AALIANGIUSSAQ
Decembarip 16-ani 2010 nuunninnut atatillugu inissiaatileqatigiiffiup B-ip naatsorsugai aggustip 25-ani 2010-meersut pillugit maalaarutit, Ineqartut Maalaarutaannik Aalajangiisartoqatigiit decembarip 16-ani 2010 aalajangiivigaat
Nassuiaat:
Inissiamik attartornermut isumaqatigiissut septembarip 14-ani 2006 ullulerneqarsimasoq naapertorlugu, uiillu A inissiaq, 39XX illoqarfik, septembarip 15-ani 2006 attartugarilerparsi.
Attartornermut isumaqatigiissut naapertorlugu attartortoq qaammat sioqqullugu qaammatip naanissaanut isumaqatigiissummik atorunnaarsitsisinnaavoq.
Isumaqatigiissuttaaq naapertorlugu 13.131 koruunit iserternissinni siumut akiliutigisimavasi.
Inissiamik attartortussanngornissinnut atatillugu takuniaanermi nalunaarusiortoqanngilaq.
Siusinnerusukkut maalaarut naapertorlugu nuunnissarsi sioqqullugu inissianik nakkutilliisoq viceværte ilagalugu inissiaq takuniarparsi. Immikkut ilisimasaqannginnersi pissutigalugu iluarsisariallit takkuitsoorsimaneri ilisimatitsissutigaat.
Juunip 8-ni B attartornermut isumaqatigiissutip juunip 15-ani 2010 atorunnaarsinnissaa inissiaatileqatigiinnut nalunaarutigaat.
Inissiaatileqatigiit allakkatigut B juunip 11-ani 2010 ullulerneqarsimasutigut attartornermut isumaqatigiissummik atorunnaarsitsiniarnerit uppernarsarpaa, inissiallu juunip 15-ani takuniarneqarnissaa ilisimatitsissutigalugu- tamatumalu nalaani pisinnaanngikkussi nalunaarnissat innersuussutigalugu. Taamatuttaaq inissiamik eqqiaanermut iluarsaanermut il.il. tunngasunik ilisimatinneqarputit.
Juunip 15-ani 2010 inissiaatileqatigiinni B inspektøri inissiamik takusaavoq. Pisattanik poortuineq pissutigalugu inissiaq misissorneqarsinnaanngimat aqaguanut kinguartinnissaa isumaqatigiissutigineqarpoq. Aqaguani attavigineqarassi takuniaasitsinissamut piffissaqanngilasi. Tamatuma nalaani A-ip inissiamut matuersaatit tunniutereersimavai.
Inissiaq arlaannassiluunniit peqataaffiginngisaanik juunip 17-ani takuniarneqarpoq.
Takuniaanermi nalunaarusiaq naapertorlugu, aserfallatissimasassi ineeqqat aappaanni sikaaviup matuata taarserneqarnera, qulliup ikittaataata iluarsaannera, uffarfimmi qullermik-, aquittarfiup matuanik-, matullu tigummivianik taarsiinerit ineeqqallu pingajuata matuata taarsernera akiligassaraasi.
Inissiap qimanneranut atatillugu akiligassat aggustip 25-ani 2010 ullulerneqarsimasut naapertorlugit, nalinginnaasumik iluarsaanermut akiligassassinnik 2006-imiilli inigisimanera pissutigalugu 46 %-imik annikilliliivigineqarnissinni katillugit 8.734,- koruunit-, takuniaanermi nalunaarusiaq naapertorlugu aserfallatitsinissinnut katillugit 6.634,- koruunit-, juunip aallaqqaataaniit juulip qeqqata tungaanut ineqarnermut akiitsorisassinnut katillugit 9.232,- koruunit siumoortumik akiliutigisimasarsi ilanngaatigalugu 11. 469,66 koruunit inissiaatileqatigiinnut akilertussanngorpasi.
Inissiaq ikuallannikuusimasoq ilisimagissi, iluarsaanneqarsimanngitsoq qalipaannariarluguli ilissinnut atukkiunneqarsimasoq, aggustip 20-ani 2010 maalaarutissinni ilaatigut oqaatigaarsi. Inissiami ukiuni sisamani najugaqarsimanissinni, sikaaviit matui sinittarfinnilu sikaaviit atasinnaasimanngillat. Viceværti arlalipassuariarluni ilissinniittarsimavoq. Iigaq aqiliorluni katagaavoq – iluarsaanneqaraluarlunilu taamaaseqqippoq, innaallagissamut ikkuffik igaffimmiittoq atunngisaannarsimavarsi, inissiallu nuuffiginerani nammineq eqqiarsimallugu.
Inisiaq juulip 15-ani 2010 allanut atukkiunneqartoq, taamaammallu juunip aallaqaataaniit juulip qeqqata tungaanut 2010 ineqarnermut akiliutaasartoq tassalu akiitsorineqartut 9. 232,-koruunit akilissagissi, B inissiaatileqatigiit oqarasuaatikkut ilisimatitsissutigaat. B assilisanik allanillu aserfallatitsisimanermut uppernarsaatissaqannginnera inissiaatileqatigiit ilisimatitsissutigaataaq.
Inatsisit tunngavigineqartut:
Inissianik attartortitsisarneq pillugu Inatsisartut Peqqussutaat nr. 2 maajip 12-ani 2005-imeersoq kingorna allannguuteqartoq § 77 naapertorlugu, inissiamit aninermi qilaanik iikkanillu qalipaanikkut /aamma imal. iikkanik ungalitsersuinikkut eqqiaanikkullu nalinginnaasumik iluarsaasoqassaaq. Naqqit imm. 3 naapertorlugu lakkerlaajussapput.
