Siusinaartumik utoqqalinersiat pillugit Kommunip ulloq 23. decembari 2015-imi aalajangiinera pillugu naammagittaalliuutit Isumaginninnikkut Naammagittaalliuuteqartarfiup ulloq 15. decembari 2017-imi suliaraa imalu:
Sags nr.: 2016 – 1979
Aalajangiineq
Kommunip aalajangiinera atuutsiinnarneqarpoq.
Tassa imaappoq kommunip aalajangiinera eqqortuusoq naammagittaalliuuteqarninnilu ilalerneqanngilatit.
Suliaq Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersoq, kingusinnersukkut allannguuteqartinneqartoq malillugu aalajangiiffigineqarpoq.
Nassuiaat:
Suliami erserpoq avinnikuusutit siusinaartumillu utoqqalinersiaqartuusutit. Meeraqanngilatit pilersugassannik.
23. decembari 2015-imi aalajangiinermi qaammammut siusinaartumik utoqqalinersiatit 9.038,- kr.-it 1.817,- kr.-inut appaaffigineqarput 1. januar 2016-imi atuutilertussatut.
Siusinaartumik utoqqalinersiat pillugit Inatsisartut peqqussutaanni nr. 4, 7. maaji 2007-imeersumi §§ 4 aamma 18 malillugit kommune aalajangiivoq.
Kommuni isumaqarpoq, piffissami aalajangiinerup nalaani K inooqatigigit, ilumoortumillu najukkat unaasimalluni Najugaq, 39xx illoqarfik X. Aalajangiinerup nalaani inuit allattorsimaffianni najukkat unaasimavoq Najugaq, 39xx illoqarfik Y.
Kommunip aalajangiinermini toqqammavigisimavaa, Illoqarfimmi Isumaginninnermi ingerlatsivimmi piffissami 2015-ip naalernerani pasitsaanneqarsimammat inuit allattorsimaffiani najukkanni najugaqanngitsutit. Pasitsaassineq taanna pisut arlallit kingunerisaanik pilersimavoq, politiit peqqinnissaqarfillu inuit allattorsimaffianni najukkatut nalunaarsorsimaffinnut saaffiginnissimagaluarmata. Tassani oqartussat najugalimmik allamik naapitaqarsimapput, taassumalu nalunaarutigaa, najukkamiit 2013-imili nuussimasutit.
Kommunip nalunaarsuilluni allattugaanit 3. decembari aamma 23. decembari 2015 pillugu erserpoq, Najugaq eqqissiviilliornernut atatillugu uppernarsarneqarsinnaasimasoq, najukkami tassani ataavartumik najugaqartuusutit, pigisatillu tamarmik tassaniillutik. Allattugaatit naapertorlugit piffissami bussinut ilaanissamut allagartaqarsimasutit, tassanilu najukkatut allaqqalluni Najugaq.
Tamatumalu kingorna illit inooqativillu akileraarusigassatut isertitassi tunngavigalugit siusinaartumik utoqqalinersiatit naatsorsornerisa kingorna kommunip ikilisippai.
Suliami allagaatinit erserpoq, illit K-lu 2014-imut akileraarusigassatut isertitassi katillugit 245.143,- kr.-iusut.
Naammagittaalliuutinni Isumaginninnikkut Naammagittaalliuuteqartarfimmit ulloq 27. januaari 2016-imi tiguneqartumi naammaginartinnagu oqaatigaat, qaammammut aningaasat tigusartakkavit ikilisimaneri, adresseqarnak kisiannili K-miittartutit.
Inatsisitigut tunngavigisaq:
Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersumi kingornalu allannguuteqartumi atuussimasumilu § 4 naapertorlugu, aappariittut naatsorsuunneqartut tassaapput, katissimallutik aappariit, nalunaarsukkamik inooqatigiit imaluunniit aappariit, katissimanermut assingusumik sivikinnerpaamik ukiumi ataatsimi inooqatigiissimasut.
