Inigisavit eqqiarneranut akiliuteqassanngitsutit

AALAJANGIINEQ 

Ineqarnermut Naammagittaalliuuteqartarfik isumaqarpoq inigisavit, Adresse XX, illoqarfimmi YX inissisimasup eqqiarneranut akiliuteqassanngitsutit.

Taamaalilluni naammagittaalliuutigisat ilalerneqarpoq.

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq kingusinnerusukkut allannguuteqartoq naapertorlugu aaliangiisoqarpoq.

Suliami allagaatit: 

  1. Iserternermi nalunaarusiaq 3. februaari 2014-imeersoq.
  2. Inissiami eqqiaanermut atatillugu suliffeqarfik YY-miit akiligassaq aggusti 2016-imeersoq.
  3. Inissiamik misissuinermut atatillugu nalunaarusiaq 8. aggusti 2016- imeersoq.
  4. Nuunnermut atatillugu naatsorsuutit 5. oktobari 2016-imeersut.
  5. Akiligassaq pillugu Ineqarnermut Naammagittaalliuuteqartarfimmut naammagittaalliuut 1. februaari 2017-imeersoq.
  6. Inissiaatileqatigiiffiup oqaaseqaataa 8. maaji 2017-imeersoq.

Nassuiaat:

Misissuinermit nalunaarusiamit erserpoq ulloq 3. februaari 2014-imi najukkamut adresse XX-mi, illoqarfik YX isertertutit taamatullu inissiamit tassannga 20. juuni 2016-imi anisutit. Tamatuma saniatigut misissuinermit nalunaarummit erserpoq inigisap iluarsaatuunneqarneranut akiliissasutit. Kiisalu erserpoq matuersaatit tunniunneqarsimasut inissiarlu qimanneqarnermini eqqiarneqarsimanngitsoq.

Suliffeqarfik YY-imeersup akileqqusaanit 7. aggusti 2016-imeersumit erserpoq inissiamit aninerup kingorna nalinginnaasumik eqqiaaneq 7. 200 kr.-nik akeqartoq.

Inissiaatileqatigiiffik Y-ip nuunnermut atatillugu naatsorsuutaanit 5. oktobari 2016-imeersumit erserpoq inissiap iluarsartuunneqarneranut aningaasartuutit 17. 200 kr.-t, gangeeqqat marluk sioralillugillu lakkernerannut aningaasartuutit 5. 775 kr. aamma eqqiaanermut aningaasartuutit 7. 200 kr. katillugit 23. 892 kr. illit nammineerlutit akilissagitit.

Taama aalajangerneq Ineqarnermut Naammagittaalliuuteqartarfimmut 1. februaari 2017-imi naammagittaalliuutigaat.

Naammagittaalliuutinni ilisimatitsissutigaat inissiap misissorneqarnerani attartortitsisoq ilaanngitsoq tassami nalilersuineq oqarasuaatikkut pisimammat. Inissiaq kusanartumik saligaatsumillu qimanneqarpoq matuersaallu tunniullusiuk. Sulisartut qalipaasullu inissiamik iluarsartuussillutik piareermata matuersaat ilissinnut utertinneqarpoq eqqiaaqqinnissarsi siunertaralugu. Tamatuma kingorna matuersaat inissiaatileqatigiiffimmut tunniupparsi inissiami eqqiaareersimagassi aammalu isumaqarassi sulisartut sulereernerisa kingorna eqqiaanissaq ilissi akisussaaffiginasiuk. Inigisaq salissimaneranut tamatuma kingorna akiligassinneqarpusi 7.200 kroninik. Naammagittaalliut allaqqavoq nuussimasuni oqoqarnera peqqutigalugu nuussimasusi. Tamatumunnga atatillugu ilisimatinneqarpusi inigisarsi qalipanneqassanngitsoq oquk peerneqaqqaartussaammat. Kingorna paasinarsivoq oquiaanermut qalipaanermullu atatillugu 17. 200 kr.-t akilertussaagisi. Naqqit lakkerneqarnerat ilissi nammineq akilissagissi paasisinnaavat tamannami ilissi akisussaaffigigassiuk naammaginnginnerarluguli oquiaaneq qalipaanerlu ilissi akilissagassiuk.

