Aalisarnermi taarsigassarsinermi akiligassiinermilu unammilleqatigiinnermut tunngatillugu ajornartorsiutit

Aalisarnermi taarsigassarsinermi akiligassiinermilu unammilleqatigiinnermut tunngatillugu ajornartorsiutit

Atuisartoqarnermut Unammilleqatigiinnermullu Aqutsisoqarfik, ukiuni kingullerni taarsigassarsinermut akiligassiinermullu tunngasunik, tunitsiviit aalisartunut ikiorsiissutigisartagaannik tigusaqartarpoq. Taarsigassarsinermut akiligassiinermullu tunngasunik nalinginnaasumik umiatsianut aalisarnermullu atortunut aserfallatsaaliinissamut aningaasaliissutaassarput.  Aningaasaliinernullu annerusunut, soorlu umiatsianut motoorinullu nutaanut, aningaasaliinissamut tunitsiviit aqqutigalugit taarsigassiisoqartarpoq.

Tunitsiviit aalisartut niueqatigisatik ilisimalluartarpaat. Taamaattumik sumiiffinni aalisartunut taarsigassiititserusuttarput, qulakkeersinnaagamikku taarsigassartik tamaat utertissinnaagaat. Aalisartut taakkua ilai bankinit taarsigassinneqarsinnaanngillat, pissutigalugu bankit aalisartut ilisarisimalluanngimmasigit. Aalisartut siunissami isertitaqarsinnaanerinut tunngatillugu, bankit tunitsivittulli paasissutissanik pigisaqanngillat, naammattunillu paasissutissanik pissarsinissaminnik ajornartorsiuteqarlutik. Tamanna ajornartorsiut nalinginnaasuuvoq, tunitsiviit inuussutissarsiummut ilisimaarinninnermikkut aaqqiissuteqarfigissagaat.

Aalisartut tunitsivinnit taarsigassarsinissaminnut, iluanaarutaasinnaasumik aarlerinartumillu aningaasaliiffigineqartarput, soorlu nutaamik umiatsiartaarneq motooritaarnerluunniit nioqqutissiornerannut iluaqutaasussanik. Peqatigitillugu aningaasaliineq, aalisarluartunut niuernermi peqataalernissamut, imaluunniit aalisarluanngitsunik pisassanik pisinissamut periarfissiisarpoq. Tamatuma qulakkiissavaa, aalisarluarnerpaat niuernermi pissarsiassaat annertunerussammata, inuussutissarsiummilu nioqqutissiornerup annertunerulernera inuiaqatigiinnut aningaasaqarnikkut iluaqutaassalluni.

Atuisartoqarnermut Unammilleqatigiinnermullu Aqutsisoqarfik assersuutissaqarpoq, tunitsiviit taarsigassap akilersorneqarnerata nalaani tunisisoqartarnissaanut piumasaqartunik. Tamatuma suliareqqitassanik pilersuinerup qulakkiissavaa tunitsivinnut taarsigassarsiap utertinneqarnissaa.

Immikkut ittumik isumaqatigiissutit tunisinissamut niuernermi unammillerteqarnissamut killiliipput. Aalisartoq tunitsivimmut immikkut ittumik isumaqatigiissuteqarpat niuernermut ajortumik kinguneqarsinnaavoq. Aalisartup tunitsiviullu isumaqatigiissutaasa, aalisartut allat ajortumik sunniuteqarfigisinnaavaat, niuernermi unammillerneq annikinnerulersillugu. Taakkua aalisartut allat, tunisinermi akinut aammalu pissutsinut isumaqatigiinniarnissamut ajornartorsiuteqarnerussapput, pissutigalugu nioqqutissiassanut unammillertoqanngimmat, aammalu tunitsiviit akornanni nioqqutitigut unammillertoqanngimmat.

Aalisartut aningaasaliiffigineqarnissamut aserfallatsaaliuinissamullu pisariaqartitsippata, pingaaruteqarpoq niuerfimmik misissuinissaat. Amerlanertigut allat aningaasaliisinnaapput tunitsiviinnaanngitsut, tamatuma aalisartoq periarfississavaa aalisakkamut akinik tunitsivimmut isumaqatiginninniarsinnaanera.

Aalisartut tunitsiviillu nalinginnaasumik eqqumaffigissavaat unammilleqatigiinnermut inatsimmi inerteqqutaasut marluk: unammilleqatigiinnermik killilersuisumik isumaqatigiissuteqarnissamut inerteqquteqarneq, aammalu annertuumik tigumminnittuusumit inissisimaffiup atornerlunneqarnissaanut inerteqquteqarneq.

Annertuumik tigumminnittuusumik inissisimaffiup atornerlunneqarnissaanut inerteqquteqarneq, annermik 60 %-imik qaleralinnik tunitsiviusumut Royal Greenlandimut atuuppoq, mikinerusunillu angallatillit aalisarluni unammillernermut naapertuutinngitsumut illersorsinnaallugit. Annertuumik tigumminnittuusumit inissisimaffimmik atornerluineq aningaasatigut pinerluuteqarneruvoq sakkortooq, akiligassiisoqartarlunilu.

