Inigisavit qimanneranut atatillugu akiligassat pillugu Inissiaatileqatigiiffik aalajangiineranut tunngasumik maalaaruteqarnerit Ineqarneq pillugu Maalaaruteqartarfiup ulloq 12. aggusti 2021-mi suliarivaa imalu aalajangiivoq. Ineqarneq pillugu Maalaaruteqartarfik ima aalajangiivoq:
AALAJANGIINEQ
Ineqarneq pillugu Maalaaruteqartarfik isumaqarpoq, najugakunni, YYX- mi nalinginnaasumik iluarsartuussineq akilissanngikkit.
Ineqarneq pillugu Maalaaruteqartarfik isumaqarpoq, inissiami eqqiaaneq akilissagit.
Taamaattumik inissiaatileqatigiiffiup nutaamik najukkamit nutsernermi akiligassamik nassissavaatit, tassani nalinginnaasumik iluarsartuussinermi akigititaq ilanngaatigalugu.
Ineqarneq pillugu Maalaaruteqartarfiup sikaaviup matua, listit, igalaat ssavi, kiassaatit, matut, majuartarfiit sinaakkutaat naqqullu qanoq issusaa pillugit suliaqassalluni piginnaatitaaffeqanngilaq, Ineqarneq pillugu Maalaaruteqartarfiup pisussaaffimmik sumiginnaaneq imaluunniit nalinginnaasumik nungullarsimanersut pisoqalillutillu nalilersussallugu periarfissaasimanngimmat.
Ineqarneq pillugu Maalaaruteqartarfik ineqarnermut akiitsut akileqquneqartut aamma taarsiiffigineqarneq pillugit apeqqummut tungatillugu suliaqarnissaminut piginnaatitaanngilaq.
Kalaallit Nunaata Eqqartuussivianut unnerluussissallutit innersuussutigineqarpoq, qulaani maalaarutigineqartut suliarisinnaanngisagut maalaarutigerusukkukkit.
Tassa imaappoq maalaarutit ilaannakuusumik isumaqataaffigineqarpoq.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Ineqarneq pillugu Maalaaruteqartarfimmut maalaarutit 1. apriili 2020-meersoq.
- Attartornermut isumaqatigiissut marsi 2018-imeersoq.
- Nakkutilliinermi nalunaarusiaq decembari 2019-imeersoq.
- Oqarasuaatikkut oqaloqatigiinnermi nalunaarusiaq 10. maaji 2021-
- Inissiaatileqatigiiffimmiit suliaq pillugu oqaaseqaat 10. maaji 2021-
- Najukkamit nutsernermi akiligassaq marsi 2020-meersoq.
- Nalinginnaasumik iluarsartuussineq pillugu akiligassaq januaari 2020-meersoq.
- Eqqiaanermut akiligassaq decembari 2019-imeersoq.
- Pisussaaffimmik sumiginnaaneq pillugu akiligassaq januaari 2020-meersoq.
- Pisussaaffimmik sumiginnaaneq pillugu akiligassaq januaari 2020-meersoq.
- Inissiaatileqataigiiffimmut saaffiginnissutit 26. oktobari 2019-
- Maalaarutinnut ilassutit juuli 2020-meersoq.
- Inissiaatileqatigiiffiup suliaq pillugu oqaaseqaataa oktobari 2020-meersoq.
- Inissiaatileqatigiiffimmiit assit ulloq 13. oktobari 2020-mi
- Oqarasuaatikkut oqaloqatiginninnermi nalunaarusiaq oktobari 2020-meersoq
- Tusarniaanermi akissutit oktobari 2020-meersoq.
Nassuiaat:
Ulloq 1. apriili 2020 Ineqarneq pillugu Maalaaruteqarfimmut inissiaatileqatigiiffik aqqutigalugu najugaqarfikut YYX pillugu maalaaruteqarputit.
Attartornermut isumaqatigiissummi takuneqarsinnaavoq, najugaq ulloq 1. marsi 2018-imi tigusimagit.
Inissiaq 94,20 m²-iuvoq 4-nillu ineerartaqarluni.
Najukkannit nutsernissannut ulloq 31. decembari 2019 killiliussimavat, najugarlu ulloq 10. decembari 2019-imi nakkutilliiffigineqarluni.
Nakkutilliinermi nalunaarusiaq 10. decembari 2019-imeersoq malillugu, najugaq nalinginnaasumik iluarsartuunneqartussaavoq, iikkat qilaarlu qalipanneqarlutik naterlu lakkerneqarluni.
Taassuma saniatigut oqaatigineqarpoq, najugaq eqqiarneqassasoq pisussaaffimmillu sumiginnaaneq pillugu iluarsartuunneqassasoq.
