inimit attartukkamit nuunnissinnut atatillugu nutsernermi akiligassaq

AALAJANGIINEQ

  Ineqarneq pillugu maalaaruteqartarfik isumaqarpoq, inissiap Z, illoqarfimmi X-mi nalinginnaasumik iluarsartinnera akilissagissi. Tamannalu tunngavigalugu naammagittaalliuuteqarnissinnit ilalerneqanngilasi.

Inissianik attartortitsisarneq pillugu Inatsisartut peqqussutaat nr. 2, 12. maaji 2005- imeersoq kingusinnerusukkut allannguuteqartoq naapertorlugu aaliangiisoqarpoq.

 Suliami allagaatit:

1. Attartortitsinermut isumaqatigiissut 2. februaari 2015-imeersoq inissiaq Z, illoqarfimmi X-mi pillugu
2. Najukkap qimanneqarneranut atatillugu misissuinermit nalunaarusiaq 29. apriili 2015-imeersoq inissiap
3. juuni 2015-imi qalipanneqarneranut akiligassaq
4. Najugaq qimanneqarpoq ulloq 15. juuli 2015-imi
5. Naammagittaalliuut 3. septembari 2015-imeersoq
6. Inissiaatileqatigiiffimmiit naammagittaalliuut ulloq 9. februaari 2016-imeersoq pillugu oqaaseqaat
7. Inissiaatileqatigiiffimmiit ulloq 16. maaji 2017-imi maili

Nassuiarneqarnera:

Suliamit erserpoq ulloq 1. februaari 2015-imiit inissiaq, Z, illoqarfimmi X-mi attartulerissi. Inissiaq pingasunik initaqarpoq 70,10 m²-iulluni.

Ilisimatitsissutigineqarpoq kingusinnerusukkut inuk N, adresse-mi Z-mi, illoqarfik X-mi inissiassinnik paarlaaqatigiinniarlusi isumaqatigiissimasusi.

Inissiassinnik paarlaaqatigiinnissarsi ulloq 1. juuni 2015-imi pisussaasimavoq.

Piffissani tassani inissiassinni ulloq 27. januaari 2015-imiit najugaqarsimavusi, paarlaaqatissarsi pineqartoq N inissiarisimasaminut ulloq 15. januaari 2007-imi nuussimavoq.

Illuatungeriit inissiaminnik paarlaallutik apriilip qaammataani 2015-imi nuunniarlutik isumaqatigiissimapput.

Nuunnermut atatillugu inissiamik misissuineq ingerlanneqarsimavoq ulloq 29. apriili 2015-imi. Najukkap qimanneqarneranut atatillugu misissuinermit nalunaarusiaq malillugu iikkat qilaallu ataasiarlutik qalipanneqartussaasimapput, uffarfik marloriarlugu, natillu lakkerneqarlutik, aamma iggavimmi nateq lenoleumiusoq qillersarneqarluni. 19. juuni 2015-imi akiligassap naatsorsorneqarnera malillugu qalipaanermut akiligassaq katillugu 10.640.- kr.-iusimavoq.

Najukkap qimanneqarneranut atatillugu misissuinermit nalunaarusiaq ilinnit pineqartoq A atsiorneqarsimavoq.

Qularnaveeqqutiniillu ilanngaassereerluni aamma piffissaq najugaqarfiusimasumit 5 procentimik ilanngareerlugit akiliutisi utertinneqartussat katillugit 1.604.- koruuniusussaapput.

Naammagittaalliuutissinni ilaatigut ilisimatitsissutigaarsi, inissiassinnik paarlaaqatigiinnissassinnut isumaqatigiissutaasimasoq ulloq 1. juuni 2015-imi paarlaaqatigiinnissarsi pisussanngorlugu; kisiannili ulloq taanna sioqqullugu inissiassinnik paarlaaqatigiinnissarsi aalajangersimavarsi. Ilisimatitsissutigaarsi qularnaveeqqutigisimasasi attartortussanut nutaanut nuunneqarnissai isumaqatigiissutaasimasoq paarlattuanillu, taamaalillusi aallaqqaataaniit aallartinnginniassagassi. Inissiasi nammineq qalipannissaat isumagisussaasimavasi, kisiannili inissiaatileqatigiiffiup nalunaarfigeqqaarnasi inissiat qalipaasunut tunniussimavaat.

Tamatuma kingunerisimavaa, inissianik paarlaaqatigiinnerup akisoorujussuunera, tassami nutaamik qularnaveeqqutinik akiliisussaasimagassi.

