Atuisutut qarasaasiaakkut pisiniarnermi utertitsinissamut ullut 14-it tunngaviusumik periarfissaapput. Imaappoq pisiap tiguneraniit ullut 14-it qaangiutsinnagit pisiaq utertillugu akia pissarsiarineqarsinnaavoq. Timmisartukkulli angalanissamut bilitsinut tunngatillugu allanik maleruagassaqarpoq.
Taamaammat atuisut timmisartumut bilitsinik qarasaasiakkut inniminnerlugu pisiaqarsimagaluarunilluunniit, utertitsinissamut ullunik 14-inik periarfissaqanngillat.
Atuisut pisisinnaanermut isumaqatigiissusiorsinnaanerat pillugu inatsimmi- ilaatigut internetsikkut pisiniarnermi utertitsisinnaanermut maleruagassiisumi- timmisartumik angalanissanut tusarnaartitsinernullu bilitsinik utertitsisinnaaneq, maleruagassanut ilaanngillat. Timmisartumik angalanissamut tusarnaartitsinernullu bilitsinik inniminniinermi, tuniniaasup neqeroorutigippagu aatsaat utertitsisoqarsinnaavoq.
Bilitsi inniminnigaq kukkuneqarpat utertinneqarsinnaanngilaq:
Timmisartumut bilitsissavit inniminnikkavit kukkuneqarnera paasigukku taannattaaq utertissinnaanngilat. Ass. bilitsimik allanngortinneqarsinnaanngitsumik qaammatip ulluisa 20-anni inniminneereerlutit (nal ak. 24-it qaangiunneranni ulloq aallarfissaq allanngortinneqarsinnaanngitsumik) 22-ani -usussaasoq paasigukku, ullup aallarfissap allanngortinneqarnissaa piumasaqaatigisinnaanngilat.
Taamaammat nutaamik bilitsiseqqittariaqalersinnaanissat pinngitsoortinniarlugu, qarasaasiakkut timmisartumut bilitsimik inniminniininni mianersoqqissaarnissat pingaaruteqarpoq.
Timmisartortsiteqatigiit angalatitsiviilluunniit, inniminniinermiit nal. ak. 24-it qaangiutsinnagit allanngortitsissinnaanermik neqerooruteqarput. Tamanna pisinnaatitaaffiginngilat, piginneqatigiiffiilli ilaasa neqeroorutigissallugu aalajangigaraat. Taamaammat bilitsimik allanngortitsinissaq piumasaqaatigisinnaanngilat. Kiffartuussinermik tamatuminnga neqerooruteqartoqarnersoq nalornigukku, bilitsisiffiit attavigalugu qanoq periarfissaqarnerit apeqqutigisinnaavat.