Suliani 32-ni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliani tallimani aalajangiinerit imaalillugit allanngortinneqarput, naammagittaaliuuteqartut siusinaartumik pensionisiartaartinneqartussanngorlugit
Suliami ataatsimi aalajangiineq siulittaasumit imaalillugu allanngortinneqarpoq, ullormit qinnuteqarfimmit atuuttumik siusinaartumik pensionisiat tunngiunneqartussanngorlugit
Suliami ataatsimi aalajangiineq siulittaasumit imaalillugu allanngortinneqarpoq, inummut tapiutit utertillugit akileqquneqassanngitsut naqissuserneqarluni, taamaaliortoqarsinnaasorlu aatsaat inummut tapiutinik illersorneqarsinnaanngitsumik aningaasanik aqutsinerlunneq pisimappat
Suliami ataatsimi aalajangiineq imaalillugu allanngortinneqarpoq, naammagittaaliuuteqartoq nunani allaniillatsiarnermini pensionisiaqartitaasinnaanngorlugu, kommunip ilaatigut pineqartoq tusarniaavigeqqaarsimanngimmagu
Suliani marlunni suliaq imaalillugu aallaqqaataanniit suliassanngorlugu utertinneqarput, siusinaartumik pensionisiat aningaasanngornagit allagartamik pisiniutissanngorlugu (rekvisistion) kommunip tunniussisimanerminut tunuliaqutaasut annertunerusumik kommunimit misissugassanngorlugit
Suliami ataasimi suliaq imaalillugu aallaqqaataanniit suliassanngorlugu siulittaasumit utertinneqarput, siusinaartumik pensionisiat aningaasanngornagit allagartamik pisiniutissanngorlugu (rekvisistion) kommunip tunniussisimanerminut tunuliaqutaasut annertunerusumik kommunimit misissugassanngorlugit
Suliami ataatsimi aalajangiineq imaalillugu allanngortinneqarpoq, naammagittaalliuuteqartoq pensionisianik tunineqarpallaarsimasoq utertitsissanngitsoq, naammagittaaliuuteqartup nammineerluni pissutsit allanngorsimanerat arlaleriarluni kommunimut nalunaarutigisarsimagaluarmagu
Suliani tallimani suliat utertinneqarput, aalajangiisussaq siulleq inummut tapiutinik qinnuteqaammik itigartitsisimammat, inuup pisariaqartitsinera nalilersuiffigeqqaarnagu
Suliami ataatsimi suliaq siulittaasumit utertinneqarput, aalajangiisussaq siulleq inummut tapiutinik qinnuteqaammik itigartitsisimammat, inuup pisariaqartitsinera nalilersuiffigeqqaarnagu.
Suliani pingasuni suliat utertinneqarput, suliamik aalajangiisoq siulleq siusinaartumik pensionisiaqalernissamut pisinnaatitaanermik aalajangiinermini paasissutissanik naammattunik piniarsimanngimmat.