Inissiaatileqatigiiffiup XX-ip ulloq 9. februaari 2016-imi ilisimatitsissutigaa, inissianik paarlaaqatigiinnissamut qinnuteqaat ulloq 22. apriili 2015-imi tigusimallugu, aamma inissiaatileqatigiiffiup ilissi paarlaaqatissarsilu pineqartoq N akornassinni ulloq 28. apriili 2015-imi ataatsimeeqatigiissimasusi. Inissianik paarlaateqatigiinneq pillugu malittarisassanik ilisimatinneqarpusi, aamma Inissianik attartortitsisarneq pillugu Inatsisartut

peqqussutaanni nr. 2-mi, 12. maj 2005-imeersumi kingusinnerusukkullu allanngortinneqartumi, § 59, imm. 4 nr. 1-imi malittarisassat naapertorlugit.

Inatsisitigut tunngavik:

Inissianik attartortitsisarneq pillugu Inatsisartut peqqussutaanni nr. 2, 12. maaji 2005- imeersumi kingusinnerusukkut allannguuteqartinneqartumi § 59 imm. 3-mi aamma imm. 4-mi ima allaqqasoqarpoq:

Imm. 3. Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.

Imm. 4. Attartortut inigisaminnik paarlaateqatigiissinnaapput imaaliorlutik:

• Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36- it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortup pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavaasi.
• Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagisinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.

Peqqussummi tassani § 77-imi allaqqavoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput.

Aalajangiinerup naqqani inatsisitigut tunngavimmi §§ 59 aamma 77 tamakkiisumi issuaavigineqarsimapput.

Nalilerneqarnera:

Ineqarneq pillugu Maalaaruteqartarfik isumaqarpoq, paarlaaqatissarsi pineqartoq N inigisamik paarlaaqatigiinneq attartornermut peqqussummi § 59 imm. 4 nr. 2 naapertorlugu taamaallaat pisinnaasimasoq.

Tamatumunnga tunngavilersuutigineqarpoq, paarlaaqatissarsi pineqartoq N ulloq 15. januaari 2007- imi inissiaminut isertersimanera. Taamaalilluni inissiamini ZZ-mi, illoqarfimmi X-mi qaammatit 36-it sinnerlugit najugaqarsimalluni.

Inissianik paarlaateqatigiinnermut atatillugu illuatungeriit attartuinerisa atuutiinnarnissaannut piumasaqaataavoq, illuatungeriit tamarmik attartuineri inissianik paarlaateqatigiinnissamut qinnuteqarnissaq sioqqullugu qaammatini kingullerni 36-it iluini pisimanissaa.

Inigisassinnik paarlaateqatigiinnissarsi qaammatit 36-it sinnerlugit sioqqullugu paarlaaqatissarsi pineqartoq N attartuisunngorsimanera pissutigalugu taanna periuseq atorsinnaasimanngilarsi.

Inissianik paarlaaqatigiinnissaq taamaalilluni periuseq taanna attartortut tamarmik inissiaminnik nalinginnaasumik iluarsartuussinissaat atorlugu pisinnaasimavoq.

Inigisanit paarlaateqatigiinneq peqqussummi § 59 imm. 4 nr. 2 naapertorlugu pisimanera innersuussutigalugu, inissiat nalinginnaasumik iluarsaanneqassapput imaluunniit inigisanik paarlaateqatigiinnermi iluarsaanneqarsimasutut isikkoqassapput. Attartortitsisoq attartornissamik isumaqatigiissutinik nutaanik sanassaaq, qularnaveeqqutinillu akiliisoqassalluni. Attartortut nammineerlutik nuunnerminnut atatillugu nalinginnaasumik iluarsaassinissartik kissaatigippassuk, tamanna pillugu inissiamut iserternermi atsiukkamik uppernarsaammik peqartoqassaaq.

Inissiassassinnut nutaamut apriilip qaammataani isertereersimanersi innersuussutigalugu, aamma inissiassassinnut nuunnginnissinni nammineerlusi iluarsaassinissarsi pillugu inissiaatileqatigiiffimmut nalunaarsimannginnersi innersuussutigalugu, inissiaatileqatigiiffiup najukkap qimanneqarneranut atatillugu misissuinermut nalunaarusiornissaminut pisinnaatitaavoq taamaalillunilu nalunaarut naapertorlugu sulisunik aallartitsisinnaasimalluni.