Peqqussummi § 9, immk. 1, nr. 3 Siusinaartumik utoqqalinersianik ilanngaassisoqassaaq, pisortanit utoqqalinersiat saniatigut siusinaartumik utoqqalinersiallip immaqalu katissimallugu aapparisaata, katissimasutut assingusumik aapparisaata inooqatigisaataluunniit isertitaasa, tassunga ilanngullugu Inunnut Isumaginninnikkut isumannaallisaaneq pillugu Nunat Avannarliit Isumaqatigiissutaanni aalajangersakkat malillugit siusinaartumik utoqqalinersiat, sinnerpatigit, aappariinnut, aappaannaa siusinaartumik utoqqalinersiaqarpat, aapparisaa pisortanit utoqqalinersianik sunilluunniit pisartagaqanngippat ukiumut 42.000 kr.-nit.
§ 11. naapertorlugu siusinaartumik utoqqalinersiat ukiut tamaasa 1. januaari ukioq kingulleq isertitarisimasat ilisimaneqartut tunngavigalugit akinut nalimmassarneqartassapput.
Imm. 2. naapertorlugu Siusinaartumik utoqqalinersiat tunniunneqartartut ukiup ingerlanerani, siusinaartumik utoqqalinersiallip inuttut imaluunniit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput. Iluarsiiviginninneq, allannguinermiit qaammatip tulliuttup ullua siulleq aallarnerfigalugu atuutilertassapput.
Imm. 3. Siusinaartumik utoqqalinersiaqartoq erninermut atatillugu sulinngiffeqarnermut atatillugu isertitami ilaanik annaasaqarpat siusinaartumik utoqqalinersiatut tunniunneqartartut piffissami sulinngiffeqarfiup nalaani nalimmassarneqartassapput.
Peqqussummi tassani § 18, imm. 1 naapertorlugu siusinaartumik utoqqalinersiaqartut nalunaaruteqarnissamik pisussaatitaapput. Aalajangersagaq taanna malillugu siusinaartumik utoqqalinersiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi utoqqalinersiamik iluarsiivigineqarnissaannik unitsinneqarnissaannilluunniit kinguneqarsinnaasunik inuttut atugarisamigut aningaasaqarnermigullu allannguuteqartoqarpat.
Naliliineq:
Siusinaartumik utoqqalinersiat pillugit Inatsisartut inatsisaat nr. 40, 9. decembari 2015-imeersoq atuutilerpoq ulloq 1. juuli 2016. Siusinaartumik utoqqalinersiat pillugit aalajangiissut naammagittaalliuutigisimavat, taannalu siusinaartumik utoqqalinersiaqarneq pillugu siusinnerusukkut inatsit tunngavigalugu aalajangiiffigineqarsimavoq.
Siusinaartumik utoqqalinersiat pillugit Inatsisartut inatsisaat nr. 40, 9. decembari 2015-imeersumi nutaami suliat ingerlasut malittarisassat suut malillugit aalajangiiffigineqartassanersut isummerfigineqarnikuunngilaq. Malittarisassat suut atuutsinneqarnersut, inatsisiliornikkut tunngavigisap aalajangersimasup nassuiaataa apeqqutaavoq, tassunga ilanngullugit atuutsitsilernermut aalajangersakkat. Taamatuttaaq inatsisitigut tunngavilersuutinik nassuiaat malittarisassat qinnuteqaateqarnerup nalaani atuuttut imaluunniit aalajangiinerup nalaani atuuttut, suliani naammagittaalliuutini atorneqarsimasut apeqqutaasarput.
Isumaginninnikkut Naammagittaalliuuteqarfiup nalilerpaa, naammagittaalliuutit suliat ingerlasut siusinnerusukkut inatsit tunngavigalugu kommunimit aalajangiiffigineqarsimasunut tunngavittut siusinnerusukkut inatsit tunngavigalugu aalajangiiffigineqartussaasut.
