Aalajangiineq
Ineqarneq pillugu Maalaaruteqartarfik isumaqarpoq inatsisitigut pisussaaffigineqartutut inissiap nalinginnaasumik iluarsaanneranut aningaasartuutit kiisalu inigisamut iserternermi akiliutit (depositum) sinnerisa ilinnut tunngasortai akilissagitit.
Suliami allagaatit:
- Attartornermut isumaqatigiissut 12. juni 2013-imeersoq
- Iserternermi misissuinermit nalunaarusiaq 12. juni 2013-imeersoq
- Attartortup amigaatit nalunaarsugai 17. juni 2013-imeersut
- Attartornerup unitsinnissaa nalunaarutigineqarpoq 16. september 2013 attartugarlu qimanneqartussaalluni 15.oktober 2013.
- Najukkat qimanneqarneranut atatillugu misissuinermit nalunaarusiaq 15. oktober 2013-imeersoq.
- Qalipaanermut akiligassaq 27. oktober 2013-imeersoq.
- Najukkap qimanneranut atatillugu akiliut ulloq 31. januar 2014-imeersoq.
- Inissiaatileqatigiiffiup inissiamillu attartortup akornanni attaveqatigiinnerit assigiinngitsut, tassunga ilanngullugu naammagittaalliuut 25. juni 2014-imeersoq.
- Ineqarneq pillugu Naammagittaalliuuteqartarfiup inissiaatileqatigiiffimmut nassuiaataa 6. november 2014-imeersoq.
Nassuiaat:
Ini uiillu attartugassarsi illoqarfimmi pineqartumi adresse XXX-imiittoq iserterfigaarsi 12. juni 2013-imi.
Inissiaq sisamanik initalik 95,80 m2-iuvoq.
Iserternissinnut atatillugu amigaatinik nalunaarsuigavit makku oqaatigaatit: eqqaavilerfik amigaataasoq, igaffimmit sinittarfimmut matu anginngitsumik putoqartoq, igalasserfiit anginngitsunik putoqartitertut, iffiorfiup matuata tigummivia katassimasoq kiisalu skaaviit, amusarissat quilu eqqiarneqarsimanngitsut.
Kingorna eqqaavilerfik iffiorfiullu matuata tigummivia iluarsineqarsimapput.
Inigisassinnik attartornissi 15. oktober taamaatissagissi 16. september 2013-imi nalunaarutigaat.
Inigisassi qimanneranut atatillugu nalunaarusiaq malillugu iikkat qilaarlu ataasiarlugit qalipanneqartussaapput natillu lakkerneqartussaallutik.
Inigisassinnit aninissinnut atatillugu misissuinermit nalunaarusiamit erserpoq nalunaarusiornerup nalaani najuuttutit nalunaarusiarlu atsiorit.
Qalipaasuninngaannit akiligassiissutaannit erserpoq nalinginnaasumik iluarsaassinermut aningaasartuutit 12.218 kr.
Inigisassi qimanneranut atatillugu akiligassaq 31. januar 2014-imeersoq malillugu Inissiaatileqatigiiffimmut Y-mut illit akiligassatit katillugit 4.438,10 kr.-upput.
Imatut aningaasat saqqummerput: Inigisamut iserternermi qularnaveeqqutit 17.193 kr. aamma 610 kr. piffissami inissiamik attartornerup nalaani atuuttut taakkunannga nalinginnaasumik iluarsaassinermut aningaasartuutit 12.218 kr. Inissiaatileqatigiiffiup ilanngaatigai, qularnaveeqqusiissutitut sinneruttut akiligassat 10.024,-kr.
Akiligassiissutigineqartoq eqqarsaatigalugu inissiaq qanorluunniit kusanartigisunngorlugu qimassimagaluaraanni inissiap ataasiarlugu qalipattussaaneranik ilisimatinneqarsimannginnerit inissiaatileqatigiiffiup ajuusaarutigaa. Taamaalilluni peqqussut malillugu Inissiaatileqatigiiffiup pisussaaffini naammassivaa. Innersuussutigineqarpoq Inatsisartut inatsisaannut nr. 2, 12. maaji 2005-imeersumut § 77: Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Natit nutaamik lakkersimassapput”.
Aammattaaq Inissiaatileqatigiiffiup taavaa inimik takuniaanermut atatillugu misissuinermut tunngatillugu nalunaarusiami suliassatut allassimasut kisimik suliarineqarsimasut, taamaattumik akiligassat allat (eqqumiitsut) ilanngunneqarsimanngitsut.
