AALIANGIUSSAQ
Nuunninnut atatillugu inissiaatileqatigiinnit Inissiaatileqatigiiffimmit naatsorsuutit januaarip 7-ani 2009 ullulerneqarsimasut pillugit maalaarutit, Ineqarneq pillugu Maalaaruteqartarfiup marsip 9-ani 2011 suliaraa.
Aalajangiineq:
Inissiaatileqatigiit nuunninnut atatillugu naatsorsugaat allannguuteqassanngimmata, akiligassavit annertussusaa pillugu maalaarutit akuerineqanngilaq.
Suliamut tunngatillugu allagaatit:
• Inimik attartornermut isumaqatigiissut juunip 13-ani 2008-imeersoq
• Iserternermut atatillugu nalunaarusiaq juunip 16-ani 2008-meersoq
• Takuniaanermut atatiullugu nalunaarusiaq septembarip 29-ani 2008-meersoq
• Nuunnermi akiligassanut naatsorsuusiaq januaarip 7-ani 2009-meersoq
• Attartortup maalaarutaa juunip 14-ani 2009-meersoq
• Inissiaatileqatigiiffiup tusarniaavigineqarnera septembarip 24-ani 2009-meersoq
• Inissiaatileqatigiiffiup akissutaa septembarip 25-ani 2009-meersoqinissiaatileqatigiiffiup qarasaasiakkut allagai janauaarip 21-ani 2011-imeersut
Nassuiaat:
Inissiamik attartornissamut isumaqatigiissut juunip 13-ani 2008 ullulerneqarsimasoq naapertorlugu, inissiaq XX juunip 15-ani 2008 attartugarilerpat. Inissiaq iluarsarlaajuvoq takuulli ataani iserternermi nalunaarut.
Iserternermut atatillugu takuniaanermi nalunaarusiortoqarpoq. Pissutsit iserternermi nalunaarusiami allassimasut qalipaanermut maanna saqitsaassutaasumut attuumassuteqanngillat. Iserternermulli atatillugu nalunaarusiami natermi itersinersaqartoq nalunaarsimavoq.
Inissiaq septembarip naalernerani 2008 qimapparsi.
Septembarip 29-ani 2008 inissiap qimanneranut atatillugu illit nammineq peqataaffigisannik nalunaarusiortoqarpoq. Nalunaarusiaq naapertorlugu iikkat tamarmik qalipanneqassapput naterlu lakkerlugu. Inissiap qimanneranut atatillugu nalunaarusiaq atsiorpat.
Inissiaatileqatigiiffiup januaarip 7-ani 2009 inissiap qimanneranut atatillugu naatsorsuutit ilinnut nassiussaai naapertorlugit 6.129 koruunit akiligassaraatit. Inissiaatileqatigiiffiup paasissutissiissutai naapertorlugit inissiaatileqatigiit 11.375 koruunit inigisimasavit nalinginnaasumik iluarsaanneranut atorpai. Siumoortumik akiliutissat 11.211 koruuniupput inissiallu qimalernerani taakkunannga 6.420 koruunit amigaataapput taamaammallu inissiap qimannerani 6.129 koruunit akiligassarilerpatit. Inissiaatileqatigiit allakkaminni inissianik attartortitsisarneq pillugu peqqussummi § 78 innersuussutigaat.
Inissiaatileqatigiiffimmut allakkanni januaarip 18-ani 2009 ullulerneqarsimasuni inissiap qimanneranut atatillugu akiligassat maalaarutigaatit. Ilaqutariillusi sivikitsuinnarmik inisiami najugaqarnissarsi nalunnginnassiuk, pisattasi tamaasa puuiarsimanagit, iikkamut ikkussuisimanasi nalinginnaasumillu inissiamik paarsilluarsimanersi, allakkanni oqaatigaat. Inissiap qimalerneranut atatillugu takuniaanermi, tamatigut tamaani annikitsuinnarmik simernerit 6-7-it qalipanneqassasut inspektøri peqataasoq isumaqarnerartoq, ilanngulluguttaaq oqaatigaat. Kiisalu naqqit lakkertariaqannginnerat ilanngussimavat.
Allakkatigut maajip 20-ani 2009 ullulikkatigut Inissiaatileqatigiiffiup akissuteqarfigaatit. Allakkani pineqartuni ilanngulugu inatsisartut peqqussutaanni § 77 imm. 1 naapertorlugu, inissiat qimanneqarnerini nalinginnaasumik iluarsarneqarnissaat inatsisitigut piumasaqaataasoq, tamatumunnga ilaallutik qilaanik iikkanillu qalipaaneq naternillu lakkerineq. Tunngaviusumik naqqit itersinnerisa iluarsaannerannut akiliinak naqqilli lakkerneqarneri akiligassarigitit Inissiaatileqatigiiffiup allappoq. Inissiap qimalerneranut atatillugu takuniaanermi nalinginnaasumik iluarsaanissaq pisariaqanngitsutut paasisimagukku tamanna Inissiaatileqatigiiffiup ajuusaarutigaa.
