2017-imi utoqqalinermi pensionisiassavit annertussusissaat pillugu Kommunip ulloq 8. november 2017-imi aalajangiinera pillugu naammagittaalliuutit ulloq 20. februar 2019-imi Isumaginninnermi Naammagittaalliuuteqartarfiup siulittaasuata suliaraa imalu aalajangiivoq
Aalajangiineq
Kommunip aalajangiinera allanngortinneqarpoq. Tamanna isumaqarpoq naammagittaalliutit ilalerneqartoq, kommunillup aalajangiinera eqqunngitsoq. Taamaasillutit qaammammut december 2017-imi 4.711,- kr-nik utoqqalinersiaqartitaassaatit.
Utoqqalinersiaqarneq pillugu Inatsisartut inatsisaat nr. 20, 23. novembari 2015-imeersoq kingusinnerusukkut allannguuteqartoq, kiisalu pensionisialinnut 1. januaari 2017-imiit akit isertitatigullu killilissarititat pillugit kaajallaasitaq nr. 285, kiisalu Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juuni 1994- imeersoq naapertorlugit suliaq aalajangiiffigineqarpoq.
Nassuiarneqarnera:
2017-imi novemberip 14-iani 66-iliisussaagavit, ulloq 17 oktober 2017-imi kommunimut utoqqalinersianik qinnuteqarputit. Katisimasuuvutit aappallu sulisuusoq najorlugu.
Ulloq 8 november 2017 kommuni 2017-imut utoqqalinersiutissatit pillugit aalajangiivoq. 1 december 2017-imiit qaammammut utoqqalinersiassatit akileraartarnermut ilanngaatigineqannginnerini 0 kr-imut inissinneqarput.
Utoqqalinermi pensionisiavit saniatigut maanna isertitatit 631.505,- koruuniusut kiisalu saniatigut aappavit utoqqalinersiutit saniatigut isertitai 279.440,- kr-iusut kommunimiit naatsorsorneqarput.
Utoqqalinersiaqarneq pillugu Inatsisartut inatsisaat nr. 20, 23. novembari 2015-imeersumi § 12, imm. 1 kiisalu Utoqqalinersiaqarneq pillugu Inatsisartut inatsisaata nr. 20, 23. novembari 2015-imeersup allanngortinneqarnera pillugu Inatsisartut inatsisaat nr. 24, 7. decembari 2015-imeersoq inatsisitut tunngaviusutut kommunimit innersuussutigineqarput.
Isumaginninnermi Naammagittaalliuuteqartarfimmut 7. december 2017- imi naammagittaalliorputit. Ukiorpassuit sulereersimallutit, aamma allapputit, isumaqartutit utoqqalinersiuteqarnissat pisussaatitaaffigigit.
Kommunimit suliami allagaatinik Isumaginninnermi Naammagittaalliuuteqartarfik pissarsisimavoq.
Suliami erserpoq illit aappavillu pensiuunisiaasa saniatigut 2017-imi isertitasi ataatsimut 909.945,- kr-iusut, taakkunanilu illit 631.505,- kr-init isertitaralugit.
Isumaginninnermi Naammagittaalliuuteqartarfik ulloq 30 august 2018 oqarasuaatikkut oqaluukkakku oqarputit utoqqalinersiutinut qinnuteqaravit ukiumut akileraarutit ilanngaatigineqannginnerini 230.000 kr-it isertitarissallugit ilimagisimallugit. Aammattaaq ilisimatitsissutigaat aappat aalajangersimasumik suliffeqartoq aammalu sapaatip akunneri marlukkaarlugit isertitarissamaagai 5.000-7.000,- kr-iusut ilimagigai.
Inatsisitigut tunngaviit:
Utoqqalinermi pensionisiat pillugit Inatsisartut inatsisaat nr. 20, 23. novembari 2015-imeersumi kingusinnerusukkullu allanngorneqartumi § 8 naapertorlugu Utoqqalinersiat toqqammaviusumik aningaasartaqarput aamma utoqqalinersianut tapeqarluni.
Inatsimmi tassani § 9 naapertorlugu Toqqammaviusumik aningaasartat ukiumut kr. 59.900-t angullugit annertussuseqarput, (iluarsiivigineqarput 60.350 koruuninngorlugit)
Imm. 2. Toqqammaviusumik aningaasartat ilanngaateqassapput, utoqqalinersiaqartup ukiumut isertitai maanna atuuttut, utoqqalinersiat aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat malillugu utoqqalinersiat ilanngunnagit, kr. 221.111 qaangerneqarsimappata. (1 januar 2017-imi 222.353 kr-inut iluarsineqarsimallutik.).
