Sags nr.2011-049729
Kommunip apriilip 14-ani 2011 aalajangiinera pillugu maalaarutit, Isumaginninnermi Naammagittaaliuteqartarfiup decembarip 13-ani 2012 suliaraa imalu aalajangiivigalugu:
Aalajangiineq
Kommunip aalajangiinera allanngortinneqarmat maalaarutit ilalerneqarpoq kommunilu suliffissaqanngikkallarnermi ikiorsiissutinik qinnuteqarninnut atatillugu nalunaaquttat akunneri suliffigisimasat pillugit nutaamik naatsorsuusiussaaq.
Suliaq suliffeqanngikkallarnermi ikiorsiissutit pillugit Inatsisartut peqqussutaat nr. 5, juunip 1-ani 2006-imeersoq naapertorlugu aajangiivigineqarpoq.
Nassuiaat:
Suliamut tunngatillugu paasissutissat naapertorlugit katinnikuuvutit pingasunillu meeraqarlutit. F-imi suliffeqarputit nalunaaquttallu akunnermusiaqarlutit. Nal. ak. suliffigisimasatit pillugit paasissutissat naapertorlugit, 2011-imi sapaatip akunneri arlallit sulisimanngilatit.
Ernininnut atatillugu februaarip 25-aniit marsip 18-anut 2011 sulinngiffeqarsimanerit ilisimatitsissutigineqarpoq. Tamatuma saniatigut piffissani allani sulinngiffeqartarsimaninnut suut patsisaanersut ilisimatitsissutigineqanngilaq.
Apriilip aallaqqaataani 2011 suliffissarsiortutut imminut nalunaarutigaatit suliffissaqanngikkallarnermilu ikiorsiissutinik qinnuteqarlutit.
Apriilip 14-ani 2011 aalajangiinermi qinnuteqaatit itigartinneqarpoq. Aalajangiinermi nal. ak. qassit sulisimaninnut naatsorsuutit nassiussatit naapertorlugit, sap. ak. 13-it kingulliit ingerlaneranni nal. ak. 153,14-it sulisimavutit taakkulu peqqussut malillugu ikiorsiissutsisinnaanermut amigarnerat tunngavilersuutaavoq.
Kommunip inatsit tunngaviusoq suliffissaqanngikkallarnermi ikiorsiissutit pillugit Inatsisartut peqqussutaat nr. 5, juunip 1-ani 2006-imeersoq § 4 imm. 3 innersuussutigaa. Aalajangersagaq aalajangiinermi issuaavigineqarpoq.
Maalaarutinni apriilip 20-ani 2011 ullulikkanni sulinngiffeqartussaanerit namminerlu pisuussuteqannginnerit ilaatigut oqaatigaatit. Nuliat ernereermat sap. ak. pingasut sulinngiffeqarputit tamatumalu nassatarisaanik ullormusiaqarnissamut nal. ak. amikkittoorputit. Erninermut atatillugu sulinngiffeqarnermi ullormusiaqartussaagaluarputit namminerli pisuussutiginngisannik sulinngiffeqartariaqalerlutit. Nuliat ullormusiaqartoq pisartagaali ilaqutariinnut pilersuinissamut naammanngitsut ilisimatitsissutigaat.
Suliamut tunngatillugu allanik paasissutissaqanngistoq taamaammallu Isumaginninnermi Naammagittaalliuteqartarfik paasissutissat pioreersut tunngavigalugit aalajangiisariaqartoq, kommunip aggustip 25-ani 2011 mailikkut ilisimatitsissutigaa.
Inatsisit tunngaviusut:
Suliffeqanngikkallarnermi ikiorsiissutit pillugit Inatsisartut peqqussutaat nr. 5, juunip 1-ani 2006-imeersoq § 4 naapertorlugu Suliffeqanngikkallarnermi ikiorsiissutit kommunalbestyrelsimit tunniunneqartarput suliffissaaleqisoq, angerlartinneqaannartoq napparsimasorluunniit kommunalbestyrelsimut saaffiginnittoq kapitali 3-mi aamma kapitali 4-mi piumasaqaatinik naammassinnissimappat, taamatullu pineqartoq piumasaqaatinik makkuninnga naammassinnissimappat:
3) sapaatit akunnerini 13-ini kingullerni sulinermik inuussutissarsiutilittut suliffeqareersimasuuppat piffissamilu tassani nalunaaquttap akunnerini ikinnerpaamik 182-ini sulereersimappat. Piffissat suliffeqanngikkallarnermi tapiissutisiffiusut sulisimanermi katersatut naatsorsuutigineqanngillat.
Naliliineq:
Apriilip aallaqqaataani 2011 suliffissarsiortutut saafiginneqaarninniit, suliffissaqanngikkallarnermi ikiorsissutinik pisinnaanersutit kommuni nutaamik naliliissasoq, Isumaginninnermi Naammagittaalliuteqartarfik inerniliivoq.
Suliffeqanngikkallarnermi ikiorsiissutit pillugit Inatsisartut peqqussutaat nr. 5, juunip 1-ani 2006-imeersoq § 4 imm. 1 nr. 3 naapertorlugu sulisimanermut piumasaqaammik eqquutsitsinersutit paasiniarlugu nutaamik naatsorsuisoqarnissaa, aalajangiinermi tunngavilersuutaavoq.