Juunip 14-ani 2009 qarasaasiakkut allakkasuarlutit akiligassat pillugu Ineqarneq pillugu Maalaaruteqartarfimmut maalaaruteqarputit.
Inigisap qimalernerani takuniaanermut atatillugu isumaqataanak oqarsimannginnerit akerlianilli nalunaarut atsiorlugu, taamaasiornikkullu nalunaarummi allassimasut akuerigitit, septembarip 24-ani 2009 tusarniaavigineqarnermut akissutitut Inissiaatileqatigiiffiup ilisimatitsissutigaa. Tamatuma saniatigut Inissiaatileqatigiiffiup maajip 20-ani allakkat issuaavigai.
Naqqit lakkerneqarnerinut akiliisinneqanngitsutit taamaallaalli qalipatsinneranut akiliissasutit, Inissiaatileqatigiiffiup januaarip 21- ani 2011 Ineqarneq pillugu Maalaaruteqartarfimmut qarasasiakkut allakkamini ilisimatitsissutigaa. Uppernarsaatitut allakkanut ilanngullugu nassiunneqarpoq qalipatsinnerata akiligassartaata assilineqarnera, tassannga takuneqarsinnaalluni ilinnut akiligassiissutip qalipatsinneranullu aningaasartuutit assigiinnerat. Akiligassavit 2.694,59 koruuninut appartinneqarnera Inissiaatileqatigiiffiup ilanngullugu ilisimatitsissutigaa.
Inatsisit tungavigineqartut:
Inissianik attartortitsisarneq pillugu Inatsisartut Peqqussutaanni § 77 imm. 1 naapertorlugu, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavi qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Naqqit lakkerlaatut isikkoqassapput, taamaattorli tak. imm. 3.
Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.
Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.
§ 79 imm. 2 naapertorlugu misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu, attartortitsisup isumaa malillugu attartortup akisussaaffigisassai allassimassapput.
Aalajangersakkat ataani ilanngunneqarput
Naliliineq:
Inissiamik attaartornissamik isumaqatigiissut naapertorlugu juunip 15-aniit 2008 septembarip naalernerata 2008 tungaanut ilaqutariillusi inissiami najugaqarpusi.
Inissiap qimalernerani takuniaanermut atatillugu nalunaarusiaq qulaani pineqartoq naapertorlugu, nalinginnaasumik iluarsaanerup saniatigut allanik iluarsagassaqanngilaq.
Inigisap qimalernerani takuniaanermi peqataaninni, nalunaarusiami allassimasunik naammaginngisaqarlutit oqaaseqannginnerit akerlianilli nalunaarummik atsiorsimanerit, Ineqarneq pillugu Maalaaruteqartarfiup ilanngullugu maluginiarpaa.
Akiligassat maanna 2.694,59 koruuninut appartinneqartut akilissagitit, Ineqarneq pillugu Maalaaruteqartarfiup aalajangerpaa.
Maalaaruteqarninnut atatillugu inatsisatut peqqussutaat naapertorlugu inissiat qimmanneqarneranni sivikitsuinnarmilluunniit najorsimagaluaraanni, nalinginnaasumik iluarsaanissap avaqqunneqarsinnaanngiunnera, Ineqarneq pillugu Maalaaruteqartarfiup ilanngullugu oqaatigissavaa; tamatumunnga atatillugu peqqussummi § 77 innersuunneqarpoq.
Suliap sivisuumik ingerlanneqarsimanera Ineqarneq pillugu Maalaaruteqartarfiup ajussaarutigaa
Aalajangiineq:
Inissiaatileqatigiit inissiamik qimatsilernermi akiligassiissutaat atuutsinneqassaaq
Naammagittaalliorsinnaaneq:
Inissianik attartortitsisarneq pillugu Inatsisartut Peqqussutaanni nr. 2-mi maajip 12-ani 2005-imeersumi kingorna allannguuteqartumi § 86 imm. 7 naapertorlugu Ineqartut Maalaarutaannik Aalajangiisartoqatigiit aalajangigaat pisortaqarfinnut allanut suliakkiissutigeqqinneqarsinnaanngillat. Attartortitsisup attartortullu akornanni aaqqiaanngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.
Ineqartut Maalaarutaannik Aalajangiisartoqatigiit aalajangigaat kommuninit Namminersorlutillu Oqartussanit inissianik attartortitsisuusunut § 86 imm. 6 naapertorlugu allanngortinneqarsinnaanngilaq.
Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.