imalu aalajangiivoq
AALAJANGIINEQ
Ineqarneq pillugu Maalaaruteqarfik isumaqarpoq najugaq XXY, illoqarfimmi YYX-mi, naliginnaasumik iluarsaattunneranut akiligassaq akilissanngikkit. Kiisalu Ineqarneq pillugu Maalaaruteqarfik isumaqarpoq taamatuttaaq eqqartuussivimmut akitsuut akilissanngikkit, aammattaaq pisattatit nuunnernut atatillugu akissaajaatit.
Ineqarneq pillugu Maalaaruteqarfik naammagittaalliuternut ineqarnermut akiligassat novemberi aamma december 2017-inut tungasut piginnaatitaaffiginngilai suliarisinnaallugit.
Taamaattumik naammagittaalliuutigisannut ilaannakortumik illerneqarputit.
Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Ilanngussaq 1: Ineqarnermut isumaqatigiissut ulloq 23. marts 2017-imeersoq najugaq XXY, illoqarfimmi YYX-mi pillugu.
- Ilanngussaq 2: Inatsit ulloq 19. juulip 2017 attartornermut isumaqatigiissutit atorunnaarsinneqarnera.
- Ilanngussaq 3: 27. juli 2017-imeersoq kinguartitsinermut kissaateqarnermut akitsuut.
- Ilanngussaq 4: Nakkutilliisimaneq pillugu nalunaarusiaq 2015-imi decembarip 14-ianeersoq.
- Ilanngussaq 5: Faktura af 11. december 2017-imeersoq naliginnaasumik iluarsaattuussineq.
- Ilanngussaq 6: 27. december 2017-imeersoq Ineqarneq pillugu Maalaaruteqartarfimmut naammagittaalliutit.
- Ilanngussaq 7: Suliffeqarfissuarmi aningaasat ingerlaartut nalunaarsorsimaffiat 31. decembarip 2017 – 31. decembari 2017 40
- Ilanngussaq 8: Naatsorsuineq ullulerneqarnikoq 10. januar 2018, akiligassaq allaqqasoq paarsinerlussimanermut aamma naliginnaasumik iluarsaattuussineq.
- Ilanngussaq 9: Ilanngussatut naammagittaalliutit ullulerneqarnikoq 10. september 2019.
- Ilanngussaq 10: Inissiaatileqatigiiffiiup nassuiaataa ulloq 18. septemberi 2019, “paarsinerlunneq” naatsorsuinermi.
Nassuiaat:
Ineqarneq pillugu Maalaaruteqarfiup aalajangiinermini ulloq 30. august 2019 aaliagerpaa, inissinneqaqqissagaluartutit najugaq XXY, illoqarfimmi YYX-mi-mut imaluunniit attartukkamut assigisaanut, eqqungitsumik inissiaatileqatigiiffiup attartornermut isumaqatigiissuut atorunnaarsereernerata kingorna.
Inissiaatileqatigiiffimmiit attartornermut isumaqaitigiissut atorunnaarsinneqarpoq allakkatigut 19. juli 2017-imi ullulerneqarnikumi. Allakkami allaqqavoq ullut 8-it qaangiutsinnagit attartortukkat allakkap ulluaniik qimareersimassagit. Naammagittaalliutinni allaqqavoq aattaat attartugassarsi illit ilaquttatillu ulloq 7. november 2017 qimassimagissi, politiit kinguartitsisimaneq naammassitsinniarlugu takkummata.
Politiinut allakkanut ullulerneqarnikoq 27. juli 2017 allaqqavoq, inissiaamiik kinguartitsinissamut qinnuteqaat pillugu eqqartuussivimmut akitsuummik 300 kroninik akileeqquneqarsimasutit. Taanna eqqartuussisutigut akitsuut akiitsugarnut inissiaatileqatigiiffimmit qaavatigut ilineqarsimavoq.
Nutsernermi atatillugu misissuisoqarsimavoq ulloq 1. december 2017.
Misissuinermi nalunaarusiaq inissiaatileqatigiiffiup aallartitaanit atsiorneqarsimavoq, aamma taamaattumik Ineqarneq pillugu Maalaruteqartarfiup aalajangiisartui isumaqarput misissuinermi najuussimangittutit.
