TV-mut iluarsarneqarsinnaanngitsumut akiliuteqarnissaq

Aalajangiineq

Maalaarutit ilaannakortumik akuersaarneqarpoq. Iluarsaaniarnermut kingoraartissat marluk, piniarnissaat akuersaarnikuugakku, akilissavatit.

TV iluarsarneqarsinnaanngimmat iluarsarniarnerigaluanut aningaasartuutit allat akilissanngilatit.

Kingoraartissat nassiunnerallu katillutik akeqarput 1.321,87 kr. Aningaasat 1.700 kr. akiliutigeree-rakkit, tuniniaasup ilinnut utertitassarilerpai 378,13 kr.

Aningaasat ilinnut utertitassat 378,13 kr. ullumimiit ullut 30-it qaangiutsinnagit akilerneqassapput. Piffissap killiliussaq qaangiunnerani aatsaat akilerneqassaguni Ernialiinermut inatsimmi § 5 naapertorlugu ernialersorneqalissaaq.

Aallaqqaasiut

Maalaarut ulloq 14. oktober 2013 tiguneqarpoq. Suliap imarisaa tassaavoq Thomson LCD TV-mik iluarsaasseriaraluarneq, taassumalulu kingoraartissaanik akiliisitsiniarneq.

Illit piumasaqaatigivat iluarsaassinermut kingoraartissanullu aningaasartuutit tamaasa tuniniaasup taarsissagai.

Tuniniaasup piumasaqaatit akueriumanngilaa, tassami illit paasitinneqareersimavutit kingoraartissat piniarneqartut akiligassaasut. Aammattaaq illit iluarsagassap tunniunnerani oqaatigereersimasussaa-galuarpat TV natermut nakkaaneqarnikuusoq. Taamaalilluni igalaartaani qupineq siusinnerusukkut paasineqarsimassagaluarmat.

Suliap saqqummiunnera

Ulloq 10. oktober 2013 Atuisartut maalaaruteqartarfiannut maalaaruteqarputit.

Maalaarutinni ersippoq TV misissugassanngorlugu iluarsagassanngorlugulu tuniniaasumut tunniussimagit maj 2013. Tunniunnerani aningaasat 700 kr. siumut akilerpatit. Kingusinnerusukkut kingoraartissanut piniagassanut 1.000 kr. akiliutigeqquneqarput.

Tuniniaasup TV-p iluarsarneqarsinnaannginnera paasereeramiuk ataatannut sianerpoq TV aaqqullugu 195 kr.-inillu akileqqullugu.

Aammattaaq ersippoq illit kingoraartissanut atunngitsuukkanut aningaasartuutit akileruman-ngiinnarlugit najat tuniniaasumut sianertissimagit. Oqaloqatigiinnermi tuniniaasoq paasisitsivoq aningaasartuutit katillugit 2.000 kr.-sut, taamaammallu illit nikingassutaasoq akilissagit, tassa illit sulisup tiimiinut kingoraartissanullu akiliisussaasutit.

Maalaarutippit naanerani ersippoq TV-pit misissorneqarnera qaammammi ataatsimi utaqqisimagit. TV tunniukkakku igalaartaa ajoquteqannginnerarpat, tassami TV uppitinneqarnikuunanilu nakkarnikuunngimmat. Aammattaaq igalaartaata iluarsarnissaa akuerisimannginnerarpat.

Illuatungeriinnik tusarniaanermi tuniniaasup makkua ilisimatitsissutigai:

Illit ulloq 3. maj 2013 Thomson LCD TR iluarsagassaq tunniuppat. Tunniunnerani 700 kr. akilerpatit. Tuniniaavimmi teknikerip TV misissorpaa kingoraartissaanillu sarfaliutaasumik piniarluni. Sarfaliutip taassuma ikkussuunnera naammassimanngilaq, erserpormi powersupply (sarfaliut sakkortooq) aamma aserorsimasoq.

Tuniniaasup sarfaliutip sakkortuup akia paasiniariarlugu attavigaatit, nalunaarfigaatillu taassuma nassiunneratalu akigigaat 919,77 kr. kiisalu 65 kr. Ulloq 15. juni 2013 akia akueraat, 1000 kr.-lu siumut akilerlugu.

