Ineqarnermi Maalaaruteqartarfiup aalajangiisartut ukiumoortumik nalunaarutaat 2012

Siulequt

Ineqarneq pillugu maalaaruteqartarfiup ukiumoortumik nalunaarut saqqummiuppaa Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 83, imm. 4 naapertorlugu.

Nalunaarutip ukioq naallugu nalunaarsuut najoqqutarivaa imaqarlunilu naatsumik nassuiaammik Ineqarneq pillugu maalaaruteqartarfiup suliassarisaanik, naatsorsuutinik maalaarutit pillugit suliarineqarsimasunik aammalu sulianik naammassineqarsimasunik.

Nalunaarut aamma nassaassaavoq Ineqarneq pillugu maalaaruteqartarfiup quppersagaani: www.maalaarut.gl

Ineqarneq pillugu maalaaruteqartarfiup allatseqarfia isumaqatiginninnikkut tunniussisinnaavoq imaluunniit nassiussilluni ukiumoortumik nalunaarutip assinganik pappialanngorlugu.

Ineqarneq pillugu maalaaruteqartarfiup allatseqarfia attavigineqarsinnaavoq uunga:

Najugaqarfik: Hans Egedesvej 3 (B48), postboks 689, 3900 Nuuk
Mail: maalaarut@nanoq.gl
Oqarasuaat: 32 80 33
Fax nr.: 32 78 50

Nuuk, oktobari 2013

Naja Joelsen
Ineqarneq pillugu maalaaruteqartarfiup
Siulittaasua

 

Paasissutissat nalinginnaasut

Ineqarneq pillugu maalaaruteqartarfik pilersinneqarsimavoq Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 82, imm. 1 tunuliaqutaralugu.

Ineqarneq pillugu maalaaruteqartarfik nunatsinni allaffissornikkut qullersaavoq maalaaruteqartarfittut inissianut attartortittakkanut tunngassuteqartunut.

Allaffissornikkut assingusuuvoq eqqartuussiveqarnerup suleriaasaanut, attuumassuteqarani aqunneqaranilu iliuusissatsigut oqaaseqaateqarnissakkulluunniit pisortaqarfinniit imaluuniit allatigut, qanoq suliassat ataasiakkat ingerlanneqassanersut aalajangiiffigineqassanersullu.

Aalajangiisartoqatigiit aalajangiisarput attartortut attartortitsisullu akunnerminni aaqqiagiinngissutaannut Namminersorlutik kommunillu attartortittakkatut ineqarfiutaannut tunngassuteqartunut.

Aalajangiinerit atuuttussaatinneqartarput allanngortinneqarsinnaanatik inaarutaasuusarlutillu. Ineqarneq pillugu maalaaruteqartarfiup aalajangiussai taamaasillutik allanut allaffissornikkut qullersaqarfinnut ingerlateqqinneqarsinnaanngillat. Aalajangiussat taamaallaat kisimi ingerlatinneqarsinnaapput eqqartuussiveqarfinnut maleruagassat naliginnaasut naapertorlugit.

Ineqarneq pillugu maalaaruteqartarfiup siunertaa aamma unaavoq, aalajangiussai ersarissumik pingaarutilimmillu sunniuteqartinneqassasut siunnersuinikkut- aammalu suleriaaseq tunngavigalugu innuttaasunut, inissiaatileqatigiiffinnut allanullu taamatut sammisalinnut soqutiginnittunut.

Tamannalu tunngavigalugu Ineqarneq pillugu maalaaruteqartarfik qulakkeerinneqataavoq, tunngavilersorluakkanik eqqortunillu aalajangiisoqartarneranik, sumiluuniit illoqarfinni inissiat inissisimagaluarpata.

Maalaaruteqartarfiup atuutsinneqarnera erseqqinnerusumik naleqqussarneqarnikuuvoq attartortitsisarneq pillugu peqqussummi § 82-86-ip tungaanut.

 

Ineqarneq pillugu maalaaruteqartarfiup pisinnaatitaaffii

Ineqarneq pillugu maalaaruteqartarfiup pisinnaatitaaffii erserput attartortitsisarneq pillugu peqqussutip § 84, imm. 1-ianni.

Ineqarneq pillugu maalaaruteqartarfiup suliassaq maalaarut suliarisinnaavaa, attuumassuteqarpat sammisanut makkununnga:

  1.  Piumasaqaatit naliginnaasut naammassisassat ineqarnermut akiliutip qaffanneqarnissaanik kalerriisoqarpat.
  2. Aserfallatsaaliinernut iluarsartuussinernullu tunngassuteqartunut.
  3. Inigisap iserterfigineqarnerani isikkuanut tunngasut.
  4. Ikkussugassanut pitsanngorsagassanullu attartukkamut tunngasut (aalajangiisinnaatitaaneq).
  5. Attartortup attartukkaminik atuinera (ineqarfiup maleruaqqusaanik unioqqutitsinerit).
  6. Attartuisinnaatitaanerup allamut tunniunnera (inigisanik paarlaanneq, attartukkamik attartuisitsineq attartornerullu nanginneqarnera).
  7. Inigisap qimannerani isikkuanut tunngasut (nalinginnaasumik iluarsartuineq)

Nalinginnaasumik suleriaaseq imaappoq, Ineqarneq pillugu maalaaruteqartarfiup maalaarutit amerlanersaat suliarisinnaagai inissiaatileqatigiiffinninngaanniit aalajangiussaasimasut.

