Avatangiisit Illersorneqarnissaat pillugu Naammagittaalliuuteqartarfiup suleriaasia 9. aggutsi 2021-meersoq

Avatangiisit innarlitsaaliorneqarnissaanik Inatsisartut inatsisaat nr. 9, 22. novembari 2011-meersumi § 61, imm. 5 naapertorlugu allanneqartut aalajangiunneqarput: 

• 1. Ataatsimiititaliaq allakkatigut imaluunniit ataatsimiinnermi aalajangiisassaaq. Allakkatigut aalajangiussat ingerlaannartumik aalajangiunneqartassapput.

  Imm. 2.  Ataatsimiinnerit siulittaasup peqquteqarluni ataatsimiisitsineri, aallaaviusumik digitalitigut ingerlanneqartassapput.

  Imm. 3.  Ataatsimiigiaqqusinernut kingusinnerpaamik ullut 14-it sioqqullugit aggersaasoqartassaaq, siulittaasoq allanik tuaviuussassanik saliassaateqalersimani allatut aaliangiisimanngippat.

  Stk. 4.  Ataatsimiinnermut aggeqqusinermi ullormut oqaluuserisassat ilanngullugu nassiunneqassaaq, taannalu sapinngisamik sulianik suliassanngortinneqarnikunik imaqassaaq, atuagassiartaanillu suliassamik suliarinninnissamut pisarialinnik ilanngussaqarluni.

  Stk. 5.  Ataatsimiinnerit kalaallisut, danskisut oqaatsilluunniit tamaasa oqaaseralugit ingerlanneqarsinnaapput. Oqalutsimik pisariaqartitsinermi tamanna Allaffeqarfimmut ataatsimiinnissamut ullut qulit tikitsinnagit nalunaarutigineqassaaq.

  Stk. 6.  Allaffeqarfik ataatsimiititaliap ataatsimiinnerani taasisinnaatitaanani ilaassaaq. 

• 2. Ataatsimiititaliaq Atuisartoqarnermut Unammilleqatigiinnermullu Aqutsisoqarfiup ingerlataanik allaffeqarfeqassaaq.

  Stk. 2. Atuisartoqarnermut Unammilleqatigiinnermullu Aqutsisoqarfiup naammagittaalliuutigineqartut allaffeqarfimmi ataatsimiititaliamut ingerlateqqinnginnerini piareersaqqaartassavai, matumani suliamut attuumassuteqartunit suliami paasissutissanik noqqaanerit, aalajangiussassamut tunngavissamik piareersaalluni, ataatsimiigiaqqusinerit il.il.

  Stk. 3. Allaffeqarfiup aamma ataatsimiititaliamut saaffiginnissutit akissuteqarfiginissai isumagisassavai.

  Stk. 4. Allaffeqarfiup ataatsimiititaliap allakkatigut taasinissaanut aalajangiussat suliaralugit piareersartassavai.

• 3. Suliat allaffeqarfimmiit aalajangiussassanngorlugit ataatsimiititaliamut ingerlateqqinneqartassapput, tassani ataatsimiititaliap suliarisinnaaniassammagit.

  Stk. 2. Ataatsimiisitaliami aalajangiussaq aqutsisoqarfiup tunngavissatut pissarsiaa tunngavigalugu aalajangiunneqartassaaq. Ataatsimiititaliap suliami paasissutissanik allanik noqqaanerq peqqutigalugu suliap suliassanngortinnera kinguartissinnaavaa.

  Stk. 3.  Ataatsimiititaliap suliaq ataatsimiinnermi suliarinngippagu, digitalikkut attaveqarlutik suliat allakkatigut suliaralugillu taasisitsissutigisassavaat.

  Stk. 4.  Aalajangiussaq taasinermi amerlanerit tunngavigalugit aalajangiunneqartassaaq. Aalajangiussaq akerliusoqarani aalajangerneqarsimanngippat, aalajangiussami ikinnerussuteqartunit tunngavigineqartoq pillugu oqaaseqaammik ilanngusisoqassaaq. 

• 4. Allaffeqarfik najoqqutassiaareersuni ingerlasunilu apeqqutit pillugit sulianik aalajangiussaqassalluni piginnaatinneqarpoq.

  Stk. 2.  Ataatsimiititaliaq ataatsimiinnerni Allaffeqarfimmi aalajangiunneqarnikut pillugit ilisimatinneqartassaaq. 

• 5. Ataatsimiititaliami ilaasortaq kisimiilluni aalajangiusseqqusaanngilaq, aalajangiussisunut ilaaqqusaanngilaq imaluunniit suliamik suliarinninnermut arlaatigut sunneeqqusaanngilaq, aamma ilaasortaq Pisortat ingerlatsineranni suliassat suliarineqartarnerat pillugu Inatsisartut inatsisaat naapertorlugu attuumavallaarpat.

  Stk. 2.  Ilaasortaq, sammineqartoq pillugu qanippallaarnissaa ilimanaateqarsinnaasoq pillugu ilisimannikkuni, tamanna Allaffeqarfimmut piaartumik nalunaarutigineqassaaq.

  Stk. 3.  Ataatsimiititaliaq ilaasortamik pineqartumik qanippallaarnera pillugu ilaatitsinani aalajangiissaaq.

• 6. Ataatsimiititaliami ilaasortaq Pisortat ingerlatsineranni suliassat suliarineqartarnerat pillugu Inatsisartut inatsisaat naapertorlugu allanut tusarliussisussaannginneq malittussaavaa. Ilaasortap imaluunniit sullissisup allanut tusarliussisussaannginnera paasissutissanik tamanik maalaaruteqarnermi ataatsimiititaliamut sunniuteqarsinnaasumik ilisimalikkat pillugit tusarliussisussaannginnermik imaqarpoq, paasissutissallu pisunut, suliffeqarfimmi aningaasaqarneq pillugu suliffeqarfimmilu pissutsinut tunngassuteqarsinnaapput, aammattaaq paasissutissat allat suliamut pingaaruteqartunut tunngassuteqarsinnaallutik.

Pipaluk Lynge-Rasmussen

Avatangiisit Pinngortitallu Illersorneqarnissaat pillugu Maalaaruteqarnermi ataatsimiititaliap siulittaasua