Spam

Suliffeqarfiit qarasaasiakkut ussassaarutitik taamaallaat naliginnaasumik nassiussinnaatitaapput, soorlu maili aqqutingalugu, SMS-kut imaluunnii inuit oqallittarfii ataasiakkaat aqqutigalugit, illit nammineerlutit ersarissumik tamanna piumasarisimagukku.

Naliginnaassumik suliffeqarfiit internetti aqqutigalugu ilinnut ussassaarutinik nassiusisarnissaat tamaalilluni inerteqqutaavoq, soorlu mailit imaluunniit SMS aqqutigalugit. Taamatuttaaq inuit oqallittarfii ataasiakkaat aqqutigalugit ussassaarineq inertequtaavoq.

Illit aalajangertussaavat suliffeqarfinniit ussassaarutinik piumanerlutit, kisianni tamatumani piumasarineqarpoq, akuersisimanerit tamatumunnga kajumissutsit naapertorlugu pisimanersoq, ersarissumik paasitinneqareerlutit sunalu akueralugu qularnaatsumik nalunaarutigisimanerit.

soorlu assersuutigalugu naammanngilaq:

  • Nittartagaq aqqutigalugu pisisimanersutit, imaluuniit,
  • Internet aqqutigalugu unamminermut ilaasimanersutit, tassanilu ersarivissumik nalunaarutigineqarsimanngippat, peqataanikkut ussassaarutinik aamma pisarnissarnut akuersisimasutit, imaluunniit
  • mailadressit imaluunniit oqarasuaativit normua allamut atatillugu attavigineqarnissat siunertaralugu tunniussimagaluarukkuluunniit,

Internet aqqutigalugu ussassaartinnissamut pisarnissarnut akuersiguit, nammineerlutit tamanna ujartorlugu iliuuseqartariaqarputit, soorlu immikkut krydsiligassaq immersorneratigut akueralugu internet aqqutigalugu ussassaarutinik pisarumallutit, assersuutigalugu mail SMS-iluunniit aqqutigalugit. Ataqatigiinneraniit ersarissumik saqqumissaaq, suna pisarumallugu akuersinersutit,  tassalu imaassaaq:

  • suliffeqarfinniit sorlerniit ussassaarutinik piumanerlutit,
  • qanoq ilillutik ussassaarutit ilinnut apuunneqassanersut (soorlu mail imaluunniit SMS atorlugit)
  • sumut tunngasunik ussassaarutinik piumanerlutit.

Suliffeqarfiup ussassaartussap nammineq pisussaaffigaa takutissiinnaassallugu, ilinniit akuersissummik tigusaqarsimanini. Qaqagukkulluunniit ilinnut aningaasartuutaanngitsumik akuersisimanerit allanngortissinnaatitaavat.

Maleruagassat taamaallaat ussassaarutinut atuupput

Suliffeqarfiit atuisunut saaffiginnissutaasa amerlanersaat ussassaarutaapput. Ussassaarutit, pisiassamik imaluunniit sullissinissamik nittarsaassinermik siunertallit. Kisianni ussassaarutit aamma suliffeqarfiup piuneranik nittarsaassiinnartulluunniit saaffiginnissutaapput. Ussassaarutit taamaasillutik pisiassamik sullisinissamilluunniit imaqartariaqanngillat.

Suliffeqarfiup nittartakkamigut pisiassamik imaluunniit sullissinissamik tuniniakkaminik, misilitassamik akeqanngitsumik nassippatit, soorlu internet atorlugu atuagaq qupperarlugu atuarneqarsinnaasoq imaluunniit ullut 30-t misiligummik pisartakkamik, tamanna aamma ussassaarutaavoq.

Siusinnerusukkut suliffeqarfimmiit piniarsimaguit, suliffeqarfiup pisisimanerit atuisut ammartagaannut nalileeqqusinnaavaa, taamatullu naliliititsineq ussassaarinertut isigineqarsinnaanngilaq.