Suliffissaqanngikkallarnermi ikiorsiissutinik qinnnuteqannginninni, erninermut atatillugu sulinngiffeqarnerup naatsorsuinermut ilanngunneqartussaanera Isumaginninnermi Naammagitaalliuteqartarfimmit inernilerneqarpoq.
Sulinngiffeqarnerpit nalaani suliffeqarfimmi F-imi suli sulinerit taamaammallu erninermut atatillugu sulinngiffeqarnissaq qinersimanngikkaluarukku piffissami tassani sulisinnaanissavit naatsorsuutigineqarsinnaanera, tamatumunnga tunngavilersuutaavoq.
Inatsit naapertorlugu erninermut atatillugu sulinngiffeqarsinnaatitaanerit piffissamilu tassani suliffissarsiortutut inissisimasussaannginnerit, Isumaginninnermi Naammagittaalliuteqartarfiup pingaartippaa.
Taamaammat apriilip aallaqqaataaniit 2011 suliffissaqanngikkallarnermi ikiorsiissutisisinnaanerit pillugu kommuni nutaamik naatsorsuusiussaaq. Februaarip 25-aniit marsip 18-anut 2011 nal. ak. suliffigisimasinnaasaraluatit naatsorsuinermi ilanngunneqassapput.
Aalajangiineq:
Isumaginninnermi Naammagittaalliuteqartarfiup kommunip aalajangiinera allanngortippaa. Tamatuma kingunerisaanik kommuni nal. ak. suliffigisimasatit pillugit nutaamik naatsorsuusiussaaq.
Inussiarnersumik inuulluaqqusillunga
Naja Joelsen
Siulittaasoq
Inatsisit tunngaviusut:
Suliffeqanngikkallarnermi ikiorsiissutit pillugit Inatsisartut peqqussutaat nr. 5, 1. juni 2006-imeersoq
§ 3. Suliffeqanngikkallarnermi ikiorsiissutit sulinermik inuussutissarsiutilinnut tunniunneqassapput nammineq pisuussutiginagu suliffeqannginnermik, angerlartitaanermik napparsimanermilluunniit pissuteqartumik isertitassaagaluanut annaasanut taartisiassatut.
§ 4. Suliffeqanngikkallarnermi ikiorsiissutit kommunalbestyrelsimit tunniunneqartarput suliffissaaleqisoq, angerlartinneqaannartoq napparsimasorluunniit kommunalbestyrelsimut saaffiginnittoq kapitali 3-mi aamma kapitali 4-mi piumasaqaatinik naammassinnissimappat, taamatullu pineqartoq piumasaqaatinik makkuninnga naammassinnissimappat:
– 1) Pineqartoq 18-inik ukioqalereersimappat imaluunniit pilersuisuuppat,
– 2) Kalaallit Nunaanni inuit allattorsimaffianni nalunaarsorsimappat, aamma
– 3) sapaatit akunnerini 13-ini kingullerni sulinermik inuussutissarsiutilittut suliffeqareersimasuuppat piffissamilu tassani nalunaaquttap akunnerini ikinnerpaamik 182-ini sulereersimappat. Piffissat suliffeqanngikkallarnermi tapiissutisiffiusut sulisimanermik katersatut naatsorsuutaanngillat.
– Imm. 2. Inuit tunisassiornermik unitsitsinermik pissuteqartumik tamatumaluunniit kingunerisaanik angerlartinneqartut, taamatullu sulisussarsiarineqarsinnaasut imaluunniit piginnaasaqarnerulersinniarneqarsinnaasut inatsisartut peqqussutaanni matumani maleruagassat malillugit suliffeqanngikkallarnermi tapiissutinik pisartagaqarsinnaatitaapput. Angerlartinneqarsimaneq sulisitsisumit allakkatigut uppernarsarneqarsimassaaq. Qarasaasiakkut allakkatigut uppernarsaasiisoqarsinnaavoq.
– Imm. 3. Sulisitsisoq piaaraluni suliffeqanngikkallarnermi ikiorsiissutinik pisassarinngisanik akiliinermik kinguneqartumik angerlartitsinissamut kukkusumik uppernarsaateqarluni imaluunniit mianersuaalliorujussuarluni angerlartitsippat, suliffeqanngikkallarnermi ikiorsiissutit akilerneqartut amerlaqataanik kommunalbestyrelsi akiliisitsisinnaavoq.
– Imm. 4. Aaqqissuussineq angerlartitaasunut tunisassiornermik unitsitsineq pissutigalugu angerlartitsinermut atatillugu akissarsiaqartitaasunut allanilluunniit isertitalinnut atuutinngilaq.
– Imm. 5. Qinnuteqaateqartup aalajangersakkami matumani piumasaqaatit naammassisimanerai kommunalbestyrelsip aalajangissavaa.
§ 5. Suliffissaaleqisut, angerlartinneqaannartut napparsimasulluunniit isertitanut taarsiullugit pisortanit allatigut ikiuutisisartut imaluunniit pinerluuteqarsimasunik isumaginnittoqarfiup imaluunniit isumaginnittoqarfiup ataani inissiisarfimmut inissinneqarsimasut suliffeqanngikkallarnermi ikiorsiissutinik pissarsisinnaatitaanngillat.