Maalaarutit suliarineqartarnerat

Maalaarutigineqartoq ilisimatinneqartarpoq.
Siullertut iliuuserineqartoq tassaaasarpoq maalaarut maalaarutigineqartumut nassiunneqartarmat.

Isummanik paarlaasseqatigiitsitsineq 

Maalaartarfik aaliangiisinnaanissaaminut paasissutissanik eqqortunik tunngavissaqarluartariaqarmat malaartoq aammalu maalaarutigineqartoq pillugu illuatungeriit isumaannik paasitinneqartarput, taamatuttaaq akissuteqarnissamik periarfissinneqartarlutik.
Maalaartarfiup allattoqarfiata maalaarutigineqartup akiisutaa tigoreeraangagu, maalaaruteqartoq akissutigineqartup imarisaa pillugu paasitinneqartarpoq akissuteqarnissaminullu periarfissinneqarluni. Maalaaruteqartoq akissutigineqartoq pillugu ilassutissaqarsimappat, maalaarutigineqartup ilassutigineqartoq takunissaanut periarfissinneqareeraangami pisoq pillugu isummeqqinnissaminut periarfissinneqartarpoq, kingornalu maalaaruteqartoq isummeqqissinnaatitaasarluni. Akissutigineqartut aammalu ilassutigineqartut tamarmik allakkatigut ingerlanneqartarput.

Allattoqarfiup suliaq ataatsimiititaliamut saqqummiuttarpaa aaliangiiffigeqqullugu.
Maalaartup maalaarutigineqartorlu tusarniaaffigineqareeraangata, allattoqarfiup suliaq nalunaarusiornikkut piareersartarpaa ataatsimiitsitaliamut aaliaangiiffigisassanngorlugu. Nalunaarusiap aallaavigisarpaa maalaartup maalaarutigineqartullu isumaat piumasaallu. Aallattoqarfik nalunaarusiamini maalaarutip qanoq inerneqarnissaanut siunnersuuteqartarpoq. Allattoqarfiup siunnersuutaa Atuisartunut Pisisartunullu Maalaaruteqartarfittut Ataatsimiitsitaliap allatut isumaqaruni malittariaqanngilaa.

Maalaarutip suliarinissaa
Allattoqarfiup maalarut ataatsimiitsitalimit qaqugukkut suliarineqassanersoq misissussavaa. Ukioq 2004-imiit 2009-imut maalaarutigineqartartut qaffassimapput, ukiorlu 2009-mi ulloq 1. august 2009 tikillugu maalaarutit 16-iusimapput. Maalaarutit amerlanerpaat maalaartup maalaarutigineqartullu akornanni isumaqatigiissuteqarnikkut naammassineqartarput sulialli ilaat maalaartumit unitsiinnarneqartarlutik. Maalaarutigineqartut ataatsimiitsitalimut suliassatut ingerlaqqittut amerlassusaat naapertorlugu ataatsimiitsitaliap suliarisarpai. Nalinnginnaavoq suliap tiguneraniit ukiup ataatsip ingerlanerani aaliangiivigineqartarnera.

Maalaaruteqartarfittut Ataatsimiitsitaliaq
Ataatsimiitsitaliaq qulingiluanik ilaasortaqarpoq, taakkunannga Atuisartunut Siunnersuisoqatigiinniit sisamat toqqarneqartarput, allat sisamat inuussutissariuteqartunit toqqagaasarput kingullerlu ataaseq Namminersorlutik Oqartussanit toqqarneqartoq ataatsimiitsitaliap siulittaasorisarpaa. Siulittaasoq inatsisilerituutut ilinniarsimasuussussaavoq.
Atuisartunut Pisisartunullu Maalaaruteqartarfittut Ataatsimiitsitaliaq aalajangiisinnaasuseqassappat minnerpaamik ilaasortat pingasut imaluunniit annerpaamik tallimat ataatsimiinnermi peqataasussaapput. Siutittaasoq tamatigut pinngitsoorani ataatsimiinnerni peqataasartussaatitaavoq, taamatuttaaq atuisartunik tunuliaqutaqarlutik aammalu inuusutissarsiuteqartunik tunuliaquteqarlutik ilaasortat ataatsimiinnermi tamatigut amerlaqatigiittussaapput.

Ataatsimiitsitaliami ataatsimiinnerit
Allattoqarfiup ataatsimiitsitaliap ataatsimiinnissaa sioqqutingaatsiarlugu ataatsimiitsitaliami ilaasortanut maalaarutit aaliangiiffigisassat nassiuttarpai. Taamaalilluni ataatsimiitsitaliami ilaasortat ataatsimiinnissaq sioqqullugu suliassat suuneri paasereertarlugit. Ataatsimiinnermi maalaarutit ataatsiakkaarlugit aliangiiffigineqartarput, isumaqatigiinngittoqartillugulu taasinikkut suliat naammassineqartarlutik. Aaliangiinerit inatsisit suliallu tunngavigalugit ingerlasarput.

Aaliangiinerit
Maalaarutit ilaatigut maalaartup maalaarutaa naapertorlugu taperserneqartarpoq allatigulli maalaarutigineqartoq taperserneqartarluni. Aaliangiineq ataatsimiitsitaliamit tunnngavilersorneqartarpoq. Aaliangiisoqareertillugu sapaatip akunneri marluk ataatsimiinnerup kingornga allakkatigut aaliangiineq maalaartumut maalaarutigineqartumullu nalunaarutigineqartarpoq.

Aaliangiineq akerlilerneqarsinnaava ?
Aaliangiineq isumaqatigineqanngippat eqqartuussivimmut maalaarut suliassanngorlugu tunniunneqarsinnaavoq.
Maalaarut atuisup piumasaanik malinnittumik aaliaanngiiffigineqarsimasoq kisiaannili maalaarutigineqartumit – pisiniarfimmit – malinneqarumanngippat, ataatsimiitsitaliap allattoqarfianit aaliangiineq eqqartuussivimmut suliassanngorlugu tunniunneqarsinnaavoq.

Scroll to Top