Suliffeqarfiuteqanngitsuniik saaffiginnissutit, akornusersuilluni ussassaarinermik inerteqqutinut ilaatinneqanngillat. Tamakku oqartussaniit, ajunngitsuliornermik siunertalimmik ataqatigiiffinniit imaluunniit politikkikkut suliniutilinniilluunniit pisinnaallutik.

Siusinnerusukkut suliffeqarfimmiit pisisimaguit

Siusinnerusukkut suliffeqarfimmiit pisisimaguit, pisiffippit qarasaasiakkut ussassaarutinik nammineq tunisassiaminik, pisiarisimasarnut assigusunik, siumut akuersiseqqaanngikkaluarlutit, nassissinnaatitaavaatit.

Taamatulli pisoqassappat piumasaqaatit makku naammasssineqarsimasussaapput:

  • Suliffeqarfiup sanaavanik pisisimasussaavutit
  • Pisisimanermut atatillugu qarasaasiakkut attaveqaatit nammineerlutit nalunaarutigisimasussaavat, soorlu assersuutigalugu mailikkut attaveqarfissaviata atia (mailadresse)
  • Ersarissumik paatsoorneqarsinnaanngitsumillu nalunaarfigineqartussaavutit, siunissami suliffiup nammineq pisiassaataasa ussasssaarutaanik pisalertussaallutit,
  • Paasitinneqartussaavutit ussassaarummik nassitsinnissarnut itigartitsisinnaallutit. Ussassaarutinik nassitsinnissamut itigartitsineq pisinnaavoq periarfissap siumut krydsileriikkap peerneratigut. Tamannali ersarissumik paatsorneqarsinnaanngitsumillu takutinneqassaaq.
  • Ersarissumik paatsoorneqarsinnaanngitsumillu, mailikkut attavigineqarfissat nalunaarutigineqarnerani, periarfissamik ajornanngitsunnguamik, akeqanngitsumillu taamaatitsisinnaalutit paasitinneqarsimasussaavutit.
  • Suliffeqarfimmiit attavigineqaraangavit, soorlu mailikkut ussassaarummik tigusaqarnerni, periarfissamik ajornanngitsumik, akeqanngitsumillu siumut pisarunnaarsinnaanissarnik ilisimatinneqartartussaavutit. Taamaattumik suliffeqarfiup suleqatimi nioqqutissiai nassiullugit pilerisaarutigisinnaatitaanngila. Tamatuma saniatigut ussassaarutigineqartut pisiarisimasarnut assigusussaapput.

”Pisiassatut pisiarisimasarnut assigusutut” pineqarput najoqqutit suussutsimikkut pisiarisimasarnut assersuunneqarsinnaasut. Suliffeqarfik mailikut aamma/imaluunnit SMS-ikkut najoqqutissanut pisiarnut allaanerusunik imalinnik ussassaarumminik nassitseqqusaanngilaq. Suliffeqarfiup pisiassaataniit immikkoortitikkaniit imaluunniit suliffeqarfiit allat ussasaarutaanik.

Nutaarsiassanik allakkiaq tamatigoortoq naliginnaasumik pisiassatut pisiarisimasamut assigusutut ussassaarinertut isigineqartanngilaq.

Mailit SMS-illu nassiuttarneranut taamaatinneqarnissai

  Internet aqqutigalugu ussassaarutinik pisarnissat kissaatigiunnaarukku taamaatissinnaasussaavat. Ussassaarutinik taamaatitsineq akeqassanngilaq.

Inuinnaat oqallittarfiani ussassaarutit

Kissaatigineqanngitsumik nittarsaassinissamut inerteqqummi aamma suliffeqarfiit inuit isummersorfiini nittarsaassisinnaanerat ilaatinneqarpoq. Tassanili saaffiginninerit tamarmik inerteqqummut ilaatinneqanngillat.

