AALIANGIUSSAQ
Attartorneranut isumaqatigiissutissinnik D-ip atorunnaarsitsinera pillugu maalaarutersi, Ineqartit Maalaarutaannik Aalajangiisartoqatigiit decembarip 16-ani 2010 aalajangiivigaat.
Nassuiaat:
Nammineq Ineqartut Maalaarutaannik Aalajangiisartut allatseqarfiannut oktobarip 27-ani 2010 saaffiginninnikkut, ineqartunut maleruagassanik unioqqutitsisimanersi pissutigalugu inigisassinnit anisinniarneqarnersi akerlilerparsi.
Decembarip 16-ani 2009, juulip 20-ani 29-anilu 2010, aggustillu 26-ani 2010 allagarsisinneqarnikkut, ineqarfissinnit nipiliortarneq nuanniitsumillu pissusilersortarneq pillugit maalaartoqarneranik ilisimatinneqarpusi. Septembarip 22-ani 2010 ineqarfissinnit nipiliortarneq nuanniitsumillu pissusilersortarneq ineqartunullu maleruagassanik arlaleriarlusi unioqqutitsissarsimanersi pissutigalugit, inigisassi attartorneranut isumaqatigiissutip atorunnaarsinnissaa pillugu allagarseqqippusi.
Pigaartup decembarip 12-ani 2009 nipiliorneq pillugu nalunaarusiorpoq: ”nal. 01.34, nipituumik nipilersorneq, assut nipiliorneq”, tamatuminngalu decembarip 16-ani 2009 ilisimatinneqarpusi.
Pigaartup juulip 20-ani 2010 nipiliorneq pillugu nalunaarusioqqippoq: ”nal. 02.10 kamaanneq assullu nipiliorneq”, eqqaamiutaaq arlallit atsiortitsinernik tunniussipput. Ulloq taanna allakkatigut tamatuminnga ilisimatinneqarpusi.
Pigaartup aggustip 21-ani 2010 nipiliorneq pillugu nalunaarusiorpoq: ”nal. 04.54, nipituumik nipilersorneq”, tamatuminnga aggustip 26-ani 2010 ilisimatinneqarpusi. Ulloq taanna D- -imit oqaloqatigineqarnissamut aggersarneqarpusi. Illit A napparsimanerit pissutigalugu marluullusi takkutinngilasi.
Pigaartup septembarip 20-ani 2010 nipiliorneq pillugu kingumut nalunaarusiorpoq: ”nal. 22.05, kamaappalunneq annertuumillu perulluliorneq”. Ineqarnermi maleruagassanik unioqqutitsineq pissutigalugu inissiamik attartornermut isumaqatigiissutip atorunnaarsinneqarnera- kingusinnerpaamillu ullut 8 qaangiunneranni anereersimanissarsi pillugu septembarip 22-ani 2010 allakkatigut ilisimatinneqarpusi.
Ineqartut Maalaarutaannik Aalajangiisartoqatigiit allatseqarfiata maalaarutersi allakkatigut oktobarip 29-ani 2010 ullulikkatigut D-imut tunniuppaa.
D allakkatigut novembarip 1-ani 2010 akissummini suliaq pillugu nassuiaateqarpoq. Nassuiaammi qulaani paasissutissat assingi pineqarput. Tamatuma saniatigut illit A piffissami nipiliorneq pillugu maalaarfiusumi, angalanerit pissutigalugu angerlarsimasimannginnerartutit D ilisimatitsivoq. D angalaninnut uppernarsaataasunik piniarpoq pissarsinanili. Illit A meeqqasi- nukarleq qanittukkut- allami najugaqalersimammata, nipiliornermut pisuutinneqarsinnaannginnerat ilanngullugu oqaatigaat. D-ip noqqaassutigigaluagaasut taama oqarneq uppernarsarneqarsinnaasimanngilaq.
Qulaani allaaserineqartutut pisoqarnerata kingorna nipiliorneq pillugu maalaartoqaqqippoq ISS-ilu oktobarip 14-ani 2010 nalunaarusiorpoq: ”nal. 19.10, sakkortuumik nipiliorneq”, tamatuminnga allakkatigut oktobarip 22-ani 2010 ilisimatinneqarpusi.
Inatsisit tunngavigineqartut:
Inissianik attartortitsisarneq pillugu Inatsisartut Peqqussutaat nr. 2 maajip 12-ani 2005-imeersoq kingorna allannguuteqartoq § 84 imm. 1 nr. 5 naapertorlugu, Ineqartut Maalaarutaannik Aalajangiisartoqatigiit ineqartut maleruagassanik unioqqutitsinerannut tunngassutillit suliarinissaat pisinnaatitaaffigaat.
Peqqussummi tamatumani § 50, imm. 1 naapertorlugu, attartortup illoqataasalu allallu attartortumit inigisamut isertinneqartut, ineqarnermut tunngatillugu maleruagassanik eqquutsitsisussaapput.
