Iggavimmi errorfiup allallu taarserneqarnissaanut akiliisussaatitaanngitsutit

AALAJANGIINEQ

Ineqarnermut Maalaartarfik isumaqarpoq, inissiami XZ,, illoqarfimmi YY-miittumi iggavimmi nerriviusut, iggavimmi errorfiup allallu taarserneqarnissaanut akiliisussaatitaanngitsutit.

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu aaliangiisoqarpoq.

Inigisaq qimanneranut atatillugu akiligassat pillugit Inissiaatileqatigiiffiup XXY-ip aalajangiinera pillugu naammagittaalliutit Ineqarnermut Maalaartarfiup ulloq 20. juni 2019 suliarivaa imalu aalajangiivoq. 

Suliami allagaatit:

  1. Attartuinermut isumaqatigiissut 15. juni 2007-meersoq
  2. Najukkap qimanneqarneranut atatillugu misissuinermit nalunaarusiaq 30 januar 2017-imeersoq
  3. Suliffeqarf Z-mit akiligassamut uppernarsaat 10. februar 2017-meersoq
  4. Suliffeqarfik Z-imiit nalinginnaasumik iluarsaassineq pillugu akiligassamut uppernarsaat 13. februar 2017-meersoq.
  5. Nutsernermut naatsorsuineq 3. marts 2017-meersoq
  6. Naammagittaalliortumut akiligassaq pillugu allagaq 23. marts 2017-meersoq iserternermullu atatillugu misissuinermi nalunaarut aammalu iserternermi amigaatinik allattorsimaffik allakkamut ilanngunneqarsimasut.
  7. Ineqarnermut Maalaartarfimmut naammagittaalliuut 7. april 2017-meersoq
  8. Inissiaatileqatigiiffimmiit nerrivinnik paaqqinnilluarsimannginneq pillugu akissut 4. april 2019-meersoq 

Nassuiaat:

Attartuinermut isumaqatigiissummi erserpoq, Attartuisoq aammalu maanna toqukkut qimagussimasoq YYY-ilu inissiaq XYX, Illoqarfimmi pineqartoq-miittoq 15 juni 2007-imi tiguarsimasaat. Inissiaq 61,2 m²-iuvoq 3-nillu ineeraqarluni.

Ulloq 20. januar 2017-imi inissiamiit nuupput. Najukkap qimanneqarneranut atatillugu misissuinermit nalunaarusiaq inissiaatileqatigiiffiup sinniisuanit 30. januar 2017-imi atsiorneqarpoq.

Najukkap qimanneqarneranut atatillugu misissuinermit nalunaarusiaq malillugu iikkat qilaallu  qalipanneqartussaapput natillu qillersarneqartussaallutik.

Aammattaaq erserpoq iggavimmi nerriviit pingasuusut taarserneqartussaasimasut taakkulu akilerneqarnissaat ilinnut tussasut.  Iggavimmi nerriviit sooq taarserneqartussaanerisa tunngavilersuutaat Najukkap qimanneqarneranut atatillugu misissuinermit nalunaarusiami ersinngilaq.

Suliffeqafiup XY-imiit paasissutissani erserpoq, nerrivinni taarsiinermi akunnernut akissarsiaqartitsinermut akiitsuutit 4771 kr-imut anngussimasoq aammalu blandingsbatteriinut (qipisartut imermut nillertumut kissartumullu akooriviit) suliaqarnermut akunnernut akissarsiaqartitsinermut akiitsuutit 734 kr-inut anngussimasut, suliaqarnermullu atortorineqartunut akiitsut 2980 kr-inut naatsorsorneqarsimapput taakkununngalu ilaapput nerrivissanut aammalu errorfimmut saviminiusumut pisiortornerit. Aningaasartuutit 8485 kroninik annertussuseqarput.

Nalinginnaasumik iluarsaassinermut akiitsut ataatsimut 20800 kr-iuvoq.

Paasissutissiissutigineqarpoq nalinginnaasumik iluarsaassinermut akiliissanngitsutit tassunga pissutaavoq akiitsut 100 %-imik annikillisinneqartaramik inissiami minnerpaamik qaammatini 100-ni najugaqarsimanerit pissutigalugu.

