Aalajangiineq
Ineqarneq pillugu Maalaaruteqarfik isumaqarpoq, inissiaatileqatigiiffiup erngerluni matut igalaallu ussiitsut iluarsaatissagai. Taamaattumik naammagittaalliuutit ilalerneqarpoq.
Nassuiaat:
Suliami erserpoq >>X<<-mi najugaqartutit. Maalaarutit naapertorlugu najugaqarfimmut ulloq 17. decembari 1997-imi isertersimavutit.
Ilisimatitsissutigineqarpoq inissiaatileqatigiiffimmut kiassaatip (radiator) aamma igalaat matullu ussiitsut iluarsaanneqarnissaat pillugit saaffiginnissuteqarsimasutit.
Ulloq 6. septembari 2014-imi kiassaatip (radiator) aamma igalaat matullu ussiinneri pillugit maalaaruteqarsimavutit. Tamatuma saniatigut ilisimatitsissutigaat iluarsaassinissamik suliaqarnissaq kinguartinneqartuartarnera.
Inissiaatileqatigiiffik 5 novembarimeersumi nassuiaammini ilaatigut ima allappoq:
”Igalaat matullu iluarsaanneqarsimannginnerannut tunngaviuvoq, inissiaatinut immikkoortortaqarfiit >>X<< aamma >>X2<< attuumassuteqarfiat, inissiaatileqatigiiffiup >>Inissiaatileqatigiiffik A<< kommunimi inissiaatinut allaffissorneq 1. januaari 2021-imi tiguarmaguli aningaasanik tigussaasunik peqannginnerat aammalu amigartooruteqarnera.
Tassanngaanniilli ukiumut ineqarnermut akit annertusiallattarnikuupput inissiaatinut immikkoortortaqarfimmi amigartooruteqarnera ukiuni tallimani ingerlaartuni aaqqiissutigineqarsinnaaniassammat. Ullorli manna tikillugu inissiaatinut immikkoortortaqarfik suli amigartooruteqarpoq, taamaammallu ineqartut ilimagisariaqarpaat ajoraluartumik suliassat pisariaqarluartut aammalu pinartut kisiisa suliarineqartarnissaat soorlu ukuusinnaapput: kissarsuutit ajortut aammalu inigisami kallerup inneranut ingerlaarfiit. Iluarsaassassaasut annertunerusut inissiaatinut immikkoortortaqarfik aningaasaqarluarnerulernissaanut utaqqisinneqartariaqarput.
Ulloq 10.09-2014 aallarnerfigalugu >>Inissiaatileqatigiiffik A<< >>illoqarfik/nunaqarfik 1<<-mi VVS-firma-mik >>illoqarfik/Nunaqarfik 2<<-miittumi kiassaatinik >>X2<<-imi aamma >>X<<-imiittuni (kiassaat asserpiaanik) iluarsaassinissaanik aningaasartuutinut akiliutissamik nassiussisimavoq. Tamatuma saniatigut >>Inissiaatileqatigiiffik A<< >>X<<-mi kiassaatinik aamma anartarfinnik ussiittunik iluarsaassinissaanik aningaasartuutinut akiliutissamik nassiussisimavoq.
Ulloq 29. septembari 2014-imi firma taanna >>X2<<-mi aamma >>X<<-mi kiassaatinik atornikunik taarsersuisimavoq allanik sussaqanngimmata. Kiassaat >>X<<-imiittoq aammalu >>X<<-mut kiassaasuusoq eqqiarneqarsimavoq aammalu qipisaataalu taarserneqarluni”
Inatsisitigut tunngavigisaq:
Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi, § 84, imm. 1, nr. 2-mi takuneqarsinnaavoq, Ineqarnermut Naammagittaalliuuteqartarfiup aserfallatsaaliuineq iluarsaassinerlu pillugit maalaarutit tiguneqartut suliarisassagai, takuuk § 45.
Peqqussummi tassani § 45-imi erserpoq, attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Naliliineq:
Ineqarneq pillugu maalaartarfik isumaqarpoq, >>Inissiaatileqatigiiffik A<< attartortumut >>U<<-mut sinniisuusoq aserfallatsaaliisussaatitaanerminik eqqortitsisimanngitsoq.