Kingoraartissat ikkussoreernerini TV suli ikissinnaanngilaq, nipaali ajoquteqarani. Misissorluarnerani paasineqarpoq LCD qupisimasoq, ajoqutaanullu taanna patsisaasoq. Ajoqutaa paasineqareermat tuniniaasup attaviginiarsimagaluarpaatit, iluatsinnaguli.

Iluarsaaviup akiligassiissutaani allassimavoq LCD iluarsarneqarsinnaanngitsoq.

September 2013 qiteqquttoq tuniniaasoq ilinnit attavigineqarpoq. Suliap ingerlarna ilinnut nassuiaatigineqarpoq, aammalu oqarfigineqarputit kingoraartissat piniakkat aalajangersimasut utertinneqarsinnaanngitsut. Tamanna tuniniaasut sullitaminut iloqqoraat, tassalu taanna siumut akiliisitsisarnermut patsisaavoq.

Apeqquteqarfigineqarnikkut tuniniaasumut uppernarsarpat, TV uppissimasoq ataasiarlunilu natermut nakkarsimasoq. Tuniniaasumit kissaatiginarsimagaluarpoq paasissutissaq taanna TV-p tunniunnerani oqaatigereersimassagaluarit.

Tuniniaasuttaaq ilanngullugu oqaatigaa sarfaliuut nalinginnaasoq 272,10 kr.-mik akeqarsimasoq, nassiunneralu 65 kr.-qarsimasoq. Suliarinera akeqarpoq 585 kr. Aammalu TV-p igikkiartornera 150 kr.-nik akeqarluni, tassa kiilumut 10.kr.

TV tuniniaavimmi allami pisiaavoq.

Illuatungeriinnik tusarniaanermi apeqquserneqarpoq sooq LCD-p igalaartaata quppaqarnersoq aallaqqaammulli paasineqarsimannginnersoq. Illit sullerlunnertut isigaat, TV-p tunniunnerani ilinnut apeqqutigineqarsimanngimmat. TV ikikkumajunnaarmat tunniuppat, sorraasaarfigineqar-nikuunngilaq nakkartinneqarnikuunnginnami.

Tamatuma saniatigut apeqqutigaat, qanoq ililluni sulisup (tuniniaasup) ilisimasimaneraa Qallunaat Nunaannut nuussimasutit. Qallunaat Nunaannut nuutsinnak sulisoq sianerfigaat TV apeqqutiginiarlugu. Tamatuma nalaani suli naammassineqanngilaq, taamaammallu illit ataatavit oqarasuaataata normua sulisumut tunniuppat, TV-p suliarinera naammassippat taassuma sianerfiginiassammatit.

Ilisimatitsissutigaat Qallunaat Nunaannit sulisumut sianernikuunak. Siusinnerusukkut nalunaaru-taareersutut najavit (nunaqarfik/illoqarfik) sulisoq sianerfigaa. Sulisup TV iluarsarsinnaanngimmagu oqaluukkuminaallillunilu, taava illit najallu paasinialerparsi aningaasat iluarsaassinermut atugassat utertissinnaanerlugit. Tamatuma tungaanut TV atorluarsinnaasoq tigoqqissallugu naatsorsuutigisimagaluarpat, tassami aningaasarpassuit tassunga atoreerakkit.

Ilanngulluguttaaq allapputit mail-ini assigiinngitsuni atuarneqarsinnaasimasoq, kingoraartissat piniarneqarsimanersut nassiunneqarsimanersulluunniit paatsiveerussutaasimasoq. Sulisumit neriorsorneqarputit kingoraartissaq piniarneqareersoq, sapaatillu akunnerata ataatsip marlulluunniit iluanni tikissasoq. Naggataatigut utaqqeqqikkumajunnaarputit, iluarsagassarlu taamaatiinnarumalerlugu. Nalunaarutigaat sulisoq tamaviaarsimasoq iluarsagassaq ingerlatiinnarumallugu, tassamigooq kingoraartisaq piniareeramiuk. Taamaattumik isumaqarsimavutit sulisup utaqqinermini piffissamik akimillu atuinini nammineq akisussaaffigigaa, tassami oqaannarsimasinnaagaluarmat tamanna sivisuallaassasoq.