Assersuutigalugu suliffeqarfiup pisiassaatiminut ussassaarutini ilinnut inuit ataasiakkaat allakkatigut tigusisinnaaffiat atorlugu toqqaannartumik nassiuppassuk, kissaatigineqanngitsumik nittarsaassinermut ilaasutut naatsorsuutigineqassaaq. Imatullu isumaqarpoq, suliffeqarfiup inuit ataasiakkaat nassiussanik tigusisinnaaffiat atorlugu ilinnut pilerisaarutinik nassitsivigissagunitsit, akuersissummik peqqaartariaqarput.

Tamanna aamma atuuppoq, suliffeqarfiup nittartakkani nalileqqullugu ilinnut nassiussaqarpat.

Nalunaarutit nutaarsiassatut ilinnut takkuttut, kissaatigineqanngitsumik nittarsaassinermut ilaatinneqanngillat. Tamanna imatut kinguneqarpoq suliffeqarfiup akuersiseqqaanngikkaluarlutit nutaarsiassat taama isikkullit ilinnut nassiussinnaatitaagai. Assersuutigalugu inuinnaat oqallittarfiisa nutaarsiassanut taamaattunut tigusinissaraluarnut mattussisinnaanermik periarfissaqartissuaatsit.

Oqarasuaatikkut tuniniaasartut

Illit nammineerlutit oqarasuaatikkut tuniniaavigineqarnissat ujartorsimanngikkukku, tamanna Kalaallit Nunaanni aallaaviatigut aamma inerteqqutaavoq.

Siusinnerusukkut eqqartorneqareersutuut tassani aamma oqarasuaat atorlugu tuniniaaffigineqassaguit suliffeqarfiup pisussaaffigivaa uppernarsassallugu ilinniit akuersissummik pereersimanissani, soorlu assersuutigalugu internettikkut unammisitsinermut atatillugu. Taamaasiorsinnaanngikkunik aallaaviatigut oqarasuaatikkut saaffiginninnerat inerteqqummut ilaatinneqarpoq.

Suliffeqarfiup piumasaqaatit sanioqqussinnaatitaanngilaa. Assersuutigalugu aaqqissuisartumut oqarasuaatikkut attavigeqqusimaguit isiginnaarutivit aaqqissuunneqarnissaanut neqeroorummik piumaniarlutit, aaqqissuisartup qarasaasiamik tuniniaaffigisinnaanngilaatsit.

Allatut aaqqiiffigineqarsimasut ikittuinnaapput

Oqarasuaatikkut attavigineqarluni tuniniaaqqusaannginnermut inerteqqummiit ilaatinneqanngitsut ikittuinnaapput. Tassani makkuninnga tuniniaanerit pineqanngillat:

  • Aviisinik,  atuagassiat sapaatip-akunnikkaarlutik saqqummersinneqartartut kiisalu atuagassiat allat pisartagaritinneqartut
  • Atuakkat naliginnaasut
  • Sillimmatit
  • Ajutoortoqartillugu annaassiniartussatut, napparsimasoqartillugulu ingerlatinissamut isumaqatigiissutit

Oqarasuaatikkut tuniniaasartumiik pisigavit?

Oqarasuaatikkut tuniniaasumiit pisisimaguit, soorlu aviisimik pisartakkamik, eqqumaffigissavat ullut 14-t iluanni isummat allanngortissinnaatitaagakku pisinerlu tunuartillugu.

Akuersiseqqaarnak oqarasuaatikkut tuniniaasartumiit attavigineqarsimaguit, taannalu pisiffigasimangaluarlugu isummat allanngortikkukku, isumaqatigiissummut pituttorneqarsinnaanngilatit. Pisinermut maalaarnissat kinguartiternagu ingerlatipallassavat. Pisinermiit piffissaq sivitsorpallaarsimappat, isumaqatigiissut allanngortinneqarsinnaajunnaassammat.

Pisiat akilereersimagukku, suliffeqarfik attavingalugu aningaasaatitit utertikkumassuatit. Eqqaamallugu taamatut pisoqassappat soorunami pisiarineqartoq suliffeqarfimmut utertinneqartariaqassammat.

Scroll to Top