Inimit attartukkannit nuunnissannut atatillugu eqqiaaneq

AALAJANGIINEQ

Ineqarneq pillugu Maalaaruteqartarfiup aalajangerpaa naliginnaasumik iluarsartuussinerit aammalu inissiap XX, illoqarfimmi pineqartumi Y-mi eqqiarnera akilissagitit.

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu aaliangiisoqarpoq.

Suliami allagaatit: 

  1. Inissiamik paarlaaqatigiinnissamut qinnuteqaat 14. august 2013-imeersoq, nutarsarneqarnikoq akiligassat akilinngisat akileqarneqarnerata kingorna.
  2. Inuk Z-ilu inissiamik paarlaaqatigiinnissamut akuersissut 20. september 2013-imeersoq.
  3. Attartornermut isumaqatigiissummut ilassut inissiamik paarlaaqatigiinnermut tunngasoq 1. oktober 2013-imeersoq.
  4. Inissiaatileqatigiiffiup Y-ip inissiamik attartorunnaarneq akueraa 1. november 2013-imiit.
  5. Inissiamik misissuinermut atatillugu nalunaarusiaq 1. november 2013-imeersoq.
  6. Inissiap qimanneranut atatillugu akiligassaq 17. december 2013-imeersoq.
  7. Akiligassaq pillugu Ineqarnermut Naammagittaalliuuteqartarfimmut naammagittaalliuut 28. maj 2014-imeersoq.

Inissiaatileqatigiiffiup oqaaseqaatai 4. november 2015-imeersut (annertunerpaartaat kiassaanermut akiligassap annertussusaanut tunngapput, aammalu uani suliarineqaratik).

Nassuiaat:

Suliami allaqqavoq aggustip qaammataani 2013-imi inissiaatileqatigiiffimmut Y-imut inuk Z-ilu inissiamik paarlaaqatigiinnissamut qinnuteqarsimasutit. Piffissami tassani adresse XZ-mi, illoqarfimmi ZZ-mi najugaqarputit, aammalu inuk Z najukkami XXX, illoqarfimmi ZZ-mi najugaqarsimalluni.

Inissiaatileqatigiiffiup inissiamik paarlaaqatigiinnermut akuersinerani paasitinneqarputit suut ilinnut inuk Z-imullu paarlaaqatigiinnerup naammassineqarnerani attartornermut peqqussut aallaavigalugu suut periarifissaanersut.

Attartornermut isumaqatigiissummut ilassat malillugu, taannalu atsiorneqarnikoq 1. november 2013-imi, illit inuk Z-ilu toqqarsimavasi najukkassinnik paarlaaqatigiinniarlusi attartortitsisarnermi peqqussummi § 59, imm. 4, nr. 1 naapertorlugu, taamaasillunilu:

“Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat, taassumalu ataani:

  1. sillimmatitut akiliutigisimasat paarlaatissavaat
  2. ajoqusernerit attartortup siulliup atuinerani pilersimasut illit akisussaaffigilissavatit
  3. Imermut kiassarnermullu akiligassarisasi paarlaallugit tigussavasi. Tamatuma kingunerisaanik illit kiassarnermut immikkut akiligassaqalersinnaavutit, paarlattuanik illit illuatungerisat aningaasanik utertoortoq, tassa akilikkannit minnerusumik atuisimaguit.”

Najukkamut XXX, illoqarfimmi ZZ-mi nussimanngilatit, kisianni ingerlatiinneq nuunnissamut 31. oktober 2013-imi atorunnaarsissimallugu.

Inissiaatileqatigiiffiup Y-ip atorunnaarsitsinerit allakkatigut 1. oktober 2013-imi akuerisimavaa.

Nuunnermi naatsorsuinermi 17. december 2013-imeersumi takuneqarsinnnaavoq 8.583,22,- koruuninit pisassaqarsimasutit, taakkualu ilinnut tunniunneqarsimapput.

Naatsorsuinermi ilaatigut takuneqarsinnaavoq naliginnaasumik iluarsartuussinermut aningaasartuutinut 2.951,80,- koruuniusunut aammalu eqqiaanermut aningaasartuutinut 2.800,- koruuninut akiliisussaasutit.

Naammagittaalliuuteqarnerni paasititsissutigisimavat qalipaanermut aningaasartuutit 2.951,80,- koruunit naammagittaalliuuteqarnerni ilaanngitsut, kisiannili naammagittaalliuutigalugu najukkap eqqiarneqarnera akilertariaqarsimagakku. Innersuussutigisimavat kialluunniit nammineerluni najukkani paarissagaa, aammalu taakku paarlaaqatigisimasappit paarlaaqatigiinnerup kingunerisassaat soqutiginngikkaat.

Taamaattumik inissiaatileqatigiiffimmut piumaffiginnipputit akiligassaq 2800,- koruuniusoq inuk Z-imut nassiunneqassasoq, aammalu innersuussutigalugu illit najukkamut nuunnikuunngisaannarnerit. Akuersaarsinnaanngilat allat atornerluinerat aammalu kukkunerat sussuteqanngitsunut tussasoq.

Inatsisitigut tunngavigisaq:

Inissianik attartortitsisarneq pillugu Inatsisartut peqqussutaanni nr. 2, 12. maaji 2005-imeersumi kingusinnerusukkut allannguuteqartinneqartumi § 59 imm. 3-mi aamma imm. 4-mi ima allaqqasoqarpoq:

Imm. 3. Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.

Imm. 4. Attartortut inigisaminnik paarlaateqatigiissinnaapput imaaliorlutik:

1) Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortup pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavai.

Peqqussummi tassani § 77-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput.

Aalajangiinerup naqqani inatsisitigut tunngavimmi §§ 59 aamma 77 tamakkiisumi issuaavigineqarsimapput.

Naliliineq:

Ineqarneq pillugu Maalaaruteqartarfiup aalajangiuppaa najuppat XXX-ip, illoqarfimmi ZZ-mi iluarsartuunnerata saniatigut aammattaaq eqqiarneqarnera akilissagit.

Aalajangiinermut tunngaviuvoq illit inuk Z-ilu najukkamik paarlaaqatigiinnissinni toqqarsimagassiuk attartornermut pisinnaatitaaffisi pisussaatitaaffisilu aammalu attartornissamik isumaqatigiissutisi paarlaatissimagassigit.

Tamatuma ilaatigut imarivaa illit Inatsisartut peqqussutaanni § 77 eqqortissagit, tassanilu takuneqarsinnaalluni inissiamit anisoqarnerani aningaasartuutit inissiap nalinginnaasumik iluarsarneqarnerani akilissagitit, taassumalu ataani eqqiaaneq, najukkami eqqiaaneq amigarsimappat.

Illit najukkamut nuussimannginnerit aalajangiinermut sunniuteqanngilaq, pissutigalugu inuk Z-ilu paarlaaqatigiinnissamik isumaqatigiinnissinni aammalu inissiaatileqatigiiffiup akuersineranik taakku attartornermut pisinnaatitaaffisi pisussaatitaaffisilu aammalu attartornissamik isumaqatigiissutisi paarlaatissimagassigit.

Aalajangiineq:

Taamaalilluni Ineqarneq pillugu Maalaaruteqartarfiup inissiaatileqatigiiffiup Y-ip aalajangiussaa attatiinnarpaa, tamannalu pissutigalugu inigisassi qimanneranut atatillugu inissiap nalinginnaasumik iluarsaanneqarneranut akiliisussaallusi.

Naammagittaalliuuteqarnissamut ilitsersuut:

Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.

Attartortitsisup attartortullu akornanni aaqqiagiinnginneq eqqartuussivimmut tunniukkusunneqassappat attartortitsisumut sassaqqusissut eqqartuussivimmut tunniunneqassaaq. Tamanna pissaaq, allaqatigiinnerit il.il. , attartortitsisup allaffeqarfittut aktiaatileqatigiiffianit isumagineqarsimagaluarpataluunniit.

Inussiarnersumik/Venlig hilsen

Lise Mørup Dalsgaard

Uunga sinniisussaq

Naja Joelsen

Siulittaasoq

Assilineqarnera uunga: Inissiaatileqatigiiffik Y-mut. Attartornermut isumaqatigiissut XXXX innersuussutigineqarpoq

Inatsisit toqqammaviit:

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq 

  • 59. Namminersornerullutik Oqartussat kommunelluunniit inissiaataanni attartortittakkani attartortut nammineq kissaatigalugu nuunnissamut allattuiffimmut allatsissinnaapput.

Imm. 2. Attartortut iniminnik paarlaateqatigiinnissartik namminneerlutik isumaqatigiissutigisimappassuk, tamanna nuunnissamik kissaateqartut allattorsimaffiannut allatsinngikkaluarluni pisinnaavoq.

Imm. 3. Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.

Imm. 4. Attartortut inigisaminnik paarlaateqatigiissinnaapput imaaliorlutik:

1) Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavai.

2) Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagissinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.

Imm. 5. Imm. 4, nr. 2 naapertorlugu inissianik paarlaateqatigiinnermi attartortitsisup attartortup attartugassamini nutaami nammineerluni nalinginnaasumik iluarsaassinissamik kissaateqarnera itigartissinnaavaa, nalinginnaasumik iluarsaassinermit kingullermiit ukiut tallimat sinnerlugit qaangiussimappata.

Imm. 6. Imm. 4, nr. 2 naapertorlugu nalinginnaasumik iluarsaassinermut atatillugu inissiat paarlaateqatigiinnermi pineqartut nalinginnaasumik iluarsaassinerup nalaani inigineqarnerat pissutigalugu saniatigut aningaasartuuteqartoqassappat, saniatigut aningaasartuutit attartortumit qimatsisussamit akilerneqassapput.

Imm. 7. Atorfeqarnermut atasumik inissianik attartortut attartortitsisoq akuersiteqqaartinnagu inissianik paarlaasseqatigiissinnaanngilat.

Imm. 8. Namminerisamik kissaateqarluni nuussinnaaneq aamma inigisamik paarlaaseqatigiissinnaaneq pillugit Naalakkersuisut maleruagassanik erseqqinnerusunik aalajangersaasinnaapput.

  • 77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.

Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.

Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.

Scroll to Top