Imm. 3. Isertitanit toqqammavigineqartunit utoqqalinersiat toqqammaviusumik aningaasartaat 50 pct.-imik annikillisinneqassapput, tak. imm. 2, tassa 221.111-kr.-nik ilanngaaserlugit. (1 januar 2017-imi 222.353 kr-inut iluarsineqarsimallutik.).
Inatsimmi § 10. naapertorlugu utoqqalinermi pensionisianut tapeq kisimiittumut ukiumut kr. 74.300 angullugu annertussuseqarpoq, utoqqalinermi pensionisiaqartumut aappaqartumut kr. 41.300 angullugu annertussuseqarpoq, tak. § 5.
Imm. 2. Toqqammaviusumik tapeq ilanngunnagu, aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu siusinaartumik pensionisiallit utoqqalinersiallillu ilanngunnagit, utoqqalinersianut tapeq ilanngaateqassaaq utoqqalinersiaqartup aappaqarpallu ukiumut isertitai maanna atuuttut katillugit ukunannga qaangiisimappata:
1) Utoqqalinersiaqartumut kisimiittumut kr. 56.000
2) Utoqqalinersiaqartumut aappaqartumut kr. 83.000, tak. § 5. Imm. 3. Utoqqalinersianut tapeq ilanngaateqassaaq isertitat tunngavigineqartut 45 pct.-iannik, tak. imm. 2, kisimiittumut ilanngaatigalugit kr. 56.000 aamma isertitat tunngavigineqartut 30 pct.- iannik utoqqalinersialimmut aappaqartumut ilanngaatigalugit kr. 83.000, tak. § 5.
Inatsimmi tassani § 5 naapertorlugu aapparisaq naatsorsuunneqartoq tassaavoq utoqqalinermi pensionisiallip katissimallugu aapparisaa, nalunaarsukkamik aapparisaa, imaluunniit katissimanermut assingusumik sivikinnerpaamik ukiumi ataatsimi aapparisimasaa.
Imm. 2. Utoqqalinermi pensionisiaqartut utoqqalinermilu pensionisiaqanngitsumik aappaqartut utoqqalinermi pensionisianut tapeqassapput utoqqalinermi pensionisialimmut kisimiittumut tunniunneqartumut annertussuseqartumik, utoqqalinermi pensionisiaqartoq aapparisaatalu isertitaat maanna atuuttut ukiumut katillugit 200.000 kr.-it ataallugit isertitaqarpata. Utoqqalinermi pensionisianut tapeq utoqqalinermi pensionisiallip aappaatalu isertitaanit toqqammavigineqartunit 53 pct-imik appartinneqassaaq 83.000-nik ilanngaaserlugit.
Utoqqalinermi pensionisialinnut akigititat isertitallu killiliiffiinut tunngasoq ulloq. 1. januaari 2017-imeersumi kaajallaasitaq nr. 285-imi § 1-imit erserpoq, utoqqalinermi pensionisialinnut annerpaamik pisartunut ukiumut tunngaviusumik tunniunneqartartut 60.350 koruuniusut, imaluunniit qaammammut 5.029 koruuniusut.
Utoqqalinermi pensionisialinnut akigititat isertitallu killiliiffiinut tunngasoq ulloq. 1. januaari 2017-imeersumi kaajallaasitaq § 3, imm. 3, nr. 3-mit erserpoq, utoqqalinermi pensionisiaqartut utoqqalinermi pensionisiaqanngitsumik aappaqartut isertitaat 200.000-it sinnerneqarpata utoqqalinermi pensionisianut tapisiarisartagai unitsinneqassapput, utoqqalinermi pensionisiaqartoq aapparisaatalu isertitaat maanna atuuttut ukiumut katillugit kr. 200.000-it ataallugit isertitaqarpata aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu utoqqalinermi pensionisiat ilanngunnagit.
Kaajallaasitap § 3-ani imm. 4-imi erserpoq utoqqalinermi soraarnerussutisiassanik pisartagaqalernissamut ikaarsaariarnerup kingornatigut ukiumut isertikkumaagassatut naatsorsuutigineqartut tunngavigalugit, utoqqalinermi soraarnerussutisiassatut pisartagassat annertussusissaat naatsorsorneqartassapput. Piffissami pensionisianik pisarsisinneqarnerup siulliup kingorna ukiullu tulliuttup naanerata tungaanut, isertitassat naatsorsuutigineqartut tunngavigalugit, utoqqalinermi pensionisiat annertussusissaat ukiumut ataatsimut isertitassatut naatsorsorneqartassapput.
Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juuni 1994-imeersumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.
Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.
Naliliineq:
Isumaginninnermi Naammagittaalliuuteqartarfiup siulittaasua kommunip 8 november 2017-ii aalajangigaa 2017-imut utoqqalinersiutissatit 0 kr-iusut kukkusoraa.
