Inigisavit qimanneranut atatillugu akiligassat pillugu Inissiaatileqatigiiffiup X-ip aalajangiineranut tunngasumik naammagittaalliuuteqarnerit Ineqarneq pillugu Maalaaruteqarfiup ulloq 9. juuni 2021 suliarivaa imalu aalajangiivoq Ineqarneq pillugu Maalaaruteqarfik ima aalajangiivoq:
AALAJANGIINEQ
Ineqarneq pillugu Maalaaruteqarfik isumaqarpoq kissarsuutip taarserneqarnera akiligassarinngikkit. Aammattaaq Ineqarneq pillugu Maalaaruteqarfiup najukkap; YY eqqiarneqarnerani akiligassap affaa akileqquneqartoq kisiat akilissagit isumaqarpoq.
Ineqarneq pillugu Maalaaruteqarfiup illup iluani matut taarserneqarnissai pillugit maalaarutit suliarissallugu piginnaatitaaffeqanngilaq, maalaarut aserfallatsaaliuinermut tunngassuteqarmat.
Naqqit qisuit eqqarsaatigalugit, Ineqarneq pillugu Maalaaruteqarfik isumaqarpoq, 59250 koruunit annertuallaartut, naqqillu taarsersorneqarneri 46000 koruuninut nalilimmik inissiivigineqarpoq, taakkualu affai kisiisa akilissavatit.
Taamaattumik maalaarutigisannut ilaannakortumik ilalerneqarputit.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
1: YY-mi illoqarfimmi Z-mi pillugu attartornermut isumaqatigiissut 11. aggusti 2000-meersoq.
2: Attartukkami unioqqutitsisumik uumasuuteqarneq peqqutaalluni mianersoqqussummik tunineqarneq 30. januaari 2012-imeersoq.
3: Misissuinermi nalunaarusiaq – 1. maaji 2013-imeersoq.
4: Rengøringsservice XZX inissiaatileqatigiiffimmeersumit eqqiaasunik allatsitsineq 6. maaji 2013-imeersoq.
5: Akiligassaq 10. maaji 2013-imeesoq perusuersartarfiup issiavittaata taarserneranut
6: Akiligassaq 21. maaji 2013-imeersoq ikkuffiit taarsersornerinut.
7: 28. juuni 2013-imeersoq naqqit taarsersornerinut akiligassaq.
8: 28. juuni 2013-imeersoq ineeqqamut matup taarserneranut akiligassaq.
9: Naatsorsuusiorneq 15. juuli 2013-imeersoq, tassani takuneqarsinnaavoq, kissarsuummik taarsiineq 5035 koruuninik naleqartoq aamma eqqiaanermut 6990 koruuninik akeqartoq.
10: Akiligassaq 11. decembari 2017-imeersoq naliginnaasumik iluarsaattuussinermut tunngasoq.
11: Akiligassaq 10. maaji 2013-imeersoq najugaq YY-mi akunnerni 30-ni eqqiaanermut tunngasoq.
12: Akiligassaq 13. maaji 2013-imeersoq kissarsuummik taarsiinermut tunngasoq.
13: Inissiaatileqatigiiffiup attartukkamut akiligassat akilinngisat pillugit noqqaanera 21. aggusti 2013-imeersoq.
14: Najugaq YY-mi najugaqarfinni assilisat quppernerit 13-it.
15: Ineqarneq pillugu maalaaruteqarfimmut nutsernermi akiligassat pillugit maalaarutit 27. marsi 2018-imeersoq.
16: Maalaarutinnut ilassutit 9. maaji 2018-imeersoq.
17: Inissiaatileqatigiiffiup suliaq pillugu nassuiaataa 12. septembari 2018-imeersoq.
18: Inissiaatileqatigiiffiup eqqiaanermi akunnerit atorneqartut pillugit akissutaa 12. septembari 2019-imeersoq.
19: Inissiaatileqatigiiffiup kissarsuut pillugu akissutaa 7. oktobari 2019-imeersoq.
Nassuiaat:
Attartuinermut isumaqatigiissummi 11. aggutsi 2000-imeersumi takuneqarsinnaavoq, illoqarfimmi YY najukkamut; Z-mut ulloq 12. aggusti 2000-imi nuussimasutit. Inissiaatileqatigiiffiup suliamut nassuiaammini 12. septembari 2018-imeersumi takuneqarsinnaavoq, najugaq XXXX-imi sananeqarsimasoq.
