F marsip 4-ni 2010 pisortanit ikiorsiissutinik naatsorsuinera pillugu maalaarutit, Isumaginninnermi Naammagittaalliuteqartarfiup apriilip 8-ni 2011 suliaraa imalu
AALAJANGIILLUNI:
Tunngavilersuutaa allanngorlugu, F naatsorsugaa atuutsinneqaannassammat, naammagittaalliutit taperserneqanngilaq.
Suliaq pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq naapertorlugu aalajangerneqarpoq.
Nassuiaat:
Ilinniartuusutit qaammammullu 3.587 koruuninik pisartagaqartutit ilisimatitsissutaavoq.
Akiligassat tamaasa akilereerlugit illit paniillu qaammammut 1.500 koruunit inuussutissarigisi ilisimatitsissutigaat.
Tamanna tunngavigalugu F aningaasatigut ikiorserneqarnissamik noqqaaffigaat.
F marsip 4-ni 2010 aningaasaqarnerit naatsorsoreerlugu 2.334 koruuninik ikiorserpaatsit.
Kommunip naatsorsugai Isumaginninnermi Naammagittaalliuteqartarfimmut allakkatigut marsip 11-ani -23-anilu 2010 maalaarutigaatit.
Allaffimmiutut ilinnialersimanerit kisimiillutillu meeqqamik pilersugaqarnerit ilisimatitsissutigaat.
Qaammammut 3.587 koruunit ilinniagaqarnersiutisiarisarlugit ilisimatitsissutigaattaaq.
Kommunip ikiorsiissutiginiagai ilinnut paninnullu qaammammut inuussutiginiassallugit naammanngitsutut nalilerpatit.
Aningaasanik inuuniarnermut atugassanik amigartoornerit allakkanni oqaatigigukku, paniit annaasinnaanerarlugu sullissisuppit oqarsimanera, naammaginngilat.
F suliamut tunngatillugu allagaatit nassiunneqarneranni, 2010-mi januaarimiit kommunip aningaasatigut ikiorsiissutigisarsimasaanik naatsorsuisarneq nassuiaatigineqarpoq.
Inatsisit tunngaviusut:
Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq § 4 imm. 2 naapertorlugu pisortanit ikiorsiissutinik tunniussisoqarsinnaavoq, pisariaqartitsineq ikiorsiissutit allat atorlugit pisinnaanngikkaangat.
Peqqussummi tamatumani § 7, nr. 1 naapertorlugu inuttut inooqataanermi pisimasumik nalaataqartoqarsimassaaq.
Peqqussummi tamatumani § 8 imm. 1 nr. 1 naapertorlugu innuttaasoq pisortanit ikiorserneqassaguni suliffissarsiortuusariaqarpoq.
Naliliineq:
Ilinniarnerpit nalaani pisortanit ikiorsiissutisisussaasimanngikkaluartutit, Isumaginninnermi Maalaarutinik Aalajangiisartoqatigiit naliliipput.
Kommunip ilinniartunut ilinniarnersiutilinnut aamma/imal. ilinniarnermik nalaani akissarsialinnut taamaasillutillu allamik tunngavilimmik pilersorneqartunut pisortanit ikiorsiissutinik tunniussaqarsinnaannginnera, Aalajangiisartoqatigiit pingaartippaatat.
Inooqatigiinnermi pisimasumik nalaataqarsimannginnerit ilinniarnerillu pissutigalugu suliffissarsiortuunnginnerit, Aalajangiisartoqatigiit pingaartipaataaq.
Taamaasillutit pisortanit ikiorsiissutisinissamut piumasaqaatinik eqquutitsinngilatit.
Aningaasatigut ikiorserneqarnissamut pisinnaatitaaffeqannginnerit ilisimanagu piaarinallu aningaasat tigusarsimanerat tunngavigalugit, pisortanit ikiorsiissutit pereersimasavit utertinneqannginnissaat Aalajangiisartoqatigiit erseqqissaatigissavaat.
Isumaginninnermi Naammagittaalliuteqartarfik kommunip sullissinera sullissisullu pillugu maalaarutinik suliaqarsinnaannginnini ilanngullugu ilisimatitsissutigissavaa. Taamaaliornissamut pisinnaatitaaffik Inatsisartut Ombudsmand-ianniippoq.
Aalajangiineq:
F aalajangiinera tunngavilersuutaa allanngorlugu atuutiinnassaaq.
Inussiarnersumik inuulluaqqusillunga
Naja Joelsen
Siulittaasoq.