AALAJANGIINEQ
Ineqarneq pillugu Maalaaruteqartarfik isumaqarpoq Inissiaatileqatigiiffik nativit iluarsaanneqarnissaannut pisussaatitaasoq.
Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersoq kingusinnerusukkut allannguuteqartoq naapertorlugu aaliangiisoqarpoq.
Suliami allagaatit:
- Attartornermut isumaqatigiissut 13. juuli 2012-imeersoq (Ilanngussaq 1)
- Amigaatit allattorsimaffiat 11. juuli 2012-imeersoq (Ilanngussaq 2)
- Maalaaruteqartup Iserternermi nalunaarusiamut oqaaseqaatai 27. juuli 2012-imeersoq (Ilanngussaq 3)
- Inissiami atorfiliup eqqiaasoqarsimaneranik E-mail-ikkut nassiussaa 27. juuli 2012-imeersoq (Ilanngussaq 4)
- Ineqarneq pillugu Maalaaruteqartarfimmut 20. novembari 2013-imi maalaarut assinik ilanngussalik (Ilanngussaq 5)
- Inissiaatileqatigiiffik xx-ip maalaarummut oqaaseqaatai 10. februaari 2014-imeersoq (Ilanngussaq 6)
- Inissiaatileqatigiiffimmiit maileq kommunip inissiaatileqatigiiffiullu isumaqatigiinnerannut tunngasoq 24. juuni 2016-imeersoq
Nassuiaat:
Attartornermut isumaqatigiissut illit Inissiaatileqatigiiffiullu akornassinni pisumi erserpoq, inissiaq yy-miittoq ulloq 16. juuli 2012-imi tiguarsimagit.
Amigaatit allattorsimaffianni iserternermi nalunaarusiami 11. juuli 2012-imeersumi suliarineqarsimasumi erserpoq, isaariap majuartarfiata qullia aseroqqasoq, uffarfiup silaannarissarfia aseroqqasoq aammalu kissarsuutip qullia ikinneq ajortoq aammattaaq ammalortut equngasut. (Oqaatigineqanngilarli ammalortut suunersut.)
Misissuisimanermik nalunaarusiami erserpoq, arlaatigut amigaatinik naammattuugaqassagaluaruit tamanna Inissiaatileqatigiiffimmut isertereernerup kingorna ullut 14-init qaangiutsinnagit nalunaarutigeriissagitit.
Ulloq 27. juuli 2012 Inissiaatileqatigiiffimmut ilisimatitsivutit, siornatigut inissiami najugaqarsimasoq ilagalugu inissiami suliassaasinnaasut allattorsimagisi. Allakkami erserpoq, qaliani computeri ajortoq inissisimasoq aammalu kissarsuut eqqiarneqarsimanngitsoq.
Ilisimatitsivutit inissiamut iserternerup kinguninngua paasillugu eqqiaasoqarsimanngitsoq. Tamatumunga ilaapput iggavimmi ilisiviit, uffarfik aammalu qaliani ineeqqami aammalu init quleriit allersaanni igalaat. Aammattaaq ippernaat toqungasunit qernertunik simertitersimasut piupput aammalu silataani qamuteeraqarpoq.
Inissiami atorfiliup 27. juuli 2012-imi mailikkut Inissiaatileqatigiiffimmut ilisimatitsivoq, inissiaq eqqiarneqarnissaa isumannaarsimallugu.
Ulloq 20. novembari 2013-imi Ineqarneq pillugu Maalaaruteqartarfik ilinnit maalaarummik tigusivoq. Maalaarummi allassimavoq: ” Natermut tunngasoq. Ukiorpassuanngorput nateq takusarneqartalermat maannamullu qanoq iliuuseqarfigineqarnikuunani. Assit ilanngullugit nassiuppakka, neriuppunga piaartumik qisuariaateqartoqassasoq. Takuneqarsinnaasutut annertooq lakkerqanngilaq ilaatigullu itersaqarluni asuli miliinnakkanik. Qaliani takuneqarsinnaapput cigaritsikut nakkarnikut uulinnernneri. Kusananngilluinnartuupput. Neriuppunga piaartumik qanoq iliuuseqartoqassasoq.”