Aammattaaq oqaatigineqarpoq, listit, igalaat saavi, kiassaatit, matut majuartarfiillu sinaakkutaat pisussaaffimmik sumiginnaaneq peqqutaalluni qalipanneqartussat.
Naggataatigut oqaatigineqarpoq, inimi sinittarfinnilu nateq qapiarneqassasoq, sinittarfimmilu ataatsimi sikaaviup matua taarseneqarluni.
Nakkutilliinermi nalunaarusiaq ilinnit atsiorneqarsimanngilaq.
Ulloq 10. maaji 2021 Ineqarneq pillugu Maalaaruteqartarfimmut oqarasuaatikkut ilisimatitsiivutit, najukkamit nutsernermi nakkutilliinermut ilaasimannginnavit nakkutilliinermut nalunaarusiaq atsiorsimanngikkit, tassanngaannartumik aallartariaqarsimanerit peqqutaalluni.
Inissiaatileqatigiiffiup ulloq 10. maaji 2021-mi Ineqarneq pillugu Maalaaruteqartarfimmut attartornermut isumatigiissutip ulloq 30.
oktobari 2019-imeersup ilinnit atorunnaartinneqarnera pillugu uppernarsaammik nassiussivoq.
Tassani inissiaatileqatigiiffiup oqaatigaa, najukkamit nutsernermut atatillugu nakkutilliineíssaq pillugu oqarasuaatikkut attavigisimagaatit, tassanilu ilisimatitsiisimasutit, novembari qaammammi nakkutilliinissamut piffissamik nalunaaruteqarumaarlutit.
Inigisavit qimanneranut atatillugu akiligassami 26. marsi 2020-meersumi takuneqarsinnaavoq, 15165 koruuninik nalinginnaasumik iluarsartuutsitsinermut 22 %-mik ilanngaaseqqaarnagit, isumaqartoq inigisanni qaammatit amerlassusaat naapertorlugu, akiligassitsissimavutit.
Aammattaaq takuneqarsinnaavoq, pisussaaffimmik sumiginnaaninnut 32597 koruuninik aamma ineqarnermut akiitsumik akileqquneqartumik 7406 koruuninik nalilinnik akiligassitsissimasutit.
Naggataatigut 14349 koruunit qularnaveeqqummut akilersimagitit takuneqarsinnaavoq.
Taamaattumik inissiaatileqatigiiffimmut katillugit 37482,70 koruunit akilertussaavatit.
ZZX-mit ulloq 13. decembari 2019-imi akiligassaq nassiunneqarnikoq malillugu, 4925 kouruuni.
ZZX-mit akiligassat ulloq 6. januaari 2020-mi nassiunneqarnikut malillugit, najugaq pisussaaffimmik sumiginnaaneq peqqutaalluni katillugit 27672 koruuninik nalilimmik iluarsartuunneqarpoq.
Ineqarneq pillugug Maalaaruteqartarfimmut maalaarutinni takuneqarsinnaavoq, nutsernermi akiligassaq maalaarutigigit.
Oqummut pasitsaassineq suliarinninnerlu pillugit unamminerit sivisunikuusoq oqaatigaat.
Inissiaatileqatigiiffimmut saaffiginnissutinni 26. oktobari 2019-imeersumi oqaatigaat, ilaquttatillu piffissami 16. aggusti 2019-imiit 3. oktobari 2019 tikillugu utaqqiisaasumik najugaqarsimasusi, najugassi nutarterneqarnera pissutaalluni.
Oqaatigaat paasisimanagu sooq najugarsi taama sivisutigisutigisumik nutarterneqarnersoq, kisianni oqummut tunnganeranik ilimasussimavutit.
Taassuma saniatigut oqaatigaat, inissiaatileqatigiiffimmut najukkamut 2018-imi nutserassili najugaq misissoqqusimagakku.
Aammattaaq oqaatigaat, ilaquttatillu najukkassi pissutsit peqqutaallutik timikkut akornguteqalersimasusi, akorngutisilu najukkamut uteqqinnissinni takkuteqqissimallutik.
Naggataatigut oqaatigaat, najukkamit ulloq 1. decembari 2019-imi nutsersimallutit.
Ulloq 8. juuli 2020 Ineqarneq pillugu Maalaaruteqartarfimmut oqaatigaat, ilaquttatillu najukkami pissutisit peqqutaallutik timikkut akornguteqalersimasusi, najukkamullu nutseqqammiinnarlusi oqoqarneranik malugisaqarsinnaavutit.
Aammattaaq oqaatigaat, nakkutilliisumit najukkap misissorneqannginnerani arlaleriarlutit inissiaatileqatigiiffimmut saaffiginnissimasutit.