Isumaqarputit kingoraartissanik piniarneq unitsiinnarneqarsinnaasimagaluartoq, paasiniaqattaaginnarnagu qaqugu pigineqaqqilissanersoq. Sulisup suli illoqarfimmi/nunaqarfimmi najugaqarninni sianerfigisimasinnnaagaluarpaatit.

Naggasiullugu oqaatigaat TV aallaqqaammut misissorluarneqarsimanngitsoq. Apeqquserpat ilumut igalaartaata qupinera iluarsaasarfimmi pisimannginnera uppernarsarneqarsinnaanersoq. Kingoraartissanik piniarnissamik uteriiserneq sulisup akisussaaffigaa, piniakkallu unitsinnissaa illuatungeriinnut aningaasartuutaanngitsumik pisussaagaluarpoq. Isumaqanngilatit illit akisussaaffigalugu TV-p suli aaneqarsimannginnera, tassami sulisup ataatavit oqarasuaataata normua pereersimammagu. Isumaqanngilatittaaq sulisup sulineranut aningaasartuutit akiligassaralugit.

Illuatungeriinnik tusarniaaqqinnermi tuniniaasup oqaatigaa, najukkami allanit tusarsimallugu Qallunaat Nunaannut nuussimasutit. Tuniniaasuttaaq oqaatigaa nalornissutigalugu illit najalluunniit oqarasuaatikkut TV pillugu oqaluussimanerlugu. Oqaloqatigiinnermittaaq tassani oqaatigineqarpoq TV natermut nakkarnikuusimasoq. Tuniniaasup kissaatiginartikkaluarpaa TV-mik misissuinermi siullermi paasissutissap taassuma ilisimareersimanissaa.

Tuniniaasuttaaq ilisimatitsissutigaa aningaasartuutit katikkaanni, piffissaq attaveqatigiinnermut atorneqartoq ilanngullugu, TV-mik iluarsaaneq katillugu akeqarsimasoq 6.000 kr.

Tuniniaasuttaaq oqaatigaa TV-t pisoqqat kingoraartissaannik piniartarneq ajornakusoortartoq, taamaammallu namminneq ileqqoralugu suulluunniit suliassanngortinneqaraangata 700 kr.-mik siumut akiiliisitsisarneq. Suliassiissutigineqartoq iluarsarneqarsinnaanngikkaangat akiliut utertinneqartarpoq. Suliassiissutigineqartoq iluarsarneqarsinnaagaangat, kingoraartissalli pisariaqartinneqarlutik, taava sullitaq tamatuminnga kingoraartissallu akiannik ilisimatinneqartarpoq. Kingoraartissanik piniarnissaq iluarsaanissarlu sullitamit akuerineqaraangat, iluarsaaneq aallartittarpoq. Pisumi uani illit ilisimatinneqarputit akileriikkavit saniatigut iluarsaassineq 1.000,00 kr.-nik akeqassasoq. Tamanna akueraat, iluarsaassinerlu aallartinneqarluni.

Tuniniaasup oqaatigaa TV-p igalaartaa ammaramikku paasisimallugu qupisimasoq, illillu tamatuminnga ilisimatinneqarputit. Misissueqqaarnermi quppaq taanna takuneqarsinnaa-simanngilaq, tassami illit tuniniaasumut suna ajoquterpiaasoq oqaatigisimannginnakku. Taamaattumik tuniniaasup igalaartaq aallaqqaammut misissorsimanngikkaluarpaa.

Aammattaaq tuniniaasup oqaatigaa, TV kingoraartissallu suli tigummiaritik, illimmigooq tigoqqikkumannginnakkit.

Tunngavilersuut

Suliamut tunngatillugu oqaatigineqarpoq TV tuniniaasumit allamit pisiaasimasoq, imminnulli iluarsaassassatut suliakkiunneqartoq. Taamaattumik TV tuniniaasumit pisiatut ussassaarutaanngilaq, tassaallunili tuniniaasup iluarsaasseriaraluarnerani akiligassaqalernermut maalaarut.

