Unammilleqatigiinnermi aalajangiisartut ulloq 31. aggusti 2010-mi KNI Polaroil A/S-ip nalinginnaasumik tuniniaasinnaanermut isumaqatigiissutaa pillugu unnerluut tiguaa. Isumaqatigiissutip imarivai KNI Polaroil A/S-ip taassumalu uuliamik niuertuutaasa akornanni pissutsit.
Niuerutissaq attuumassutilik ikummatissaq imerpalasuuvoq, niuerfissarlu Kalaallit Nunaanniilluni. Niuernermi isumaqatigiissutip Kalaallit Nunaanni ikummatissanik imerpalasunik niuerniarneranut sunniutai nalilersorneqarput.
KNI Polaroil ikummatissanik imerpalasunik amerlasuunik niuertuuniarnerani tuniniaaviup ilaa 99 %-iusoq tigummigaa nalilerneqarpoq. Isumaqatigiissut malillugu niuerfissat nunap inissisimanera malillugu agguataaqqapput, uuliamik niuerfiit ataasiakkaat namminneq tuniniaavik 100 %-imik ingerlappaat.
Unammilleqatigiinnermi aalajangiisartut nalinginnaasumik tuniniaanissamut isumaqatigiissut, ataani immikkut isiginiarlugit nunat inissisimanerat malillugu agguataarnerit, nassiussuinerit aalajangersimasut annertussusaat aamma tuniniaaqqinnissamut akit aalajangiussimasut pillugit naliliivoq.
Unammilleqatigiinnermi aalajangiisartut aalajangersakkat ukua unammilleqatigiinnermut inatsisini § 6, imm. 1 malissimanngilaat, § 6, imm. 4 malillugu peqqussuteqarsinnaapput, tamannalu pisinnaavoq isumaqatigiissummi piumasaqaatit § 8, imm. 1-imiittut pisussaajunnaarsitaaneq pillugu eqquutsinneqarsimappata.
KNI Polaroil A/S-ip inissiineri pillugit Unammilleqatigiinnermi aalajangiisartut paasinninnerat malillugu, nunat inissisimanerat naapertorlugu inissiinerit imaluunniit nassiussuinerit aalajangersimasut annertussusaat KNI Polaroil A/S-ip nalinginnaasumik tuniniaanissamut isumaqatigiissutaani, unammilleqatigiinnermut inatsisini § 8, imm. 1 malillugu pisussaajunnaarsitaaneq anguniarlugu § 6, imm. 1-imeersumi, piumasaqaatit sisamat tamarmik naammassisariaqarpaat.
Unammileqatigiinneq killeqaraluartoq kiffartuussinermut isumaqatigiissummi takuneqarsinnaavoq tamassuma nammineerluni kinguneqartissinnaanngikkaa, § 8, imm. 1, nr. 3-mi piumasaqaataasut suliffeqarfiup isumaqatigiissummi anguniagaanut killilersuinngitsumik naammassinnissinnaassaaq.
Kiffartuussinermut isumaqatigiissut aningaasartuutissanut inatsit tunngavigalugu isumaqatigiissuteqarfigineqarpoq, tassanilu akuersissutinut tunngasut kisimik tunngavigineqarput. Taammaammat kiffartuussinissamut isumaqatigiissut unammileqatigiittut killilimmik aalajangersaanissamut atuutsitsinissaq naammaginartumik tunngavigissallugu piumasarineqanngilaq. Aappiullugu piumasarineqassaaq unammileqatigiittut killeqarnera Aningaasartuutissanut inatsimmi tunngavigineqassammat.