Tunngavilersuutigineqarpoq:
– Toqqammaviusumik aningaasartanut tunngatillugu
Pensionisiavit 230.000,- kr-iusut saniatigut isertitaqarniarnerit ilimagivat, taamaammat ukiumut 60.350,- kr-inik tunngaviliussat 50 %-mik isertitarissamaakkatit appartinneqassapput 222.353,- kr-millu ilanngaateqarlutik (230.000,- kr. – 222.353,- kr. = 7.647,- kr. aamma 50 %- ertaa 7.647,- kr.-inik = 3.823,50 kr. aamma 60.350,00 kr. – 3.823,50 kr. = 56.526,50 kr., iluittunngortinneqarlutik 56.527,- kr-imut.)
Taamaammat Isumaginninnermi Naammagittaalliuuteqartarfiup siulittaasuata ukiumut akileraarutit ilanngaatiginneqannginnerini 56.527,- kr-nik imaluunniit qaammammut 4.711,- kr-nik utoqqalinersiaqarsinnaatitaasutit isumaqarpoq.
Taamaasillutit december 2017-imut utoqqalinersiutinik 4.711,- kr-nik pisinnaatitaavutit.
– Pensionisianut tapinut tunngatillugu
Pensionisianut tapinik pisinnaatitaanngilatit aappavillu saniatigut isertitasi katillugit 200.000 koruunit sinnermagit.
2017-imut 1 december 2017-miit qaammammut akileraarutit ilanngaatiginneqannginnerini isertitarisartagassatit 4.711,- kr- iussagaluartut, Isumaginninnermi Naammagittaalliuuteqartarfiup siulittaasua isumaqarpoq.
Isumaginninnermi Naammagittaalliuteqartarfiup siulittaasuata kommunimut oqaatigissavaat kommuni pensionisiassanut ikaarsaarniarnermi illit inooqativillu isertitariumaagassasi tunngavigalugit naatsorsorsimasussaagaluarai illit 1 december 2017-imi pensiuunisiaqaleravit.
Kommunittaaq inatsisinut tamanut attuumassutilinnut aamma kaajallaasitamiittunut innersuussisimasussaagaluarmat, taamaalilluni aalajangiussami ersarissumik atuarneqarsinnaalerlugu pensionisiat annertussusissaat qanoq naatsorsorneqarsimanersut.
Isumaginninnermi Naammagittaalliortarfiup siulittaasuata ilinnut ilisimatitsissutigissavaa, qaqugukkulluunniit kommunimut aningaasaqarnermut tapinik imaluunniit aningaasanut nammineq atorsinnaasanut tapinik qinnuteqarsinnaasutit. Isumaginninnermi Naammagittaalliuuteqartarfiup siulittaasuata aningaasanut tamakkununnga pisinnaatitaanerit isummerfigisimanngilaa.
Suliap taama sivisutigisumik suliarineqarnera Isumaginninnermi Naammagittaalliuuteqartarfiup siulittaasuata ajuusaarutigaa, tamanna allaffissornikkut tunngasunut pissuteqarpoq
Aalajangiineq:
Qaammammut akileraarutit ilanngaatigineqannginnerini 4.711,- koruunit utoqqalinersiutissatut pisinnaagitit, kommunip aalajangiinera Naammagittaalliuuteqartarfiup siulittaasuata allanngortippaa.
Eqqartuussivimmut suliassanngortitsineq:
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. novembari 2001-imeersoq kingusinnerusukkut allanngortinneqartoq § 8, imm. 4-imi allassimavoq Isumaginninnermi Naammagittaalliuuteqartarfiup aalajangigai allat suliamut attuumassuteqartumit Kalaallit Nunaanni Eqqartuussivimmut suliassanngortinneqarsinnaapput. Aalajangikkap Kalaallit Nunaanni Eqqartuussivimmut tunniunneqarnera pissaaq aalajangiinerup kingorna sapaatit akunnerisa sisamat iluanni.
Inussiarnersumik inuulluaqqusillunga
Freja Lisby Nielsen
Siulittaasoq
Ilanngussaq: Inatsisitigut tunngavik .
Assilinera Kommunei
Bilag
Inatsisit toqqammaviit:
Utoqqalinersiaqarneq pillugu Inatsisartut inatsisaat nr. 20, 23. november 2015-meersoq
§ 5. Inatsisartut inatsisaanni matumani aapparisaq naatsorsuunneqartoq tassaavoq utoqqalinersiallip katissimallugu aapparisaa, nalunaarsukkamik aapparisaa, imaluunniit katissimanermut assingusumik sivikinnerpaamik ukiumi ataatsimi aapparisimasaa.
