Timmisartorlutit aallarnissavit piffissaa allanngortinneqarpat susoqassava?
Timmisartorlutit aallarnissavit piffissaa allanngortinneqarpat allannguut pillugu toqqaannaq nalunaarfigineqarnissat pisinnaatitaaffigaat. Timmisartuutileqatigiiffiup angallatsitsiviulluunniit angalanissamik inniminniigavit attavigineqarnissamut paasissutissat tunniussatit atorlugit, soorlu e-mailikkut SMS-ikkulluunniit attavigissavaatit.
Attavigineqarnissamut paasissutissatit eqqortuunissaasa, aammalu nalunaarutit ilinnut nassiunneqartut tigusinnaanissai atuarsinnaanissaallu illit qulakkeernissai akisussaaffigaat. Assersuutigalugu e-mailadresse kukkusoq tunniussimagukku, attaveqarsimanngikkuit imaluunniit nalunaarut spamfilterinnukarsimappat aallaaviusumik illit nammineq akisussaaffigissavat.
Timmisartuutileqatigiiffik allannguut pillugu nalunaaruteqarnissaminut akisussaaffeqarpoq. Timmisartuutileqatigiiffiup piffissap naleqquttup iluani kalerrinngippatit, paasissutissamik pisaqannginnivit kingunerisaanik annaasaqarninnut akisussaasuusinnaavoq. Taamaattorli nalunaarummik tigusaqannginneq illit pisuussutiginngikkukku tamanna taamaallaat atuusinnaavoq.
Timmisartuutileqatigiiffiup nittartakkamini taamaallaat aallarfissat piffissaanik nutarterisarnissaa, naatsorsuutigalugulu ilaasussat allannguutinik nammineerlutik nalinnaanissai naammanngilaq. Angalanissamut isumaqatigiissut pillugu allannguutit pingaarutillit toqqaannaq ilinnut nalunaarutigineqassapput.
Aamma nalunaarut piffissap naleqquttup iluani tigussavat, taamaasillutit allannguutimut qisuariarnissannut periarfissaqassaatit. Assersuutigalugu timmisartuutileqatigiiffiup aallarnissaq siuartissimasoq pillugu piffissami check ind-ernissavit naammattoorsinnaajunnaarfiani aatsaat ilisimatitsissutigippagu, timmisartuutileqatigiiffiup aallaaviusumik tamanna akisussaaffigissavaa.
Nalunaarut piffissap naleqquttup iluani pisimanersoq pillugu qanoq suliami aaliangersimasumi naliliisoqarsimanera apeqqutaavoq. Pissutsit immikkut ittut atuutinngippata, aallarfissap nutaap piffissaa akunnerit 24-t sioqqullugit nalunaarutigineqartillugu piffissaq eqqorlugu nalunaarutiginninnertut nalinginnaasumik isigineqartarpoq.
Nalinginnaasumik timmisartuutileqatigiiffiup allannguut pillugu ilinnut nalunaaruteqarniartarsimagaluarnini uppernarsarsinnaasussaavaa.
Angallatsitsivik aqqutigalugu angalanissaq pisiarisimagukku
Angallatsitsivik aqqutigalugu angalanissaq pisiarisimagukku, aallaaviusumik angallatsitsiviup angalanissap naammassineqarnissaa akisussaaffigaa.
Taamaattumik angalanissaq ajornakusooruteqalerpat angallatsitsivik attavigissavat.
Angallatsitsiviup timmisartuutileqatigiiffik angalanissamut piffissat assigisaallu allanngorneri pillugit nalunaaruteqartitsisuutissinnaavaa. Taamaattorli timmisartuutileqatigiiffiup attavigineqarnissamut paasissutissatit eqqortut pigissagai pillugu angallatsitsiviup qulakkeerinninnissani suli akisussaaffigaa. Timmisartuutileqatigiiffik kukkuppat, angallatsitsivik angalanermik tunisisuusoq nalinginnaasumik ilinnut akisussaasuussaaq.
Timmisartorlutit angalanissat taamaatiinnarneqarpat
Timmisartorlutit angalanissat taamaatiinnarneqarpat, aallaaviusumik pisinnaatitaaffigissavat:
- aallarnissamut allamut nuunneqarnissat, imaluunniit
- allamut nuunneqarnissaq kissaatiginngikkukku aningaasat utertinneqarnissai.
Assersuutigalugu utertitsilluni akiliineq naapertuusinnaavoq, taamaatiinnarneq peqqutaalluni angalanerup siunertaa naammassineqarsinnaajunnaarpat.Timmisartuutileqatigiiffiup aallarnissaq pilersaarutaasoq taamaatiinnarlugu ilaasussat aallarfissanut allanut nuukkaangassuk timmisartumik aallarnissaq nalinginnaasumik taamaatiinnartutut isigineqartarpoq. Tamassuma nassatarikkajuttarpaa pileqqaammut inniminnikkanniit timminissap normua allanngortarnera.
Angalanerit EU/EØS-mi aallartippat, imaluunniit timmisartuutileqatigiiffiup EU/EØS-nunami angerlarsimaffillip ataani angalassaguit, piffissap naleqquttup iluani taamaatitsiinarneq kalerriitigineqanngippat aamma taarsiiffigitinnissamut pisinnaatitaaffeqarputit.
Timmisartuutileqatigiiffiup qanoq annertutigisumik aallarnissap piffissaa allanngortissinnaavaa?
Timmisartuutileqatigiiffik angalanissamut qanoq siuartitsitigisinnaanersoq kinguartitsitigisinnaanersorlu pillugu aalajangersimasunik killeqanngilaq.
Pisinnaatitaaffitit suunerinut bilitsi pisiarinerani pissutsit suut akuerisimaneritit ilaatigut apeqqutaapput.
Allannguut annertuppat aallaaviusumik pisineq atorunnaartissinnaavat. Allannguut annertunersoq pillugu naliliiniarnermi ilaatigut uku isiginiarneqartarput:
- aallarfissap piffissaa qanoq allangortiginersoq,
- angalanissap tamakkiisup sivisussusaa, aamma
- angalanerup sivisussusaa.
Angalaneq sivisunerutillugu angalasumut allannguutit annertunerusarneri nalinginnaasuuvoq.
Timmisartuutileqatigiiffiit arlallit aallarnissamik piffissat annertuallaamik allanngortutut isigineqassappata qanoq allanngortinneqartigisinnaanersut pillugit nassuiaasunik atugassarititaqartarput.. Taakkua atugassarititaasut naleqqutsillugit aallaaviusumik pituttorsimasuusarput.
Angalanerit EU/EØS-imi aallartippat imaluunniit EU/EØS-imik aallaaveqartumik timmisartuutileqatigiiffiup pigisaanut ilaallutit angalassaguit aallarnissamullu piffissaq allannguutilik ornitannut apuunissannut kinguaattoornermik kinguneqartitsippat taarsiivigineqarnissamut pisinnaatitaavutit.
Aallannginnermi siunnersuutitsialaat
Aallarnissannut ulloq ataaseq sioqqullugu inniminniinermut paasissutissatit aallarfissatillu misissortarnissai isumatsialaavoq. Timmisartuutileqatigiiffiup nittartagaatigut app-iatigulluunniit taamaasiorsinnaavutit. Taamaasillutit piffissap naleqquttup iluani allannguutaasinnaasut takusarsinnaavatit.