Suliani arfineq pingasuni suliaq siulittaasumit utertinneqarput, suliamik aalajangiisoq siulleq siusinaartumik pensionisiaqalernissamut pisinnaatitaanermik aalajangiinermini paasissutissanik naammattunik piniarsimanngimmat
Suliami ataatsimi suliaq aallaqqaataanniit suliassanngorlugu siulittaasumit utertinneqarput, pensionisiat annertussulernissaannuut inoqutigiit isertitaat misissoqqitassanngortinneqarlunik
Suliani 34-ni aalajangiinerit naammagittaalliuutigineqartut atortussanngortinneqarput:
Suliami ataatsimi aalajangiineq siulittaasumit imaalillugu atortussanngortinneqarpoq, pensionisiat annertussusiat nammineq isertitaqarnermit (uillarnerussutisiat) aalajangerneqartartut
Suliani sisamani aalajangiinerit siulittaasumit imaalillugit atortussanngortinneqarput, pensionisiat uiusup/nuliaasup isertitai apeqqutaatillugit annertussusilerneqartartut
Suliani pingasuni aalajangiinerit imaalillugit atortussanngortinneqarput, naammagittaalliuuteqartup inummut tapiutinik qinnuteqaataa akuerineqarsinnaanngitsoq, naammagittaalliuuteqartup aningaasartuutit nammineerluni akilissasuugunigit aningaasatigut amikkisaalernissaa aarlerinaateqanngimmat
Suliani marlunni aalajangiinerit siulittaasumit imaalillugit atortussanngortinneqarput, naammagittaalliuuteqartup inummut tapiutinik qinnuteqaataa akuerineqarsinnaanngitsoq, naammagittaalliuuteqartup aningaasartuutit nammineerluni akilissasuugunigit aningaasatigut amikkisaalernissaa aarlerinaateqanngimmat
Suliami ataatsimi aalajangiineq siulittaasumit imaalillugu atortussanngortinneqarpoq, illersorneqarsinnaanngitsumik aningaasanik aqutsisoqartillugu inummut tapiutinik utertillugit akileeqqusisarneq naqissuserneqarluni
Suliani pingasuni aalajangiinerit imaalillugit atortussanngortinneqarput, naammagittaalliuuteqartoq siusinaartumik pensionisiartaarsinnaanngitsoq sulilluni misiliinermi peqataaqqaanngikkuni
Suliani sisamani aalajangiinerit siulittaasumit imaalillugit atortussanngortinneqarput, naammagittaalliuuteqartoq siusinaartumik pensionisiartaarsinnaanngitsoq sulilluni misiliinermi peqataaqqaanngikkuni
Suliami ataatsimi aalajangiineq imaalillugu atortussanngortinneqarpoq, naammagittaalliuuteqartoq pinerluuteqarsimasunut isertitsisarfimmiinnermini taamaallaat pensionisiat tunngaviusumik aningaasartai tigusinnaagai
Suliami ataatsimi aalajangiineq siulittaasumit imaalillugu atortussanngortinneqarpoq, naammagittaalliuuteqartup siusinaartumik pensionisiai kommunimit aqunneqarsinnaasut atornerluisoqarnera pissutigalugu
Suliani tallimani aalajangiinerit imaalillugit atortussanngortinneqarput, siusinaartumik pensionisiaqalerniarluni qinnuteqartut itigartinneqarlutik timimikkut, eqqarsartaatsimikkut imaluunniit inooqataanermi atugarisat pissutigalugit inuussutissarsiorsinnaassusaat ataavartumik annikillisimanngimmat
Suliami ataatsimi aalajangiineq imaalillugu atortussanngortinneqarpoq, naammagittaalliuuteqartoq aatsaat sulilluni misiliinermi kingorna qaammatip tulliuttup aallaqqaataani siusinaartumik pensionisiaqalersinnaammat
Suliani sisamani piffissaq siusinaartumik pensionisianik tunniussivissaq pillugu aalajangiinerit siulittaasumit atortussanngortinneqarput
Erninermi il.il. sulinngiffeqartarneq pillugu Inatsisartut peqqussutaat
Erninermi il.il. sulinngiffeqarneq pillugu Inatsisartut peqqussutaat malillugu suliassaq ataaseq Naammagittaalliuuteqartarfiup suliaraa, naammagittaalliuutit pingasut siulittaasumit aalajangiiffigineqarput, tassa naammagittaalliuutit katillugit sisamat.
Suliani marlunni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliami ataatsimi aalajangiineq imaalillugu allanngortinneqarpoq, erninermut atatillugu pisartagaqartitsisoqartussanngorlugu.
Suliami ataatsimi naammagittaalliuut aallaqqaataaniit suliarisassanngorlugu siulittaasumit utertinneqarpoq, kommunip itigartitsissutaa erninermi sulinngiffeqarnissaq sioqqullugu ullormusiaqartitsinissamut qinnuteqaat eqqortumik suliarineqarsimanngimmat.
Suliani marlunni aalajangiinerit naammagittaalliuutigineqartut atortussanngortinneqarput:
Suliami ataatsimi aalajangiineq imaalillugu siulittaasumit atortussanngortinneqarpoq, erninermut atatillugu sulinngiffeqarnissamik qinnuteqartumut kommunip itigartitsissutaa attatiinnarneqartussanngorlugu.