Ineqarneq pillugu Maalaaruteqartarfimmut naammagittaalliuutinni 25. juni 2014-imeersumi oqaatigaat inigisassinnit aninissinnut atatillugu akiligassavit saniatigut allanik akiligassinneqarsimanerit naammaginagu. Inissiamik attartornermi maleruaqqusat malissimavasi, inissiaq attartugarsi aserfallatsaalisimavarsi aammalu anigassi peqqissaartumik eqqiarsimallugu. Ilisimatinneqarpusi qalipaaneq peqqutaalluni akiligasseqqinneqarsimasusi, isumaqarlutillu
namminersorlutik qalipaasartut qanorsuaq akiligassanik sanasinnaasartut.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 77 naapertorlugu Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Naqqit nutaamik lakkersimasutut isikkoqassapput, taamaattorli tak. imm. 3.
Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
Naliliineq
Ineqarneq pillugu Maalaaruteqartarfik isumaqarpoq inissiap attartukkavit nalinginnaasumik iluarsaanneranut aningaasartuutinut attuumassuteqartut illit pinngitsoornak akiligassarigitit.
Tamatumunnga pissutaavoq inigisap qimannerani inigisaq qanoq ikkaluarpalluunniit nalinginnaasumik iluarsaassisussaatitaanermut, soorlu natit lakkerneqarnissaannut, iikkat qalipanneqarnissaannut aamma qilaat qalipanneqarnissaannut piumasaqaatip sanioqqunneqarnissaanut peqqussummi tunngavissaqannginnera.
Aamma taamaappoq inigisat qaammatini tallimaannarni najorsimagaluarukkuluunniit iluarsaassisussaatitaanermut piumasaqaatip appartinnissaanut tunngavissaqarani.
Inissiap angissusaa eqqarsaatigalugu Ineqarneq pillugu Maalaaruteqartarfik isumaqarpoq qalisut akiligassiissutaat annertuallaanngitsoq taamaammallu naammagittaalliuutivit tassunga tunngasortaa naliliiffiginiarnagu.
Ineqarneq pillugu Maallaaruteqartarfiup inissiaatileqatigiiffik Y-mut erseqqissaatigissavaa inigisamit aninermut atatillugu akiligassat ima immikkoortiterneqarsimassasut taamaalilluni suliassat suut suliarineqarsimanersut suliassat qanoq annertutiginersut kiisalu atortunut sulinermilu aningaasarsiassanut aningaasartuutit erseqqinneroqqullugit.
Matumani siunertaavoq inigisamit aninermi akiligassat erseqqinnerunissaat soorlu misissuinermit nalunaarusiamut atatillugu isigigaanni akiligassat naleqqunnersut inimik attartortoq naliliisinnaaniassammat.
Depositum-it sinneri innersuussutigalugit Ineqarneq pillugu Maalaaruteqartarfiup innersuussutigissavaa depositum tamakkerlugu ingerlatanut ilaatinneqarmat. Taamaattumik eqqorpoq depositum-ip tassunga tunngasortaa suli akilersorlugu naammassisimanngisat ingerlasunut ilanngunneqarsimanngimmat
taakkualu akiligassannut naleqqupput.
Aalajangiineq:
Ineqarneq pillugu Maalaaruteqartarfik isumaqarpoq aninermut atatillugu naatsorsukkanut naapertuuttumik Inissiaatileqatigiiffimmut akiliissasutit.
Naammagittaalliuuteqarnissamut ilitsersuut:
Ineqarnermut Naammagittaalliuuteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi kingusinnerusukkullu allanngortinneqartumi, § 86, imm. 7 naapertorlugu. Attartortitsisup attartortullu akornanni aaqqiagiinnginneq eqqartuussivilersuukkumaneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. , attartortitsisup allaffeqarfittut aktiaatileqatigiiffianit isumagineqarsimagaluarpataluunniit.
Ineqarneq pillugu Maalaaruteqartarfiup aalajangiineri namminersornerullutik oqartussanut (namminersorlutik oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu. 6.
Ineqarneq pillugu Maalaaruteqartarfiup siulittaasua
Assilinera Inissiaatileqatigiiffik Y-mut. Siuliani taaneqartut innersuussutigineqassapput. XXXXX