T aggustip 22-ani 2007 pisortanit ikiorserneqarnissamut itigartitsinera pillugu maalaarutit Isumaginninnermi Naammgittaaliuteqartarfiup apriilip 8-ni 2011 suliaraa imalu
AALAJANGIIVIGALUGU:
Kingumoortumik pisortanit ikiorsiissutisisussanngorlutit T aalajangiinera allanngortinneqarpoq.
Suliaq pisortat ikiorsiisarnerat pillugu Inatsisartut peqqussutaat nr. 15 novembarip 20-ani 2006 –imeersoq aappariinnermilu inatsisitigut illersugaanerup Kalaallit Nunaannut atuutilersinneqarnera pillugu inatsit nr. 150 marsip 31-ani 1993-imeersoq naapertorlugit aalajangiivigineqarpoq.
Nassuiaat:
Siullermik maajip 15-ani 2007 meeqqavit nerisassaannut ernerpillu isaruassaanut akissannik pisortanit ikiorserneqarnissat qinnutigaat.
Aqaguani T sianerfigalutit, inunnik isumaginninnermik siunnersortimik oqaloqateqaqqaarnissat uippillu meeqqanut akilersuinnginnera pissutigalugit, pisortanit ikiorserneqarnissat itigartitsissutigaa.
Tamatumunnga atatillugu uiillu avinniarlusi atsioreersimanersi uiilli politeeqarfiliaqataajumasimanngitsoq pinngitsaalisinnaasimanngikkillu ilisimatitsissutigaat.
Meeqqat tallimat pilersugaralugit ilisimatitsissutigaattaaq.
Aalajangiineq allaganngorlugu piumasimagit aatsaallu aggustip 22-ani 2007 tigusimagit ilisimatitsissutigaat.
T suliaq pillugu allagaatiminik nassitsinermini ilassuteqanngilaq.
Allattugaatit naapertorlugit junnimiit oktobari qaammat 2006 tikillugu pisortanit ikiorserneqarsimavutit.
Allattugaatit naapertorlugit avissimanersi meeqqanullu akilersuutinik tigusaqartarnerit misissuiviginiarlugu, T pisortat ikiorsiissutaat oktobarip 25-ani 2006 unitsippaat.
Aalajangerneq oqarasuaatikkut nalunaarutigineqarmat uippit avinnermut pappiaqqanik atsiorumannginnera illit akissutigaat.
Februaarip 15-ani 2007 pisortanit ikiorserneqarnissaq itigartitsissutaasoq ilisimatitsissutaavortaaq, itigartitsinermullu sukumiisumik paasissutissiinnginneq, ilaatigut uippit akissarsiaasa allagartaannik tunniussinnginneq tunngavilersuutaavoq.
Kommune-p aalajangiinermini inatsisit tunngaviusutut innersuussaat tassaaput pisortanit ikiorsiissutit pillugu Inatsisartut peqqussutaat nr.10 novembarip 1-ani 1982-imeersoq § 3 aappariit pilersueqataanissamut pisussaaffiat kiisalu § 7 suliap paasiniaaviginerani peqataanissaq.
Akiligassat tamakkerlugit kisimiillutit pilersuisutut akilersinnaannginnakkit aggustip 10-ani 2007 pisortanit ikiorserneqarnissannik qinnuteqaqqipputit.
Aggustip 22-ani 2007 uippit akissarsiaasa allagartaannik takutitsinnginnikkut suliap paasiniaaviginerani peqataannginnerit pissutigalugu, pisortanit ikiorserneqarnissaq kommunemit itigartitsissutaavoq.
Aappariit pilersueqataanissamut pisussaaffeqarnerat pillugu Inatsisartut peqqussutaat nr. 15 novembarip 20-ani 2006-imeersoq § 2 kiisalu § 25 suliap paasiniaaviginerani peqataanissaq, Kommunip itigartitsinerminut tunngavigisatut innersuussutigai.
Inuit allattorsimaffianni paasissutissat naapertorlugit Y-ilu katissimallusi aappariippusi.
Ukiuni arlaqalersuni inooqatigiissimanngitsusi uiillu 2006-imi januaarip aallaqqaataaniit aalajangersimasumik najugaqarsimanngitsoq, inuit allattorsimaffianni takuneqarsinnaavortaaq.
Inatsisit tunngaviusut:
Inatsisartut peqqussutaat nr. 15 novembarip 20-ani 2006-imeersoq § 4 imm. 2 naapertorlugu pisariaqartitsineq ikiorsiissutit allat atorlugit pisinnaanngikkaangat pisortat ikiorsiisinnaapput.
Pisortat ikiorsiisarnerat pillugu Inatsisartut peqqussutaat nr. 15 novembarip 20-ani 2006-imeersoq § 5 imm. 1 naapertorlugu katissimalluni aappariinneq pillugu inatsit naapertorlugu, imaluunniit meeqqat inatsisitigut illersugaanerat pillugu inatsit naapertorlugu, pineqartoq allamut ikiorsiissutinik pisartagaqartumut akilersuuteqartussaatitaappat, pilersuisussaatitaaneq § 2-mi maleruagassat naapertorlugit atorunnaareersimagaluarpalluunniit,
pisortat akilersuuteqartussaatitaasumut piumasaqaataasunut atatillugu, ikiorsiissutigineqartartut pallillugit annertussuseqarsinnaasunik piumasaqaateqartussaatitaalissapput.