Suliami ataatsimi aalajangiineq siulittaasumit imaalillugu atortussanngortinneqarpoq, erninermi ullormusiat, meeqqanut akilersuutit meeqqanullu tapiissutit allagartaq atorlugu pisiniutissanngorlugit (rekvisision) tunniunneqartarnissaannik kommunip aalajangiinera attatiinnarneqartussanngorlugu.
Pisortanit ikiorsiissutit il.il. pillugit Inatsisartut peqqussutaat
Pisortanit ikiorsiissutit il.il. pillugit Inatsisartut peqqussutaat malillugu suliassat 36-t Naammagittaalliuuteqartarfiup suliarai, naammagittaalliuutit 27 siulittaasumit aalajangiiffigineqarput, tassa naammagittaalliuutit katillugit 63-it.
Suliani marlunni naammagittaalliuuteqartut suliassanngortitsineri itigartinneqarput:
Suliassami ataatsimi suliassanngortitsineq siulittaasup itigartippaa, isumaaginninnikkut malittarisassat naapertorlugit aalajangiisoqarsimannginnera pissutigalugu.
Suliassami ataatsimi suliassanngortitsineq siulittaasup itigartippaa, naammagittaalliuuteqarnissamut piffissaq qaangiussimammat.
Suliani 25-ni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliani arfineq marlunni aalajangiinerit imaalillugit allanngortinneqarput, naammagittaalliuuteqartoq ikiorsiissutaasimasunik utertitsilluni akiliisussaanngimmat, utertitassanngorlugit ikiorsiinissamut piumasaqaatit naammassineqarsimanngimmata.
Suliami ataatsimi aalajangiineq siulittaasumit imaalillugu allanngortinneqarpoq, naammagittaalliuuteqartoq ikiorsiissutaasimasunik utertitsilluni akiliisussaanngimmat, utertitassanngorlugit ikiorsiinissamut piumasaqaatit naammassineqarsimanngimmata.
Suliani marlunni aalajangiinerit utertinneqarput, aalajangiisussap siulliup inatsitigut tunngavissat suliamut tunngassuteqartut atorsimanngimmagit.
Suliani arfinilinni aalajangiinerit utertinneqarut, aalajangiisussap siulliup inatsitigut tunngavissat amigartut atorsimammagit.
Suliani arfineq pingasuni aalajangiinerit siulittaasumit utertinneqarput, aalajangiisussap siulliup inatsitigut tunngavissat amigartut atorsimammagit.
Suliami ataatsimi aalajangiineq utertinneqarpoq, aalajangiisussap siulliup aalajangiinialernermini pissutsit sorpiaat pingaartillugit aalajangiisimanera ersinngimmat.
Suliani 36-ni aalajangiinerit naammagittaalliuutigineqartut atortussanngortinneqarput:
Suliani qulingiluani aalajangiinerit imaalillugit atortussanngortinneqarput, pisortanit ikiorsiissutit pillugit aalajangersakkat malillugit naammagittaalliuuteqartut ikiorserneqarnissamik pisinnaatitaasut Naammagittaalliuuteqartarfiup nalilermagu.
Suliani sisamani aalajangiinerit siulittaasumit atortussanngortinneqarput, siulittaasup nalilermagu peqqussummi aalajangersakkat naapertorlugit ikiorsiissutaasinnaasut tunniunneqarsimasut.
Suliani arfinilinni aalajangiinerit imaalillugit atortussanngortinneqarput, naammagittaalliuuteqartut ikiorneqarnissamik pisinnaatitaanngitsut, ikiorsiineq naammagittaalliuuteqartut siunissami imminnut napatissinnaalernissaannut annertuumik sunniuteqartussatut isigineqanngimmat.
Suliani arfinilinni aalajangiinerit imaalillugit siulittaasumit atortussanngortinneqarput, naammagittaalliuuteqartut ikiorserneqarnissamik pisinnaatitaanngitsut, ikiorsiineq naammagittaalliuuteqartut siunissami imminnut napatissinnaalernissaannut annertuumik sunniuteqartussatut isigineqanngimmat.