Depositum-imik 9824 kr-iusumik akiliisimapput, Ilanngullugu nerrivinnut aningaasartuutit, errorfimmut taarsiineq, blandingsbatterii allanillu aningaasartuutit 8485 kr-iusunut depositumimut akiliutigisimasaammut  1340 kr-inik utertoortussanngorlutik.

Naatsorsuinermi ilisimatitsissutigineqarpoq nerrivinnik taarsiineq paaqqinnilluarsimannginnermut pissuteqartoq.

Naammagittaalliummi allassimavat: ”Jeg beklager at skulle fortælle om da vi flyttede til YYZ i året 15/06-07 havde de udskiftet slidte borde i køkkenet og det er blevet en regning for lejeren med 8.485,- kr. selvom der har været andre lejere før dem. Det er meget beklageligt, at man ikke har undersøgt det grundigere noget før.”

Attartuinermut isumaqatigiissummi imaluunniit iserternermi amigaatinik allattorsimaffimmi 2007-meersumi arlaatigut nerrivinnik ajoquteqartoqarnissaanut allaqqasumik peqanngilaq.

Ineqarnermut Maalaartarfimmiit piumasaqaateqarnerani Inissiaatileqatigiiffik ulloq 4 april 2019-imi ilisimatitsivoq, misissuinermi nalunaarummi imaluunniit iserternermi amigaatinik allattorsimaffimmi arlaannik nerriviit pillugit oqaaseqaatinik allaqqasoqanngitsut.  Taamaattorli najukkap qimanneqarneranut atatillugu misissuinermit nalunaarusiami allaqqavoq ”køkkenbord udskiftes, 3 stk. lejer.” Attartortumiit paaqqinnilluartoqarsimanngippat najukkap qimanneqarneranut atatillugu misissuinermit nalunaarusiami allaqqasoqarsimasussaagaluarpoq aammalu allaqqasoqarmat ” lejer”, naatsorsuutigineqarpoq attartuisoq peqqutaalluni paaqqinnilluarsimannginneq pisimassasoq. Ajoraluartumik qanorpiaq paaqqinnilluarsimannginneq pisimanersoq paasiniaasoqarsinnaanngilaq, taamani nutsernermi takusaasuusimasoq Inissiaatileqatigiiffiit-mi sulisuujunnaarsimanera pissutigalugu.

Iserteqqaarnermi iggavimmi nerriviusunut nutarterisoqarsimanissaanik oqaaseqaatinik peqanngimmat aammalu oqaatigineqareersutut iserternermullu atatillugu misissuinermi nalunaarummi imaluunniit iserternermi amigaatinik allattorsimaffimmittaaq nerriviit pillugit oqaaseqaatinik allaqqasoqanngilaq.

Inissiaatileqatigiiffik ulloq 11 juni 2019 Ineqarnermut Maalaartarfimmut ilisimatitsivoq, inissiaatileqatigiiffiup suliami allagaatitik nutaamik misissoqqissimagaat ajoraluartumillu nalunaartariaqarlutik soorpiaq nerriviit taarserneqarsimaneri pillugu allakkanik tunngavilersuutissaanik nassaarsimasinnaanatik. Inissiaatileqatigiiffik taamaasilluni piumasaqaatitik massakkumiit atuutsikkunnaarniarlugit aalajangersimapput tamannalu pillugu naammagittaalliortunut nalunaarniarlutik saaffiginninniarlutik aalajangersimapput.

Inatsisitigut tunngavigisat:

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi § 45-mi allaqqavoq, Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigigaa.
 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikut pisoqalisullu ima akulikitsigisumik ilinniartut ineqarfiisa allaffeqarfiannit isumagineqartassapput ilinniartut tassanilu najugaqartut eqqarsaatigalugit pisariaqartitsinerit malillugit.
 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.

Aalajangersakkat inatsisitigut tunngavigisani ataani tamakkerlugit ilanngunneqarsimapput.