Kommunip aalajangigaa Isumaginninnikkut Naammagittaalliuuteqartarfiup atortussanngortippaa.
Tamatumunnga tunngavigineqarpoq, Isumaginninnikkut Naammagittaalliuuteqartarfiup paasissutissaatai tunngavigalugit aalajangiinerup nalaani illit K-lu Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersumi kingornalu allannguuteqartumi § 4 naapertorlugu katissimanermut assingusumik inooqatigiissimanersi. Aalajangiinerup nalaani Najugaq, 39xx illoqarfik inuit allattorsimaffianni najugaqartutut nalunaarsorsimavutit. Isumaginninnikkut Naammagittaalliuuteqartarfilli isumaqarpoq, ilumoortumik najugaqarfiit tassaasimasoq K-mi najukkami uani Najugaq, 39xx illoqarfik, aalajangiinissaq ukioq ataatsimiit sivisunerusoq sioqqullugu.
Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersumi, kingusinnerusukkullu allannguuteqarfiusumi § 18, imm. 1 naapertorlugu, siusinaartumik utoqqalinersiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi utoqqalinersiamik iluarsiivigineqarnissaannik unitsinneqarnissaannilluunniit kinguneqarsinnaasunik inuttut atugarisamigut aningaasaqarnermigullu allannguuteqartoqarpat.
Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersumi, kingusinnerusukkullu allannguuteqarfiusumi § 9, imm. 1, nr. 3 naapertorlugu, siusinaartumik utoqqalinersianik ilanngaassisoqassaaq aappariinnut, aappaannaa siusinaartumik utoqqalinersiaqarpat, aapparisaa pisortanit utoqqalinersianik sunilluunniit pisartagaqanngippat ukiumut 42.000 kr.-it sinnersimappatigit.
Siusinaartumik utoqqalinersiat pillugit Inatsisartut peqqussutaat nr. 4, 7. maaji 2007-imeersumi, kingusinnerusukkullu allannguuteqarfiusumi § 9, imm. 3 naapertorlugu, isertitat akileraarutaasussat qanorluunniit annertutigigaluarpata tamatigut siusinaartumik utoqqalinersiallip kisermaap utoqqalinersiassaasa 20 procentiannik pisartagaqarnissaq pisinnaatitaaffigigaat.
Isumaginninnikkut Naammagittaalliuteqartarfiup paasissutissaatai malillugit, illit inooqatillu K-lu 2014-imi akileraarutaasussamik isertitasi 245.143,- kr.-iusimapput. Taamaalilluni siusinaartumik utoqqalinersiatit eqqortumik 1.817,- kr.-inut appartinneqarsimapput, tassalu siusinaartumik utoqqalinersiassavit akuerineqartut 20%-ii.
Kommunip aalajangiinermini, kommunip aalajangiinissaat sioqqullugu siusinaartumik utoqqalinersiassat amerlanaarlugit tunniunneqarsimasinnaasut utertinneqarnissaat imaluunniit utoqqalinersiassanik tunisinermini tulliuttuni ilanngaassisoqassanersoq isummerfigisimanngilaa. Taamaattumik naammagittaalliuutissinnut atatillugu Isumaginninnikkut Naammagittaalliuuteqartarfik isummersinnaanngilaq.
Allaffissornermut tunngasunik pissuteqarluni suliap sivisuallaartumik suliarineqarsimanera Isumaginninnikkut Naammagittaalliuuteqartarfiup ajuusaarutigaa.
Aalajangiineq:
Isumaginninnikkut Naammagittaalliuteqartarfiup isumaqarpoq Kommunip aalajangigaa eqqortuusoq.
Inussiarnersumik Inuulluaqqusillunga
Naja Joelsen
Siulittaasoq.
Assilinera: Kommuni, qullersaqarfik aamma illoqarfimmi immikkoortoqarfik.
Assinga Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfimmut nassiunneqassaaq.