Suliami ataatsimi aalajangiineq imaalillugu atortussanngortinneqarpoq, pisortanit ikiorsiissutit rekvisitioninngorlugit (allagartaq pisiniutissaq) tunniunneqartarnerat ingerlaannassasoq suliamut tunngassutillit paasissutissat malillugit ikiorsiissutigineqartut naammagittaalliuuteqartunit ikiorsiinermut siunertaanngitsunut atorneqartarmata.
Suliani pingasuni aalajangiinerit imaalillugit atortussanngortinneqarput, ineqarnermut akiitsut akilernissaannut ikiorsiisoqassanngitsoq, akiitsut pinngornerisa nalaanni naammagittaalliuuteqartoq ineqarnermut akiliisinnaassuseqarmat.
Suliani arfineq marlunni aalajangiinerit imaalillugit siulittaasumit atortussanngortinneqarput, ineqarnermut akiitsut akilernissaannut ikiorsiisoqassanngitsoq, akiitsut pinngornerisa nalaanni naammagittaalliuuteqartoq ineqarnermut akiliisinnaassuseqarmat.
Annertussusileriikkanik ikiorsiissutit pillugit Inatsisartut peqqussutaat
Annertussusileriikkanik ikiorsiissutit pillugit Inatsisartut peqqussutaannut tunngasut suliassat arfineq marluk Naammagittaalliuuteqartarfiup suliarai aalajangiiffigalugillu.
Suliani marlunni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliani marlunni aalajangiinerit aallaqqaataaniit suliarisassanngorlugit utertinneqarput. Naammagittaalliuuteqartariup nalilerpaa kommunip piumassuserinngisaminik malittarisassat annertussusileriikanik ikiorsiissutinut tunngasut paatsoorsimassagai.
Suliani tallimani aalajangiinerit naammagittaalliuutigineqartut atortussanngortinneqarput:
Suliani sisamani aalajangiinerit atortussanngortinneqarput, naammagittaalliuuteqartut suliffissaaleqinertik namminneq pisuussutigigaat takuneqarsinnaammat.
Suliami ataatsimi aalajangiineq atortussanngortinneqarpoq, annertussusileriikkanik ikiorserneqarnissamut piumasaqaatit naammagittaalliuuteqartup angunngimmagit.
Meeqqanik inuusuttunillu ikiorsiisarneq pillugu Inatsisartut peqqussutaat
Meeqqanik inuusuttunillu ikiorsiisarneq pillugu Inatsisartut peqqussutaat malillugu suliassat arfinillit Naammagittaalliuuteqartarfiup suliarai, naammagittaalliuutit arfinillit siulittaasumit aalajangiiffigineqarput, tassa naammagittaalliuutit katillugit aqqaneq marluk.
Suliami ataatsimit naammagittaalliuuteqartup suliassanngortitsinera itigartinneqarput:
Suliami ataatsimi naammagittaalliuuteqartup suliassanngortitsinera itigartinneqarpoq, meeqqap paarineqartup angerlartitaaneranut naammagittaalliuuteqartoq akuunngimmat.
Suliani sisamani aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliami ataatsimi aalajangiineq imaalillugu allanngortinneqarpoq, akuersisitseqqaarani angerlarsimaffiup avataanut inissiineq atorunnaarsinneqarluni, aalajangiinialernermi aqqusaagassat il.il. pillugit malittarisassat atuuttut kommunimit malinneqarsimanngimmata.
Suliami ataatsimi aalajangiineq imaalillugu siulittaasumit allanngortinneqarpoq, meeqqerivimmit anisitsisimaneq atorunnaasinneqarluni, aalajangiinialernermi aqqusaagassat il.il. pillugit malittarisassat atuuttut kommunimit malinneqarsimanngimmata.
Suliami ataatsimi meeqqap angerlartinnissaanut aalajangiineq ataaseq aallaqqaataanit suliarisassanngorlugu utertinneqarpoq, angerlartitsinissamut itigartitsinermini inatsisit kukkusut kommunip tunngaavigisimammagit.
