Naammagittaalliorsinnaavutit

Pisininniit qaammatit siulliit arfinillit atuisartutut pisiap pisiarineraniilli ajoquteqarsimanissaata ilimanaateqarneranut tunngatillugu maleruagassamit immikkut illersugaavutit. Qaammatit siulliit arfinillit ingerlaneranni pisiat ajoquteqalerpat, pisiarinerani ajoquteqareersimanissaa naatsorsuutigineqassaaq. Tuniniaasoq tamatumunnga isumaqataanngikkuni uppernarsaatissaqartariaqarpoq.

Oqarasuaatip angallattakkap Danmarkimut nassiunneqarnera
Oqarasuaat angallattagaq ikikkumajunnaariataarmat tuniniaasumut tunniunneqarpoq. Tuniniaasup nammineq misissornissaanut periarfissaqannginnami Danmarkimi iluarsaasarfimmut nassiuppaa. Oqarasuaatip nakkaaneqarsimanermi kingorna ikissinnaajunnaarsimanera paasinarsivoq.

Pisisoq akiliisussanngussaaq
Fabrikkip kukkussutiginagu pisisup nammineq pisuussutigimmagu oqarasuaatip iluarsaasarfimmut nassiunnera, misissorneqarnera pisariaqarpallu iluarsarneqarnera ilanngullugu pisisup akiligassaraa.

Tuniniaasup ajornartorsiut aaqqiissuteqarfigissavaa
Pisinermiit ukiut marluk ingerlanerini pisiaq aserorpat pisiniarfimmut naammagittaalliutigisinnaavaat. Tamanna pisiat -illit nammineq pisuussutiginngisannik amigaateqarpat ajoquteqarpalluunniit- tuniniaasumit aaqqiissuteqarfigineqarnissaanik isumaqarpoq. Nioqqutissap akikillisanngorlugu tamakkiisumilluunniit akilerlugu pisiarisimanera apeqqutaanngilaq.

Pisinermut uppernarsaat eqqaamassavat
Pisinermut uppernarsaat tassaavoq pisiniarfimmi tassani nioqqutissamik aalajangersimasumik pisisimaninnut uppernarsaat naammagittaalliussagaanni takutinneqarsinnaasussaq. Pisiaq amigaateqarpat ajoquteqarpalluunniit naammagittaalliornissannut pisinermut uppernarsaatit tamatigut toqqortarisakkit.

Piffissaatillugu naammagittaalliorit
Piffissaagallartillugu naammagittaalliussaatit. Tamanna ajoqutip paasineraniit qaammatit marluk qaangiutsinnagit naammagittaalliornissamik isumaqarpoq. Piaarnerpaamilli naammagittaalliornissat innersuussutigaarput.

Toqqarsinnaasatit
Naammagittaalliutit tuniniaasumit akuerineqarpat assigiinngitsut sisamat arlaannik periarfissinneqassaatit. Pisiap ajoqutaata annertussusaa apeqqutaatillugu periarfissatut toqqarneqarsinnaapput:

  •  Iluarsartinnera (ajoqutaata aaqqiivigineqarnera) – ajoqutaa annikippat pisiarlu suli atorsinnaappat
  •  Akikillinera (akikilliliivigineqarneq) – ajoqutaa annikippat pisiarlu suli atorsinnaappat
  •  Allamik taarserneqarnera (nutaamik tunineqarneq) – ajornartorsiutaasup pisiaq atorsinnaajunnaarsissimappagu
  •  Pisinerup atorunnaarsinneqarnera (pisiap utertinnera) – ajornartorsiutaasup pisiaq atorsinnaajunnaarsissimappagu

Amigaataasoq pingaaruteqassaaq
Pisiaq utertinniaraanni pisiavit ajoqutaa pingaaruteqassaaq. Tassa imaappoq pisiappit atortussiaanut atorneqarsinnaassanngippat. Assersuutigalugu kavaajappit siittartua aserorsimasoq imaluunniit mobiltelefonimiik sianersinnaangittutit.

Ajoquteqaqqilerpat
Ass. akikillisaavigineqarnissaq toqqarukku, amigaataasoq akuerissavat amigaataasullu aaqqiivigineqarnissaa piumasaqaatigisinnaanngilat. Ajoqutaasutut naammagittaalliutigisimasat takkuteqqippat, iluarsartinneraniit ukiut tallimat pallillugit naammagittaalliornissamut periarfissaqarputit.

Avaqqutsissinnaannginnermik illersugaaneq
Naammagittaalliorsinnaatitaanerit inatsisilerinermi oqaatsit atorneqartartut naapertorlugit avaqqutsisinnaannginnermit illersugaanermik taaneqartarpoq. Tamanna– nammineq piumassutsinnik isumaqatigiissuteqaraluaruilluunniit pisinnaatitaaffippit avaqqunneqarsinnaannginneranik isumaqarpoq. Tamatigut minnerpaamik ukiuni marlunni naammagittaalliorsinnaatitaassaatit. Tuniniaasup ass. naammagittaalliorsinnaatitaanerpit ukiunut pingasunut sivitsorneragut pitsaanerusumik periarfissiissinnaanera akornutissartaqanngilaq, sivikillisinneqarsinnaanngisaannarporli.

Ilisimagaanni iluaqutissat

Scroll to Top