Misissuinermi nalunaarusiaq 1. maaji 2013-imeersoq malillugu najugaq 58,70 kvadratmiiterinik angissuseqarpoq.
Ulloq 1. maaji 2013 aallarnerfigalugu ini attartorunnaarpat.
Misissuinermi nalunaarusiaq malillugu, najugaq naliginnaasumik iluarsartuunneqartussaavoq, iikkat, qilaaq ataatigullu iikkiussat qalipanneqarlutik naterlu lakkerneqarluni.
Massuma saniatigut nalunaarusiami “nalinginnaasumik iluarsartuutassat aamma aserfallatsaaliuinermi” allanneqarsimavoq, najugaq tamaat, matut ilanngullugit eqqiarneqassasut. Aamma allanneqarsimavoq, perusuersartarfiup issiavittaa, kissarsuut, inimut matu, inimi naqqit tamakkerlugu, isaariamilu ikkuffiit taarserneqassasut.
Nalunaarummi ungaluusami nalunaarusiap ataaatungaani ’’Najugaq eqqiarneqarpoq’’-mi “naamik” krydsilerneqarsimavoq.
Najukkamit nutsernermi nalunaarusiaq attartortitsisumit ilinniillu atsiorneqarsimavoq.
Ineqarneq pillugu Maalaaruteqarfimmut najukkamit nutsernermi akiligassaq tigusimasat pillugu maalaaruteqarputit. Suli inissiaatileqatigiiffillu eqqartugassaqarnerarputit, isumaqaravimmi ilissi akileriikkassinnik najugaq nutarterneqartoq nalinginnaasumik iluarsartuutsillunilu aserfallatsaaliorfigineqarnani.
Maalaarummut ilassutinni oqaatigaat, perusuersartarfimmut issiavimmik nutaamik taarsiititsineq akisuallaartoq. Akigititaq 1683 koruuniusoq annertugisimavat, isumaqaravimmi tassunga naligititamut perusuersartarfimmik nutaamik issiavittaannaaniunngitsoq pisisoqarsinnaasoq.
Maalaarutinnut ilassummi oqaatigaat, eqqiaanermut akiligassaaq nalinginnaasumit annertunerujussuusoq, eqqiaanermi akunnerit 30-t atorneqarsimammata.
Aammattaaq maalaarutinnut ilassummi oqaatigaat, naqqit taarsersornerinut akiligassaq 59250 koruuniusoq annertuallaartoq, isumaqarputillu akunnermulerluni suliarigaanni nalimik aaliangersimasumik taasinermiit akikinneerarsuusimassagaluartoq.
Inissiaatileqatigiiffiup suliamut nassuiaammini 12. septembari 2018-imeersumi oqaatigaa, attartortup siuliata najukkamit nutsernera atatillugu misissuinermi nalunaarusiami naqqit ajoquteqartut eqqaaneqanngimmata.
Attartukkanni unioqqutitsillutit qimmeqarsimagavit, februaari 2012-imi aserfallatsaanermut mianersoqqussummik tunineqarsimavutit.
Aammattaaq inissiaatileqatigiiffiup nassuiaammini 12. novembari 2018-imeersumi ilassutigisimavaa, attartukkami uumasuuteqarneq najukkamut annertuumik aserfallatsaassisartoq, uumasup isigai kukiffaalu naqqit qisuusut nungullapallattarmagit, taamaattumillu naqqit moreerlugit uumasuutip tumikui tamaasa peersinnaajunnaartarlutik.
Aammattaaq inissiaatileqatigiiffiup nassuiaammini oqaatigaa, inissiaatileqatigiiffiup nakkutilliisua nutserninni naqqit aserfallangaatsiarsimasutut nalilersimagai. Aammattaaq inissiaatileqatigiiffiup oqaatigaa, attartornerup nalaani naqqit ataasinnguamilluunniit aserfallatsaaliorneqarsimanngitsut, taamaattumillu tamarmik taarsertariaqarsimallutik.
Akiligassami ZZX-imeersumi takuneqarsinnaavoq, ikkuffinnik ajoquteqartunik 1494,09 koruuninut taarsersuisoqarsimasoq.
