Atuisartoqarnermut Unammilleqatigiinnermullu Aqutsisoqarfiup ulloq 10. septembari 2021-mi Per Aarsleff Holding A/S-ip Permagreen Grønland A/S peqatigalugu kisimi nakkutiginninnermik inuussutissarsiuteqarneq pillugu unnerluussummik tamakkiisumik tigusaqarpoq, tak. unammilleqatigiinnermi inatsimmi § 17, imm. 1.
§ 18, imm. 2, pkt. 3 malillugu § 20, imm. 1-imi piffissaliussaq ulloq aqutsisoqarfiup nalunaarutiginninnerup tamakkiisup saniatigut akiliummik akiliisimanermut uppernarsaammik tigusinerata aallarnerfigalugu aallartissaaq. Ulloq 10. septembari 2021 killiliussaq aallartippoq.
Per Aarsleff danskinit sanaartornermut illuliornermullu suliassinneqartutut suliffeqarfiutigineqarpoq, sanaartugassanillu assigiinngitsunik suliassinneqartartutut suliffeqarfiulluni. Per Aarsleffip Kalaallit Nunaanni suliaqarnera piginneqatigiiffik allamik aqutamit Per Aarsleff Grønland ApS-imit ingerlanneqarpoq, pingaarnertullu Kalaallit Nunaanni suliffeqarfinnit kisimi suliassanngortitsilluni neqererooruteqarnermi neqeroorfigineqarsinnaasuni iluarsartuullugu pilersaarusianut atorneqartarluni. Matuma saniatigut Per Aarsleffip Kalaallit Nunaanni suliaqartarnerani suliffeqarfik islandimeersoq Ístak Ísland EHF, aamma Kalaallit Nunaanni immikkoortortaqarfia, Istak Island HF, piginneqatigiiffillu allamik aqutaq, Aarsleff-Ístak I/S inerlatsisarput.
Permagreen kalaallinit sanaartornikkut suliassinneqartartutut suliffeqarfiuvoq, assigiinngitsunillu sanaartornermik illuliornermillu suliaqartartuulluni. Suliffeqarfik illunik sanaartornermut nutarterinermullu iluarsartuullugu pilersaarusiorluakkanik suliaqartarpoq, nunallu atortulersugaaneranik pilersitsinernik sammisaqartarluni.
Permagreen Grønland A/S kattunneqalinngikkallarami marlunnik pigineqarpoq. Aktiat 85 %-i Preben Kold Larsenimit pigineqarput, 15 %-ilu Jesper Johannes Petersenimit pigineqarluni.
Kattussinerup naammassineqarneranut atatillugu Per Aarsleff Holding A/S aktiat 85 %-i pissarsiarissavai, taakkualu Permagreenimi piginnittumit Preben Kold Larsenimit pigineqarlutik. Matuma kinguninngua Per Aarsleff erngertumik aktiat 102-t suliffeqarfimmut tunniunneqartumut ingerlateqqissavai, tassa aktiat 15 %-i, taakkualu Permagreenip maannakkut ingerlatsisutut pisortaanut, Jeppe Bloch Steffensenimut ingerlateqqinneqassallutik.
Kattussinerup imaraa, Per Aarsleff Holding A/S-ip matuma kingorna Permagreenip aktiai 70 %-it pigilissagai, Jeppe Bloch Steffensenillu aamma Jesper Johannes Petersenip aktiat 15 %-i pigilissallugit.
Unammilleqatigiinneq pillugu inatsimmi suliffeqarfiit kattunneranut tunngasumi kattussineq ilaatinneqarpoq, tak. § 16. Suliffeqarfiitkattussinermut ilaasut kaaviaatitaat, unammilleqatigiinnermi inatsimmi § 15, imm. 1, nr. 1 amma 2 naapertorlugit kaaviaartitat killigititaat qaangerpaat. Aammattaaq § 15, imm. 1, nr. 3-mi inigisamut piumasaqaatit naammassineqarsimapput.
Sanaartornermi nutarterinermilu illua-tungeriit tamarmik suliaqartarput, aamma Kalaallit Nunaanni atortulersuinikkut suliaqartarlutik. Illua-tungeriit suliaminnik qalleraattuulaarsimarpasipput, suliffeqarfiit tamarmik Nuummi suliaqaramik. Atuisartoqarnermut Unammilleqatigiinnermullu Aqutsisoqarfik naliliigallarpoq, kattussineq unammilleqatigiinnermut ajoqusiinissamut aallaaveqanngitsoq.
Kattussineq paasissutissat tunngavigalugit maalaaruteqarnissamut tunngaviliinngimmat, Atuisartoqarnermut Unammilleqatigiinnermullu Aqutsisoqarfiup sullissereerluni kattussineq akueraa, tak. unammilleqatigiinneq pillugu inatsimmi § 19, imm. 7.
Akuersissut tunniunneqarpoq, suliffeqarfinnit ilaasunit paasissutissat tunniunneqartut eqqortuusut tunngavigalugit, tak. unammilleqatigiinneq pillugu inatsimmi § 22, nr. 1.