Ineqarneq pillugu maalaaruteqartarfimmut maalaaruteqarnissaq 150 kr.-imik akeqartinneqarpoq. Maalaaruteqartoq taamaallaat akiliuteqassaaq, suliap ingerlateqqinneqarnissaa suliarineqalerpat. Akiliut uterteqqinneqassaaq, paasinarsippat, attartortoq tamakkiisumik ilaannakortumilluuniit maalaarumminut taperserneqarsimappat.

 

Ineqarneq pillugu maalaaruteqartarfiup aaqqissuunneqarnera (ilaasortaqarnikkut):

Ineqarneq pillugu maalaaruteqartarfik aaqqissuussaavoq siulittaasoqarluni nalinginnaasunillu pingasunik siunnersuinermut ilaasortaqarluni.

Siulittaasoq tassumalu tullersortaa toqqarneqartarput Naalakkersuisumiit siunnersuusiorfigineqarnikkut Naalakkersuisut ilaasortaaniit, akisussaassuseqarfeqartuusumiit ineqarnernut tunngasuusunut. Toqqarneqartut tamarmik immikkut ilisimasaqartuussapput inissiaatileqatigiiffinnut tunngassuteqartunut imaluuniit naammassisaqarsimassalluni inatsisilerituutut kandidatitut soraarummeersimanermut uppernarsaateqassalluni.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Inissiaatileqatigiiffik A/S INI-miit.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut KANUKOKA-miit maalaaruteqartarfiullu ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Attartortut Nuna tamakkerlugu kattuffianiit IPK imaluunniit SIK, IMAK aamma PPK.

Taakku pingasut nalinginnaasumik ilaasortaasut sinniisuilu ilisimasaqartuussapput inissiaateqarnernut tunngassuteqartunut.

Ineqarneq pillugu maalaaruteqartarfiup aaqqissuussaanera malitseqarpoq taamaattumik, attartuisut attartortitsisullu soqutigisaqarfianniit sinniisoqartinneqarlutik.

Siulittaasoq:
Morten Nornild, Kalaallit Nunaanni Ilagiit.
Suppleant: Peter Sindal Lundsberg, advokat Nordic Law Group.

Maalaaruteqartarfimmut ilaasortat: 

  1. Josef Therkildsen, SIK
    Sinniisoq: Sofie Fleischer, SIK
  2.  Ken Nyborg, KANUKOKA
    Sinniisoq: Petur Gudmundsson, KANUKOKA
  3.  Kenneth Bøjler, A/S Boligselskabet INI
    Sinniisoq: Erik Ravn, ISERIT A/S

Ineqarneq pillugu maalaaruteqartarfik minnerpaamik ukiumut pingasoriarluni ataatsimiittarpoq. Ukioq 2012-mi siulittaasup pisarialittut nalilersimavaa sisamariarluni ataatsimiinnissaq. Ataatsimiinnerit ingerlanneqarsimapput marts-mi, august-mi, septemberimi aammalu november-mi.

Suliassat ataasiakkaarlugit siulittaasumiit atuarneqartarput, ataatsimiititaliallu tamarmiusup aalajangiiffigisarlugit. Suliassat aalajangiiffigineqartarput taasinerni amerlanerussuteqarnikkut, tassannga siulittaasoq ilaasortaatitaasullu tamarmik taasinermik ataatsimik naleqartinneqartarlutik. Taasinerni naligiissoqartillugu siulittaasup taasinera aalajangiisuutinneqartarpoq.

 

Ineqarneq pillugu maalaaruteqartarfiup ukioq 2012-mi sulinera

Siulittaasup nalunaarusiaa:

Ukioq 2012-mi Ineqarneq pillugu maalaaruteqartarfiup atuuttuunini erseqqissaassutigalugu suliniuteqartarsimavoq, soorlu KNR-i aqqutigalugu takutitassiaaqqatigut aammalu Inatsisigut Siunnersuisarfik-p IKIU-p suleqatigineratigut. Tamatuma kingunerisaanik suliat malunnaatilimmik amerleriaqqissimapput ukiunut siuliinut sanilliullugu, ilimanarluni ersarinnerulernissamik suliniuteqarnerulernerup kingunerisaanik.

 

Naatsorsueqqissaarneq

Ineqarneq pillugu maalaaruteqartarfik ukioq 2012-mi maalaarutinik tigusaqarpoq katillugit 48-nik nuna tamakkerlugu inigisanut attartortuniit. Naammassineqarput katillugit 40-it suliassat, taakkunannga maalaaruteqartarfiup ataatsimiinnerini qulit suliarineqarsimallutik, sinneruttullu qularnaveeqqummik akiliuteqanngitsoorsimanermik, imaluunniit amigartumik pisinnaatitaaffeqannginnermik peqquteqartumik tunuartinneqarsimallutik.

 

Agguataarneqarneri

Agguataarneqarneri suliat itigartitsissutaasut:

6 – itigartitsissutaapput akiligassamik akiliinngitsoorsimaneq tunngavigalugu.
20 – itigartitsissutaapput oqartussaaffeqarnerup killeqarneranik tunngaveqartumik
4 – tunuartiinnarneqarput maalaarutitut.

Scroll to Top