Iserternermi inissiaq nalinginnaasumik iluarsaanneqarsimanngippat, attartortup imm. 3 naapertorlugu iserternermi isikkuatut itillugu qimassavaa.
Peqqussummi § 80 naapertorlugu, inissiamik attartortoq taassumaluunniit piginnaatitaaffiligaa, inissiamik takuniaanermi takkutsinngippat, attartortitsisup takuniaanermi nalunaarusiaq toqqammavigisinnaavaa, attartortullu siumoorluni akiliutigisimasaa §§77 – 78-ilu naapertorlugit- nalinginnaasumik iluarsaanermut attartornermilu isumaqatigiissut naapertorlugu- attartortup pisussaaffiinut allanut atorsinnaavaa.
Imm. 3 naapertorlugu attartortitsisumit inissiaq paarilluarneqarani aserorteriffigineqarsimanerarneqarpat, taamaattoqarnera immikkut uppernarsarneqassaaq.
Naliliineq:
Illit A-illu nalinginnaasumik iluarsaanermut akiligassat inatsisit malillugit ilanngaataasussaq 46 % ilanngaatigalugu katillugit 16. 174 koruunit 46%-it ilanngaatigalugit katillugit 8. 733,96 koruunit eqqiaanermilu aningaasartuutit 3.000 koruunit akilissagisi, Ineqartut Maalaarutaannik Aalajangiisartoqatigiit naliliipput.
Peqqussummi § 77 naapertorlugu inissiap nalinginnaasumik iluarsarneqartussaanera, tamatumunngalu sanilliullugu attartornermi isumaqatigiissummi suliamulluunniit tunngatillugu allagaatini, inissiap 2006-imi nutserfiginerani iluarsarneqaranilu eqqiarneqannginneranik paasissutissanik uppernarsakkanik peqannginnera, aalajangiinermut tunngavilersuutaavoq.
Illit A-illu inissiaq takuniarneqarmat takkutinnginnassi, peqqussummi § 77 imm. 3 naapertorlugu, attartortitsisup takuniaanermut atatillugu nalunaarusiaa, nalinginnaasumik iluarsagassanut tunngavigineqarsinnaammat, Ineqartut Maalaarutaannik Aalajangiisartoqatigiit ilisimatitsissutigaat.
Innaallagissamut ikkuffiup iluarsarneranut, sikaaviup matuata taarserneranut matullu nutaamik taarserneqarneranut aningaasartuutit katillugit 3.634,20 koruunit akilissanngikkisi, Ineqartut Maalaarutaannik Aalajangiisartoqatigiit naliliipput.
Inissiap ilissinnit najugarineqarnerata nalaani aserfallatsinneqarsimaneranut inissiaatileqatigiinnit B uppernarsaatissaqartinneqannginnera, aalajangernermut tunngavilersuutaavoq.
Taamaammat inissiaatileqatigiit takuniaanermi B inspektørinik marlunnik peqataasoqarneranik ilisimatitsissutaa, immikkut pingaarutilittut Ineqartut Maalaarutaannik Aalajangiisartoqatigiit nalilersinnaanngilaat.
Nalinginnaasumik iluarsaanermi- eqqiaanermilu aningaasartuutit saniatigut, inerqarnermut akiliut juunip aallaqqaataaniit juulip qeqqata tungaanut akiitsorisasi 9.232,50 koruunit akilissagisi, Ineqartut Maalaarutaannik Aalajangiisartoqatigiit aalajangiipput.
Juuni qaammat akiliisimannginnersi inissiallu juulip qeqqani atukkiuteqqinneqarnera taama aalajangernermut tunngavilersuutaavoq.
Aalajangiineq naapertorlugu siumoortumik akiliutisi 13.131,- koruunit ilanngaatigalugit inissiaatileqatigiinnut 7.835,40 koruunit akiligassarilerpasi.
Aalajangiineq:
Inissiamit aninissinnut atatillugu naatsorsuutit naapertorlugit 11.469,66 koruunit akiligassarigaluasi, Ineqartut Maalaarutaannik Aalajangiisartoqatigiit allanngortimmatigik inissiaatileqatigiinnut 7.855,40 koruunit B akiligassarilerpasi.
Naammagittaalliorsinnaaneq:
Inissianik attartortitsisarneq pillugu Inatsisartut Peqqussutaat nr. 2 maajip 12-ani 2005-imeersoq kingorna allannguuteqartoq § 86 imm. 7 naapertorlugu, Ineqartut Maalaarutaannik Aalajangiisartoqatigiit aalajangigaat pisortaqarfinnut allanut nangitassanngortinneqarsinnaanngillat. Attartortitsisup attartortullu akornanni aaqqiagiinngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.
Ineqartut Maalaarutaannik Aalajangiisartoqatigiit aalajangigaat § 86 imm. 6 naapertorlugu kommuninit Namminersorlutillu Oqartussanit inissianik attartortitsisuusunit allanngortinneqarsinnaanngilaq.
Namminersorlutik Oqartussat kommunilluunniit aqutsinermut pisortamik toqqaasimappata, aalajangiisartut aalajangigaat inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq §86 imm. 6 naapertorlugu, taassuma allanngortissinnaanngilai.
Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.