Suliami ataatsimi paarsinissamik akuersissuteqarnissamik itigartitsissut aallaqqaataanit suliarisassanngorlugu utertinneqarpoq, kommunip aalajangiinermini inatsisit kukkusut tunngaavigisimammagit.
Suliani arfineq malunni aalajangiinerit naammagittaalliuutigineqartut atortussanngortinneqarput:
Suliani pingasuni aalajangiinerit imaalillugit attatiinnarneqarput, akuersisitseqqaarani angerlarsimaffiup avataanut inissiinerit atornerluisoqarnera pissutigalugu pisariqartutut isigineqarmata.
Suliami ataatsimi meeqqerivimmut akiliutip annertussusilerneqarneranik aalajangiineq ataaseq siulittaasumit attatiinnarneqarpoq.
Sulinngiffeqarluni angalanermi meeqqap paarsap akiliunneqarnissaanik qinnuteqaatip itigartitsissutigineqarnera suliami ataatsimi aalajangiineq siulittaasup attatiinnarpaa.
Nammineq aaqqissuutamik ilaqutariinnut inissiisoqarsimanera pissutigalugu paaqqinninnersiuteqartitsinissamik itigartitsisimaneq suliami ataatsimi siulittaasup attatiinnarpaa.
Annertuumik innarluutillit ikiorserneqartarnerat pillugu Inatsisartut peqqussutaat
2003-mi 2004-milu kommuninit arlalinnit naammagittaalliuutinik aalajangersimasunik amerlassusilinnik (aalajangersimasumik naammagittaalliuutit 111-t) Naammagittaalliuuteqartarfik tigusaqarpoq, naammagittaalliuutit Ilaqutariinnermut Pisortaqarfiup annertuumik innarluutillit tapersersorteqarnissaannut itigartitsissutaanut tunngapput. Naammagittaalliuutit taakku suliariniarnerini Naammagittaalliuuteqartarfik ajornartorsiorsimaqaaq.
Ilaqutariinnermut Pisortaqarfiup Nunap immikkoortuini immikkoortortaqarfiisa aalajangiinerminni inatsisitigut tunngivigisimasaat pillugit paasissutissanik piniarneq ajornakusoortorujussuusimavoq, suliani tamani taanna ilisarnaataasimalluni. Taamaattumik Naammagittaalliuuteqartarfik aamma Ilaqutariinnermut Pisortaqarfik decemberi qaammat 2004-mi isumaqatigiipput 2005-imi qaammatit pingasut siulliit ingerlanerini suliassat annertuumik innarluutilinnut tunngasut tamaasa Ilaqutariinnermut Pisortaqarfiup misissussagai, aalajangiinermi inatsisit tunngavigineqarsimasut nalilersussallugit. Naammagittaalliuutit taakku Naammagittaalliuuteqartarfiup Ilaqutariinnermut Pisortaqarfimmit tigoqqissimavai taakkulu tunngavigalugit sulianut arlalinnut tunngatillugu aalajangiisimalluni 2005-illu naalernerani naammagittaalliuutit sinnerini aalajangiinissaq naatsorsuutigineqarpoq.
Pisortanit pensionisiat utoqqarnillu paaqqinniffiit il.il. pillugit suliassat tallimat Naammagittaalliuuteqartarfiup suliarai, naammagittaalliuut ataaseq siulittaasumit aalajangiiffigineqarpoq, tassa naammagittaalliuutit katillugit arfiniliupput.
Suliami ataatsimi naammagittaalliuuteqartup suliassanngortitsinera itigartinneqarput:
Suliami ataatsimi naammagittaalliuutip suliassanngortinnera itigartinneqarpoq, isumaginninnermi malittarisassat malillugit aalajangiisoqarsimanngimmat.
Suliani pingasuni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngilaq:
Suliani marlunni aalajangiinerit imaalillugit allanngortinneqarput, annertuumik innarluutillit ikiorserneqartarnerat pillugu Inatsisartut peqqussutaat malillugu naammagittaalliuuteqartut ikiorserneqartussanngorput.
Suliami ataatsimi aalajangiineq imaalillugu siulittaasumit allanngortinneqarpoq, annertuumik innarluutillit ikiorserneqartarnerat pillugu Inatsisartut peqqussutaat malillugu naammagittaalliuuteqartoq ikiorserneqartussanngorpoq.
