Siusinaartumik pensionisiannut tapi pillugu G Kommuneata ulloq 13. december 2007 aalajangiinera naammagittaalliuutigisat Isumaginninnermi Naammagittaalliuuteqartarfiup ulloq 25. juni 2010 suliaraa imatullu
Aalajangiilluni
G Kommuneata aalajangiinera atortussaatinneqarpoq. Tamanna isumaqarpoq illit naammagittaalliuutinni taperserneqanngitsutit.
Suliaq aalajangiiffigineqassaaq siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq aamma pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq naapertorlugit.
Nassuiaat:
Ulloq 13. december 2007 nammineerlutit saaffiginnillutit G Kommuneat siusinaartumik pensionisiannut tapimik qinnuteqarfigaat.
G Kommuneat ulloq 13. december 2007 suliaq pillugu aalajangiivoq, aalajangiinermilu oqaasiinnakkut itigartinneqarputit.
Allakkatigut 18. december 2007 ullulerneqartutigut G Kommuneata aalajangiinera Isumaginninnermi Naammagittaalliuuteqartarfimmut naammagittaalliuutigaat.
Naammagittaalliuutinni ilaatigut allapputit, aningaaserivimmit atorlutit illusisimallutit, kisianni ineqarnermut aningaasartuutitit, imaappoq aningaaserivimmi atukkannut naafferartumik akilersuutitit siusinaartumik pensionisiannut tapimik pissarsisinnaanerit takuniarlugu naatsorsuinermi ilanngunneqaratik. Allapputit aningaaserivimmit atukkannut akilesukkavit saniatigut innaallagissamut, eqqagassanut anartarfinnut, ikummatissamut akiliisarlutit, utoqqalinersiallilli allat ikummatissamik akeqanngitsumik pisartut, illilli taamatut pineqarnak.
Paasissutissat suliamut tunngassuteqartut Isumaginninnermi Naammagittaalliuuteqartarfimmut nassiunnerinut atatillugu G Kommuneata oqaatigaa, illit nammineq illusiutissannik aningaaserivimmit atorsimagavit, taamaammat illit nammineq atukkavit taarsersorneri akilertartussaallugit, inatsisit oqartussaasut taamaattunut ikiorsiisinnaanerannut periarfissiinngimmata. Aammattaaq kommuni allappoq, illit ataasiarnak tamanna pillugu nassuiaanneqartarsimasutit, kommunilu nangilluni allappoq, aningaaserivimmut taarsersuininni akilersuutitit kommunip naatsorsuinerani ilaatinneqarsimagaluarpataluunniit inummut tapimik tunineqarsinnaanngitsutit.
Inatsisitigut tunngavigisat:
Siusinaartumik pensionisiat pillugit Inatsisartut peqqussutaanni nr. 4-mi, 7. maj 2007-imeersumi § 15 malillugu inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiartumik ikiorsiissutitut.
Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi aalajangiinerit allaganngorlugit nalunaarutigineqartarnissaat piumasaanngilaq. Taamaattoq pisortat ingerlatsineranni aalajangiinerit allaganngorlugit nalunaarutigineqartarnerat ileqquuvoq kusanartoq.
Peqqussummi pineqartumi § 23 malillugu aalajangiinermik oqaasiinnakkut nalunaarfigineqartup aalajangiineq imminik tapersiisuulluinnanngippat piumasarisinnaavaa aalajangiinermut tunngaviusoq allaganngorlugu piumallugu. Tamatuminnga qinnuteqaat oqartussaasunut saqqummiunneqassaaq aalajangiinermik nalunaarutip suliami peqataasumit tiguneqarnerata kingornagut ullut 14-it qaangiutsinnagit.
Peqqussummi pineqartumi § 22 malillugu aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.
Peqqussummi pineqartumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.
Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.
Naliliineq:
Isumaginninnermi Naammagittaalliuuteqartarfik isumaqarpoq G Kommuneata aalajangiinera allaganngorlugu ilinnut tunniunneqartariaqarsimagaluartoq, pissutigalugu aalajangiineq ilinnut tapersiisuulluinnanngimmat.
Taamaattoq Isumaginninnermi Naammagittaalliuuteqartarfik isumaqarpoq G Kommuneata aningaasaqarninnut tunngatillugu naatsorsuinera eqqortuusoq, tassani takuneqarsinnaalluni illit siusinaartumik pensionisiatit atorlugit imminut pilersorsinnaassuseqartutit. Taamaattumik Isumaginninnermi Naammagittaalliuuteqartarfik aalajangiinerup allanngortinnissaanut tunngavissaqanngilaq.
Aalajangiineq:
G Kommuneata aalajangiinera atortussaatinneqarpoq.
Inussiarnersumik inuulluaqqusillunga
Naja Joelsen
Siulittaasoq.