Misissuinermi nalunaarusiaq naapertorlugu naliginnaasumik attartugaq iluarsaattuunneqartussaasimavoq. Kiisalu allaqqavoq attartugaq eqqiiajarneqarsimasoq.
Naatsorsuisimanermi ullulerneqarnikumi 10. januar 2018 allaqqavoq, qularnaveqqusiinermut 13068 kronit akilersimagitit. Kiisalu allaqqavoq naliginnaasumik iluarsaassinermut akiligassaq 13677 kroniusimasoq, aamma inissiaatilteqatigiiffiup taakkunanit1367,70 kronit akilissagai. Allaqqavortaarlu pisussaaffimmik sumiginnaanermut 4558,50 kronit akilissagitit. Taamaalillutit akiligassarilersimavatit 16867,80 kronit naliginnaasumik iluarsaassinermut aamma sumiginnaanermut tamaasa katillugit.
Ineqarneq pillugu Maalaaruteqarfiup apeqqutilliinerani inissiaatileqatigiiffik ulloq 18. september 2019 ilisimatitsivoq, naatsorsuinerup ilaani allaqqasoq “paarsinerlunneq” pissutaasoq taamanikkut inissiaatileqatigiiffiup qarasaasiaata nalunaarsortarsigamigit akiligassat attartortunit akilereernikut. Uani pineqarsimavoq nutsernernut atatillugu inissiaatileqatigiiffiup nutsernernut ikiooqataasimanera avataaniit nutsernermi suliffeqarfik ikiorsiuullugu taamani inissiaatileqatigiiffimmut saaffiginnereernerpit nutsernissat pillugu kingorna, aamma taamani ileqquusut naapertorlugit. Tamanna paarinerlunnermut tungassuteqarsimanngilaq. Inissiaatileqatigiiffiup aammattaaq allassimavaa, siumut oqarfigereersimallutit tamanna akisusinnaaneranik tamannalu illit akuerisimavat. Tamatuma kingorna inissiaatileqatigiffiiup nutserisut attavigisimavai nutsernissamullu inniminniillutik.
Naammagittaalliutinni allaqqavoq novemberimut aamma decemberimut 2017 inimut akiliisimasutit.
kiisalu naammagittaalliutigivat, nutsernermut atatillugu aningaasartuuteqarsimallutit nutsernissinnut, tamatuma ataani natseq lakkerneranut akiliisimallutit. Allapputit nuunnissinni takusinnaasimagit nateq lakkerneqangitsoq kisianni ajorpasinngittoq, aamma tassanngaanniit nuukkassi nateq iserterassitut nutserassi assinganik isikkulik qimassimallugu.
Ilassutitut naammagittaalliutinni allaqqavoq qujamasuutigigit inissiaatileqatigiiffiup inissiamut tuneqqinniaraasi, kisianni aaqqitassatit aaqqeqqaarusullugit inissassinnik nutaamik neqeroorfigitinnginnissinni. Allapputit taamani piffissaliunneqarsimasumut nutsernissaq akissaqarfigisimanagu.
Kiisalu naammagittaalliutinni allassimavat ini arlaatigulluunniit ajoqusersimanagu.
Naggataagut ilassutitut naammagittaalliutinni allassimavat, taakku ajornartorsiutit assigiinngitsut aaqqinneqarsinnaanersut.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi kingusinnerusukkut allanngortinneqartumi § 45-mi allaqqavoq, Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaat attartortitsisup pisussaaffigigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikut pisoqalisullu ima akulikitsigisumik ilinniartut ineqarfiisa allaffeqarfiannit isumagineqartassapput ilinniartut tassanilu najugaqartut eqqarsaatigalugit pisariaqartitsinerit malillugit.
Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Natit lakkersimasutut nutaatut isikkoqassapput attartortup nuunnerani.
- 77, imm. 1 atuutinngilaq, attartortup nuunnerani naliginnaasumik iluarsaattuunneqarsimanngippat, jf. § 77, imm. 3.
Peqqussummi assigani § 84 naapertorlugu, imm. 1, nr. 1-7 , Ineqarneq pillugu Maalaaruteqarfiup naammagittaalliutit tigusat tulliuttut suliarisinnaatitaavaat ukununnga tungasut:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqarfiup inimut akiligassat pillugit apeqqutit suliarinissaanut piginnaatitaaffeqarfiginnginnamiuk, naammagittaalliutit suliarisinnaanngilaa inimut akiligassat novemberimut aamma decemberimut 2017 akiligassanut tungasut.