Naliliineq:

Ineqarnermut Maalaartarfik isumaqarpoq, inissiami qimariikkami adresse XXY-miittumi iggavimmi nerriviusut, blandingsbatterii allallu taarserneqarnissaanut akiliisussaatitaanngitsut.

Tamatumunga tunngavilersuutaavoq attartuinermut isumaqatigiissummi paaqqinnilluarsimannginneq pillugu allagaatinik peqannginnera.

Ineqarnermut Maalaartarfiup taamaasilluni pingaartippaa, iserternermi nerriviit qanoq utoqqaatigineri imaluunniit qanoq aserfatsaaliorneqarsimaneranut takussutissanik allagaateqartoqannginnera.

Ineqarnermut Maalaartarfik taamaasilluni naliliivoq, atuinermi malunnaatit pineqartut taamaammallu Inissiaatileqatigiiffik pisussaatitaalluni taasiisuunissaminut.

Ineqarnermut Maalaartarfik maluginiarpaa, iserternermi amigaatinik allattorsimaffimmi imaluunniit misissuinermi nalunaarusiami iserternermi nerrivinni arlaatigut amigaateqartoqarnissaa allaqqasoqannginnera aammalu ilannguppaa tamanna pingaaruteqanngitsoq Inissiaatileqatigiiffiup ilisimatitsissutigisinnaanngimmagu qaqagukkut paaqqinnilluarsimannginneq pisimanera aammalu nerriviit qanoq utoqqaassuteqarneri.

Ineqarnermut Maalaartarfiup maluginiarpaa Inissiaatileqatigiiffiup nalunaarutaa 11 juni 2019-meersoq. Ineqarnermut Maalaartarfiullu tamanna aalajangiineq ilisimagaluarlugu suliaq naammassinissaanik aammalu aalajangiiffiginissaa aalajangersimavaa, pissutigalugu taamani aalajangiineq pillugu ilanngutassiaq ataatsimiititaliami ilaasortanut nassiunneqarsimanera aammalu suliamik sullissineq sivitsorpallaannginnissaa piniarlugu aammattaaq naggattut suliami naammassinermi inernermik ersarissumik inerneqarniassammat.

Maluginiaqquneqarpoq, iggavimmi errorfiup aammalu blandingsbatteriip taarserneqarnera iggavimmi nerrivinnik taarsiinerup kinguneriuneri, tamakkulu tamarmik attartuisumiit akilerneqarnissaat.

Taarsiinermut akiliisimaguit Inissiaatileqatigiiffiup aningaasartuutit tamarmik utertissavai.

Aalajangiineq:

Ineqarnermut Maalaartarfiup Inissiaatileqatigiiffiup aalajangiinera allanngortippaa, ima nutsernermi ineqarfiup iggaviani nerrivinnik, errorfianik aammalu blandingsbatteriimik allanillu  taarsiineq akiligassarinngikkaat.

Akiliutigisimasaat utertinneqarnissaannut pisinnaatitaaffeqarput.  Taamaammat piumaffigineqarput ilisimatitsiffigeqqullugu kontonummer sorlermut oorit akiitsuusut ikineqarnissaat.

Suliap taama sivisutigisumik suliarineqarnera Ineqarneq pillugu maalaaruteqartarfiup ajuusaarutigaa tamanna ilaatigut  allaffissornermut tunngasunik ilaatigullu piffissami sivisuumi ataatsimiititaliamik toqqaasoqarnikuunnginnera tamatumunnga pissutaapput. 

Naammagittaalliuuteqarnissamut ilitsersuut:

Ineqarnermut Maalaartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.

Ineqarnermut Maalaartarfiup aalajangiinera eqqartuussivinnut ingerlateqqinneqarniarpat, sassaqqusissut

inimik atukkiisumut, tassa Namminersorlutik Oqartussat imaluunniit kommuni, Kalaallit Nunaanni Eqqartuussiveqarfimmut tunniunneqassapput.

Inussiarnersumik/Venlig hilsen

Naja Joelsen

Ineqarnermut Maalaartarfimmi siulittaasoq

Scroll to Top