Nioqqutissamik pisigaangavit, taava pisinermi uppernarsaammik tunineqarnissat pisinnaatitaaffigivat, assersuutigalugu akilikkap uppernarsaataanik tunineqarnissat pisinnaatitaaffigivat. Suliffeqarfiup akilikkap uppernarsaataanik tunniunnaveeqqusisinnaanngilaq. Tamatumunngalu piffissami aaliangersimasumi nioqqutissanik amerlasuukkaanngorlugit akikilliliinermi (lagersalg) nioqqutissaq pisiarineqarsimagaluarpalluunniit. Taamaattumik pisinnaatitaaffitit atuutsinniarukkit tamatigut akilikkap uppernarsaataa toqqortarisassavat minnerpaamillu ukiuni marlunni.
Akilikkap uppernarsaataani imaluunniit pisinermut uppernarsaammi ima allaqqasoqassaaq:
- Nioqqutissap taaguutaa suussusialuunniit
- Akia
- Pisinerup ullulerneqarnera
- Pisiniarfiup aqqa
- Pisinermi isumaqatigiissutip naliginnaasumit allamik isumaqatigiissusiortoqarsimappat, assersuutigalugu pisinerup peqqissimissutigineranik pisinnaatitaaffik
Nioqqutip tuniniaasumut naammagittaalliorsinnaatitaaffeqarfinni ukiuni marluusuni, akilikkap uppernarsaataa toqqortarissavat.
Pisiap ajoqutaa (fejl) pillugu imaluunniit pisiaq pisinermi isumaqatigiissummut naapertuutinnginnera (mangel) pillugu kingusinnerusukkut naammagittaalliuutigissagukkit, taava tuniniaasup nioqqutissaq pisiniarfimmi pisiarineqarsimanera pillugu, ulloq suna pisisinerlutit aammattaarlu suna akilersimanerit pillugit uppernarsaatinik takujumassalluni pisinnaatitaaffigivaa. Tamatumunngalu nioqqutissap ulluni arfineq-pingasuni pisinerup peqqissimissutigineranik pisinnaatitaaffeqarnera pillugu uppernarsaaneq. Tamatumani nioqqutissap piffissami isumaqatigiiffigineqartup iluani pisinerup peqqissimissutigineranik pisinnaatitaaffeqarnera pillugu akilikkap uppernarsaataa illit uppernarsaatigissavat.
Nioqqutit akilersorlugit pisiat aammalu ingerlaavartumik tunniussinerit
Nioqqutissiaq akilersorlugu pisiarisimagukku, imaluunniit ingerlaavartumik tunniussinikkut pisimaguit, assersuutigalugu ataavartumik ingerlaartumik isumaqatigiissusiorneq (abonnement), taava pisinermi uppernarsaat minnerpaamik ukiuni tallimani toqqortarissavat. Taamak akilersuineq pisoqalisoornissamut inatsimmi aalajangersarneqarmata, tamatumunngalu piumasaqaateqarsinnaaneq ukiut tallimat qaangiukkaangata aatsaat pisoqalisarmata.
Tuniniaasup akilersugassatit imaluunniit ingerlaavartumik nioqqutissanik tigusartakkatit akilersimanngikkitit unnerluutigissappagu, taava illit ilumut akiliisarsimallutit uppernarsarsinnaasariaqarpat. Pisinermi uppernarsaatit toqqortarsimanngikkukkit, aappassaanik akileeqqittariaqarsinnaavutit.
Nioqqutip qularnaveeqqusernera
Ukiut marluk sinnerlugit qularnaveeqqusiinermik isumaqatigiissuteqarsimaguit, pisiap qularnaveeqquserneqarnerata piffissarititaa atuutsillugu akilikkap uppernarsaataa aamma qularnaveeqqusiinermik uppernarsaat (garantibevis) toqqorsimasuutigissavatit.
Qularnaveeqqusiinermik uppernarsaammi suna pineqartoq qularnaveeqquserneqartoq allaqqassaaq, aammattaaq qanoq sivisutigisumik atuuttussaanera allaqqassalluni.
Aamma kina qularnaveeqqusiisimanersoq allaqqassaaq.
Qularnaveeqqusiinermik uppernarsaataatip atuuffia tamaat toqqorsimasuutigissavat.
Pisinermut uppernarsaat imaluunniit akilikkap uppernarsaataa tammarsimappat
Akiliinermut uppernarsaat imaluunniit pisinermut uppernarsaat nassaarisinnaanngikkukku, taava pisisimanerit allatigut uppernarsassallugu periarfissaasinnaavoq. Assersuutigalugu Dankort atorlugu akiliinermi uppernarsaat, aningaaserivimmiit kontop allattorsimaffiata assilinera (udskrift) imaluunniit mobiilikkut akiliisimanerit allattorsimaffiata assilinera.
Kisiannili nioqqutissaq ataaseq aatsaat pisiarisimagaanni, taamatut uppernarsaaneq atorneqarsinnaavoq. Nioqqutissanik arlalinnik pisisimaguit taamak uppernarsarsinnaanngilat, imaakkami nioqqutit ataasiakkaat qanoq akeqarsimanersut uppernarsarneqarsinnaanngimmata. Nioqqutigisap nutaamik taarseqqusaaneranik uppernarsaat (byttemærke) imaluunniit qularnaveeqqusiinermik uppernarsaat aamma uppernarsaatitut atorneqarsinnaapput.
Akiliinermut uppernarsaatit atuarneqarsinnaanngitsut
Akiliinermut uppernarsaatip allanneri ilaatigut atuarneqarsinnaajunnaartarput, imaluunniit arlaatigut atuaruminaallillutik. Pappilissap pitsaassusaa aamma naqiterneqarneratalu peqqutaasarput.
Pisinermut allagartap minnerpaamik ukiunik marlunni atuuffeqartussaammat tamanna pisiniarfiup akisussaaffigaa, tamatumunngali akiliinermut uppernarsaat atuaruminaallisimappat, illit nioqqutissaq suna pineqarnersoq uppernarsarnissaanut ajornakusoortitsisinnaalluni.
Nioqqutissamik akisuumik pisiguit, tamatumunngalu akiliinermut uppernarsaatip sivisuumik atanissaa naatsorsuutigineqarpat, taava pisinermut uppernarsaatip pappilissamik naliginnaasumik sananeqarnissaa kissaatigisinnaavat, imaluunniit akiliinermut uppernarsaat assilisinnaavat (kopi). Tamanna kingusinnerusukkut iluaqutigerujussuarsinnaavat.
Aammattaaq akiliinermut uppernarsaat assilineqarnissaa (billede) isumassarsialatsialaasinnaavoq. Digital-isut assilisaq original-iatut uppernarsaatitut atorneqarluarsinnaavoq.