Imm. 2. Utoqqalinersiallit utoqqalinersianut pisinnaatitaanngitsumik aappaqartut utoqqalinersianut tapeqassapput utoqqalinersialimmut kisimiittumut tunniunneqartumut annertussuseqartumik, utoqqalinersiat ilanngunnagit aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu utoqqalinersiat ilanngunnagit, utoqqalinersialik aapparisaatalu isertitaat maanna atuuttut ukiumut katillugit kr. 200.000-t ataassimappatigit. Utoqqalinersianut tapeq utoqqalinersiallip aappaatalu isertitaanit toqqammavigineqartunit 53 pct-imik appartinneqassaaq kr. 83.000-inik ilanngaaserlugit.
Imm. 3. Aappaasoq isumaginninnerup iluani ulloq unnuarlu angerlarsimaffimmut aalangajersimasumik najugalittut nuuppat, utoqqalinersiaqartoq kisimiittutut isigineqassaaq.
§ 8. Utoqqalinersiat toqqammaviusumik aningaasartaqarput aamma utoqqalinersianut tapeqarluni.
§ 9. Toqqammaviusumik aningaasartat ukiumut kr. 59.900-t angullugit annertussuseqarput.
Imm. 2. Toqqammaviusumik aningaasartat ilanngaateqassapput, utoqqalinersiaqartup ukiumut isertitai maanna atuuttut, utoqqalinersiat aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat malillugu utoqqalinersiat ilanngunnagit, kr. 221.111 qaangerneqarsimappata.
Imm. 3. Isertitanit toqqammavigineqartunit utoqqalinersiat toqqamma- viusumik aningaasartaat 50 pct.-imik annikillisinneqassapput, tak. imm. 2, kr. 221.111-inik ilanngaaserlugit.
§ 10. Utoqqalinersianut tapeq kisimiittumut ukiumut kr. 74.300 angullugu annertussuseqarpoq, utoqqalinersiaqartumut aappaqartumut kr. 41.300 angullugu annertussuseqarpoq, tak. § 5.
Imm. 2. Toqqammaviusumik tapeq ilanngunnagu, aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu siusinaartumik pensionisiallit utoqqalinersiallillu ilanngunnagit, utoqqalinersianut tapeq ilanngaateqassaaq utoqqalinersiaqartup aappaqarpallu ukiumut isertitai maanna atuuttut katillugit ukunannga qaangiisimappata:
1) Utoqqalinersiaqartumut kisimiittumut kr. 56.000.
2) Utoqqalinersiaqartumut aappaqartumut kr. 83.000, tak. § 5.
Imm. 3. Utoqqalinersianut tapeq ilanngaateqassaaq isertitat tunngavigi- neqartut 45 pct.-iannik, tak. imm. 2, kisimiittumut ilanngaatigalugit kr. 56.00 aamma isertitat tunngavigineqartut 30 pct.-iannik utoqqalinersialimmut aappaqartumut ilanngaatigalugit kr. 83.000, tak. § 5.
§ 11. Aningaasartat §§ 9-10-mi taaneqartut Kalaallit Nunaata Naatsorsueqqissaartarfiata akinik nalimmassaanermi nalunaarsuutai toqqammavigalugit nalimmassaavigineqartassapput. Toqqammaviusumik aningaasartat aamma utoqqalinersianut tapeq nalimmassaavigineqassapput akinik nalimmassaanermi nalunaarsuutit juulip aallaqqaataaneersut qaammatini 12-it iluanni kingullerni allannguutitut naatsorsuinerit toqqammavigalugit. Nalimmassaaneq ukiumut ataasiarluni pisassaaq jan- uaarip aallaqqaataa tulliuttoq siulleq aallarnerfigalugu atuutilersinne- qartassalluni.
Imm. 2. Ukiut tamaasa januaarip aallaqqaataani aningaasartat nalimmassaavigineqartut Naalakkersuisunit pisortatigoortumik tamanut nalunaarutigineqartassapput.
Kapitali 4
Utoqqalinersianik ukiumoortumik nalimmassaasarneq
§ 12. Utoqqalinersiat ukiut tamaasa januaarip aallaqqaataani nalimmassarneqartassapput, tak. §§ 9-11.
Imm. 2. Utoqqalinersiaqalersitsisoqartillugu aamma isertitani maanna atuuttuni annertuumik allanngortoqartillugu isertitat maanna atuuttut ilimagineqartut tunulequtaralugit utoqqalinersiat naatsorsorneqassapput. Allannguuteqartoqarnerup kingorna nalimmassaaneq qaammatip aallaqqaataani atuutilertassaaq.
Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq
§ 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.
Imm. 2.Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.
Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15