Maleruagassani nipiliorneq pillugu ima allassimasoqarpoq:
Sannatit, nipilersorneq il.il. Sannatit nipiliortut ass. qillerutit, eqqaamiut eqqarsaatigalugit taamaallaat nal. 8–p 19-illu akornanni atorneqarsinnaapput. Majuartarfinni altanini naqqullu ataani nipiliorluni pinnguarneq inerteqqutaavoq. Radio, TV-kkut isiginnaarut, immiussissut, oqaluttartoq Cd-nulluunniit nipilersuut eqqaamiunut ajoqutaasumik atorneqassanngillat. Eqqaamiunit akuersissummik pisimatinnani nipiliorfiusumik nalliuttorsiortoqassanngilaq. Nipilersortartut sungiusartarnissaat nipilersornermillu ilinniartitsisinnaaneq inissianik attartortitsisumit akuerineqaqaartussaapput.
Tunngavilersuut/naliliineq:
D-ip arlaleriarluni maleruagassanik unioqqutitsisarneq pillugu inissiamik attartornermut isumaqatigiissummik atorunnaarsitsinera atorsinnaangitsoq, Ineqartut Maalaarutaannik Aalajangiisartoqatigiit naliliipput.
Taamaammat inissiamik attartortitsisup isumaqatigiissummik atorunnaarsitsisimanngitsutut pissavaasi. Anisitaareersimagussi D–ip aalajangiinerup matuma ilissinnit D-imillu tiguneqarneraniit ullut 14–it qaangiutsinnagit inisseqqissavaasi.
Isumaqatigiissutissi peqqussummi atuuttumi § 73 imm. 2 nr. 4 innersuussutigalugu atorunnaarsinneqarsimanera, Ineqartut Maalaarutaannik Aalajangiisartut aalajangiinerminni pingaartippaat. Aalajangersagaq peqqussummi kapitali 11-miippoq qulequtaqarluni ima: Attartortitsisup isumaqatigiissummik atorunnaarsitsisinnaanera tassani pineqarlutik attartortup tungaaniit annertuumik unioqqutitsinerit.
Inissianik attartortitsisarneq pillugu Inatsisartut Peqqussutaanni kapitali 10 ima qulequtaqarpoq: Isumaqatigiissummik atorunnaarsitsineq, taama tunngaviqarluni isumaqatigiissummik atorunnaarsitsinissamut aalajangersakkat. Attartortoq tassalu ilissi attartortitsisoq arlaleriarluni mianersoqqusigaluaq, pitsaasumik pissusilersunngikkussi imal. ineqarfimmut ineqartunullu allanut ajoqutaagussi- imali pissutsit innatik isumaqatigiissut attartortitsisumit atorunnaarsinneqarsinnaalluni-taamalu § 67 nr. 4 attartortitsisumut isumaqatigiissummik atorunnaarsitsisinnaanermut periarfissiivoq. Attartortoq qaammatini tulleriinni 12-ini pingasoriarluni allakkatigut sioorasaarneqarsimassaaq inanneqarsimassalluniluunniit(ataani inatsisip oqaasertaanik issuaaneq innersuussutigineqarpoq).
Taamaasilluni isumaqatigiissutip atorunnaarsinneqarnissaanut suleriaaseq naapertorlugu allagaqaat kingullerpaaq atorunnaarsitsinermik kinguneqartitsisoq ilanngullugu, D eqqunngitsumik suliamik ingerlatsisimavoq.
Illit A piffissat maalaarfiit ilaanni inigisassi inoqarsimannginneranut uppernarsaatissanik saqqummiussiniarlutit, Aalajangiisartoqatigiit allatseqarfiannut ilisimatitsinerpit eqquutsinnginnera, Ineqartut Maalaarutaannik Aalajangiisartoqatigiit maluginiarpaat.
Ineqarneq pillugu Maalaaruteqartarfiup nittartagaani aalajangiinermik issuaaneq innersuussutigissavarputtaaq: 2010-04-27: Ineqartut maleruagassaannik unioqqutitsineq tamatumunngalu atatillugu Inatsisartut Ombudsmandiata aalajangiinera, all.nr. 2008-511-0001.
Inissiamik attartornermi isumaqatigiissutip atorunnaarsinneqarnissaanut piumasaqaatip eqquutsinneqannginnera, Aalajangiisartoqatigiit aalajangiinerminni kisiat pingaarnertut maluginiarmassuk oqaatigineqassaaq.
Aalajangiisartoqatigiinni ilaasortat pingasut aalajangiinermut akuersillutik taasipput ataaserlu taaseqataanani. Taamaammat maalaarutersi akuerineqarpoq
Aalajangiineq:
D-ip piumasaqaataasut inissiamit attartukkassinnit C, 39XX nuussanngilasi.
Naammagittaalliorsinnaaneq:
Inissianik attartortitsisarneq pillugu Inatsisartut Peqqussutaat nr. 2 maajip 12-ani 2005-imeersoq kingorna allannguuteqartoq § 86 imm. 7 naapertorlugu, Ineqartut Maalaarutaannik Aalajangiisartoqatigiit aalajangigaat pisortaqarfinnut allanut nangitassanngortinneqarsinnaanngillat. Attartortitsisup attartortullu akornanni aaqqiagiinngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.
Namminersorlutik Oqartussat kommunilluunniit- aqutsinermut pisortamik toqqaasimagaluarpataluunniit- Ineqartut Maalaarutaannik Aalajangiisartoqatigiit aalajangigaat inissianik attartortitsisarneq pillugu Inatsisartut peqqussutaat nr. 2, maajip 12-ani 2005-imeersoq § 86 imm. 6 naapertorlugu, kommuninit Namminersorlutillu Oqartussanit inissianik attartortitsisuusunit allanngortinneqarsinnaanngilaq.
Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.