Aammattaaq akiligassami XXZ-meersumit takuneqarsinnaavoq, ineeqqamut matu 1600 koruunilerlugu taarserneqarsimasoq.
Eqqiaasunit akiligassaq malillugu, akunnerit 30-t eqqiaanermut atorneqarsimapput.
Naatsorsuusiorneq 15. juuli 2013-imeersoq malillugu qularnaveeqqut 6228 koruuniusoq ilanngaatigereerlugu, inissiaatileqatigiiffimmut katillugit 70237,11 koruunit akilertussaavatit.
Eqqiaanermut akiligassaq katillugu 6990 koruuniusoq, kissarsuutip taarsernera 5035 koruunit, naqqit qisuusut taarserneri 59250 koruunit, ineeqqamut matup taarsernera 1600 koruunit, perusuersartarfiup issiavittaa aserornikup taarsertinneranut 1683 koruunit, ikkuffinnik taarsersuineq 1494,09 koruunit akiligassanut nalimut ilaapput.
Inissiaatileqatigiiffimmit assit nassiunneqarnikuni takuneqarsinnaanngilaq kissarsuut qanoq aserfallatsaaliorneqarsimannginnersoq.
Ineqarneq pillugu Maalaaruteqarfimmiit inissiaatileqatigiiffimmut ulloq 7. oktobari 2019-imi saaffiginninnermi paasineqarpoq, kissarsuut 2000-imi najukkamut nutsernerni takuneqarsimasoq, tassanilu inissiaatileqatigiiffiup kissarsuut qangarnisaanersoq takusinnaasimanngilaa.
Kissarsuut 2000-imi najukkamut nutsernerni nutaajusimanngitsoq inissiaatileqatigiiffiup apeqqummut akissutaani takuneqarsinnaavoq.
Aamma inissiaatileqatigiiffik nassuiaateqarpoq, inissiaatileqatigiiffik kissarsuutit aatsaat taarsertarai, kissarsuut aserorneqarsimappat imaluunniit arlaatigut attartortumit paarilluarneqarani atoqqissinnaajunnaarsimappat. Aammattaaq inissiaatileqatigiiffiup oqaatigaa, attartorninni kissarsuut ajoquteqarsimanngitsoq.
Inissiaatileqatigiiffiup nalunaarutigaa, nutsernermi nakkutilliinermi kissarsuut ilinnit paarilluarneqarsimanngitsoq allanneqarsimammat, tamannalu isumaqarpoq, amusariaq (iffiorfinnut ilisiviit ilaalu) aserorsimasoq, tigummivia qupisimasoq, kogeplade ikuallannikunik nipititernertallit kissarsuullu tamarmi peqqinnanngitsumik ipertulluni. Aammattaaq inissiaatileqatigiiffiup oqaatigaa, nutsernermi nakkutilliinermi nalunaarusiaq 1. maaji 2013-imeersoq atsiorlugu akuerisimagit. Taamaattumik inissiaatileqatigiiffik isumaqarpoq, kissarsuut paarilluarneqarsimanngitsoq akueralugu nutaamik taarserneqarnissaanut akiligassaq akilertussaagit.
Aammattaaq maalaarutinni oqaatigaat, isumaqarlutit qularnaveeqqutit akiligassat nakkutilliinermut nalunaarusiami allaqqasut matussagaat, piffissami tassani akit pillugit ilisimatinneqannginnassi. Taamaattumik akiligassaq takugassiuk tupaallassimavusi.
Inissiaatileqatigiiffiup suliamut nassuiaammini 12. septembari 2018-imeersumi oqaatigaa, najugaq XXXX-imeersoq illillu attartulinngikkallarakku allamik attartorneqarnikuusoq.
Aamma maalaarutinni takuneqarsinnaavoq, inissiaatileqatigiiffiup nassiunnikuusai akileeqqussutit marluk tigusimanngikkisi, nutsernissinni najugartaassinni allakkanut nakkartitsivissi ajornartorsiuteqarfigisimagassiuk. Taamaattumik isumaqarsimavusi inissiaatileqatigiiffik najukkamut akiligassaq pillugu oqaaseqaatisi pillugit paasinnissimasoq. Tamanna tunngavigalugu inissiaatileqatigiiffiup suliaq aningaasanik akiliisitsiniaasartunut februaari 2018-imi ingerlateqqissimagaa tupaallaatigivarsi.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi kingusinnerusukkut allanngortinneqartumi § 45-mi allaqqavoq, Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaat attartortitsisup pisussaaffigigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
- 77, imm. 1-imi atuarneqarsinnaavoq, Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Natit lakkersimasutut nutaatut isikkoqassapput attartortup nuunnerani.