Ilisimatitsivutit Inissiaatileqatigiiffiup aalajangiinera oqaasiinnakkut pisimasoq.
Inissiaatileqatigiiffimmiit ulloq 24. juuni 2016-imi mailikkut tigusami erserpoq: ”Illuutillit zx kommuni aamma Namminersorlutik Oqartussat ilagalugit septembari 2010-mi aalajangerneqarpoq, illuni nalinginnaasumik iluarsaassisarneq taamaatiinnarneqassasoq. Taamanili illuni nutserfiusuni nalinginnaasumik iluarsaasineq aammalu eqqiaaneq pisimanngilaq, aningaasartuutit annertuallaalernerat pissutigalugu tamatumalu kinguneranik inissiat annertuumik eqqugaanikunut naapertuussinnaajunnaarmata.
Kommunip attartuisui neqeroorfigineqarnikuupput nammineerlutik qalipaasinnaanissaannut aammalu nunaqarfimmut qalipaatit atugassaasut pisinnaalertoqarnerani nassiunneqarsinnaasut. Aaqqissuiniarnermi attartuisut aasakkut umiarsuaq tikittartoq utaqqisariaqartarsimavaat qalipaatit qulimiguulikkut nassiunneqarneq ajormata.”
Inatsisitigut tunngavigisaq:
Ineqarneq pillugu maalaaruteqartarfiup piginnaasai Inissianik attartortitsisarneq pillugu Inatsisartut peqqussutaat nr. 2, 12. maaji 2005-imeersumi kingusinnerusukkullu allannguuteqartumi § 84-imi tamakkiisumik allattorneqarsimapput
Peqqussummi § 84 imm.1 nr. 2-mi erserpoq, Ineqarneq pillugu maalaaruteqartarfiup attartortut
inissiap iserterfigineqarnerani qanoq issusianut maalaarutaat suliarisinnagaat, tak. § 47.
Peqqussummi tassani erserpoq, Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, § 28, imm. 2 takuuk.
2) Aserfallatsaaliuineq iluarsaassinerlu, § 45 takuuk.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), §§ 51 aamma 55 takukkit.
5) Attartortup attartukkaminik atuinera (torersaarnissamik malittarisassanik unioqqutitsinerit), tak. § 50.
6) Atuisinnaatitaanerup allanut tunniunneqarnera (inissianik paarlaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq) §-it 58-62 takukkit.
7) Inissiamit aninermi inissiap qanoq issusia (iluarsaassineq nalinginnaasoq) § 77 takuuk.
Peqqussummi tassani § 47-mi erserpoq, Attartortitsisup attartorneqartoq piffissamit attartornissap aallartiffissaaniit pitsaasumik isumannaatsumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.
Imm. 2. Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.
Imm. 3. Amigaatit allat, attartortup inissiamut iserternermi kingorna tigusinermut atatillugu ersersinniagai, inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.
Naliliineq:
Ineqarneq pillugu Maalaaruteqartarfik isumaqarpoq Inissiaatileqatigiiffik nativit iluarsaanneqarnissaannut pisussaatitaasoq.
Tamatumunga tunngavilersuutaavoq iluarsaassineq nalinginnaasoq 2010-miilli aallunneqarsimannginnera tamatumunngalu atatillugu aamma illit iserternerni.
Tamatumunngalu atatillugu kommunip Namminersorlutik Oqartussat akornanni 2010-imi isumaqatigiissusiliaat pingaartinneqarluni, tassani illuni aniffiusuni iluarsaasineq naliginnaasoq aallunneqarunnaarsimalluni.