Inissiaatileqatigiiffik Y Ineqarnermut Naammagittaalliuuteqartarfimmut 8. maaji 2017-imi ilisimatitsivoq nalinginnaasumik iluarsartuussinissamut atatillugu piumasaqaatertik taamaatillugu. Inissiap qimanneqarneranut atatillugu misissuinermi peqataanissannut periarfissinneqannginnavit Inissiaatileqatigiiffiup aamma ajuusaarutigaa. Inissiap eqqiarneqarnissaa pillugu piumasaqaat Inissiaatileqatigiiffiup attatiinnarpaa inissiap qimanneqarneranut atatillugu misissuisoqannginnerani sanasunik inniminniisoqarsimannginnera pissutigalugu aammalu eqqiaanissaq misissuisoqareernerata kingorna aatsaat inniminnerneqarmat.

Ineqarnermut Naammagittaalliuuteqartarfiup Inissiaatileqatigiiffiup paasissutissiissutai 26. maaji 2017-imi illuatungiusutut ilinnut tusarniarneqarput. Tamatumunnga atatillugu Ineqarnermut Naammagittaalliuuteqartarfik ilinnit tusagaqanngilaq.

Inatsisitigut tunngavigisaq: 

Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi § 77 naapertorlugu Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput.

Naliliineq: 

Ineqarnermut Naammagittaalliuuteqartarfik isumaqarpoq inissiap Adresse XX, illoqarfimmi YX-mi eqqiarneqarnera illit akilissanngikkit.

Ineqarnermut Naammagittaalliuuteqartarfik isumaqarpoq inissiaq qimanneqarniariartoq piaartumik inissiamik qimatsinermut atatillugu misissuisoqarsimasariaqaraluartoq. Inigisat 20. juuni 2016-imi qimappat tamatumunngalu atatillugu matuersaat tunniullugu. Taamaammat Ineqarnermut Naammagittaalliuuteqartarfik isumaqarpoq aninerpit kingorna suliassat eqqiaanermillu Inissiaatileqatigiiffiup suliakkiissutai illit akisussaaffigisinnaanngikkitit.

Taamatuttaaq Ineqarnermut Naammagittaalliuuteqartarfiup pingaartippaa inissiap qimanneqarneranut atatillugu misissuineq nalunaarusiami oqaasertat malillugit 8. aggusti 2016-imi pisimasoq eqqiaasuniillu akiligassaq 7. aggusti 2016-imi ullulerneqarsimasoq.

Taamaammat Ineqarnermut Naammagittaalliuuteqartarfik isumaqarpoq eqqiaanermut akiligassaq illit akilissanngikkit.

Taamaalilluni naammagittaalliuutigisat ilalerneqarpoq.

Akiliutigisimasavit utertinneqarnissaannut pisinnaatitaaffeqarputit. Taamaammat qinnuigineqarputit kontomut sorlermut akiliutigisimasatit ikineqassasut Ineqarnermut Naammagittaalliuuteqartarfimmut ilisimatitsissutigeqqullugu.

Suliap taama sivisutigisumik suliarineqarnera Ineqarneq pillugu maalaaruteqartarfiup ajuusaarutigaa tamanna ilaatigut allaffissornermut tunngasunik ilaatigullu piffissami sivisuumi ataatsimiititaliamik toqqaasoqarnikuunnginnera tamatumunnga pissutaasut.

Aalajangiineq:

Inissiaatileqatigiiffik Y-ip aalajangigaa Ineqarnermut Naammagittaalliuuteqartarfiup matumuuna allanngortippaa imaalillugu inigisavit qimanneranut atatillugu inissiap eqqiarnera illit akilissanngikkit.

Naammagittaalliuuteqarnissamut ilitsersuut:

Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005-imeersumi kingusinnerusukkullu allanngortinneqartumi, § 86, imm. 7 naapertorlugu.

Ineqarnermut Naammagittaalliuteqartarfiup aalajangiinera eqqartuussisunut suliassanngortinneqarnissaa kissaatigineqarpat, attartortitsisumik sassaqqusissut, tassa Namminersorlutik Oqartussat imaluunniit kommuni Kalaallit Nunaanni Eqqartuussivimmut tunniunneqassapput.

Inussiarnersumik/Venlig hilsen

Naja Joelsen

Siulittaasoq

Assilineqarnera uunga: Inissiaatileqatigiiffik Y-mut. Attartornermut isumaqatigiissut XXXXinnersuussutigineqarpoq

Inatsisit toqqammaviit:

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq

  • 77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.

Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.

Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.

Scroll to Top