– 5, imm. 2 naapertorlugu Kommune innuttaasumut inatsisit qulaani pineqartut naapertorlugit ikiorserneqarnissamut pisinnaatitaaffeqartumut ikiorsiissuteqarsimappat, tapiissutit annertussusissaannik qaffannissaannilluunniit aalajangiisussatut inississaaq.
Pisortat ikiorsiisarnerat pillugu Inatsisartut peqqussutaat nr. 15 novembarip 20-ani 2006-imeersoq § 7 naapertorlugu kommunalbestyrelsi tassanngaannartumik pisariaqavissumik pissaaleqilernermi ikiorsiissuteqarsinnaavoq qinnuteqartoq:
1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.
Peqqussummi pineqartumi § 13 naapertorlugu pisortanit ikiorsiissutit ikiorsigassap inuuniarnikkut atugai, pilersugassat, akiligassat, sumiiffimmi pissutsit aapparisallu isertitai aallaavigalugit naatsorsorneqartarput.
Aappariinnermi inatsisitigut illersugaanerup Kalaallit Nunaannut atuutilersinneqarnera pillugu inatsit nr. 150 marsip 31-ani 1993-imeersoq
– 6, uniffik 1 aamma 2 naapertorlugit inooqatigiikkunnaaraluaraanniluunniit aappariilluni pilersueqataanissamut pisussaaffik atuutiinnarpoq taamatuttaaq aapparisamut meeqqanullu najortigisaanut pilersuinermi tapiissutaasussaq aningaasanngorlugu aalajangiivigineqassaaq.
Naliliineq:
Aggusti qaammat 2007-imiit pisortanit ikiorserneqarnissaq pisinnaatitaaffigigit Isumaginninnermi Naammagittaalliuteqartarfik naliliivoq.
Uiillu avinniarlusi inooqatigiikkunnaarnersi, uippillu akilersuinnginnera pissutigalugit, illit meeqqallu inuuniarnissinnut akissaqannginnavit, pisortanit ikiorserneqarnissamut pisariaqartitsileriataarnermi maleruagassat naapertorlugit piumasaqaatinik eqquutitsinerit, Isumaginninnermi Naammagittaalliuteqartarfiup aalajangiinermini pingaartippaa.
Aappariit inooqatigiikkunnaartut imminnut pilersoqatigiittussaanerat uippillu ilinnut meeqqanullu akilersuinissaanik peqquneqarsimasussaagaluarnera naliliinermi ilaatinneqarput.
Ikiorsiissutit qanoq annertutiginissaannik aalajangiinnginnermi akilersuutit taakku Kommune-p nammineq eqqartuussivikkut aalajangiivigitissinnaagaluarpai akilersugassallu akilerneqarnissaannik piumasaqaateqarluni.
T meeqqanut ilinnullu akilersuutinik Naalagaafiup sinniisua aqqutigalugu qinnuteqarsinnaaninnik siunnersorlutilluunniit Kommunep nammineq eqqartuussivikkoorluni akilersugassanik aalajangiivigititsisinnaagaluarnera, Isumaginninnermi Naammagittaalliuteqartarfiup uparuarusuppaa.
Pisortat ingerlatsineranni suliassat suliarinerqartarnerat naapertorlugu ingerlatsinerminut atatillugu paasissutissanik suliamut naapertuuttunik pissarsiniarnissaq Kommunep nammineq pisussaaffigimmagu, uippit akissarsiaasa allagartaannik pissarsisinnaasimannginnerit ilinnut meeqqannullu ajoqutaasimasariaqanngikkaluarpoq.
Tamatumunnga atatillugu uippit attavigisinnaannginnera pissutigalugu paasissutissanik pissarsiviginiarlugu attaviginiarnerani Kommune-p ikiorniarsimasariaqaraluaraatit, Isumaginninnermi Naammagittaalliuteqartarfik uparuaavoq.
Aapaasumut meeqqanullu tunngappat pisariaqartitsivinnermilu aalajangiinissaq paasissutissanik aappaasumut tunngasunik amigaateqarneranik patsiseqarpat meeqqat pisariaqartitaat ilaqutariillu nerisassaqarnissaat eqqarsaatigalugit, tamatuma suliap ingerlanerani aappaasumut ajoqutaannginnissaa, Isumaginninnermi Naammagittaalliuteqartarfiup oqaatigissavaa.
Aalajangiineq:
T aggustip 22-ani 2007 aalajangigaa allanngortinneqarpoq.
Pisariaqavitsillugu pisortat ikiorsiissutaannik illit meeqqavillu nerisassanut atugassassinnik aggustip 1-aniit 31-anut 2007 qanoq annertutigisunik pisinnaasimagaluarnerit T, maanna T missingersorlugu naliliivigissavaa.
Tamatuma saniatigut ilinnut meeqqanullu tallimanut akilersuutit qinnuteqaatiginissaanut T maanna T ikiussavaatsit.
Inussiarnersumik inuulluaqqusillunga
Naja Joelsen
Siulittaasoq.