Maluginiarneqarpoq tamanna unioqqutitsinerusoq Inissianik attartortitsisarneq pillugu Inatsisartut peqqussutaani § 47 akerlilerneqarmat.
Ineqarneq pillugu Maalaaruteqartarfiup maluginiarpaa paasissutissat malillugit natit pineqartut inissiamut 2012-imi iserternermi qisuariarfigisimanngikkitit.
Ineqarneq pillugu Maalaaruteqartarfiup taamaattoq pingaartippaa arlaleriarlutit inissiaatileqatigiiffimmut natit pillugit saaffiginnittarsimanerit, tassungalu atatillugu tigussaasunik uppernarsaatinik ilanngussaqartarsimallutit iserternalli nalinginnaasumik iluarsaasisoqarsimannginneranik.
Aalajangiineq:
Ineqarneq pillugu Maalaaruteqartarfik isumaqarpoq Inissiaatileqatigiiffiup nativit iluarsartinneqarnissaannut aningaasartuutit akilissagai.
Naammagittaalliuuteqarnissamut ilitsersuut:
Ineqarnermut Naammagittaalliuuteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu. Attartortitsisup attartortullu akornanni aaqqiagiinnginneq eqqartuussivilersuukkumaneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. attartortitsisup allaffeqarfittut aktiaatileqatigiiffianit isumagineqarsimagaluarpataluunniit.
Ineqarneq pillugu maalaaruteqartarfiup aalajangiineri Namminersornerullutik Oqartussanut kommuninullu, inissianik attartortitsisuusunut pinngitsoorani malinneqassapput, § 86, imm. 6 naapertorlugu.
Inussiarnersumik inuulluaqqusillunga
Naja Joelsen.
Ineqarneq pillugu Maalaaruteqartarfimmi siulittaasoq
Assilinera Inissiaatileqatigiiffik xx-imut. Attartornermut isumaqatigiissut nr. xxxxxx innersuussutigineqartoq:
Inatsisit toqqammaviit:
Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq
Aserfallatsaaliuineq, iluarsaassineq atuinerlu
- 45. Namminersornerullutik Oqartussat kommuunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
Imm. 2. Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.
- 47. Attartortitsisup attartorneqartoq piffissamit attartornissap aallartiffissaaniit pitsaasumik isumannaatasumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.
Imm. 2. Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.
Imm. 3. Amigaatit allat, attartortup inissiamut iserternermi kingorna tigusinermut atatillugu tikkuarsutai inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.
Imm. 4. Imm. 2-mi aamma 3-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.
Imm. 5. Inissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.
- 48. Attartortup attartorneqartoq isumannaatsumik paarissavaa, ajoqusikkanullu attartortup nammineq, attartortup inoqutaasa allalluunniit attartortup attartorneqartumut isersinnaatitaasa isumannanngitsumik pissusilersornerisigut ajoqusersimasaannut taarsiinissamut attartortoq akisussaavoq. Takusaanermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai.
Imm. 2. Attartortup attartortitsisoq akuersiseqqaarnagu inissiaq isumaqatigiissutigineqartumit allaanerusumik atussanngilaa.
Imm. 3. Inissiami ineeqqanik ataasiakkaanik inisimasunut allanut attartortitsinerup saniatigut, attartortup attartortitsisoq akuersiseqqaarnagu inoqutigisami saniatigut allanut attartorneqartoq atugassanngortissanngilaa, taamaattorli tak. § 58.
Imm. 4. Ineeqqanik attartortut attartortitsisoq akuersiteqqaarnagu ineeqamik atuinernik allanut tunniussinnaanngilaat.
Imm. 5. Attartortup attartortitsisoq pisariaqartinneqartumik isumaqatigiissuteqarfigeqqaartinnagu inissiaq piffissaanngitsukkut qimassanngilaa.
- 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Imm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.
Imm. 3. Maalaarutip ineqarneq pillugu maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput.
Imm.4. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaaruteqartarfik maalaarutip suliarinissaanut itigartitsissaaq.