Tamatumunnga tunngavilersuutigineqarpoq, inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput.

Ineqarneq pillugu maalaaruteqartarfimmit inissiaatileqatigiiffimmut inassutigineqassaaq, attartortunut erseqqissumik nassuiaatigineqartassammat, qaqugukkut inissianik paarlaateqatigiinnermut tunngasoq § 59, imm.4, nr. 1-imiittoq atorneqassanersoq, aamma qaqugukkullu § 59, imm. 4, nr. 2 kisiat atorlugu inissianik paarlaateqatigiittoqarsinnaanersoq.

Suliap taama sivisutigisumik suliarineqarnera Ineqarneq pillugu maalaaruteqartarfiup ajuusaarutigaa tamanna ilaatigut allaffissornermut tunngasunik ilaatigullu piffissami sivisuumi ataatsimiititaliamik toqqaasoqarnikuunnginnera tamatumunnga pissutaapput.

Aaliangiineq:

Taamaalilluni Ineqarneq pillugu Maalaaruteqartarfiup inissiaatileqatigiiffiup XX-ip aalajangiussaa attatiinnarpaa, tamannalu pissutigalugu inigisassi qimanneranut atatillugu inissiap nalinginnaasumik iluarsaanneqarneranut akiliisussaallusi.

Naammagittaalliortarfissatut periarfissaq:

Ineqarneq pillugu Maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq, Inissianik attartortitsisarneq pillugu Inatsisartut peqqussutaanni nr. 2-mi, 12. maaji 2005- imeersumi kingusinnerusukkullu allanngortinneqartumi, § 86, imm. 7 naapertorlugu.

Ineqarneq pillugu Maalaaruteqartarfiup aaliangernera eqqartuussisunut suliassanngortinneqartarnissaanut kissaateqaruit, attartortitsisumut sassaqqusissut, tassa Namminersorlutik Oqartussannut imaluunniit kommunimut, Kalaallit Nunaanni Eqqartuussivimmut tunniunneqassapput.

Inussiarnersumik inuulluaqqusillunga

Naja Joelsen Siulittaasoq

Assilineqarnera uunga: Inissiaatileqatigiiffik XX.

Attartornermut isumaqatigiissut nr.xxxx-xxxx-xxxx innersuussutigineqarpoq

Inissianik attartortitsisarneq pillugu Inatsisartut peqqussutaat nr. 2, 12. maj 2005- imeersoq

•   59. Namminersornerullutik Oqartussat kommunelluunniit inissiaataanni attartortittakkani attartortut nammineq kissaatigalugu nuunnissamut allattuiffimmut allatsissinnaapput.

Imm. 2. Attartortut iniminnik paarlaateqatigiinnissartik namminneerlutik isumaqatigiissutigisimappassuk, tamanna nuunnissamik kissaateqartut allattorsimaffiannut allatsinngikkaluarluni pisinnaavoq.

Imm. 3. Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.

Imm. 4. Attartortut inigisaminnik paarlaateqatigiissinnaapput imaaliorlutik:

• Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit
• Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagissinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.

Imm. 5. Imm. 4, nr. 2 naapertorlugu inissianik paarlaateqatigiinnermi attartortitsisup attartortup attartugassamini nutaami nammineerluni nalinginnaasumik iluarsaassinissamik kissaateqarnera itigartissinnaavaa, nalinginnaasumik iluarsaassinermit kingullermiit ukiut tallimat sinnerlugit qaangiussimappata.

Imm. 6. Imm. 4, nr. 2 naapertorlugu nalinginnaasumik iluarsaassinermut atatillugu inissiat paarlaateqatigiinnermi pineqartut nalinginnaasumik iluarsaassinerup nalaani inigineqarnerat pissutigalugu saniatigut aningaasartuuteqartoqassappat, saniatigut aningaasartuutit attartortumit qimatsisussamit akilerneqassapput.

Imm. 7. Atorfeqarnermut atasumik inissianik attartortut attartortitsisoq akuersiteqqaartinnagu inissianik paarlaasseqatigiissinnaanngilat.

Imm. 8. Namminerisamik kissaateqarluni nuussinnaaneq aamma inigisamik paarlaaseqatigiissinnaaneq pillugit Naalakkersuisut maleruagassanik erseqqinnerusunik aalajangersaasinnaapput.

•  77. Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.

Imm. 2. Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.

Imm. 3. Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.

Imm. 4. Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq.

Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.

Imm. 5. Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput.