Suliffeqarfimmik naammagittaalliuutiginninnerit pillugu
Suliffeqarfik pillugu naammagittaalliuutit Atuisartunut Pisisartunullu Maalaaruteqartarfiup suliaraa isumaqatigiissutaasumillu ima:
Aalajangiineq
Naammagittaalliuutivit ilaani ilalerneqarputit. Iphonevit 5S plusip iluarsaanneranut 1.000 kr.-nik akiliuteqarnissannut pisussaaffeqanngilatit taanna iluarsaanneqarsimanngimmat. Mobilivit allamik taarserneranut atatillugu 500 kr.-nik akiliuteqartussaatitaavutit taarsiinissamik akuersissuteqarsimanerit pissutigalugu.
Aallaqqaasiut
Naammagittaalliut 4. decembari 2014-imi tiguneqarpoq. Suliami pineqartoq tassaavoq mobiltelefoni iphone 5S plusimik ilisarnaatilik (matuma kingorna mobiltelefon B-mik taagorneqartoq) aamma mobiltelefonip taassuma mobiltelefonimik allamik taarserneqarnera.
Mobiltelefon B (iPhone 5S plusip iluarsaannerata imaluunniit taassuma mobiltelefon iPhone 5S-imik (matuma kingorna mobiltelefon C-mik taagorneqartoq) taarserneqarneranut akigititap akilinnginnissaat piumasaqaatigaat.
Piumasaqaatit suliffeqarfiup malikkumanngilaa, iluarsaanneqarnera telefonillu allamik taarserneqarnera akilissagitit isumaqarami.
Suliamik saqqummiussineq
Suliffeqarfik-mit mobiltelefon B-p iluarsaanneqarnera Atuisartunut Pisisartunullu Maalaaruteqartarfimmut (siusinnerusukkut Atuisartunut Pisisartunullu Maalaaruteqartarfittut Ataatsimiititaliamik taaneqartartoq) 4. decembari 2014-imi naammagittaalliuutigaat.
Naammagittaalliuutinni ilisimatitsissutigaat mobiltelefonit marluk iPhone 5-ip (matuma kingorna mobiltelefon A-mik taagorneqartup) saqqaata qupisimanera aamma mobiltelefon B-p saqqaata iluata ajoqusersimanera pissutigalugit iluarsaatassanngorlugit suliffeqarfimmut 2014-imi juunip qaammataani tunniukkitit. Mobiltelefon A piffissaq sivisunngitsoq qaangiummat ilinnut utertinneqarpoq taannali tamakkiisumik atorneqarsinnaasimanngilaq. Taamaattorli mobiltelefon A-p akilernissaa akuerisimavat.
Mobiltelefon B naammagittaalliuutigineqartumit iluarsaanneqarsinnaasimanngilaq taamaammallu suliffeqarfimmut allamut Nuummiittumut nassiunneqarsimalluni. Mobiltelefonivit annertunerusumik iluarsaannissaanut Danmarkimut nassiunneqarnerata kingorna kvitteringimik nassinneqarputit tamatumunngalu peqatigitillugu mobiltelefon B-p C-mik taarserneqarnissaanik neqeroorfigineqarlutit taarsiinerlu taanna 500 kr.-nik akeqartoq. Tamannalu akuerisimavat. Akiliiffissaq nallilersoq mobiltelefon B-p iluarsaanneranut aamma akileeqquneqarputit tamannalu akilertussaanagu isumaqarputit.
Naammagittaalliuutigineqartup nassuiaatini 7. septembari 2015-imi saqqummiuppai illillu 11. septembari aamma 24 oktobari 2015-imi nassuiaatinik tunniussaqaqqipputit.
Suliamik saqqummiussineq
Kiffartuunneqarsimagutta akiliuteqarnissarput atuisutut pisussaaffigaarput. Ilaatigut mobiltelefon B-p iluarsaanneqarneranut atatillugu 1.000 kr.-nik akeqartussaq pillugu pisiaqarumallutillu isumaqatigiissuteqarsimavutit.
Atuisumit piumaneqartumik tunniussinissaminut kiffartuussinissaminullu akuersissuteqarsimasutut inuussutissarsiuteqartoq pisussaaffeqarpoq. Tamatumunnga atatillugu nangaassuteqartoqarpat tamanna isumaqatigiissuteqannginnermi erseqqissumik ilisimatitsissutigineqartussaavoq.
Nangaanartoqarsinnaasut ilisimatitsissutiginagit mobiltelefonip iluarsaannissaa naammagittaalliuutigineqartup akuersissutigisimavaa.
Mobiltelefon B-p iluarsaanneqarsimannginnera assortorneqarmat tamatuma akilerneqarnissaa naammagittaalliuutigineqartup piumasarisinnaanngilaa.
Mobiltelefon B-p iluarsaanneqarneranut akiliiumanerit arlaleriarlutit oqaatigisareeraluarit pingaartinneqanngilaq mobiltelefonip iluarsaanneqarsimanera ilumut pisimassasoq piumasaqataammat.
Taamaattumik mobiltelefon B-p iluarsaanneqartaraluarneranut atatillugu akiliutissap katillugit 1.000 kr.-t akilernissaannut pisussaaffeqannginnerit ilalerneqarpoq.
Mobiltelefon B mobiltelefon C-mik taarserneqarnissaa akuerisimavat taamaalillutillu taarsiinermi akiliutissaq 500 kr. akuerisimallugu. Taamaattumik tamanna peqqissimissutigisinnaanngilat.
Taamaammat telefonip taarserneqarneranut atatillugu akiliuteqarnissannut pisussaaffeqannginnerarnerit ilalerneqanngilaq. Taamaattumik mobiltelefon B-p mobiltelefon C-mik taarserneqarneranut atatillugu akiliutissaq katillugu 500 kr. akilernissaanut pisussaavutit.
Naammagittaalliuuteqarnissamut ilitsersuut
Atuisartunut Maalaaruteqartarfittut Ataatsimiitsitaliap aalajangiinera allaffissornikkut oqartussaasunut allanut naammagittaalliutigisinnaanngilat, tak. tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaat nr. 39, 9. decembari 2015-imeersoq, § 35-mi imm. 2 periarfissaavoq.
Inussiarnersumik inuulluaqqusillunga
Atuisartunut Pisisartunullu Maalaaruteqartarfik
Nicolai Odgaard Jensen
Siulittaasoq