Sags nr.2012-067899
Kommune-p juunip arfineq pingajuani 18-ianilu 2012 pisortanit ikiorsiissutinut tunngatillugu aalajangiinera pillugu maalaarutit, Isumaginninnermi Naammagittaalliuteqartarfiup februaarip 15-ani 2013 suliarai imalu aalajangiivigalugit:
Aalajangiineq
Kommune-p aalajangiinera tunngavilersuutaasoq allanngortillugu atuutiinnassammat, maalaarutersi ilalerneqanngilaq.
Suliaq pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq tunngavigalugu aalajangiivigineqarpoq.
Nassuiaat:
Illit B juunip sisamaani 2012 initaannut qularnaveeqqusiissut akilersinnaajumallugu, Kommune-mut qinnuteqarputit.
Ilaatigut illit B suliffeqannginnerit suliffissarsiortuunnginnerillu innersuussutigalugu, juunip arfineq pingajuani 2012 kommunip qinnuteqaat itigartillugu illit M nalunaarfigaatsit. Kommunip aalajangiinermini inatsimmik tunngavigisaminik innersuussuteqanngilaq. Kommunip piffissaq maalaaruteqarsinnaanermut killiliussaq ilanngunnagu maalaaruteqarsinnaaneq oqaatigaat.
Paasissutissat naapertorlugit initaassinnut qularnaveeqqusiissummik akileereernissinni nerisassarsiutissaqannginnersi pissutigalugu, juunip 15-ani 2012 Kommune-mut pisortanit ikiorsiissutinik qinnuteqaqqippusi.
Kommune-p juunip 18-ani 2012 aalajangiinera naapertorlugu 108,94 koruuninik pisortanit ikiorsiissutisisinnaavusi. Kommunip aalajangiinerminut naatsorsuinermi inisimasoqarnersi taassumalu inimut akiliutip sisamararterutaanik akiliisussaanera tunngavilersuutigaa.
Kommunip pisortanit ikiorsiissutit pillugu Inatsisartut peqqussutaat nr. 15 novembarip 20-ani 2006 –imeersoq § 13 kingorna allannguuteqartinneqartoq tunngavilersuutitut innersuussutigaa. Kommunip inatsimmi aalajangersagaq issuaavigaa maalaaruteqarsinnaanermullu ilitsersuinermini maalaaruteqarsinnaanermut piffissaliussaq ilanngussimanagu. Suna pillugu inisimasup ineqarnermi akiliutip sisamararterutaanik akiliisussaasutut naliliiviginera, kommunip ilanngussimanngilaa.
Illit B allakkanni juunip 18-ani 2012 ullulikkanni kommunip aalajangigai Isumaginninnermi Naammagittaalliuteqarfimmut maalaarutigaatit. Maalaarutinni nerisassarsiutissaqannginnersi, illillu ernerit inersimasoq initaarnissinni, nammineq inigisaminit ilissinnut nuussimasoq oqaatigaat.
Inatsit tunngaviusoq
Pisortanit ikiorsiissutit pillugit Inatsisartut peqqussutaat nr. 15 novembarip 20-ani 2006-imeersoq § 7 naapertorlugu tassanngaannartumik pisariaqavissumik pissaaleqilernermi qinnuteqartoq inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat kommunalbestyrelsi pisortanit ikiorsiissuteqarsinnaavoq.
Naliliineq:
Pisortanit ikiorsiissutisisinnaasimangitsusi Isumaginninnermi Naamagittaalliuteqartarfik naliliivoq.
Suliami inooqataanikkut pisoqarneranik soorlu nappaateqalernermut, erninermut atatillugu sulinngiffeqarnermut, qimannermut/avinnermut assigisaannulluunniit tunngasunik paasissutissaqanngilaq.
Inuttut inooqataanermut atatillugu arlaannik pisoqarsimanngimmat pisortanit ikiorsiissutisisinnaanngilasi.
Pisortanit ikiorsiissutinik qinnuteqaatinik 2012-imi juunip arfineq pingajuaneersumik 18-aneersumillu naliliinermi, aalajangersagaq naapertuuttoq tassaasoq peqqussummi § 7, Isumaginninnermi Naammagittaalliuteqartarfiup matumani oqaatigissavaa.
inuttut inooqataanermi arlaannik pisoqarsimanersoq kommunip isummerfigeqqaassavaa. Ilissitulli ittuni taamaanngippat pisortanit ikiorsiisoqarsinnaanngilaq.
Taamaammat kommuni naatsorsuissanngimmat § 13-imut innersuussineq eqqortuunngilaq.
Nutaamik initaarniarnermi qularnaveeqqusiissummik akiliisoqartarnera ilisimareerissi, Isumaginninnermi Naammagittaalliuteqartarfiup oqaatigissavaa. Taamaammat inissiaatileqatigiinnut inimik attartornissamut isumaqatigiissusiortinnasi aningaasanik tamatumunnga atugassanik ileqqaarsimasariaqaraluarpusi.
Isumaginninnermi Naammagittaalliuteqartarfiup ineqarnermut akiliutinut tapiissutinik qinnuteqarsinnaanersi ilisimatitsissutigissavaa. Tamatumunngali atatillugu ineqarnermut akiliutinut tapiiffigineqarsinnaanersi aalajangiivigineqanngilaq.
Aalajangiineq:
Kommune-p juunip arfineq pingajuani 18-anilu 2012 aalajangiinera atuutiinnassaaq.
Pisortanit ikiorsiissutissinissamut pisinnaatitaanngilasi.
Juunilli 18-ani 2012 pisortanit ikiorsiissutisiasi utertsissanngilasi.
Inussiarnersumik inuulluaqqusillunga
Naja Joelsen
Siulittaasoq