Suliani malunni aalajangiinerit naammagittaalliuutigineqartut atortussanngortinneqarput:
Suliami ataatsimi aalajangiineq imaalillugu atortussanngortinneqarpoq, naammagittaalliuuteqartup piginnaasatigut killiffia nalilerneqassaaq annertuumik innartuulinnik ikiorsiisarneq pillugu malittarisassat malillugit ikiorsiisoqartinnagu.
Suliami ataatsimi aalajangiineq imaalillugu atortussanngortinneqarpoq, tusilartut isiginnaartitsinermi pikkorissarnerannut peqataanissamut ikiorsiisoqassanngitsoq.
Meeqqanut tapiissutit pillugit Inatsisartut peqqussutaat
Meeqqanut tapiissutit pillugit Inatsisartut peqqussutaat malillugu suliassat marluk Naammagittaalliuuteqartarfiup suliarai, naammagittaalliuutit marluk siulittaasumit aalajangiiffigineqarput, tassa naammagittaalliuutit katillugit sisamat.
Suliani marlunni aalajangiinerit naammagittaalliuutigineqartut tamakkiisumik ilaannakortumilluunniit atortussaatinneqanngillat:
Suliami ataatsimi aalajangiineq aallaqqaataaniit suliarisassanngorlugu utertinneqarpoq, kommunip aalajangiinermini inatsitigut tunngavissat amigartut atorsimammagit.
Suliami ataatsimi aalajangiineq aallaqqaataaniit suliarisassanngorlugu siulittaasumit utertinneqarpoq, kommunip aalajangiinermini inatsitigut tunngavissat amigartut atorsimammagit.
Suliani malunni aalajangiinerit naammagittaalliuutigineqartut atortussanngortinneqarput:
Suliami ataatsimi meeqqanut tapiissutinik pisalernissamut itigartitsissut attatiinnarneqarpoq inuqatigiit isertitaqarpallaarnerat pissutigalugu
Suliami ataatsimi apersortitsinissamut tapiissutinik qinnuteqaammut itigartitsissut siulittaasup attatiinnarpaa, piumasaqaat apersortitsereernerup kingorna ukiut arfineq marluk qaangiutereersut saqqummiunneqarsimammat.
Ineqarnermut tapiissutit pillugit Inatsisartut peqqussutaat
Ineqarnermut tapiissutit pillugit Inatsisartut peqqussutaat malillugu suliassat tallimat Naammagittaalliuuteqartarfiup suliarai, naammagittaalliuutit qulingiluat siulittaasumit aalajangiiffigineqarput, tassa naammagittaalliuutit katillugit 14-iupput.
Suliani marlunni naammagittaalliuuteqartut suliassanngortitsinerat itigartinneqarput:
Suliani marlunni suliassanngortitsineq itigartinneqarpoq naammagittaalliuuteqartarfik suliamik ingerlatsissalluni piginnaatitaanngimmat.
Suliani qulingiluani suliassanngortitsinerit siulittaasumit itigartinneqarput naammagittaalliuuteqartarfik suliamik ingerlatsissalluni piginnaatitaanngimmat.
Suliami ataatsimi aalajangiineq naammagittaalliuutigineqartoq tamakkiisumik ilaannakortumilluunniit atortussaatinneqanngilaq:
Suliami ataatsimi aalajangiineq aallaqqaataaniit suliareqqitassanngorlugu utertinneqarpoq, suliaq pillugu paasissutissat pisariaqartinneqartut kommunip paasiniarsimanngimmagit.
Suliani marlunni aalajangiinerit naammagittaalliuutigineqartut atortussanngortinneqarput:
Suliami ataatsimi aalajangiineq atortussanngortinneqarpoq, suliffissaarunneq kisiat pissutigalugu ineqarnermut tapiissutit qaffanneqarsinnaanngimmata.
Suliami ataatsimi ineqarnermut tapiissutinik qinnuteqaammut itigartitsineq attatiinnarneqarpoq isertitaqarpallaarneq pissutigalugu.