Sags nr.2012-065775
Meeraaqqap qamutissaanik assakaasulinnik patitinneqarsinnasunik, atisaarassaanik, kiisalu atisaarassaanik pisinissannut atugassanik pisortanit ikiorsiissutinik qinnuteqaatinnut atatillugu Kommunip ulloq 9. Marsi 2012 aalajangiinera naammagittaalliuutigisat Isumaginninnermi Naammagittaalliuuteqartarfiup 19. Apriili 2012 suliaraa imatullu aalajangiilluni
Aalajangiineq
Kommunip aalajangiinera allanngortinneqarpoq. Imaappoq kommunip aalajangigassanut tamanut tunngatillugu aalajangiineri eqqortuunngitsut, taamaammat illit naammagittaalliuutinni taperserneqarlutit.
Suliaq pisortanit ikiorsiissutit pillugit Inatsisartut peqqussutaat nr. 15, 20. Novembari 2006-imeersoq naapertorlugu aalajangiiffigineqassaaq.
Nassuiaat:
Oqaatigineqarpoq 1977-imi inunngortutit. Angajoqqaanni najugaqartutit suliffeqanngitsutillu, pisortanillu ikiorsiissutinik pisartagaqartutit.
Pisunik allattuiffinni takuneqarsinnaavoq qinnuteqarnerpit nalaani naartusutit, ullorlu 27. Maaji 2012 ernivissattut naatsorsuutigineqartoq.
Ulloq 23. Februaari 2012 kommuni siniffeeqqamik, meeqqap qamutaanik assakaasulimmik patitittakkamik aammalu atisaaqqanik, ataatsimut akeqartunik kr. 6.099,90 kr. pisinissamut ikiorsiissutinik ainnuteqarfigaat.
Ulloq 9. Marsi 2012 aalajangiinermi qinnuteqaatinnik itigartinneqarputit. Itigartitsinermut tunngaviliunneqarpoq meerartaarneq tassanngaannartumik pineq ajormat. Inatsisitigut tunngavigineqarpoq Inatsisartut peqqussutaat nr. 15, 20. Novembari 2006-imeersoq.
Naammagittaalliuutinni allapputit aningaasanik katersisinnaasimanak naartunerit tamaat suliffeqarsimannginnavit.
Kommuni ulloq 18. Maaji 2012 Isumaginninnermi Naammagittaalliuuteqartarfimmut allappoq oqaatigalugu illit pisortanit ikiorsiissutinik pisartagaqartutit, tamatumalu saniatigut kommuni paasissutissanik allanik saqqummiussaqanngilaq.
Inatsisitigut tunngavigisat:
Pisortanit ikiorsiissutit pillugit Inatsisartut peqqussutaanni nr. 15-imi, 20. Novembari 2006-imeersumi § 20 malillugu kommunalbestyrelsi ataasiartumik anningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm. 1 aamma § 8-mi piumasaqaataasut naammassippagit, aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq aningaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.
Naliliineq:
Isumaginninnermi Naammagittaalliuuteqartarfik isumaqarpoq meeraaraativit atisassaanik siniffeerassaanillu ikiorneqarnissamut pisinnaatitaasutit.
Isumaginninnermi Naammagittaalliuuteqartarfiup pingaartutut isigaa, naak aningaasartuutissat siumoortumik naatsorsuutigineqareersinnaagaluartut, illit aningaasanik tamakkununnga atugassanik sipaagaqarnissamut periarfissaqarsimanngitsutit, pissutigalugu naartunerit tamaat pisortanit ikiorsiissutinik pisartagqarsimagavit.
Taamatuttaaq Isumaginninnermi Naammagittaalliuuteqartarfiup pingaartutut isigaa meeraaqqap atisassaanut siniffeeraanullu tunngatillugu aningaasartuutissat naammaginartumik nassuiaaserneqarsinnaasut, aammalu aningaasartuutit taakku aningaasartuutigineqarneri ilinnit isumagineqassagunik illit ulluinnarni inuuniarninnut annertuumik nammakkiisuunissaat, pissutigalugu illit ulluinnarni pisariaqartitavit akilersornissaannut taamaallaat pisortanit ikiorsiissutit isumalluutigisimagakkit, aningaasartuutillu tamakku inimut nerisassanullu aningaasartuutit amerlaqatigiinnarlugit.
Isumaginninnermi Naammagittaalliuuteqartarfik isumaqarpoq meeqqap qamutaanik assakaasulinnik aningaasatigut ikiorserneqarnissamut pisinnaatitaanngitsutit.
Tamatumunnga tunngavigineqarpoq qamutinik assakaasulinnik patitinneqarsinnaasunik pisinissamut aningaasartuutissat naammaginartumik nassuiaaserneqarsinnaasutut isigineqangimmata, pissutigalugu meeraaraq aallaqqaammut meeraaqqat qamutiviinik (barnevogn) pisariaqartitsisarmata.
Aalajangiineq:
Kommunip aalajangiinera allanngortinneqarpoq, taamaalilluni illit meeraaqqamut siniffimmik atisaaqqanillu pisinissamut ikiorsernqarsinnaanngorlutit, kisianni meeqqat qamutaannik assakaasulinnik patitinneqarsinnaasunik pisinissamut itigartitsineq atortussaatinneqarluni.
Inussiarnersumik inuulluaqqusillunga
Naja Joelsen
Siulittaasoq
Inatsisit tunngaviusut:
Pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq
§ 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq
1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.
§ 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
1) suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliassarsiortuunngikkuni
2) sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit
3) napparsimaguni imaluunniit erninermut atatillugu sulinngiffeqaruni taamalu sulisinnaanani.
§ 20. Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut
naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.
Imm. 2. Aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.
Imm. 3. Kommunalbestyrelsi aamma pisortanit ikiorsiisinnaavoq ilaquttat qanigisat napparsimaneranni aamma/imaluunniit toquneranni ilisaanerannilu angalanissamut aningaasartuutinut. Kommunalbestyrelsimit piumasarineqarpat nakorsamit uppernarsaammik tunniussisoqassasoq, uppernarsaammik piniarnermut aningaasartuutit kommunalbestyrelsip akilissavai.