Tuniniaasumi iluarsaasartup oqaatigaa TV iluarsarneqarsinnaanngitsoq, misissueqqinnermi paasineqarmat igalaartaa qupisimasoq. Misissueqqinneq tamanna pivoq sarfaliutip piniakkap TV-mik nipinitsitsisup assitaqalersitsinngitsulli ikkussuutereerneratigut.

Nalliuteqqittartumik ajoquteqarsimappat tamanna tuniniaasumik sumiissusersiuminaassaaq. Taamaattumik ajoqutip nassaarinissaanut iluarseeriaqattaarneq pisariaqarsinnaasarpoq.

Atuisartunut maalaaruteqartarfik isumaqarpoq tuniniaasup ajoqummik nassaarniarnermini aaqqeeriarnerit pisariaqartut ingerlassimagai. Aammattaaq illit kingoraartissat akilernissaat akuerisimavat. Tamatuma kingorna tuniniaasup nalunaarutigaa; TV igalaartamigut quppaqarmat iluarsarsinnaanagu, qupparlu taanna ingitsereqqittaarnermi aatsaat takuneqarsinnaasimasoq.

Kingoraartissanik piniarnissaq akuerigakku, isumaqarpoq tuniniaasoq TV-mik iluarsaanissaanik akuerigit. Taamaattumik ajoqutip iluarsarnissaanut neqerooruteqarnissaq pillugu misissuisoqanngilaq.

Tuniniaasup oqaatigaa TV iluarsarneqarsinnaanngippat, aningaasat akileriigaasut utertinneqassasut. Atuisartunut maalaaruteqartarfik isumaqarpoq tamanna imatut paasineqarsinnaasoq, illit TV-mik iluarsaasseriaraluarnermi akiliuteqassanngitsutit. Erseqqissumik ilisimatinneqarsimavutit iluarsaas-seriartoqassappat kingoraartissat aalajangersimasut tikisinneqarsimasut illit akiligassarigitit.

Tuniniaasup Atuisartunut maalaaruteqartarfimmut erseqqissaatigaa, illit ersarissumik ilisimatinneqarsimasutit, TV-p iluarseriarnera illit akiligassarigit. Taamaattumik Atuisartunut maalaaruteqartarfik isumaqarpoq iluarsaasseriaraluarnermut akileeqqissanngitsutit.

Atuisartunut maalaaruteqarfik isumaqanngilaq tuniniaasoq qinnuigisimagit sarfaliuummik sakkortuumik piniarnini unitseqqullugu, taamatullu iluarsaaneq taamaateqqullugu. Taamaattumik sarfaliuummut sakkortuumut akiliinissaq pinngitsoorsinnaanngilat.

Qinnuigineqarsimavutit kingoraartissanut akiliutaagallartoq 700 kr. aammalu sarfaliuummut sakkortuumut akiliutissaq 1.000 kr. akileqqullugit. Akiliutissaq katillugu 1.700 kr. Tuniniaasup oqarnera naapertorlugu sarfaliuut nalinginnaasoq 272,10 kr.-qarsimavoq, saniatigullu nassiunneranut 65 kr. Sarfaliuut sakkortooq 919,77 kr.-nik akeqarpoq, saniatigullu nassiunnera 65 kr. Tassa kingoraartissat katillugit 1321,87 kr.-mik akeqarput.

Atuisartunut maalaaruteqartarfik isumaqarpoq illit iluarsaasseriarnermut akiligassatit tassaasut 1321,87 kr. Illit akileriikkavit 1.700 kr. sinneri tuniniaasup utertitassarai. Taamaattumik 378,13 kr. ilinnut utertussaapput. Piffissap naammaginartup iluani TV aanngikkukku tuniniaasup piumasarisinnaavaa iginnissaanut aningaasartuutini ilinnit akilerneqassasut.

Maalaarnissamut ilitsersuut

Atuisartunut pisisarturtullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaat nr. 10, 13. november 1986-imeersoq § 31 naapertorlugu Atuisartunut maalaaruteqartar-fiup aalajangiussaa allaffissornikkut sullissivinnut allanut maalaarutigisinnaanngilat.

Inussiarnersumik inuulluaqqusillunga

Atuisartunut maalaaruteqartarfik

Jannik Isidor

Siulittaasoq

Scroll to Top