Unammilleqatigiinnermik killilersuisumik isumaqatigiissuteqarnissamut inerteqquteqarneq tamanut aalisarnermik ingerlatalinnut pisassanik niuertartunut atuuppoq. Niuernikkut unammilleqatigiinnermik annikillisitsisumik (kartelvirksomhed) niuerfimmi marluk arlallilluunniit isumaqatigiissuteqarpata, unammilleqatigiinneq killilerneqarnissaa inerteqquteqarnerup qulakkiissavaa. Unammilleqatigiinnermik killilersuisumik isumaqatigiissuteqarnissamut inerteqquteqarnermut unioqqutitsineq, aningaasatigut pinerluuteqarneruvoq sakkortooq, akiliisitsisoqarfiusinnaasoq isertitsivimmullu inissiisoqarsinnaalluni.

Unammilleqatigiinnermik killilersuisumik isumaqatigiissuteqarnissamut inerteqquteqarneq

Suliffeqarfiit toqqaannartumik, toqqaannanngitsumilluunniit unammilleqatigiinnermut killiliisussamik siunertalimmik isumaqatigiissusioqqusaanngillat. Niuernermi suliffeqarfiit ataqatigiissaakkamik tunisisarnerattut “isumaqatigiissusiorneq” paasineqassaaq. Unammilleqatigiinnissamut inatsisip, isumaqatigiinnissamut maleruaqqusai malillugit, inatsisitigut pituttorsimasumik isumaqatigiissusiortoqarnissaa piumasaqaataanngilaq.

Taamaattumik aalisartut tunitsiviillu akornanni taarsigassiinermi akilersuititsinermilu, illuatungeriit atugassaqartitsinerup tungaatigut unammilleqatigiinnermut killiliisussamik siunertalimmik isumaqatigiissusiornissaat inerteqqutaavoq. Unammilleqatigiinnermi inatsisip isumaqatigiissutit assigiinngitsut unammilleqatigiinnissamut killiliisut assersuusiorpai. Pisassarititanik niuerneq suliffeqarfiit akornanni unammilleqatigiiffiusumi pisarpoq. Tamanna isumaqarpoq, isumaqatigiissutit iluminni pilersitarigaat.

Unammilleqatigiinnermik killilersuisumik isumaqatigiissuteqarnissamut inerteqquteqarnermut atatillugu, aalisartut tunitsiviillu eqqumaffigissavaat, tunitsivimmuinnaq tulaassuisarnissamut isumaqatigiissutit inerteqqummut ilaasinnaammata.

Isumaqatigiissutit unammilleqatigiinnermut inatsisip inerteqquteqartitsineranit peerneqarsinnaavoq, sunniuteqarluassusia nukittorsarneqarpat, teknikikkulluunniit iluaqutaassappat, imaluunniit aningaasaqarnikkut niuernermut ineriartuutaassappat, atuisunullu pissarsissutaanissaanut qulakkeerinnissalluni. Inerteqquteqarnermut ilaatinneqassanngikkaanni, piumasaqaataavoq isumaqatigiissutit Unammilleqatigiinnermi aalajangiisartunut nalunaarutiginissaat. Taamaattumik ilaatinneqannginnissaq anguniarlugu, isumaqatigiissutit suliffeqarfinnut killiliinissamik piumasaqaateqassanngillat, sunniuteqarluarnermi iluaqutissat anguniarnerini, suliffeqarfiillu unammillertit niuernermit peernissaannut periarfissinniarlugit.

Unammilleqatigiinnermik killilersuisumik isumaqatigiissuteqarnissamut ilitsersuut

Annertuumik tigumminnittuusumit inissisimaffiup atornerlunneqarnissaanut inerteqquteqarneq

Suliffeqarfik, imaluunniit suliffeqarfiit kattuffiat, sunniuteqaqataasinnaanissamut angusaqarsinnaavoq, allaat atornerluinissamut periarfissaqalersinnaalluni, niuernermullu unammilleqatigiinnissamullu killiliisumut atorsinnaallugu.

Qaleralinnik tunisinermi niuernermi Royal Greenland annerpaajuvoq, 60 %-imik niuernermi pissarsisarluni. Ingerlatsiviit annertuumik niuernermi piginneqataasut, eqqumaffigissavaat annertuumik tigumminnittuusumit inissisimanertik. Niuernermi annertuumik inissisimanissaq inerteqqutaanngilaq, inissisimanerli niuernerup aqunneranut atorneqarpat, annertuumik tigumminnittuusumit inissisimaffimmik atornerluineruvoq, tamannalu inerteqqutaavoq.

Taamaattoqartillugu, suliffeqarfik annertuumik tigumminnittuusumik inissisimasoq, pisiortorfimminut immikkut ittumik isumaqatigiinnissamut piumasaqarsinnaavoq, tamannalu nalinginnaasumik annertuumk tigumminnittuusumit inissisimaffimmik atornerluineruvoq. Taamaattumik suliffeqarfik annertuumik tigumminnittuusumik inissisimasoq, pisiortorfimminut sissuertumik tunisinissamut immikkut isumaqatigiissusiussaaq.

Tuluttut isumaqatigiissutit allaapput, suliffeqarfik annertuumik tigumminnittuusumik inissisimasup unammillertini akornuserniarsinnaavaa.  Tuluttut isumaqatigiissutini aalisartoq pisussaavoq, tunitsivimmi allami akinik pitsaanerusunik neqeroorfigineqaruni suliffeqarfik annertuumik tigumminnittuusumik inissisimasumut nalunaarutiginnissalluni.  Aalisartoq pisussaatitaavoq tunitsivimmi unammillertumi taamaallaat tunisisassalluni suliffeqarfik annertuumik tigumminnittuusumik inissisimasup akitigut assigiisitsisinnaanngippat.

Atorfimmik naalagaaniartumik atornerluinermut ilitsersuut

Scroll to Top