Peqqussummi tassani § 45-imi Imm. 1 aamma Imm 2-mi erserpoq, inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Taamatuttaaq aserfallatsaalissalluni attartortitsisup pisussaaffigaa. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Tassani ilaavoq attartuisoq nammineerluni aallaqqaammut aalajangissagaa aaqqissuussassat iluarsaatassallu sorliit pisariaqarnersut aammalu iluarsaanermi ingerlatsinerit qanorpiaq aallunneqassanersut.
Attartuisup aaqqissugassanik iluarsaassassanik naammattuugaqaruni attartuisoq pisussaatitaavoq attartuiffimminut taakkuninnga ilisimatitsissalluni aammalu aaqqiisoqarnissaanut tassunga atatillugu iliuuseqassalluni.
Inissiaatileqatigiiffimmit paasissutissat aallaavigalugit Ineqarneq pillugu maalaaruteqartarfik isumaqarpoq, kiassaammut radiatorimullu aaqqissorneqarnissaanut atatillugit attartortitsisoq aaqqissuisoqarnissaanut qisuariarsimasoq.
Inissiaatileqatigiiffimmit aamma attartortumit paasissutissiissutit tunngavigalugit Ineqarneq pillugu maalaartarfiup qularnarunnaarsippaa, matut aamma igalaat suli iluarsaanneqarsimannginnerat.
Attartorneq pillugu peqqussummi piffissaliussat ilaanngillat tassa qanoq piaartigisumik/sukkatigisumik amigaatinik pitsanngorsaasoqassanersoq taamaattumik aallaaviusoq tassaasariaqassaaq, attartortitsisup sapinngisamik piaarnerpaamik pisariaqartitanik iluarsaassinissaa.
Inissiaatileqatigiiffiup aningaasaqarnerup tungaatigut matunik igalaanillu iluarsaassinissamut periarfissaqannginnera pissutigalugu, attartortitsisoq nutarterinissamut allatulluunniit matunik igalaanillu ajortunngorsimasunik nungullarsimasunik aamma pisoqalisimasunik iluarsaassinissamut pisussaassutsiminik pinngitsoortitsinngilaq.
Taamaattumik inissiaatileqatigiiffik – attartortitsisoq sinnerlugu – sapinngisamik piaarnerpaamik inissiami matunik igalaanillu iluarsaassinissamik aallartitsisariaqarpoq, taamaaliornikkut taakku ussissiniassammata/suerfiujunnaarniassammata.
Aalajangiineq:
Inissiaatileqatigiiffik attartortitsisoq sinnerlugu sapinngisamik piaarnerpaamik inissiami iluarsaassisimanngilaq.
Taamaattumik inissiaatileqatigiiffik attartortitsisoq sinnerlugu sapinngisamik piaarnerpaamik inissiami matunik igalaanillu iluarsaassinissamik aallartitsisariaqarpoq.
Taamaattumik naammagittaalliuutit ilalerneqarpoq.
Akiliutigisimasavit utertinneqarnissaannut pisinnaatitaaffeqarputit. Taamaattumik qinnuigineqarpusi Ineqarneq pillugu maalaaruteqartarfimmut ilisimatitsissutigeqqullugu, kontomut sumut aningaasat ikineqarnissaat kissaatiginerlugu.
Naammagittaalliuuteqarnissamut ilitsersuut:
Ineqarnermut Naammagittaalliuuteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu. Attartortitsisup attartortullu akornanni aaqqiagiinnginneq eqqartuussivimmut tunniukkusunneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. attartortitsisup allaffeqarfittut aktiaatileqatigiiffianit isumagineqarsimagaluarpataluunniit.
Ineqarneq pillugu maalaaruteqartarfiup aalajangiineri Namminersornerullutik Oqartussanut kommuninullu, inissianik attartortitsisuusunut pinngitsoorani malinneqassapput, § 86, imm. 6 naapertorlugu.
Ineqarneq pillugu Maalaaruteqartarfik sinnerlugu
Naja Joelsen
Ineqarneq pillugu Maalaaruteqartarfiup siulittaasua