Tassunga atatillugu oqaatigaat, najukkami iikkap putoornerani iluarsartuusaaginnarsimagaat. Pisattasi piiaqqaarnagit kissassaammik aallartiisimapput, najugarlu pujoralaannanngorlugu.
Matuma kingorna najugaq, ini qalianilu sinittarfeeraq minillugu, qalipanneqarpoq, mininneqartut aatsaat najukkamit nutsileravit qalipanneqarlutik.
Qularnaveeqqut utertinneqarsimanngitsoq oqaatigaat, tassani inissiaatileqatigiiffiup qalipaasup qalipaareernerani qularnaveeqqut sinneqanngitsoq nalunaarutigisimavaa.
Naggataatigut oqaatigaat, akiitsumut akileeqqussummik 7400 koruuninik nalilimmik akiligassaqarlutit, uffa akiligassat akilersortuaannaritit.
Inissiaatileqatigiiffik ulloq 13. oktobari 2020-mi Ineqarneq pillugu Maalaaruteqartarfimmut oqaatigaa, najukkamit nutserninnut atatillugu najukkap pisussaaffimmik sumiginnangaasimanera uppernarsineqarsimasoq, tamannalu najukkamit nutsernermut akiligassamut qaffassaataasimasoq.
Tassunga atatillugu inissiaatileqatigiiffiup Ineqarneq pillugu Maalaaruteqartarfimmut assinik nassiussivoq, tassanilu najukkap qanoq issusaa najukkamit nutsernermi qanoq isikkoqarnersoq takuneqarsinnaavoq.
Ulloq 21. oktobari 2020 Ineqarneq pillugu Maalaaruteqartarfimmut oqarasuaatikkut nalunaarputit, najukkamit nutsernermut akiligassaq isumaqatiginagu. Paasinnittariaatsit malillugu, inissiaatileqatigiiffiup najugaq najukkamit nutsernermi nalinginnaasumik iluarsartuunnagu, najugaq oqoqarnera peqqutaalluni iluarsartuunneqarsimasoq.
Ulloq 21. oktobari 2020 Ineqarneq pillugu Maalaruteqartarfimmut oqaatigaat, inissiaatileqatigiiffimmut ersiutit uteqqittut pillugit ilisimatitseereeraluarlutit, najukkap iluarsartuunneqareernerata kingorna suliaq misissorneqaqqissimanngitsoq.
Aammattaaq oqaatigaat, oqarasuaatikkut, mailikkut namminerlu takkulluni saaffiginnissutisi iliuuseqarfigineqarsimanngitsut.
Naggataatigut oqaatigaat, oqoqarneranut taarsiiffigineqarsimanak.
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaanni nr. 2, 12. maaji 2005-imeersumi § 77 naapertorlugu Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Naqqit nutaamik lakkersimasutut isikkoqassapput, taamaattorli tak. imm. 3. Peqqussummi tassani § 79, imm. 1 aamma imm. 2 naapertorlugit, attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat.
Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik 7-nik siumut ilisimatitsinermigut attartortoq misissuinermut peqataaqqullugu noqqaaffigissavaa.Imm. Peqqussummi tassani § 84, imm. 1, nr. 2 naapertorlugu, Ineqarneq pillugu Maalaaruteqarfiup naammagittaalliuutit tigusat tulliuttut ukununnga tunngasut suliarisinnaatitaavai:
- Ineqarnermut akiliutinik qaffaanissamik siumoortumik ilisimatitsisarnermi piumasarisat, § 28, imm. 2.
- Aserfallatsaaliuineq iluarsaassinerlu, § 45.
- Inissiap iserterfigineqarnerani qanoq issusia, § 47.
- Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55.
- Attartortup attartukkaminik atuinera (torersaarnissamik malittarisassanik unioqqutitisinerit), § 50.
- Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), §§ 58-62.
- Inissiamit aninermi inissiap qanoq issusia (iluarsaassineq nalinginnaasoq), § 77.
Aalajangersagaq tamakkiisuuvoq.
Naliliineq:
Ineqarneq pillugu Maalaaruteqartarfik isumaqarpoq, najugakunni, YYX- mi nalinginnaasumik iluarsartuussineq akilissanngikkit.
Attartornermi peqqussummi § 79, imm. 1 naapertorlugu, attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq nakkutilliinermut peqataaqqullugu noqqaaffigissavaa.
Ineqarneq pillugu Maalaaruteqartarfiup pingaartippaa, nakkutilliinermi nalunaarusiaq malillugu ulloq 31. decembari 2019-imi atuutilertumik najugaq tigummiunnaarit.
Ilaanngitsutit ulloq 10. decembari 2019-imi najukkamit nutsernermi nakkutilliineq ingerlanneqarpoq.