- 77, imm. 1 atuutinngilaq, attartortup nuunnermini naliginnaasumik iluarsaattuussisimanngippat, tak. § 77, imm. 3.
- 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.
- 79 naapertorlugu attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat.
Imm. 2 naapertorlugu misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaanik missingersuummik allakkatigut nalunaarfigineqassaaq.
Peqqussummi § 84, imm. 1, nr. 1-7 naapertorlugu Ineqarneq pillugu Maalaaruteqarfiup maalaarutit tigusat ataani allaqqasut suliarisinnaatitaavai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqarfik allakkat najukkamut takkussimannginneri pillugit suliaqassalluni piginnaatitaaffeqanngilaq. Ineqarneq pillugu Maalaaruteqarfiup akiliisitsiniaasartut pillugit maalaarutit suliarissallugu piginnaatitaaffeqanngilaq.
Aammattaaq Ineqarneq pillugu Maalaaruteqarfik ineeqqamut matu, imaluunniit aserfallatsassimasut nalinginnaasumik pisoqalisoornerulluunniit pianik pinngorsimanersut nalilersussallugit piginnaatitaaffeqanngilaq, taamaattumik ineeqqamut matu pillugu apeqqutit eqqartuussiviup ataaniippoq.
Inissiaatileqatigiiffiup naatsorsuinerani 15. juuli 2013-imeersumi takuneqarsinnaavoq, inissiaatileqatigiiffiup nalinginnaasumik iluarsartuussinerni akiligassat § 77, imm. 1 naapertorlugu suliarisimagaa, attartugaq qaammatit 100-ut sinnerlugit nutsinnginnerni najugarisimagakkut. Taamaattumik inissiaatileqatigiiffik nalinginnaasumik iluarsartuussinermut akileeqqusinikuunngilaq.
Inissiaatileqatigiiffik aallaaviusumik aserfallatsaaliuinissamut pisussaaffeqarpoq, perusuersartarfillu tassani ilaavoq.
Ineqarneq pillugu Maalaaruteqarfiup nalilerpaa, inissiaatileqatigiiffiup perusuersartarfiup issiavittaata taarsernera akilissagaa, tamanna najukkamut atareermat. Perusuersartarfiup issiavittaa taarserneqallattaanissaanut ilimagineqartariaqarpoq, tamannalu attartortitsisup akisussaaffigaa.
Ikkuffinnik taarsersuineq pillugu, Ineqarneq pillugu maalaaruteqarfik isumaqarpoq, akileqquneqartoq akiligassarinngikkit.
Tamanna tunngavilerneqarpoq, nipittartut inikui eqqiaanermi ilanngullugit piiarneqarsinnaasimagaluartut.
Ineqarneq pillugu Maalaaruteqarfik isumaqarpoq, inissiaatileqatigiiffiup ikkuffiit taarsersorneqarneri nammineq akiligassarigai.
Ineqarneq pillugu Maalaaruteqarfik isumaqarpoq, najukkap eqqiarneranut akiligassap affaa akilissagit, najugaq eqqiaqqaarnagu qimannikuunera peqqutaalluni.
Taasunga tunngavigineqarpoq, nutsernermi najukkap nalinginnaasumik iluarsartuunnera assingalugu, eqqiarnissaa piumasaqaataammat.
Aamma Ineqarneq pillugu Maalaaruteqarfik isumaqarpoq, akunnerit eqqiaanermut atorneqartut, najukkamut marlunnik initalimmut annertuallaartut.
Ineqarneq pillugu Maalaaruteqarfik naliliinermini attartukkap angissusaa, pigisat attartukkami qimaannarneqarnikut, eqqiaasullu piiaaqqaarniarlutik piffissaq atortariaqagaat tunngavigisimavaat.
Tamanna tunngavigalugu Ineqarneq pillugu Maalaaruteqarfik isumaqarpoq, eqqiaanermut akunnerit atorneqartut amerlavallaartut, taamaattumillu eqqiaanermut akiligassap nalinga affaanut apparneqassasoq isumaqarluni, ima annertutigisunngorlugu 3495 koruunit.