Ineqarneq pillugu Maalaareteqarfik isumaqarpoq taanna eqqartuuffivimmiit akitsuuserneqaat akiligassanngortinneqartoq akilissanngikkit.
Tamatumunnga tungavilersuutaavoq najugaq XXY, illoqarfimmi YYX-mi tungavissaqangittumik atorunnaarsinneqarsimammat, aamma eqqartuussivimmiit akitsuut naatsorsuutitut tamanna malitsigisimavaa. Tassa imaappoq ineqarnermut isumaqatigiissut tungavissaqangitsumik atorunnaarsinneqarsimangikkaluarpat taava taanna akiligassaq pisimassanngikkaluarpoq.
Ineqarneq pillugu Maalaaruteqarfik paasivaa aamma naliginnaasumik iluarsaattuussinermut akiligassanngortinneqarnikoq akilissanngikkit.
Uani tungavilersuutigineqarpoq, attartornermut isumaqatigiissut najugaq XXY tungavissaqangittumik atorunaarsinneqarsimammat, aamma naliginnaasumik iluarsaattuussisarneq tamatuttaaq naatsorsuutitut malitsigisarmagu.
Inissiaatileqatigiiffik ikiuilluni nuutsitinermi aningaasat 4558,50 kronit aningaasartuutigisimasarnut tungatillugu, Ineqarneq pillugu Maalaaruteqarfiup inernilerpaa taakku aamma taamatuttaaq akilissanngikkitit.
Uani tungavilersuutigineqarpoq, attartornermut isumaqatigiissut najugaq XXY tungavissaqangittumik atorunaarsinneqarsimammat. Attartornermut Isumaqatigiissutit najugaq XXY pillugu pissutissaqanngittumik atorunnarsinneqarsimangikkaluarpat taava akiligassamik pisimassanngikkaluarputit.
Inissiaatileqatigiiffiup tamaattumik qularnaveeqqutit ilinnut utertissavaat, aamma naliginnaasumik iluarsaattuussinermut sinneruttunik akiliisimaguit 609 kroninik, qularnaveeqqutinut naatsorsoreerlugit, taamatuttaaq utertissavaat. Taamatuttaaq Inissiaatileqatigiiffik akiligassaq 4558,50 inissiaatileqatigiiffiup ikiussimaneranut utertissavaa soorlu aamma eqqartuussiveqarfimmiit akitsuut 300 kronit utertissagaat akiligassat tamakku akilersimagukkit.
Inissiaatileqatigiiffiup septemberimi 2019 kingumut allamik inissiamik neqeroorfigigamitit, taamanikkut akissaqarfiginngeruttorlugu, inissiaatileqatigiiffik pisussaajunnaarsinngilaa matumani aalajangiinermi allamik inimik tunissallutit.
Aalajangiineq:
Ineqarneq pillugu Maalaaruteqarfik inissiaatileqatigiiffiup aalajangiinera allanngortippaa, naliginnaasumik iluarsaattuussineq akilissangilat najugaq XXY aaqqissorneranut, aniingaasartuutit inissiaatileqatigiiffiup nuunnermut ikiiuuneranut akiligassat pillugu kiisalu eqqartuussiveqarfimmut akitsuutit.
Allaffissornermut tunngasunik pissuteqarluni suliap sivisuallaartumik suliarineqarsimanera Ineqarneq pillugu Naammagittaalliuuteqartarfiup ajuusaarutigaa.
Ineqarneq pillugu Maalaaruteqartarfiup aalajangiineri namminersornerullutik oqartussanut (namminersorlutik oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Akiliutigisimasavit utertinneqarnissaannut pisinnaatitaaffeqarputit. Taamaattumik Inissiaatileqatigiiffimmut saaffiginneqquneqarputit konto normut tunniunnissaa siunertaralugu.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.
Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaanni Eqqartuussivimmut tunniunneqassapput.
Inussiarnersumik inuulluaqqusillunga
Naja Joelsen
Ineqarnermut Maalaartarfimmi siulittaasoq
Ilanngussat: Inatsit tunngavissaq.
Assilineqarnera uunga: InissiaatileqatigiiffikXXY. Attartornermut isumaqatigiissut nr. XX-XXX-XXXX-XXX innersuussutigineqarpoq.