Inissiaatileqatigiiffiup ulloq 30. oktobari 2019-imi Ineqarneq pillugu Maalaaruteqartarfimmut attartornermut isumatigiissutip ilinnit atorunnaartinneqarnera pillugu uppernarsaammik nassiussivoq, tassanilu atuarneqarsinnaavoq, najukkami nakkutilliinissanut piffissamik isumaqatigiissusiortoqassasoq.
Ulloq 10. maaji 2021 inissiaatileqatigiiffiup Ineqarneq pillugu Maalaaruteqartarfimmut oqaatigaa, najukkamit nutsernermut nakkutilliinissaq pillugu oqarasuaatikkut attavigisimagaatit, tassanilu ilisimatitsiisimallutit, novembari qaammatip ingerlanerani nakkutilliinissamut piffissamik nalunaaruteqarumaarlutit.
Inissiaatileqatigiiffimmut najukkamit nutsernermi nakkutilliinissamut piffissamik nassiussaqarsimanngilatit, taamaattumik nakkutilliineq sooq ulloq 10. decembari 2019-imi ingerlanneqarsimanersoq ersarinnani.
Taamaattumik Ineqarneq pillugu Maalaaruteqartarfik isumaqarpoq, inissiaatileqatigiiffiup najukkamit nutsernermut atatillugu nakkutilliinissamut aggeqqussummik ullut arfineq-marluk sioqqullugit ilisimatissimanngikkaatit, taamaattumillu attartornermut peqqussummi § 79, imm. 1 naapertorlugu piumasaqaatit naammassisimanagit.
Inatsimmi toqqaannartumik nutsernermi nakkutilliineq pillugu maleruagassaqanngikkaluartoq, Ineqarneq pillugu Maalaaruteqartarfiup attartornermi peqqussutip attartortumik illersuisussatut siunertarigaa nalilerpaa, taamaattumillu attartortitsisup allakkatigut aggeqqusisimannginnera inatsisitigut unioqqutitsinertut nalilerlugu.
Tamanna tunngavigalugu ataatsimiissitaliap naggasiuppaa, attartortitsisup nalinginnaasumik iluarsartuussinermut akiligassat pillugit akiliitissinnaanngikkaatit.
Ineqarneq pillugu Maalaaruteqartarfik isumaqarpoq, inissiami eqqiaaneq akilissagit.
Tassunga tunngaviuvoq, najugaq attartoreerlugu nutsernermi eqqiarneqaqqaartussaammat.
Ineqarneq pillugu Maalaaruteqartarfiup pingaartippaa, inissiaatileqatigiiffik assinik nassiussaqarnikuusoq, tassanilu najukkamit nutsernermut atatillugu eqqiarneqarsimanngitsoq takuneqarsinnaavoq.
Aalajangiineq:
Ineqarneq pillugu Maalaaruteqartarfik isumaqarpoq, najugakunni, YYX- mi nalinginnaasumik iluarsartuussineq akilissanngikkit.
Ineqarneq pillugu Maalaaruteqartarfik isumaqarpoq, inissiami eqqiaaneq akilissagit.
Tassa imaappoq maalaarutit ilaannakuusumik isumaqataaffigineqarpoq. Akiliutigisimasavit utertinneqarnissaannut pisinnaatitaaffeqarputit.
Taamaattumik Ineqarneq pillugu Maalaaruteqartarfimmut saaffiginneqquneqarputit konto normut tunniunnissaa siunertaralugu.
Ineqarneq pillugu Maalaaruteqartarfiup aalajangiineri Namminersornerullutik Oqartussanut (Namminersorlutik Oqartussanut) kommuninullu inissianik attartortitsisuusunut pituttuisumik sunniuteqarput, § 86, imm. 6 naapertorlugu.
Ineqarnermut Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat soorlu maani pisumi taava tamanna Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaat nr. 27,
- novembari 2008-meersumi § 11 naapertorlugu, iluarsisassat Ineqarneq pillugu Maalaaruteqartarfiup aalajangiinerata saqqummiunneqarnerata kingorna kingusinnerpaamik sapaatit akunnerisa marluk qaangiunnerini iluarsineqarsimassapput.
Naammagittaalliuuteqarnissamut ilitsersuut:
Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2, 12. maaji 2005-imeersoq kingusinnerusukkullu allanngortinneqartumi, § 86, imm. 7 naapertorlugu.
Ineqarneq pillugu Maalaaruteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaata Eqqartuussivianut tunniunneqassapput.
Inussiarnersumik inuulluaqqusillunga
Naja Joelsen
Ineqarneq pillugu Maalaaruteqartarfimmi siulittaasoq
Assilinera Inissiaatileqatigiiffimmut nassiunneqarpoq. Attartorluni normu innersuutigineqarpoq: XX-XXXX-XXXX