Ineqarneq pillugu Maalaaruteqarfik kissarsuutip taarserneqarnera pillugu isumaqarpoq, kissarsuutip taarserneranut akiligassap nalinga akileqquneqartoq akilissanngikkit.
Matumunnga kissarsuutip ukiunik 13-inik pisoqaassuseqarnera tunngavigalugu, qanorluunniit nutsernerni ipertutigigaluarpat, pisoqalineq peqqutaalluni taarserneqarnissaa tunngavigineqarmat.
Taamaattumik Ineqarneq pillugu Maalaaruteqarfik isumaqarpoq, inissiaatileqatigiiffiup kissarsuutip taarsernera nammineq akilissagaa.
Ineqarneq pillugu Maalaaruteqarfik sanaartornermut suliffeqarfinnit marluniit naqqit qisunnik 24 kvadratmiiterisut annertutigisumik taarsersuinermut akinik paasiniaanikuupput, tassanilu akit agguaqatigiinnerini naleq 46000 koruuninut inissinneqarpoq. Taamaattumik ineqarneq pillugu Maalaaruteqarfiup naleq 59250 koruuniusut akitut annertugivai, naqqillu taarsersornerinut akiusussatut 46000 koruunit naliliussimallugu.
Aammattaaq Ineqarneq pillugu Maalaaruteqarfik isumaqarpoq, inimi naqqit qisunnik taarsersorneqarneranut akiligassap 50 procentia kisimi akilissagit.
Matumunnga najukkami qimmiuteqarlutit maleruaqqussutit unioqqutissimaneri tunngavigineqarpoq, aamma unioqqutitsinerup saniatigut attartornermut isumaqatigiissummi aserfallatsaaliuineq pillugu unioqqutitsisimagavit.
Aammattaaq Ineqarneq pillugu Maalaaruteqarfik isumaqarpoq, inissiaatileqatigiiffiup inimi naqqit qisunnik taarsersorneqarnerisa nalingata 50 procentia akilissagaa.
Matumunnga Ineqarneq pillugu Maalaaruteqarfik isumaqarpoq, nateq XXXX-imeersoq taarsersorneqarnissaa piffissanngorsimassasoq, taamaattumillu naqqit moreerneqaannaratik taarsersorneqarnerini attartukkap nalinganut qaffaasussaasoq tunngaviliunneqarpoq.
Taamaattumik Ineqarneq pillugu Maalaaruteqarfik naliliivoq, akiligassaq nalingiimmik 50 procentimik avinneqassasoq.
Inissiaatileqatigiiffimmut eqqiaanermut aamma kissarsuutip, naqqit, ikkuffiit, perusuersartarfiullu issiavittaata taarserneqarneri pillugit akiligassaq tamakkerlugu akilereersimagukku, inissiaatileqatigiiffiup akiligassami nalinga ilinnut akilissavaa.
Aalajangiineq:
Ineqarneq pillugu Maalaaruteqarfiup inissiaatileqatigiiffiup aalajangiussaa allanngortippaa, najugakunni kissarsuutip taarsernera, ikkuffiit taarserneri aamma perusuersartarfiup issiavittaata taarsernera pillugit akiligassaq akilissanngikkit.
Aammattaaq Ineqarneq pillugu Maalaaruteqarfik isumaqarpoq, eqqiaanermut akiligassap nalingata affaa kisimi akilissagit.
Naggataatigut Ineqarneq pillugu Maalaaruteqarfik isumaqarpoq, najugakunni naqqit qisunnik taarsersornerisa akiligassartaata affaa kisiat akilissagit.
Ineqarneq pillugu Maalaaruteqartarfiup aalajangiineri Namminersorlutik Oqartussanut kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu aalajangiiffigineqartarput.
Akiliutigisimasavit utertinneqarnissaannut pisinnaatitaaffeqarputit. Taamaattumik Ineqarneq pillugu Maalaaruteqarfimmut saaffiginnillutit konto normut tunniutissavat.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarnermut Maalaartarfimmi siulittaasoq.
Ilanngussat: Inatsit tunngavissaq.
Assilineqarnera uunga: Inissiaatileqatigiiffik YY. Attartornermut isumaqatigiissut nr. XX-XXX-XX-XXX innersuussutigineqarpoq.